ಅಂತರಜಾಲಾಡಿ
ನೀವೊಬ್ಬರು ಸಣ್ಣ ಲೇಖಕರೇ? ನಿಮ್ಮ ಪುಸ್ತಕವನ್ನು ಯಾವ ಪ್ರಕಾಶನದವರೂ ಕೈಗೆತ್ತಿಕೊಳ್ಳುವುದಿಲ್ಲವೇ? ಅಥವಾ ನೀವು ಖ್ಯಾತನಾಮರಾಗಿದ್ದರೂ ನಿಮ್ಮ ಪುಸ್ತಕಕ್ಕೆ ಕಡಿಮೆ ಪ್ರಮಾಣದ ಕೊಳ್ಳುಗರಿದ್ದಾರೆಯೇ? ಸಾಮಾನ್ಯವಾಗಿ ಯಾವುದೇ ಮುದ್ರಕರೂ ಪುಸ್ತಕ ಮುದ್ರಿಸಬೇಕಾದರೆ ಕನಿಷ್ಠ ಇಂತಿಷ್ಟು ಪ್ರತಿ ಮುದ್ರಿಸಲೇಬೇಕು ಎಂಬ ಷರತ್ತು ವಿಧಿಸುತ್ತಾರೆ. ಇದೇ ಷರತ್ತನ್ನು ಪ್ರಕಾಶಕರು ಹಾಕುತ್ತಾರೆ. ಹಾಗಾದರೆ ಕಡಿಮೆ ಸಂಖ್ಯೆಯ ಪುಸ್ತಗಳನ್ನು ಪ್ರಕಟಿಸಬೇಕಾದರೆ ಏನು ಮಾಡಬೇಕು? ಇನ್ನೂ ಒಂದು ರೀತಿಯ ಸಮಸ್ಯೆ ಇದೆ. ಪ್ರಕಾಶಕರು ಸತ್ಯವನ್ನೇ ಹೇಳುತ್ತಾರೆ ಎಂಬ ಖಾತ್ರಿ ಏನು? ಕೇವಲ ಒಂದು ಸಾವಿರ ಪ್ರತಿ ಮುದ್ರಿಸಿದ್ದೇವೆ ಎಂದು ಸುಳ್ಳು ಹೇಳಿ ಹತ್ತು ಸಾವಿರ ಪ್ರತಿ ಮುದ್ರಿಸಿ ಮಾರಾಟ ಮಾಡಿಲ್ಲ ಎಂದು ಏನು ಖಾತ್ರಿ? ಈ ಎಲ್ಲ ಸಮಸ್ಯೆಗಳಿಗೆ ಪರಿಹಾರ ಅಂತರಜಾಲ ಮೂಲಕ ಸ್ವ-ಪ್ರಕಾಶನ. pothi.com ಎಂಬ ಜಾಲತಾಣವಿದೆ. ಇಲ್ಲಿ ನೀವು ನಿಮ್ಮ ಪುಸ್ತಕದ ಪ್ರತಿಯನ್ನು ಗಣಕದಲ್ಲಿ ತಯಾರಿಸಿ ಸೇರಿಸಿಡಬಹುದು. ಪುಸ್ತಕ ಬೇಕಾದವರು ಅದಕ್ಕೆ ನಿಗದಿಪಡಿಸಿದ ಹಣ ತೆತ್ತು ಬೇಡಿಕೆ ಸಲ್ಲಿಸಿದಾಗ ಜಾಲತಾಣದವರು ಅದನ್ನು ಮುದ್ರಿಸಿ ಕಳುಹಿಸುತ್ತಾರೆ. ಲೇಖಕರಿಗೆ ಹಣವೂ ತಲುಪುತ್ತದೆ. ಸಾವಿರಾರು ಪ್ರತಿ ಮುದ್ರಿಸಲೇಬೇಕೆಂಬ ಷರತ್ತಿಲ್ಲ. ಒಂದೇ ಒಂದು ಪ್ರತಿ ಬೇಕಿದ್ದರೂ ಮುದ್ರಿಸಿ ಕಳುಹಿಸುತ್ತಾರೆ.
ಡೌನ್ಲೋಡ್
ಅಂತರಜಾಲದಿಂದ ಡೌನ್ಲೋಡ್ ಮಾಡಬಲ್ಲ ತಂತ್ರಾಂಶಗಳಲ್ಲಿ ಹಲವು ವಿಧ ಇವೆ. ಸಂಪೂರ್ಣ ಉಚಿತ ಕೆಲವು. ಸ್ವಲ್ಪ ಕಾಲ ಪ್ರಯೋಗಾತ್ಮಕವಾಗಿ ಬಳಸಬಲ್ಲವು ಕೆಲವು. ಸಂಪೂರ್ಣ ಹಣ ನೀಡಿ ಕೊಳ್ಳಬೇಕಾದವು ಬಹಳಷ್ಟು. ಸಂಪೂರ್ಣ ಹಣ ಕೊಟ್ಟು ಕೊಳ್ಳಬೇಕಾದ ತಂತ್ರಾಂಶವನ್ನು ಒಂದು ದಿನ ಉಚಿತವಾಗಿ ನೀಡುವ ಜಾಲತಾಣ www.giveawayoftheday.com. ಈ ಜಾಲತಾಣದಲ್ಲಿ ಹೆಸರೇ ಸೂಚಿಸುವಂತೆ ಒಂದು ಬೆಲೆಬಾಳುವ ತಂತ್ರಾಂಶವನ್ನು ಪ್ರತಿ ದಿನ ಉಚಿತವಾಗಿ ನೀಡುತ್ತಾರೆ. ಅದನ್ನು ಆ ದಿನ ಡೌನ್ಲೋಡ್ ಮಾಡಿಕೊಂಡರೆ ಸಾಲದು. ಅದನ್ನು ಅಂದೇ ಇನ್ಸ್ಟಾಲ್ ಮಾಡಿಕೊಳ್ಳಬೇಕು.
e - ಸುದ್ದಿ
ಬ್ಲಾಗರುಗಳು ಪತ್ರಿಕೋದ್ಯಮಿ ಅಲ್ಲ ಎಂಬ ತೀರ್ಮಾನಕ್ಕೆ ಅಮೆರಿಕದ ಕಾಂಗ್ರೆಸ್ ಬಂದಿದೆ. ಇದರಿಂದಾಗಿ ಬ್ಲಾಗರುಳು ತಾವು ಏನನ್ನೇ ಬರೆದರೂ ಅದಕ್ಕೆ ತಾವೇ ಜವಾಬುದಾರರಾಗುತ್ತಾರೆ. ಮಾತ್ರವಲ್ಲ, ತಮ್ಮ ಮಾಹಿತಿಯ ಮೂಲವನ್ನು ಅಧಿಕಾರಿಗಳು ಕೇಳಿದಾಗ ನೀಡಬೇಕಾಗುತ್ತದೆ. ರಾಜಕಾರಣಿ ಅಥವಾ ಉದ್ಯಮದವರುಗಳ ಅವ್ಯವಹಾರಗಳನ್ನು ಹೊರಹಾಕುವ ಬ್ಲಾಗರುಗಳು ಇನ್ನು ಮುಂದೆ ನಾವು ಪತ್ರಿಕೋದ್ಯಮಿಗಳು ಎಂದು ಹೇಳಿ ತಪ್ಪಿಸಿಕೊಳ್ಳುವಂತಿಲ್ಲ.
e- ಪದ
ವೈ-ಮಾಕ್ಸ್ (WiMAX) - ನಿಸ್ತಂತು (ವಯರ್ಲೆಸ್) ತಂತ್ರಜ್ಞಾನ ಮೂಲಕ ತಂತಿ ಇಲ್ಲದೆ ಒಂದಕ್ಕೊಂದು ಸಂಪರ್ಕ ಸಾಧಿಸುವ ಇನ್ನೊಂದು ವಿಧಾನ. ಈ ವಿಧಾನದ ಮೂಲಕ ಗಣಕದಿಂದ ಗಣಕಕ್ಕೆ ಮತ್ತು ಅಂತರಜಾಲಕ್ಕೆ ಸಂಪರ್ಕ ಸಾಧಿಸಬಹುದು. ಇದನ್ನು ವಯರ್ಲೆಸ್ ಬ್ರಾಡ್ಬಾಂಡ್ ಎಂದೂ ಕರೆಯುತ್ತಾರೆ. ಇದು ವೈ-ಫೈಗಿಂತ ತುಂಬ ಹೆಚ್ಚಿನ ಮಾಹಿತಿ ಸಾಗಾಣಿಕೆಯ ಸಾಮರ್ಥ್ಯ ಹೊಂದಿದೆ.
e - ಸಲಹೆ
ಮೈಕ್ರೋಸಾಫ್ಟ್ ವರ್ಡ್ ೨೦೦೩ ಬಳಸಿ ಕನ್ನಡದ ಕಡತ ತಯಾರಿ ಮಾಡುವಾಗ ಕೆಲವೊಮ್ಮೆ ಫಾಂಟ್ ಆಯ್ಕೆಯ ಸಮಸ್ಯೆ ಬಾಧಿಸುತ್ತದೆ. ಫಾಂಟನ್ನು ಆಯ್ಕೆ ಮಾಡಲು ಹೋದಾಗ ಕನ್ನಡದ ಫಾಂಟ್ಗಳ ಹೆಸರು ಕನ್ನಡ ಲಿಪಿಯಲ್ಲಿ ವಿಚಿತ್ರವಾಗಿ ಅಸಂಬದ್ಧವಾಗಿ ಕಾಣಿಸುತ್ತವೆ. ಇದರಿಂದಾಗಿ ನಮಗೆ ಬೇಕಾದ ಫಾಂಟನ್ನು ಆಯ್ಕೆ ಮಾಡಲು ಕಷ್ಟವಾಗುತ್ತದೆ. ಇದಕ್ಕೊಂದು ಪರಿಹಾರವಿದೆ. Tools ಮೆನುವಿನಲ್ಲಿ Customize ಎಂದು ಆಯ್ಕೆ ಮಾಡಿ ನಂತರ List font names in their font ಎಂಬ ಆಯ್ಕೆಯನ್ನು ತೆಗೆದು ಹಾಕಿ. ಈಗ ಎಲ್ಲ ಫಾಂಟುಗಳ ಹೆಸರುಗಳೂ ಇಂಗ್ಲಿಶ್ ಲಿಪಿಯಲ್ಲೇ ಕಾಣಿಸುತ್ತವೆ. ದುರದೃಷ್ಟಕ್ಕೆ ಈ ಸವಲತ್ತು ವರ್ಡ್ ೨೦೦೭ರಲ್ಲಿ ಇಲ್ಲ. ಬರಬರುತ್ತಾ ರಾಯನ ಕುದುರೆ ಕತ್ತೆಯಾಯಿತು ಎನ್ನೋಣವೇ?
ಕಂಪ್ಯೂತರ್ಲೆ
ಬ್ಲಾಗಾಯಣ ಸೂತ್ರಗಳು-
ನಿಮ್ಮ ಬ್ಲಾಗನ್ನು ನಿಮ್ಮ ಸ್ನೇಹಿತರು ಮತ್ತು ಕುಟುಂಬದವರು ಹೊರತಾಗಿ ಇನ್ನೂ ಹಲವಾರು ಮಂದಿ ಓದುತ್ತಾರೆ ಎನ್ನುವುದು ಕೇವಲ ನಂಬಿಕೆ.
ಬ್ಲಾಗಿಂಗ್ ಮೂಲಕ ಸಮಾಜವನ್ನು ಬದಲಿಸುತ್ತೇನೆ ಎಂಬ ನಿಮ್ಮ ನಂಬಿಕೆ ವಾಸ್ತವದಿಂದ ಬಹಳ ದೂರ ಇದೆ.
ಬ್ಲಾಗಿಂಗ್ ಮಾಡುವ ಮೂಲಕ ತರಕಾರಿಯ ಬೆಲೆ ಕೆಳಗಿಳಿಸಲು ಸಾಧ್ಯವಿಲ್ಲ.
ಖಡ್ಗಕ್ಕಿಂತ ಬ್ಲಾಗಿಂಗ್ ಹರಿತ ಎಂಬ ಗಾದೆ ಇನ್ನೂ ಬಳಕೆಗೆ ಬಂದಿಲ್ಲ.