ಬುಧವಾರ, ಡಿಸೆಂಬರ್ 29, 2010

ಗಣಕಿಂಡಿ - ೦೮೪ (ಡಿಸೆಂಬರ್ ೨೭, ೨೦೧೦)

ಅಂತರಜಾಲಾಡಿ

ಸಂಸ್ಕೃತ ಪುಸ್ತಕಮೇಳ

ಪ್ರಪಂಚದ ಅತಿ ಹಳೆಯ ಶುದ್ಧ ವೈಜ್ಞಾನಿಕ ಭಾಷೆ ಸಂಸ್ಕೃತ. ಇಂದಿಗೂ ಈ ಭಾಷೆಯನ್ನು ತಮ್ಮ ಮಾತೃಭಾಷೆ ಎಂದು ಜನಗಣತಿಯಲ್ಲಿ ನೋಂದಾಯಿಸುವವರು ಇಂದಿಗೂ ಇದ್ದಾರೆ. ಇಂದು ಗಣಕ ಪರಿಭಾಷೆಯಲ್ಲಿ ಬಳಕೆಯಲ್ಲಿರುವ ಸಹಜ ಭಾಷಾ ಸಂಸ್ಕರಣೆಗೆ (natural language processing) ಮೂಲಮಂತ್ರಗಳನ್ನು ನೀಡಿದ್ದು ಸಂಸ್ಕೃತ ಭಾಷೆಯಲ್ಲಿ ಪಾಣಿನಿ. ಭಾರತದ ಸಂವಿಧಾನವು ಅಧಿಕೃತವಾಗಿ ಅಂಗೀಕರಿಸಿರುವ ೨೨ ಭಾಷೆಗಳಲ್ಲಿ ಸಂಸ್ಕೃತವೂ ಸೇರಿದೆ. ವಿಶ್ವದ ಪ್ರಪ್ರಥಮ ಸಂಸ್ಕೃತ ಪುಸ್ತಕ ಮೇಳ ೨೦೧೧ರ ಜನವರಿ ೭ರಿಂದ ೧೦ರ ತನಕ ಬೆಂಗಳೂರಿನಲ್ಲಿ ಜರುಗಲಿದೆ. ಈ ಬಗ್ಗೆ ಸಮಸ್ತ ವಿವರ ನೀಡುವ ಜಾಲತಾಣ www.samskritbookfair.org. ಈ ಮೇಳದಲ್ಲಿ ನೀವೂ ಹಲವಾರು ರೀತಿಯಲ್ಲಿ ಭಾಗವಹಿಸಬಹುದು. ವಿವರಗಳು ಜಾಲತಾಣದಲ್ಲಿವೆ.

ಡೌನ್‌ಲೋಡ್

ಔಟ್‌ಲುಕ್‌ನಿಂದ ಜಿಮೈಲ್‌ಗೆ

ಜಿಮೈಲ್ ತುಂಬ ಜನಪ್ರಿಯ ಉಚಿತ ಇಮೈಲ್ ಸೇವೆ. ಹಲವರು ಜಿಮೈಲ್ ಜೊತೆ ಸಿಗುವ ವಿಳಾಸ ಪುಸ್ತಕದ ಸೌಕರ್ಯವನ್ನೂ ಬಳಸುತ್ತಾರೆ. ಇಮೈಲ್‌ಗಳನ್ನು ನಿಮ್ಮ ಗಣಕಕ್ಕೆ ಇಳಿಸಿಕೊಳ್ಳಲು ಮತ್ತು ಇಮೈಲ್ ಕಳುಹಿಸಲು ಬಳಸುವ ಜನಪ್ರಿಯ ತಂತ್ರಾಂಶ ಮೈಕ್ರೋಸಾಫ್ಟ್ ಔಟ್‌ಲುಕ್. ಇದರಲ್ಲೂ ವಿಳಾಸ ಪುಸ್ತಕದ ಸೌಕರ್ಯವಿದೆ. ಈ ಸೌಕರ್ಯದ ವೈಶಿಷ್ಟ್ಯವೇನೆಂದರೆ ಇದನ್ನು ಬಳಸಲು ಅಂತರಜಾಲಕ್ಕೆ ಸಂಪರ್ಕ ಅಗತ್ಯವಿಲ್ಲ. ಜಿಮೈಲ್‌ನಲ್ಲಿರುವ ಮತ್ತು ಔಟ್‌ಲುಕ್‌ನಲ್ಲಿರುವ ವಿಳಾಸಗಳನ್ನು ಪರಸ್ಪರ ವಿನಿಮಯ ಮಾಡಿಕೊಳ್ಳಲು ಅನುವು ಮಾಡಿಕೊಡುವ ತಂತ್ರಾಂಶ ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ http://bit.ly/e0sNgT.

e - ಸುದ್ದಿ

ಫೇಸ್‌ಬುಕ್‌ನಲ್ಲಿ ಅವಮಾನ -ಪರಾರಿ

ಫಿಲಡೆಲ್ಪಿಯಾ ನಗರದಲ್ಲಿ ಸರಣಿ ಕಲೆ ಮತ್ತು ಲೈಂಗಿಕ ಅತ್ಯಾಚಾರ ಮಾಡಿದ ಆರೋಪಿಯನ್ನು ಪೋಲೀಸರು ಹುಡುಕುತ್ತಿದ್ದರು.  ಅದೇ ಸಮಯದಲ್ಲಿ ಯಾರೋ ಪೋಕರಿಗಳು ಒಬ್ಬಾತನ ಫೋಟೋವನ್ನು ಫೇಸ್‌ಬುಕ್‌ನಲ್ಲಿ ಸೇರಿಸಿ ಸರಣಿ ಕೊಲೆ ಮಾಡಿದವ ಈತನೇ ಎಂದು ಸಂದೇಶ ಹಾಕಿದ್ದರು. ಆತ ನಿಜವಾಗಿ ನಿರಪರಾಧಿ ಆಗಿದ್ದ. ಆದರೆ ಜನರು ಗುಂಪುಕಟ್ಟಿಕೊಂಡು ಆತನ ಮನೆ ಮುಂದೆ ಗದ್ದಲ ಮಾಡತೊಡಗಿದರು. ಆತ ತಾನಾಗಿಯೇ ಡಿ.ಎನ್.ಎ. ಪರೀಕ್ಷೆಗೆ ಒಳಪಡಿಸಿಕೊಂಡು ನಿರಪರಾಧಿ ಎಂದು ಪೋಲೀಸರಿಂದ ಹೇಳಿಕೆ ನೀಡಿಸಿದ ನಂತರವೇ ಆತ ನಿರಾಳವಾಗಿ ಇರಲು ಸಾಧ್ಯವಾದದ್ದು.

e- ಪದ

ರೌಟರ್ (router) - ಗಣಕಜಾಲಗಳಲ್ಲಿ ಬಳಕೆಯಾಗುವ ಸಾಧನ. ಇದು ಕನಿಷ್ಠ ಎರಡು ಜಾಲಗಳಿಗೆ ಸಂಪರ್ಕಗೊಂಡಿರುತ್ತದೆ. ಗಣಕಜಾಲಗಳಲ್ಲಿ ಮಾಹಿತಿಗುಚ್ಛಗಳನ್ನು ಜಾಲದಿಂದ ಜಾಲಕ್ಕೆ ಕಳುಹಿಸಲು ಇದರ ಬಳಕೆ ಆಗುತ್ತದೆ.

e - ಸಲಹೆ

ದಾವಣಗೆರೆ ಪುನೀತ್ ಅವರ ಪ್ರಶ್ನೆ: ಮೈಕ್ರೋಸಾಫ್ಟ್ ಆಫೀಸ್ ೨೦೦೭ನ್ನು ಡೌನ್‌ಲೋಡ್ ಮಾಡಬೇಕು. ಯಾವ ಜಾಲತಾಣದಲ್ಲಿ ಸಿಗುತ್ತದೆ?
ಉ: ಆಫೀಸ್ ತಂತ್ರಾಂಶ ಉಚಿತವಾಗಿ ಸಿಗುವುದಿಲ್ಲ. ಅದನ್ನು ಹಣಕೊಟ್ಟು ಕೊಂಡುಕೊಳ್ಳಬೇಕು. ವಿವಿಧ ಆವೃತ್ತಿಗಳ ಬೆಲೆ ತಿಳಿಯಲು ಹಾಗೂ ಕೊಂಡುಕೊಳ್ಳಲು microsoftstore.co.in ಜಾಲತಾಣಕ್ಕೆ ಭೇಟಿ ನೀಡಿ. ಅಂತರಜಾಲದ ಮೂಲಕ ಉಚಿತವಾಗಿ ಮೈಕ್ರೋಸಾಫ್ಟ್ ಆಫೀಸ್ ಬಳಸಬೇಕಿದ್ದರೆ office.live.com ಜಾಲತಾಣಕ್ಕೆ ಭೇಟಿ ನಿಡಿ.

ಕಂಪ್ಯೂತರ್ಲೆ

ಗಣಕವೇದವಾಕ್ಯ: ನೀವು ಅತಿ ಅವಸರದಲ್ಲಿದ್ದೀರೆಂಬುದನ್ನು ಗಣಕ, ಮುದ್ರಕ, ಇತ್ಯಾದಿ ಸಾಧನಗಳಿಗೆ ಅರಿವು ಮಾಡಬೇಡಿ. ನೀವು ಅತಿ ಅವಸರದಲ್ಲಿದ್ದಾಗಲೆ ಅವು ಕೈಕೊಡುತ್ತವೆ.

ಬುಧವಾರ, ಡಿಸೆಂಬರ್ 22, 2010

ಗಣಕಿಂಡಿ - ೦೮೩ (ಡಿಸೆಂಬರ್ ೨೦, ೨೦೧೦)

ಅಂತರಜಾಲಾಡಿ

ರಸಾಯನಶಾಸ್ತ್ರ ವರ್ಷ

೨೦೧೧ನೆಯ ಇಸವಿಯನ್ನು ರಸಾಯನಶಾಸ್ತ್ರ ವರ್ಷ ಎಂದು ವಿಶ್ವಸಂಸ್ಥೆ ಘೋಷಿಸಿದೆ. ಮನುಕುಲದ ಒಳಿತಿಗಾಗಿ ರಸಾಯನಶಾಸ್ತ್ರದ ಕೊಡುಗೆಯನ್ನು ಜನರಿಗೆ ತಿಳಿಸಿ ಹೇಳುವುದು ಈ ವರ್ಷಾಚರಣೆಯ ಮೂಲ ಉದ್ದೇಶಗಳಲ್ಲೊಂದು. “ರಸಾಯನಶಾಸ್ತ್ರ - ನಮ್ಮ ಜೀವನ, ನಮ್ಮ ಭವಿಷ್ಯ” ಎಂಬ ಧ್ಯೇಯ ವಾಕ್ಯದೊಂದಿಗೆ ಹಲವಾರು ಕಾರ್ಯಕ್ರಮಗಳನ್ನು ೨೦೧೧ರಲ್ಲಿ ಪ್ರಪಂಚಾದ್ಯಂತ ನಡೆಸಲು ತಯಾರಿ ನಡೆದಿದೆ. ಈ ಕಾರ್ಯಕ್ರಮಗಳು ಏನೇನು, ಎಲ್ಲೆಲ್ಲಿ ಇವು ನಡೆಯುತ್ತಿವೆ, ಇತ್ಯಾದಿ ಮಾಹಿತಿಗಳಿಗೆ www.chemistry2011.org ಜಾಲತಾಣಕ್ಕೆ ಭೇಟಿ ನೀಡಿ. ನಿಮ್ಮೂರಿನಲ್ಲಿ ಈ ವರ್ಷಾಚರಣೆಯಲ್ಲಿ ನೀವು ಪಾಲ್ಗೊಳ್ಳಬೇಕೇ? ಅಥವಾ ಕಾರ್ಯಕ್ರಮದ ರೂವಾರಿ ನೀವಾಗಲು ಉತ್ಸುಕರಾಗಿದ್ದೀರಾ? ಹಾಗಿದ್ದರೆ ಇದೇ ಜಾಲತಾಣದಲ್ಲಿ ನಿಮ್ಮ ಹೆಸರನ್ನು ನೋಂದಾಯಿಸಿ.

ಡೌನ್‌ಲೋಡ್

ಫೋಟೋಗಳಿಂದ ಸಿನಿಮಾಕ್ಕೆ

ನೀವು ಇತ್ತೀಚೆಗೆ ಯಾವುದಾದರು ಪ್ರೇಕ್ಷಣೀಯ ಸ್ಥಳಕ್ಕೆ ಹೋಗಿರುತ್ತೀರಿ. ಆಗ ತೆಗೆದ ಫೋಟೋಗಳನ್ನು ಒಂದಾದ ನಂತರ ಒಂದರಂತೆ ಗಣಕದ ಪರದೆಯಲ್ಲಿ ಮೂಡಿಸಿ ತೋರಿಸುತ್ತೀರಿ ತಾನೆ? ಅದರ ಬದಲಿಗೆ ಆ ಎಲ್ಲ ಫೋಟೋಗಳನ್ನು ಒಂದಾದ ನಂತರ ಒಂದು ಚಲನಚಿತ್ರದ ಮಾದರಿಯಲ್ಲಿ ಮೂಡಿಬರುವಂತೆ ಮಾಡಿದರೆ ಹೇಗೆ? ಅಷ್ಟು ಮಾತ್ರವಲ್ಲ ಅದನ್ನು ಸಿ.ಡಿ. ಅಥವಾ ಡಿ.ವಿ.ಡಿ.ಗೆ ವರ್ಗಾಯಿಸಿ ನಿಮ್ಮ ಡಿ.ವಿ.ಡಿ ಪ್ಲೇಯರ್‌ನಲ್ಲಿ ಪ್ಲೇ ಮಾಡಿ ಮನೆಯಲ್ಲಿರುವ ಟಿ.ವಿ. ಪರದೆಯಲ್ಲಿ ಮೂಡಿಸಿದರೆ ಇನ್ನೂ ಚೆನ್ನ ತಾನೆ? ಹೀಗೆ ಫೋಟೋಗಳಿಂದ ಚಲನಚಿತ್ರ ತಯಾರಿಸುವ ಒಂದು ಉಚಿತ ತಂತ್ರಾಂಶ Foto2Avi. ಇದು ದೊರೆಯುವ ಜಾಲತಾಣದ ವಿಳಾಸ bit.ly/hVFeyK.

e - ಸುದ್ದಿ


ಗೂಗ್ಲ್ ತೆರಿಗೆ

ಗೂಗ್ಲ್ ಬಳಸಿ ಯಾವುದಾದರೊಂದು ಮಾಹಿತಿಯನ್ನು ಹುಡುಕುವಾಗ ಪಕ್ಕದಲ್ಲಿ ಜಾಹೀರಾತುಗಳು ಬರುವುದನ್ನು ಗಮನಿಸಿದ್ದೀರಿ ತಾನೆ? ಈ ರೀತಿ ಜಾಹೀರಾತು ಹಾಕಲು ಗೂಗ್ಲ್‌ಗೆ ಹಣ ಕೊಡಬೇಕು. ಈ ಜಾಹೀರಾತುಗಳು ಗೂಗ್ಲ್‌ನಲ್ಲಿ ಮಾತ್ರವಲ್ಲ. ಬಹುತೇಕ ಎಲ್ಲ ಜಾಲತಾಣಗಳಲ್ಲೂ ಕಾಣಸಿಗುತ್ತವೆ. ಈ ರೀತಿ ಜಾಲತಾಣಗಳಲ್ಲಿ ಜಾಹೀರಾತು ನೀಡಲು ಇನ್ನು ಮುಂದೆ ಫ್ರಾನ್ಸ್ ದೇಶದಲ್ಲಿ ಶೇಕಡ ೧ ತೆರಿಗೆ ನೀಡಬೇಕಾಗುತ್ತದೆ. ಈ ತೆರಿಗೆ ಜನವರಿ ೨೦೧೧ರಿಂದ ಜಾರಿಗೆ ಬರಲಿದೆ. ಈ ತೆರಿಗೆಗೆ ಗೂಗ್ಲ್ ತೆರಿಗೆ ಎಂದು ಜನ ನಾಮಕರಣ ಮಾಡಿದ್ದಾರೆ. ಅಂದ ಹಾಗೆ ಈ ರೀತಿ ತೆರಿಗೆ ಹಾಕಬಹುದು ಎಂಬುದನ್ನು ನಮ್ಮ ಸರಕಾರಕ್ಕೆ ಯಾರೂ ತಿಳಿಸಬೇಡಿ!

e- ಪದ
ಸ್ವಪ್ರತಿಷ್ಠೆಯ ಹಡುಕಾಟ (Egosurfing) -ಇದು ಸಾಮಾನ್ಯವಾಗಿ ಗೂಗ್ಲ್ ಅಥವಾ ಬೇರೆ ಯಾವುದಾದರು ಜಾಲಶೋಧಕವನ್ನು ಬಳಸಿ ಅಂತರಜಾಲದಲ್ಲಿ ತನ್ನ ಬಗ್ಗೆ ಏನೇನು ದಾಖಲಾಗಿದೆ ಎಂಬುದನ್ನು ಹುಡುಕುವುದನ್ನು ಸೂಚಿಸಲು ಬಳಕೆಯಾಗುತ್ತಿದೆ. ಹೀಗೆ ಮಾಡುವುದರಿಂದ ತಮ್ಮ ಬಗ್ಗೆ ಬೇರೆ ಯಾರಾದರು ಎಲ್ಲಿಲ್ಲಿ ಏನೇನು ಮಾಹಿತಿ ಹಾಕಿದ್ದಾರೆ, ಏನೇನು ಹೊಗಳಿದ್ದಾರೆ ಅಥವಾ ತೆಗಳಿದ್ದಾರೆ ಎಲ್ಲ ತಿಳಿಯಬಹುದು.

e - ಸಲಹೆ

ಅಶ್ವಿನ್ ಅವರ ಪ್ರಶ್ನೆ: ೮, ೯ ಮತ್ತು ಹತ್ತನೆಯ ತರಗತಿಯ ವಿಜ್ಞಾನ ಮತ್ತು ಗಣಿತ ವಿಷಯಗಳ ಬಗ್ಗೆ ವೀಡಿಯೋ ಪಾಠಗಳು ಎಲ್ಲಿ ಸಿಗುತ್ತವೆ?
ಉ: ಇದೇ ಅಂಕಣದಲ್ಲಿ ಹಿಂದೊಮ್ಮೆ ಸೂಚಿಸಿದ್ದ www.khanacademy.org ಜಾಲತಾಣ ನೋಡಿ. ಹಾಗೆಯೇ www.howstuffworks.com ಜಾಲತಾಣವನ್ನೂ ನೋಡಿ.

ಕಂಪ್ಯೂತರ್ಲೆ

ಹುಡುಗ: ನೀನು ನನ್ನನ್ನು ಪ್ರೀತಿಸುತ್ತಿದ್ದೀಯಾ?
ಹುಡುಗಿ: ಹೌದು
[ಹುಡುಗ ಓಡಲು ಪ್ರಾರಂಭಿಸುತ್ತಾನೆ]
ಹುಡುಗಿ: ಎಲ್ಲಿಗೆ ಓಡುತ್ತಿದ್ದೀಯಾ?
ಹುಡುಗ: ಫೇಸ್‌ಬುಕ್‌ನಲ್ಲಿ relationship status ಬದಲಿಸಲು ಹೋಗುತ್ತಿದ್ದೇನೆ.

ಸೋಮವಾರ, ಡಿಸೆಂಬರ್ 13, 2010

ಗಣಕಿಂಡಿ - ೦೮೨ (ಡಿಸೆಂಬರ್ ೧೩, ೨೦೧೦)

ಅಂತರಜಾಲಾಡಿ

ಭ್ರಷ್ಟಾಚಾರ ನಿರ್ಮೂಲನೆ

೨೦೧೦ನೆಯ ಇಸವಿಯನ್ನು ಹಗರಣಗಳ ವರ್ಷ ಎಂದೇ ಕರೆಯಬಹುದು. ಪ್ರತಿ ದಿನ ಒಂದಲ್ಲ ಒಂದು ಭ್ರಷ್ಟಾಚಾರದ ವರದಿ ಪತ್ರಿಕೆಗಳ ಮುಖಪುಟದಲ್ಲಿ ರಾರಾಜಿಸಿದೆ. ಜನರಿಗಂತೂ ಈ ಭ್ರಷ್ಟಾಚಾರಗಳನ್ನು ನೋಡಿ ನೋಡಿ ರೋಸಿ ಹೋಗಿದೆ. ಇದಕ್ಕೆ ಕೊನೆಯೇ ಇಲ್ಲವೇ? ರಾಜಕಾರಣಿ ಮತ್ತು ಸರಕಾರಿ ಅಧಿಕಾರಿಗಳಿಂದ ಏನನ್ನೂ ನಿರೀಕ್ಷಿಸುವಂತಿಲ್ಲ. ಜನರೇ ಮುಂದೆ ಬಂದು ಇದಕ್ಕೆಲ್ಲ ಕೊನೆ ಹಾಕಿಸಬೇಕಾಗಿದೆ. ಅದಕ್ಕಾಗಿಯೇ ಒಂದು ಚಳವಳಿ ನಡೆಯಬೇಕಾಗಿದೆ. ಹಾಗೆಂದು ನೀವು ಭಾವಿಸುತ್ತಿದ್ದೀರಾ? ಹಾಗಿದ್ದರೆ ನಾವೆಲ್ಲ ಏನು ಮಾಡಬಹದು? ಏನು ಮಾಡಬೇಕು? ಎಲ್ಲರೂ ಒಂದುಗೂಡುವುದು ಹೇಗೆ? ಇಂತಹ ಒಂದು ಚಳವಳಿಗೆಂದೇ ಒಂದು ಜಾಲತಾಣ ಸಿದ್ಧವಾಗಿದೆ. ಅದರ ವಿಳಾಸ -killcorruption.org. ಇನ್ನು ತಡವೇಕೆ? ಅಲ್ಲಿಗೆ ಭೇಟಿ ನೀಡಿ ಮುಂದಿನ ಕಾರ್ಯಕ್ರಮಗಳಿಗೆ ನಿಮ್ಮ ಕೈಜೋಡಿಸಿ.

ಡೌನ್‌ಲೋಡ್


ಗುಪ್ತ ಟೊರೆಂಟ್

ಅಂತರಜಾಲದಲ್ಲಿ ತಂತ್ರಾಂಶ, ಸಂಗೀತ, ಚಲನಚಿತ್ರ, ಅಥವಾ ಇನ್ಯಾವುದೇ ಫೈಲುಗಳನ್ನು ಪ್ರಪಂಚಾದ್ಯಂತ ವಿವಿಧ ವ್ಯಕ್ತಿಗಳು ತಮ್ಮ ಗಣಕಗಳಲ್ಲಿ ಸಂಗ್ರಹಿಸಿಟ್ಟು ಆಸಕ್ತರಿಗೆ ಡೌನ್‌ಲೋಡ್ ಮಾಡಲು ಅವಕಾಶ ಮಾಡಿಕೊಟ್ಟಿರುತ್ತಾರೆ. ಈ ರೀತಿಯ ಸೌಲಭ್ಯಕ್ಕೆ P2P ಅಂದರೆ ಪರ್ಸನ್-ಟು-ಪರ್ಸನ್ ಅರ್ಥಾತ್ ವ್ಯಕ್ತಿಯಿಂದ ವ್ಯಕ್ತಿಗೆ ಎಂದು ಕರೆಯುತ್ತಾರೆ. ಇದಕ್ಕಾಗಿ ಬಳಸುವುದು ಟೊರೆಂಟ್ ವಿಧಾನವನ್ನು. ಈ ರೀತಿಯಲ್ಲಿ ಡೌನ್‌ಲೋಡ್ ಮಾಡಲು ಹಲವು ತಂತ್ರಾಂಶಗಳಿವೆ. ಅಂತಹ ಒಂದು ತಂತ್ರಾಂಶ OneSwarm. ಇದರ ವೈಶಿಷ್ಟ್ಯವೇನೆಂದರೆ ಇದು ನಿಮ್ಮ ಪರಿಚಯವನ್ನು ಅಂದರೆ ನಿಮ್ಮ ಐಪಿ ವಿಳಾಸ ಇತ್ಯಾದಿಗಳನ್ನು ಗುಪ್ತವಾಗಿಡುತ್ತದೆ. ಈ ತಂತ್ರಾಂಶ ದೊರೆಯುವ ಜಾಲತಾಣ bit.ly/e7WKjo.

e - ಸುದ್ದಿ

ಸ್ಟೀವ್ ಜಾವ್ಸ್‌ಗೆ ಸಾಲ ವಾಪಾಸು ಬಂದಿಲ್ಲ

ಅಮೆರಿಕದಲ್ಲಿ ಪ್ರತಿ ಕಂಪೆನಿಯೂ ತಾನು ಇತರರಿಗೆ ಕೊಡಬೇಕಾದ ಮತ್ತು ಇತರರಿಂದ ತನಗೆ ಬರಬೇಕಾದ ಹಣ ಮತ್ತು ಆಸ್ತಿಗಳ ಬಗ್ಗೆ ಪ್ರತಿ ವರ್ಷ ಸರಕಾರಕ್ಕೆ ವರದಿ ನಿಡಬೇಕು. ಈ ರೀತಿ ಆಪಲ್ ಕಂಪೆನಿ ಈ ವರ್ಷ ನೀಡಿದ ವರದಿಯಲ್ಲಿ ತಾನು ಒಬ್ಬ ವ್ಯಕ್ತಿಗೆ 37.91 ಡಾಲರು ವಾಪಾಸು ನೀಡಬೇಕಾಗಿದೆ. ಅವರು ಅದನ್ನು ಇನ್ನೂ ಪಡೆದುಕೊಂಡಿಲ್ಲ ಎಂದು ಮಾಹಿತಿ ನೀಡಿದೆ. ಯಾಕೆ ಅವರು ಇನ್ನೂ ಪಡೆದುಕೊಂಡಿಲ್ಲ? ಅವರು ಯಾರು ಎಂಬ ಮಾಹಿತಿ, ಅವರ ವಿಳಾಸ ಸಿಕ್ಕಿಲ್ಲವೇ ಎಂಬ ಅನುಮಾನ ಬರುತ್ತಿದೆಯೇ? ಆ ವ್ಯಕ್ತಿ ಮತ್ತಿನ್ಯಾರೂ ಅಲ್ಲ. ಆಪಲ್ ಕಂಪೆನಿಯ ಮುಖ್ಯಸ್ಥ ಸ್ಟೀವ್ ಜೋವ್ಸ್ ಅವರೇ!

e- ಪದ

ಡಿಡಿಓಎಸ್ (DDoS =Distributed Denial of Service) -ಏಕಕಾಲದಲ್ಲಿ ಪ್ರಪಂಚದ ಹಲವು ಕಡೆಗಳಿಂದ ಒಂದೇ ಜಾಲತಾಣಕ್ಕೆ ಧಾಳಿ ಮಾಡಿ ಅದು ಯಾರಿಗೂ ದೊರಕದಂತೆ ಮಾಡುವುದು. ಎಲ್ಲ ಸರ್ವರ್‌ಗಳಿಗೂ ಏಕಕಾಲಕ್ಕೆ ಇಂತಿಷ್ಟೇ ಬೇಡಿಕೆಗಳನ್ನು ಪೂರೈಸುವ ಶಕ್ತಿ ಇರುತ್ತದೆ. ಅದಕ್ಕಿಂತ ಹೆಚ್ಚಿನ ಸಂಖ್ಯೆಯಲ್ಲಿ ಬೇಡಿಕೆಗಳು ಬಂದರೆ ಅದು ಉತ್ತರಿಸುವುದಿಲ್ಲ. ಎಸ್‌ಎಸ್‌ಎಲ್‌ಸಿ ಪರೀಕ್ಷೆಯ ಫಲಿತಾಂಶವನ್ನು ಜಾಲತಾಣದಲ್ಲಿ ಘೋಷಿಸಿದಾಗ ಪ್ರಾರಂಭದಲ್ಲಿ ಒಂದೆರಡು ಗಂಟೆಗಳ ಕಾಲ ಅದನ್ನು ವೀಕ್ಷಿಸಲು ಅಸಾಧ್ಯವಾಗುವುದು ಇದೇ ಕಾರಣಕ್ಕೆ. ಡಿಡಿಓಎಸ್ ಧಾಳಿಯಲ್ಲಿ ಹ್ಯಾಕರ್‌ಗಳು ಜಗತ್ತಿನ ಲಕ್ಷಗಟ್ಟಳೆ ಗಣಕಗಳನ್ನು ವಶಕ್ಕೆ ತೆಗದುಕೊಂಡು ಅವುಗಳ ಮೂಲಕ ಒಂದು ಜಾಲತಾಣಕ್ಕೆ ಧಾಳಿ ಇಟ್ಟು ಅದನ್ನು ನಿಷ್ಕ್ರಿಯಗೊಳಿಸುತ್ತಾರೆ. ಇತ್ತೀಚೆಗೆ ತುಂಬ ಸುದ್ದಿ ಮಾಡಿದ ವಿಕಿಲೀಕ್ಸ್‌ಗೆ ಹಣ ಸಂದಾಯ ಮಾಡುವುದನ್ನು ನಿಲ್ಲಿಸಿದ ವೀಸಾ, ಮಾಸ್ಟರ್‌ಕಾರ್ಡ್ ಮತ್ತು ಪೇಪಾಲ್ ಜಾಲತಾಣಗಳಿಗೆ ಅನೋನಿಮ್ ಹೆಸರಿನಲ್ಲಿ ಧಾಳಿ ಮಾಡಿ ಅವುಗಳನ್ನು ಕೆಲವು ಗಂಟೆಗಳ ಕಾಲ ನಿಷ್ಕ್ರಿಯ ಮಾಡಿದ್ದರು.

e - ಸಲಹೆ

ಬೆಂಗಳೂರಿನ ಮಧುಸೂದನರ ಪಶ್ನ್ರೆ: ನಾನು ASP.NET ವಿದ್ಯಾರ್ಥಿ. ನನಗೆ ಅದರ ಬಗ್ಗೆ ಜಾಸ್ತಿ ತಿಳಿದುಕೊಳ್ಳಬೇಕು. ಯಾವ ಜಾಲತಾಣದಲ್ಲಿ ಈ ಬಗ್ಗೆ ಮಾಹಿತಿ ಸಿಗುತ್ತದೆ?
ಉ: ಮೈಕ್ರೋಸಾಫ್ಟ್‌ನವರದೇ ಆದ msdn.microsoft.com ಮತ್ತು www.asp.net ಜಾಲತಾಣಗಳನ್ನು ನೋಡಿ. 

ಕಂಪ್ಯೂತರ್ಲೆ

ಭಯೋತ್ಪಾದಕರು ಹೈಟೆಕ್ ಆಗುತ್ತಿರುವುದು ಗೊತ್ತೇ ಇದೆ. ಇತ್ತೀಚೆಗೆ ಅವರು ಹೊಸ ನಮೂನೆಯ ಬಾಂಬ್ ತಯಾರಿಸಿದ್ದಾರೆ. ಒಂದು ಜಾಗದಲ್ಲಿ ಬಾಂಬ್ ಸ್ಫೋಟ ಆದ ತಕ್ಷಣ ಇದನ್ನು ನಾವೇ ಮಾಡಿದ್ದು ಎಂದು ಆ ಬಾಂಬ್ ಭಯೋತ್ಪಾದಕರ ಫೇಸ್ಬುಕ್ ಜಾಲತಾಣ ಮತ್ತು ಟ್ವಿಟ್ಟರ್ ಖಾತೆಗಳಲ್ಲಿ ಅದು ದಾಖಲಿಸುತ್ತದೆ.

ಸೋಮವಾರ, ಡಿಸೆಂಬರ್ 6, 2010

ಗಣಕಿಂಡಿ - ೦೮೧ (ಡಿಸೆಂಬರ್ ೦೬, ೨೦೧೦)

ಅಂತರಜಾಲಾಡಿ

ಮುಕ್ತ ಶಿಕ್ಷಣ ಸಂಪನ್ಮೂಲ

ಶಿಕ್ಷಣ ದಿನ ಕಳೆದಂತೆ ಅತಿ ದುಬಾರಿಯಾಗುತ್ತಿದೆ. ಪುಸ್ತಕಗಳ ಬೆಲೆ ಗಮನಿಸಿದ್ದೀರಾ? ಸರಕಾರಿ ಪುಸ್ತಕಗಳ ಹೊರತಾಗಿ ಇತರೆ ಖಾಸಗಿ ಪುಸ್ತಕಗಳ ಬೆಲೆ ಗಗನಕ್ಕೇರಿದೆ. ಅದರಲ್ಲೂ ವಿಜ್ಞಾನ ತಂತ್ರಜ್ಞಾನಕ್ಕೆ ಸಂಬಂಧಿಸಿದ ಉತ್ತಮ ಚಿತ್ರಗಳಿಂದ ತುಂಬಿದ ಪುಸ್ತಕಗಳ ಬೆಲೆ ಇನ್ನೂ ಅಧಿಕ. ಶಿಕ್ಷಣ ಜನಸಾಮಾನ್ಯರಿಗೆ ಸುಲಭವಾಗಿ ದೊರಕುವಂತಿರಬೇಕು ಮತ್ತು ಮುಕ್ತವಾಗಿರಬೇಕೆಂದು ಹೇಳುವವರು ನಮ್ಮ ದೇಶದಲ್ಲಿ ಮಾತ್ರವಲ್ಲ ಜಗತ್ತಿನಾದ್ಯಂತ ಇದ್ದಾರೆ. ಇವರೆಲ್ಲ ಸೇರಿಕೊಂಡು ಶಿಕ್ಷಣಕ್ಕೆ ಸಂಬಂಧಿಸಿದ ಎಲ್ಲ ಸಂಪನ್ಮೂಲಗಳನ್ನು ಮುಕ್ತವಾಗಿ ದೊರೆಯುವಂತೆ ಮಾಡಲು ಒಂದು ಜಾಲತಾಣವನ್ನು ನಿರ್ಮಿಸಿದ್ದಾರೆ. ಅದರ ವಿಳಾಸ -www.oercommons.org. ಇತರೆ ಮುಕ್ತ ಸಂಪನ್ಮೂಲಗಳಿಗೆ ಇದರಲ್ಲಿ ಸಂಪರ್ಕಕೊಂಡಿಗಳೂ ಇವೆ.

ಡೌನ್‌ಲೋಡ್

ಎಂಪಿ3 ಟ್ಯಾಗ್

ಗಣಕ ಮತ್ತು ಹಾಡುಗಳ ಪ್ಲೇಯರ್‌ಗಳಲ್ಲಿ ಬಳಕೆಯಾಗುವ ಹಾಡುಗಳು ಸಾಮಾನ್ಯವಾಗಿ ಎಂಪಿ೩ ವಿಧಾನದವುಗಳು. ಈ ಹಾಡುಗಳ ಕಡತಗಳಿಗೆ (ಫೈಲ್) ಹಲವು ಗುಣವಿಶೇಷಗಳಿರುತ್ತವೆ. ಅವುಗಳೆಂದರೆ ಹಾಡಿನ ಶೀರ್ಷಿಕೆ, ಕಲಾವಿದ, ಆಲ್ಬಮ್ ಹೆಸರು, ಆಲ್ಬಮ್ ಚಿತ್ರ, ದಿನಾಂಕ, ಇತ್ಯಾದಿ. ಹೆಚ್ಚಿನ ಗಣಕದಲ್ಲಿ ಈ ಹಾಡುಗಳನ್ನು ಪ್ಲೇ ಮಾಡುವಾಗ ಸಾಮಾನ್ಯವಾಗಿ ಈ ಗುಣವೈಶಿಷ್ಟ್ಯಗಳಿಗೆ ಅನುಗಣವಾಗಿ ಅವುಗಳನ್ನು ಪ್ಲೇ ಮಾಡಲಾಗುತ್ತದೆ. ಹೆಚ್ಚಿನ ಎಂಪಿ೩ ಪ್ಲೇಯರ್‌ಗಳಲ್ಲೂ (ಉದಾ -ಐಪಾಡ್) ಇದೇ ವಿಧಾನವನ್ನು ಬಳಸಲಾಗುತ್ತದೆ. ಹಾಡುಗಳನ್ನು ಸಿ.ಡಿ.ಯಿಂದ ಗಣಕದಲ್ಲಿ ಪ್ರತಿಮಾಡಿ ಎಂಪಿ೩ಗೆ ಪರಿವರ್ತನೆ ಮಾಡಿದಾಗ ಈ ಎಲ್ಲ ಗುಣವೈಶಿಷ್ಟ್ಯಗಳನ್ನು ದಾಖಲಿಸಬೇಕು. ಇಲ್ಲವಾದಲ್ಲಿ ಅವುಗಳನ್ನು ಪ್ಲೇ ಮಾಡಲು ಒದ್ದಾಡಬೇಕಾಗುತ್ತದೆ. ಹಾಡುಗಳಿಗೆ ಈ ಎಂಪಿ೩ ಗುಣವೈಶಿಷ್ಟ್ಯಗಳನ್ನು ದಾಖಲಿಸಲು ಅನುವುಮಾಡಿಕೊಡುವ ಒಂದು ಉಚಿತ ತಂತ್ರಾಂಶ Mp3tag. ಇದು ದೊರೆಯುವ ಜಾಲತಾಣ www.mp3tag.de/en

e - ಸುದ್ದಿ

1$ ಪರಿಹಾರ

ಗೂಗ್ಲ್ ಬೀದಿನೋಟ ಎಂಬ ಜಾಲತಾಣದಲ್ಲಿ ಬೀದಿಗಳನ್ನು ಅಂತರಜಾಲದ ಮೂಲಕ ವೀಕ್ಷಣೆ ಮಾಡಬಹುದು. ಮಕ್ಕಳನ್ನು ಅಮೇರಿಕಕ್ಕೆ ಕಳುಹಿಸಿರುವ ಭಾರತೀಯರು ಇಲ್ಲಿ ಕುಳಿತೇ ಅವರ ಮಕ್ಕಳ ಮನೆ, ಕಛೇರಿ, ಅವರು ಓಡಾಡುವ ರಸ್ತೆಗಳು, ಅಂಗಡಿಗಳನ್ನೆಲ್ಲ ನೋಡಬಹುದು. ಈ ರೀತಿ ಬೀದಿನೋಟವನ್ನು ದಾಖಲಿಸಲು ಗೂಗ್ಲ್‌ನವರು ಕಾರಿನ ಮೇಲೆ ಕ್ಯಾಮರಾ ಇಟ್ಟು ಬೀದಿ ಬೀದಿ ಓಡಿಸುತ್ತಾರೆ. ಹೀಗೆ ಬೀದಿನೋಟದಲ್ಲಿ ತಮ್ಮ ಖಾಸಗಿ ಮನೆ, ಬೀದಿಗಳನ್ನು ತೋರಿಸಿದ್ದರ ವಿರುದ್ಧ ಒಂದು ದಂಪತಿಗಳು ದಾವೆ ಹೂಡಿದರು. ಎರಡು ವರ್ಷಗಳ ಹೋರಾಟದ ನಂತರ ಅವರಿಗೆ ಪರಿಹಾರವೂ ದೊರೆಯಿತು. ಎಷ್ಟು ಗೊತ್ತೆ? ಕೇವಲ ೧ ಡಾಲರು! ಆ ದಂಪತಿಗಳು ಈಗಾಗಲೆ ರಿಯಲ್ ಎಸ್ಟೇಟ್ ಜಾಲತಾಣವೊಂದರಲ್ಲಿ ತಮ್ಮ ಮನೆ, ಬೀದಿ, ಆಸ್ತಿಗಳ ಫೋಟೋ ದಾಖಲಿಸಿದ್ದರು. ಹೀಗಿರುವಾಗ ಗೂಗ್ಲ್‌ನವರು ಏನು ವಿಶೇಷ ತಪ್ಪು ಮಾಡಿದಂತಾಯಿತು? ಹೌದು. ಗೂಗ್ಲ್‌ನವರು ಒಂದು ತಪ್ಪು ಮಾಡಿದ್ದರು. ಅದೇನೆಂದರೆ ಆ ದಂಪತಿಗಳ ಖಾಸಗಿ ರಸ್ತೆಯಲ್ಲಿ ತಮ್ಮ ಕಾರು ಚಲಾಯಿಸಿದ್ದು. ಅದಕ್ಕಾಗಿ ಪರಿಹಾರ ನೀಡಬೇಕೆಂದು ನ್ಯಾಯಾಲಯ ತೀರ್ಮಾನ ನಿಡಿತು.

e- ಪದ


ಡೊಮೈನ್ (domain) - ಅಂತರಜಾಲದಲ್ಲಿ ಮತ್ತು ಗಣಕ ಜಾಲದಲ್ಲಿ ಗಣಕಗಳು ಮತ್ತು ಇತರೆ ಸಾಧನಗಳು ಒಂದು ಗುಂಪಾಗಿ ಎಲ್ಲವಕ್ಕೂ ಏಕರೀತಿಯ ನಿಯಮಗಳ ಮೂಲಕ ನಿಯಂತ್ರಿಸಲಾಗುತ್ತದೆ. ಅಂತರಜಾಲದಲ್ಲಿ ಇವುಗಳನ್ನು ಸಂಖ್ಯೆಗಳ ಗುಚ್ಛದ ಮೂಲಕವೂ ಗುರುತಿಸಲಾಗುತ್ತದೆ. ಈ ರೀತಿಯ ಸಂಖ್ಯೆಗುಚ್ಛದ ವಿಳಾಸಕ್ಕೆ ಐಪಿ ವಿಳಾಸ ಎಂದು ಕರೆಯಲಾಗುತ್ತದೆ.

e - ಸಲಹೆ

ಪಣಜಿಯ ಸಂತೋಷರ ಪ್ರಶ್ನೆ: ನನ್ನಲ್ಲಿ ಒಂದು ಸ್ಯಾಮ್‌ಸಂಗ್ ಫೋನ್ ಇದೆ. ಗಣಕದಲ್ಲಿ ಹಾಡುಗಳನ್ನು ನನಗೆ ಬೇಕಾದ ರೀತಿಯಲ್ಲಿ ಸರಿಹೊಂದಿಸಿ ಅವುಗಳನ್ನು ಫೋನಿಗೆ ವರ್ಗಾಯಿಸಿದೆ. ಆದರೆ ಈಗ ಫೋನಿನಲ್ಲಿ ಹಾಡುಗಳು ನನಗೆ ಬೇಕಾದ ರೀತಿಯಲ್ಲಿ ಸಿಗುತ್ತಿಲ್ಲ. ಹಾಡುಗಳ ಶೀರ್ಷಿಕೆ ಪ್ರಕಾರ ಹಾಡುಗಳು ಕಾಣಿಸುತ್ತಿಲ್ಲ. ಇದಕ್ಕೇನು ಪರಿಹಾರ?
ಉ: ನೀವು ಹಾಡುಗಳನ್ನು ಫೋನಿಗೆ ವರ್ಗಾಯಿಸುವ ಮೊದಲು ಅವುಗಳ ಎಂಪಿ೩ ಟ್ಯಾಗ್‌ಗಳನ್ನು ಹಾಡುಗಳ ಶೀರ್ಷಿಕೆ, ಕಲಾವಿದ, ಇತ್ಯಾದಿ ಗುಣವೈಶಿಷ್ಟ್ಯಗಳನ್ನು ಸೇರಿಸಿ ನಂತರ ಫೋನಿಗೆ ವರ್ಗಾಯಿಸಬೇಕು. ಆಗ ನಿಮ್ಮ ಸಮಸ್ಯೆ ಪರಿಹಾರವಾಗುತ್ತದೆ. ಈ ರೀತಿ ಎಂಪಿ೩ ಟ್ಯಾಗ್ ಸಂಪಾದಿಸಲು ಇದೇ ಅಂಕಣದಲ್ಲಿ ಸೂಚಿಸಿರುವ Mp3tag ತಂತ್ರಾಂಶ ಬಳಸಿ. 

ಕಂಪ್ಯೂತರ್ಲೆ

ತಲೆಕೆಡಿಸುವ ಜಾಲತಾಣಗಳು, ವೈರಸ್ ತುಂಬಿದ ಡೌನ್‌ಲೋಡ್‌ಗಳು, ಸಮಯ ಹಾಳುಮಾಡುವ e-ಸುದ್ದಿಗಳು, ಕೆಲಸಕ್ಕೆ ಬಾರದ e-ಸಲಹೆಗಳು, ನಗಿಸದ ಕಂಪ್ಯೂತರ್ಲೆಗಳು - ಗಣಕಿಂಡಿ ಇಷ್ಟೇನೆ.

ಮಂಗಳವಾರ, ನವೆಂಬರ್ 30, 2010

ಗಣಕಿಂಡಿ - ೦೮೦ (ನವಂಬರ್ ೨೯, ೨೦೧೦)

ಅಂತರಜಾಲಾಡಿ

ಲಿನಕ್ಸಾಯಣ


ಗಣಕ ನಡೆಸಲು ಕಾರ್ಯಾಚರಣೆಯ ವ್ಯವಸ್ಥೆ ಬೇಕು. ಹೆಚ್ಚಿನ ಮಂದಿ ಬಳಸುತ್ತಿರುವುದು ಮೈಕ್ರೋಸಾಫ್ಟ್ ವಿಂಡೋಸ್. ಆದರೆ ಅದು ತುಂಬ ದುಬಾರಿ. ಹಣ ಕೊಡದೆ, ಕಾನೂನು ಬಾಹಿರವಾಗಿ ವಿಂಡೋಸ್ ಬಳಸುತ್ತಿರುವವರು ನಮ್ಮಲ್ಲಿ ಅನೇಕ ಮಂದಿ ಇದ್ದಾರೆ. ಅಂತಹವರು ವಿಂಡೋಸ್ ಬದಲಿಗೆ ಸಂಪೂರ್ಣ ಉಚಿತ ಹಾಗೂ ಮುಕ್ತ ಕಾರ್ಯಾಚರಣೆಯ ವ್ಯವಸ್ಥೆ ಲಿನಕ್ಸ್ ಬಳಸಬಹುದು. ಲಿನಕ್ಸ್ ಅನ್ನು ಎಲ್ಲಿಂದ ಪಡೆದುಕೊಳ್ಳಬಹುದು? ಈ ಲಿನಕ್ಸ್ ಬಳಸುವುದು ಹೇಗೆ? ಅದರಲ್ಲಿ ಕನ್ನಡ ಮೂಡಿಸುವುದು ಮತ್ತು ಬೆರಳಚ್ಚು ಮಾಡುವುದು ಹೇಗೆ? - ಇತ್ಯಾದಿ ಎಲ್ಲ ಪ್ರಶ್ನೆಗಳಿಗೆ ಉತ್ತರ ಕನ್ನಡ ಭಾಷೆಯಲ್ಲಿ ಬೇಕಿದ್ದಲ್ಲಿ ನೀವು ಲಿನಕ್ಸಾಯಣ ಜಾಲತಾಣಕ್ಕೆ ಭೇಟಿ ನೀಡಬಹುದು. ಇದರ ವಿಳಾಸ - linuxaayana.net.

ಡೌನ್‌ಲೋಡ್

ಡಾಸ್ ಆಟ ಆಡಿ

ಸುಮಾರು ಹದಿನೈದು ವರ್ಷಗಳ ಹಿಂದೆ ಡಾಸ್ ಕಾರ್ಯಾಚರಣೆಯ ವ್ಯವಸ್ಥೆಯಲ್ಲಿ ಆಟಗಳನ್ನು ಆಡಿದವರಲ್ಲಿ ನೀವೂ ಒಬ್ಬರೇ? ಆ ಆಟಗಳನ್ನು ಈಗಲೂ ಆಡಬೇಕು ಅನ್ನಿಸುತ್ತಿದೆಯೇ? ಹೌದಾದಲ್ಲಿ ನಿಮಗೆ ಡಾಸ್ ಆಟಗಳು ಸಿಗುವ ಜಾಲತಾಣವನ್ನು ತಿಳಿಸಬೇಕು. ಅದುವೇ dosgamesarchive.com. ಇಲ್ಲಿ ನೀವು ಹಳೆಯ ಜನಪ್ರಿಯ ಆಟಗಳನ್ನು ಡೌನ್‌ಲೋಡ್ ಮಾಡಿಕೊಳ್ಳಬಹುದು. ಈ ಆಟಗಳಲ್ಲಿ ಪ್ಯಾಕ್‌ಮಾನ್, ಡಿಗ್ಗರ್, ಬ್ಲಾಕ್ಸ್, ಇತ್ಯಾದಿ ಸೇರಿವೆ. ಆಟಗಳನ್ನು ಹಲವು ವಿಭಾಗಗಳಲ್ಲಿ ವಿಭಜಿಸಿ ಅವುಗಳ ಸೂಚಿಯನ್ನು ನೀಡಲಾಗಿದೆ. ನೆನಪಿಡಿ -ಇವು ಯಾವುವೂ ಹೊಚ್ಚ ಹೊಸ ವಿಂಡೋಸ್‌ನಲ್ಲಿ ಕೆಲಸ ಮಾಡುವುದಿಲ್ಲ. ವಿಂಡೋಸ್‌ನಲ್ಲಿ ಇವುಗಳನ್ನು ಆಡಬೇಕಿದ್ದಲ್ಲಿ ಹಿಂದೊಮ್ಮೆ ಇದೇ ಅಂಕಣದಲ್ಲಿ ಸೂಚಿಸಿದ್ದ ಡಾಸ್‌ಬಾಕ್ಸ್‌ನ್ನು (dosbox.com) ಬಳಸಬೇಕು.  

e - ಸುದ್ದಿ

ವ್ಯಕ್ತಿಯಿಂದ ವ್ಯಕ್ತಿಗೆ ಗಣಕ ಕಡತಗಳ ವರ್ಗಾವಣೆಗೆ ಇರುವ ಒಂದು ವಿಧಾನ ಟೊರೆಂಟ್. ಇದರ ಬಳಕೆ ಅತಿ ಹೆಚ್ಚು ಆಗುತ್ತಿರುವುದು ಚಲನಚಿತ್ರಗಳ ಚೌರ್ಯಕ್ಕೆ. ಈ ರೀತಿ ಟೊರೆಂಟ್ ಜಾಲಕ್ಕೆ ಕೃತಿಚೌರ್ಯ ಮಾಡಿದ ಚಲನಚಿತ್ರ, ತಂತ್ರಾಂಶ, ಹಾಡು, ವೀಡಿಯೋ, ಇತ್ಯಾದಿಗಳನ್ನು ಸೇರಿಸುವುದು ಕಾನೂನು ಪ್ರಕಾರ ಅಪರಾಧ. ಈ ರೀತಿಯ ಅಪರಾಧ ಎಸಗಿದ್ದಾರೆ ಎಂಬ ಆರೋಪ ಹೊರಿಸಿ ಹೈದರಾಬಾದ್ ಪೋಲೀಸರು ನಾಲ್ಕು ಮಂದಿ ಯುವಕರನ್ನು ದಸ್ತಗಿರಿ ಮಾಡಿದ್ದಾರೆ. ಟೊರೆಂಟ್‌ಗಳಿಗೆ ಸೂಚಿ ನೀಡುವ ಜಾಲತಾಣ ನಡೆಸಿದ್ದು ಮಾತ್ರವಾಗಿದ್ದರೆ ಅವರನ್ನು ದಸ್ತಗಿರಿ ಮಾಡಲು ಕಷ್ಟವಾಗುತ್ತಿತ್ತು. ಆದರೆ ಚಲನಚಿತ್ರಗಳನ್ನು ಪ್ರತಿ ಮಾಡಿ ಈ ಜಾಲತಾಣಕ್ಕೆ ಸೇರಿಸಿದ್ದು ಅವರ ಅಪರಾಧ.

e- ಪದ

ಟೆದರಿಂಗ್ (Tethering) - ಮೊಬೈಲ್ ಫೋನನ್ನು ಗಣಕ ಯಾ ಲ್ಯಾಪ್‌ಟಾಪ್‌ನ್ನು ಅಂತರಜಾಲಕ್ಕೆ ಸಂಪರ್ಕಿಸಲು ಬಳಸುವ ಒಂದು ವಿಧಾನ. ಇದನ್ನು ಸಾಮಾನ್ಯವಾಗಿ 3G ಸವಲತ್ತು ಇರುವ ಮೊಬೈಲ್ ಫೋನಿನಲ್ಲಿ ಮಾತ್ರ ಬಳಸುತ್ತಾರೆ. ಹೀಗೆ ಪಡೆದ ಅಂತರಜಾಲ ಸಂಪರ್ಕವನ್ನು ಇತರೆ ಗಣಕಗಳ ಜೊತೆ ಹಂಚಿಕೊಳ್ಳಬಹುದು.

e - ಸಲಹೆ

ತಿಪ್ಪೇಸ್ವಾಮಿಯವರ ಪ್ರಶ್ನೆ: ನಾನು ನನ್ನ ಗಣಕದಿಂದ ತುಂಗ, ಶ್ರುತಿ ಮತ್ತು ವೃಂದ ಹೆಸರಿನ ಫಾಂಟ್‌ಗಳನ್ನು ಅಳಿಸಿಹಾಕಿದ್ದೆ. ಗಣಕದಲ್ಲಿ ಕನ್ನಡದ Language Interface Pack ಕೂಡ ಇದೆ. ಈಗ ಕನ್ನಡದಲ್ಲಿ ಮೆನು ಮೂಡಿಬರಬೇಕಾದ ಜಾಗದಲ್ಲಿ ಖಾಲಿ ಚೌಕಗಳು ಕಾಣಿಸುತ್ತಿವೆ. ಇದಕ್ಕೆ ಏನು ಪರಿಹಾರ? 
ಉ: ನೀವು ಯಾವ ಕಾರ್ಯಾಚರಣೆಯ ವ್ಯವಸ್ಥೆ ಬಳಸುತ್ತಿದ್ದೀರಿ ಎಂದು ತಿಳಿಸಿಲ್ಲ. ವಿಂಡೋಸ್ ಎಕ್ಸ್‌ಪಿ ಎಂದು ಭಾವಿಸುತ್ತೇನೆ. ಕಂಟ್ರೋಲ್ ಪ್ಯಾನೆಲ್‌ಗೆ ಹೋಗಿ ಭಾರತೀಯ ಭಾಷೆಯನ್ನು ಮತ್ತೊಮ್ಮೆ ಚಾಲನೆ ಮಾಡಿದಲ್ಲಿ ನಿಮ್ಮ ಸಮಸ್ಯೆ ಪರಿಹಾರವಾಗುತ್ತದೆ. ಅಥವಾ ನಿಮ್ಮ ಸ್ನೇಹಿತರ ಗಣಕದಿಂದ ತುಂಗ ಫಾಂಟ್‌ನ್ನು ಪ್ರತಿ ಮಾಡಿಕೊಂಡು ನಿಮ್ಮ ಗಣಕಕ್ಕೆ ಸೇರಿಸಿದರೂ ಆಗಬಹುದು. 

ಕಂಪ್ಯೂತರ್ಲೆ

ಗಣಕವ್ಯಸನಿ ಒಬ್ಬ ಹಡಗು ಮುಳುಗಿದಾಗ ಬದುಕುಳಿದು ಜನವಸತಿಯಿಲ್ಲದ ದ್ವೀಪದಲ್ಲಿ ಸೇರಿಕೊಂಡ. ಅವನ ಲ್ಯಾಪ್‌ಟಾಪ್ ಆನ್ ಮಾಡಿದಾಗ ಅದು ಕೆಲಸ ಮಾಡಿತು. ಡಾಟಾ ಕಾರ್ಡ್ ಮೂಲಕ ಅಂತರಜಾಲ ಸಂಪರ್ಕವೂ ಸಿಕ್ಕಿತು. ಕೂಡಲೇ ಆತ ಗಣಕ ಸೇವಾ ಕೇಂದ್ರಕ್ಕೆ ಇಮೈಲ್ ಮಾಡಿದ - “ನಿಮ್ಮಲ್ಲಿ ಲ್ಯಾಪ್‌ಟಾಪ್‌ನ ಹಾರ್ಡ್‌ಡಿಸ್ಕಿನಿಂದ ಮರಳು ತೆಗೆಯುವ ತಂತ್ರಾಂಶ ಇದೆಯೇ?”

ಸೋಮವಾರ, ನವೆಂಬರ್ 22, 2010

ಗಣಕಿಂಡಿ - ೦೭೯ (ನವಂಬರ್ ೨೨, ೨೦೧೦)

ಅಂತರಜಾಲಾಡಿ

ಕಿಂದರಜೋಗಿ


ಮಕ್ಕಳಿಗಾಗಿ ಕಥೆ, ಕವನ, ನಾಟಕ, ಇತ್ಯಾದಿಗಳು ನಮ್ಮಲ್ಲಿ ಅಂದರೆ ಕನ್ನಡ ಭಾಷೆಯಲ್ಲಿ ಇರುವುದೇ ಬಹುಕಡಿಮೆ. ಹಾಗಿರುವಾಗ ಅಂತರಜಾಲದಲ್ಲಿ ಅವುಗಳನ್ನು ಭೂತಕನ್ನಡಿ ಹಾಕಿಯೇ ಹುಡುಕಬೇಕು. ಈಗೊಂದು ಸಿಹಿಸುದ್ದಿ ಬಂದಿದೆ. ಕನ್ನಡ ಭಾಷೆಯಲ್ಲಿ ಮಕ್ಕಳಿಗಾಗಿ ಒಂದು ಅಂತರಜಾಲ ನಿರ್ಮಾಣವಾಗಿದೆ. ಅದರಲ್ಲಿ ಕಥೆ, ಕವನ, ನಾಟಕ, ವಿಜ್ಞಾನ ಪ್ರಯೋಗಗಳು, ಕಾರ್ಟೂನ್ ಎಲ್ಲ ಇವೆ. ಇದು ಒಂದು ರೀತಿಯಲ್ಲಿ ಜನರಿಂದ ಜನರಿಗಾಗಿ ಇರುವ ಜಾಲತಾಣ. ಅಂದರೆ ನಾವು ನೀವು ಎಲ್ಲರೂ ಈ ಜಾಲತಾಣಕ್ಕೆ ಲೇಖನಗಳನ್ನು ನೀಡಬಹುದು. ಇದರ ವಿಳಾಸ - kindarajogi.com.

ಡೌನ್‌ಲೋಡ್

ವಿ-ಪುಸ್ತಕ ಪರಿವರ್ತಕ

ವಿದ್ಯುನ್ಮಾನ ಪುಸ್ತಕಗಳು ಈಗ ಜನಪ್ರಿಯವಾಗುತ್ತಿವೆ. ವಿ-ಪುಸ್ತಕಗಳನ್ನು ಓದಲೆಂದೇ ಗ್ಯಾಜೆಟ್‌ಗಳು ಮಾರುಕಟ್ಟೆಯಲ್ಲಿ ದೊರೆಯುತ್ತಿವೆ. ಉದಾ:- ಐಪ್ಯಾಡ್, ಕಿಂಡಲ್, ನೂಕ್, ಇತ್ಯಾದಿ. ಗಣಕ ಮತ್ತು ಸ್ಮಾರ್ಟ್‌ಫೋನ್‌ಗಳಲ್ಲೂ ಈ ಪುಸ್ತಕಗಳನ್ನು ಓದಬಹುದು. ಆದರೆ ಪ್ರತಿಯೊಬ್ಬರೂ ತಮ್ಮದೇ ವಿಧಾನದ ವಿ-ಪುಸ್ತಕವನ್ನು ಬಳಸುತ್ತಿದ್ದಾರೆ. ಹೀಗಾಗಿ ಮಾರುಕಟ್ಟೆಯಲ್ಲಿ ಹಲವಾರು ನಮೂನೆಯ ವಿ-ಪುಸ್ತಕಗಳು ತುಂಬಿವೆ. ನಿಮ್ಮ ಫೋನಿಗೆ ಬೇಕಾದ ವಿಧಾನದ ಪುಸ್ತಕ ನಿಮ್ಮಲ್ಲಿ ಇಲ್ಲ, ಆದರೆ ನಿಮ್ಮಲ್ಲಿ ಇನ್ನೊಂದು ವಿಧಾನದ ವಿ-ಪುಸ್ತಕ ಇದೆ ಎಂದಾದಲ್ಲಿ ಈ ಪುಸ್ತಕಗಳನ್ನು ಒಂದು ವಿಧಾನದಿಂದ ಇನ್ನೊಂದು ವಿಧಾನಕ್ಕೆ ಪರಿವರ್ತಿಸಲು ಒಂದು ಮುಕ್ತ ತಂತ್ರಾಂಶ ಲಭ್ಯವಿದೆ. ಅದುವೇ  calibre. ಈ ತಂತ್ರಾಂಶ ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ calibre-ebook.com/download. ಈ ಜಾಲತಾಣದಲ್ಲಿ ವಿಂಡೋಸ್, ಮ್ಯಾಕ್ ಮತ್ತು ಲಿನಕ್ಸ್ ಕಾರ್ಯಾಚರಣೆಯ ವ್ಯವಸ್ಥೆಗಳಿಗೆ ತಂತ್ರಾಂಶ ಲಭ್ಯವಿದೆ.

e - ಸುದ್ದಿ

ಶ್ವಾನಟ್ವೀಟ್

“ನನ್ನ ಬೇರುಗಳಿಗೆ ನೀರು ಕಡಿಮೆಯಾಗುತ್ತಿದೆ” ಎಂದು ಟ್ವೀಟ್ ಮಾಡುವ ಗಿಡದ ಬಗ್ಗೆ ಈ ಅಂಕಣದಲ್ಲಿ ಹಿಂದೊಮ್ಮೆ ವರದಿ ಮಾಡಲಾಗಿತ್ತು. ಈಗ ಶ್ವಾನಪುರಾಣದ ಟ್ವಿಟ್ಟರ್ ಅಧ್ಯಾಯ ಪ್ರಾರಂಭವಾಗಿದೆ. ಪಪ್ಪಿಟ್ವೀಟ್ ಎಂಬ ಗ್ಯಾಜೆಟ್ ಅಮೆರಿಕದಲ್ಲಿ ಮಾರುಕಟ್ಟೆಗೆ ಬಂದಿದೆ. ಅದನ್ನು ನಾಯಿಯ ಕುತ್ತಿಗೆಯ ಪಟ್ಟಿಗೆ ಜೋಡಿಸಲಾಗುತ್ತದೆ. ಓಡಾಟ, ಬೊಗಳಾಟ, ನಿದ್ದೆ ಇತ್ಯಾದಿ ನಾಯಿಗಳು ಸಹಜವಾಗಿ ಮಾಡುವ ಕ್ರಿಯೆಗಳನ್ನು ಅರ್ಥಮಾಡಿಕೊಳ್ಳುವ ಸಾಮರ್ಥ್ಯ ಅದಕ್ಕೆ ಇದೆ. ಅಷ್ಟು ಮಾತ್ರವಲ್ಲ. ಅದನ್ನು ನಿಸ್ತಂತು ವಿಧಾನದಲ್ಲಿ ಮನೆಯ ಗಣಕಕ್ಕೆ ಜೋಡಿಸಬಹುದು. ಇದರ ಜೊತೆ ದೊರೆಯುವ ತಂತ್ರಾಂಶದಲ್ಲಿ ಆಯಾಯ ಕ್ರಿಯೆಗೆ ಅನ್ವಯವಾಗುವಂತೆ ಟ್ವೀಟ್ ಮಾಡುವ ಸವಲತ್ತು ಇದೆ. ಇನ್ನು ಮುಂದೆ ಶ್ವಾನದೊಡೆಯ ಆಫೀಸಿನಲ್ಲಿದ್ದಾಗ ಮನೆಯ ನಾಯಿಯಿಂದ “ನಾನು ನಿದ್ದೆ ಮಾಡುತ್ತಿದ್ದೇನೆ”, “ನಾನು ಬೊಗಳಿದಾಗ ಊರೇ ಬೊಗಳುತ್ತದೆ” -ಇತ್ಯಾದಿ ಟ್ವೀಟ್ ಬರಬಹುದು.

e- ಪದ

ಸ್ಪರ್ಶಪರದೆ (ಟಚ್‌ಸ್ಕ್ರೀನ್ -touchscreen) -ಮುಟ್ಟಿದರೆ ಕೆಲಸ ಮಾಡುವ ಪರದೆಗಳು. ಇಂತಹವುಗಳ ಬಳಕೆ ಈಗೀಗ ಮೊಬೈಲ್ ಫೋನ್‌ಗಳಲ್ಲಿ ಸಹಜವಾಗುತ್ತಿದೆ. ಈ ಸ್ಪರ್ಶಪರದೆಗಳಲ್ಲಿ ಎರಡು ನಮೂನೆ. ಕಡ್ಡಿಯಿಂದ ಅಥವಾ ಉಗುರಿನಿಂದ ಒತ್ತಿದರೆ ಕೆಲಸ ಮಾಡುವಂತಹವು ಮತ್ತು ಬೆರಳಿನಿಂದ ಒತ್ತಿದರೆ ಮಾತ್ರ ಕೆಲಸ ಮಾಡುವಂತಹವು. ಈ ಸ್ಪರ್ಶಪರದೆಗಳನ್ನು ಎಟಿಎಂ ಮತ್ತು ಕಿಯೋಸ್ಕ್‌ಗಳಲ್ಲೂ ಬಳಸುತ್ತಾರೆ.

e - ಸಲಹೆ

ಪರಶುರಾಮ ಕಟ್ಟಿಮನಿಯವರ ಪ್ರಶ್ನೆ: Shared drive ನ ಕೆಳಗಿನ ಹಸ್ತದ ಚಿತ್ರವನ್ನು ಹೇಗೆ ತೆಗೆಯಬೇಕು?
ಉ: ಈ ಚಿತ್ರ ಅರ್ಥಾತ್ ಐಕಾನ್ ನಿಮ್ಮ ಡ್ರೈವ್ ಅಥವಾ ಫೋಲ್ಡರ್ ಗಣಕಜಾಲದಲ್ಲಿ ಇರುವ ಇತರರೊಂದಿಗೆ ಹಂಚಿಕೆಯಾಗಿದೆ ಎಂಬುದನ್ನು ಸೂಚಿಸುತ್ತದೆ. ಈ ಚಿತ್ರ ಇರುವ ತನಕ ನಿಮ್ಮ ಡ್ರೈವ್ ಅಥವಾ ಫೋಲ್ಡರ್ ಅನ್ನು ಅದೇ ಗಣಕಜಾಲದಲ್ಲಿ ಇರುವ ಇತರೆ ಮಂದಿ ಬಳಸಬಹುದು. ಹಂಚಿಕೆಯನ್ನು (sharing) ನಿಲ್ಲಿಸಿದೊಡನೆ ಈ ಚಿತ್ರವೂ ಮಾಯವಾಗುತ್ತದೆ. 

ಕಂಪ್ಯೂತರ್ಲೆ

ಟ್ವಿಟ್ಟರ್ ಗಾದೆ

ಆಡಿದ ಮಾತು ಮಾಡಿದ ಟ್ವೀಟ್ ಹಿಂದಕ್ಕೆ ಬರುವುದಿಲ್ಲ.

ಸೋಮವಾರ, ನವೆಂಬರ್ 15, 2010

ಗಣಕಿಂಡಿ - ೦೭೮ (ನವಂಬರ್ ೧೫, ೨೦೧೦)

ಅಂತರಜಾಲಾಡಿ

ಜ್ಞಾನಕೋಶ

ಅಂತರಜಾಲದಲ್ಲಿ ಕನ್ನಡ ಭಾಷೆಯಲ್ಲಿ ಜ್ಞಾನಕೋಶಗಳು ಇರುವುದೇ ಬೆರಳೆಣಿಕೆಯಷ್ಟು. ಅಂತಹ ಒಂದು ಜ್ಞಾನಕೋಶ  www.jnanakosha.org. ಹೆಸರೇ ಸೂಚಿಸುವಂತೆ ಈ ಜಾಲತಾಣದಲ್ಲಿ ಎಲ್ಲ ವಿಷಯಗಳ ಬಗ್ಗೆ ಲೇಖನಗಳನ್ನು ಸೇರಿಸಲು ಪ್ರಯತ್ನ ಪಡಲಾಗಿದೆ. ಇದರ ಹಿಂದೆ ಕೆಲಸ ಮಾಡುವವರ ಪಟ್ಟಿ ನೋಡಿದರೆ ಅಲ್ಲೂ ಬೆರಳೆಣಿಕೆಯಷ್ಟೇ ಮಂದಿ ಇದ್ದಾರೆ. ಗಣಕ, ವಿಜ್ಞಾನ, ತಂತ್ರಜ್ಞಾನ, ಮ್ಯಾನೇಜ್‌ಮೆಂಟ್, ಕಾನೂನು, ಕೃಷಿ, ಆಯುರ್ವೇದ - ಹೀಗೆ ಎಲ್ಲ ವಿಷಯಗಳ ಸೂಚಿ ಇದೆ. ಆಯಾ ವಿಷಯಗಳ ಬಗ್ಗೆ ಕೆಲವು ಲೇಖನಗಳೂ ಇವೆ. ಚರ್ಚಾವೇದಿಕೆ ಹಾಗೂ ಬ್ಲಾಗ್‌ಗಳೂ ಇಲ್ಲಿವೆ. ಮಾಧ್ಯಮದವರ ಮುಂದೆ ತುಂಬ ಗದ್ದಲಮಾಡಿ ಬಿಡುಗಡೆ ಮಾಡಿದ ಸರಕಾರದ “ಕಣಜ” (kanaja.in) ಜಾಲತಾಣ ಇನ್ನೂ ಅಲ್ಲೇ ನಿದ್ದೆ ಮಾಡುತ್ತಿದೆ. ಕನ್ನಡದ ಮುಕ್ತ ವಿಶ್ವಕೋಶದ ವಿಳಾಸ kn.wikipedia.org.

ಡೌನ್‌ಲೋಡ್

ಮೊಬೈಲ್‌ಗೆ ತಂತ್ರಾಂಶ

ಈಗೀಗ ಮಾರುಕಟ್ಟೆಯಲ್ಲಿ ದೊರಕುತ್ತಿರುವ ಫೋನುಗಳು ಬಹುತೇಕ ಕಿಸೆಗಣಕಗಳೇ ಆಗಿವೆ. ಅವುಗಳಲ್ಲಿ ಏನೇನೆಲ್ಲಾ ಮಾಡಬಹುದು. ಆಟಗಳನ್ನೂ ಆಡಬಹುದು. ಅಂತೆಯೇ ಅವುಗಳಿಗೆ ಸಹಸ್ರಾರು ತಂತ್ರಾಂಶಗಳೂ ಲಭ್ಯವಿವೆ. ಗಣಕಗಳಿಗೆ ಹೇಗೆಯೋ ಅಂತೆಯೇ ಆಧುನಿಕ ಮೊಬೈಲ್ ಫೋನ್‌ಗಳಿಗೂ ಕಾರ್ಯಾಚರಣೆಯ ವ್ಯವಸ್ಥೆಗಳಿವೆ. ಅವುಗಳಲ್ಲೂ ಹಲವಾರು ನಮೂನೆಗಳಿವೆ. ಎಲ್ಲ ನಮೂನೆಯ ಫೋನುಗಳಿಗೆ ಹಾಗೂ ಕಾರ್ಯಾಚರಣೆಯ ವ್ಯವಸ್ಥೆಗಳಿಗೆ ತಂತ್ರಾಂಶಗಳು ಎಲ್ಲಿ ದೊರೆಯುತ್ತವೆ ಎಂದು ಹಲವು ಮಂದಿ ಮತ್ತೆ ಮತ್ತೆ ಇಮೈಲ್ ಮೂಲಕ ವಿಚಾರಿಸುತ್ತಿದ್ದಾರೆ. ಅಂತಹ ಒಂದು ಜಾಲತಾಣ bestmobileapp.org. ನಿಜವಾಗಿ ಈ ಜಾಲತಾಣದಲ್ಲಿ ತಂತ್ರಾಂಶ ದೊರೆಯುವುದಿಲ್ಲ. ತಂತ್ರಾಂಶ ಎಲ್ಲಿ ದೊರೆಯುತ್ತದೆ ಎಂಬ ಕೊಂಡಿ ಮಾತ್ರ ಇಲ್ಲಿದೆ. ಹಾಗೆ ದೊರೆಯುವ ಎಲ್ಲ ತಂತ್ರಾಂಶಗಳೂ ಕಾನೂನುಬದ್ಧವಾಗಿರಬೇಕಾಗಿಲ್ಲ. ನಿಮ್ಮ ಎಚ್ಚರಿಕೆಯಲ್ಲಿ ನೀವು ಇರುವುದು ಒಳ್ಳೆಯದು.

e - ಸುದ್ದಿ

ಇಲ್ಲದ ರೋಗಕ್ಕೆ ಮದ್ದು

ನಕಲಿ ವೈದ್ಯರಲ್ಲಿಗೆ ಹೋದರೆ ಸುಳ್ಳು ಸುಳ್ಳೇ ಯಾವುದೋ ದೊಡ್ಡ ಖಾಯಿಲೆ ನಿಮಗೆ ಬಂದಿದೆ ಎಂದು ನಂಬಿಸಿ ನೀರನ್ನೇ ಇಂಜೆಕ್ಷನ್ ಚುಚ್ಚಿ ಹಣ ಕೀಳುವವರ ಕಥೆ ನೀವು ಕೇಳಿರಬಹುದು. ಅಮೇರಿಕದ ಕೋಟ್ಯಾಧೀಶ ಸಂಗೀತ ಸಂಯೋಜಕರೊಬ್ಬರನ್ನು ಗಣಕ ತಂತ್ರಜ್ಷನೊಬ್ಬ ಹೀಗೇ ಮೋಸ ಮಾಡಿದ ಕಥೆ ವರದಿಯಾಗಿದೆ. ಡೇವಿಡ್ಸನ್ ಹೆಸರಿನ ಆ ಸಂಯೋಜಕರು ತಮ್ಮ ಗಣಕವನ್ನು ವಿಕ್ರಮ್ ಬೇಡಿ ಎಂಬಾತ ನಡೆಸುತ್ತಿದ್ದ ಗಣಕ ದುರಸ್ತಿ ಅಂಗಡಿಗೆ ತೆಗೆದುಕೊಂಡು ಹೋದರು. ತಮ್ಮ ಗಣಕದಲ್ಲಿರುವ ತಾನು ತಯಾರಿಸಿದ ಸಂಗೀತ ಸಂಯೋಜನೆಗಳನ್ನು ವೈರಸ್ ಹಾಳುಮಾಡಬಹುದೇನೋ ಎಂಬ ಭಯ ಅವರನ್ನು ಕಾಡುತ್ತಿತ್ತು. ಡೇವಿಡ್ಸನ್ ಅವರ ಅಮಾಯಕತೆಯನ್ನು ಅರಿತ ವಿಕ್ರಮ್ ಬೇಡಿ ಅವರನ್ನು ಬೆದರಿಸಿ, ನಿಮ್ಮ ಗಣಕದಲ್ಲಿ ವೈರಸ್ ಇದೆ, ಅದು ಯಾವುದೋ ದುಷ್ಟ ಕೂಟಕ್ಕೆ ನಿಮ್ಮನ್ನು ಸಂಪರ್ಕಿಸಿದೆ, ನಿಮ್ಮ ಗಣಕದ ವೈರಸ್‌ನಿಂದಾಗಿ ನನ್ನ ಅಂಗಡಿಯಲ್ಲಿರುವ ಎಲ್ಲ ಗಣಕಗಳು ಹಾಳಾಗಿವೆ, ಇನ್ನೂ ಏನೇನೋ ಸುಳ್ಳು ಹೇಳಿ ಬೆದರಿಸಿ ಅವರಿಂದ ಹಣ ಕಿತ್ತ. ಅದೂ ಕಡಿಮೆಯೇನಲ್ಲ, ಸುಮಾರು ೨೦ ಮಿಲಿಯ ಡಾಲರುಗಳು. ಈಗ ವಿಕ್ರಮ್ ಬೇಡಿ ಸೆರೆಯಲ್ಲಿದ್ದಾನೆ.

e- ಪದ

ಕರ್ನಿಂಗ್ (kerning) - ಪುಟವಿನ್ಯಾಸದಲ್ಲಿ(ಡಿಟಿಪಿ) ಬಳಕೆಯಾಗುವ ಪದ. ಮುಖ್ಯವಾಗಿ ಇಂಗ್ಲಿಶ್ ಭಾಷೆಯ ಪುಟವಿನ್ಯಾಸದಲ್ಲಿ ಮಾತ್ರ ಇದರ ಬಳಕೆಯಾಗುತ್ತದೆ. ಇಂಗ್ಲಿಶ್ ಭಾಷೆಯಲ್ಲಿ ಕೆಲವು ಅಕ್ಷರಗಳು ಉದಾ- V ಮತ್ತು A ಪಕ್ಕ ಪಕ್ಕ ಬಂದಾಗ, A ಅಕ್ಷರದ ಎಡಭಾಗ V ಅಕ್ಷರದ ಬಲಭಾಗದಲ್ಲಿ ಸ್ವಲ್ಪ ಒಳಕ್ಕೆ ಹೋಗಬಲ್ಲುದು. ಹೀಗೆ ಹೋಗುವಂತೆ ಮಾಡುವುದಕ್ಕೆ ಕರ್ನಿಂಗ್ ಎನ್ನುತ್ತಾರೆ. 

e - ಸಲಹೆ

ಷಣ್ಮುಖ ಅವರ ಪ್ರಶ್ನೆ: ನಾನು ಇತ್ತೀಚೆಗೆ ಒಂದು ಆಪಲ್ ಐಫೋನ್ ಕೊಂಡುಕೊಂಡಿದ್ದೇನೆ. ಅದಕ್ಕೆ ನನಗೆ ಹಾಡುಗಳನ್ನು ಸೇರಿಸಲು ಉಚಿತ ತಂತ್ರಾಂಶ ಬೇಕಾಗಿದೆ. ಎಲ್ಲಿ ಸಿಗುತ್ತದೆ?
ಉ: ನೀವು ಆಪಲ್ ಕಂಪೆನಿಯದ್ದೇ ಐಟ್ಯೂನ್ ಬಳಸಬಹುದು. ಇದು ದೊರೆಯುವ ಜಾಲತಾಣ http://bit.ly/9FVoeI

ಕಂಪ್ಯೂತರ್ಲೆ

ಗಣಕವಚನ

ಫೇಸ್‌ಬುಕ್‌ನಲ್ಲಿ ಖಾತೆ ತೆರೆದು ಗೋಡೆಬರಹಗಳಿಗೆ ಅಂಜಿದೊಡೆಂತಯ್ಯಾ?
ಆರ್ಕುಟ್‌ನಲ್ಲಿದ್ದುಕೊಂಡು ಸ್ಕ್ರಾಪ್ ಬರಹಗಳಿಗೆ ಅಂಜಿದೊಡೆಂತಯ್ಯಾ?
ಕಂಪ್ಯೂಟರ್ ಕೊಂಡುಕೊಂಡು ವೈರಸ್‌ಗಳಿಗೆ ಅಂಜಿದೊಡೆಂತಯ್ಯಾ?

ಬುಧವಾರ, ನವೆಂಬರ್ 10, 2010

ಗಣಕಿಂಡಿ - ೦೭೭ (ನವಂಬರ್ ೦೮, ೨೦೧೦)

ಅಂತರಜಾಲಾಡಿ

ಸಿರಿನುಡಿ

ಕನ್ನಡ ಭಾಷೆಗೆ ಸರಿಸುಮಾರು ಎರಡು ಸಹಸ್ರ ವರ್ಷಗಳ ಇತಿಹಾಸವಿದೆ. ಕನ್ನಡ ಭಾಷೆ ತುಂಬ ಶ್ರೀಮಂತ ಭಾಷೆ. ಈ ಭಾಷೆಯಲ್ಲಿ ಅತ್ಯನ್ನತ ಮಟ್ಟದ ಸಹಸ್ರಾರು ಸಾಹಿತ್ಯ ರಚನೆಯಾಗಿದೆ. ಕನ್ನಡ ಸಾಹಿತ್ಯವನ್ನು ಅಂತರಜಾಲದಲ್ಲಿ ಸೇರಿಸುವ ಕೆಲಸ ಮಾತ್ರ ಅಲ್ಲಲ್ಲಿ ಅಷ್ಟಿಟ್ಟು ಪ್ರಾತಿನಿಧಿಕವಾಗಿ ಆಗಿದೆಯಷ್ಟೆ. ಅಂತಹ ಒಂದು ಜಾಲತಾಣ  www.sirinudi.org. ಇದರಲ್ಲಿ ಕನ್ನಡ ಭಾಷೆಯ ಹಲವಾರು ಸಾಹಿತ್ಯ ಕೃತಿಗಳನ್ನು ಓದಬಹುದು. ಕನ್ನಡ ಭಾಷೆ ನಿಜಕ್ಕೂ ಜನರಿಗೆ ಉಪಯುಕ್ತ ಭಾಷೆಯಾಗಬೇಕಾದರೆ ಕನ್ನಡ ಭಾಷೆಯಲ್ಲಿ ಆಧುನಿಕ ವಿಜ್ಞಾನ ತಂತ್ರಜ್ಞಾನದ ಎಲ್ಲ ವಿಷಯಗಳೂ ಪ್ರತಿಬಿಂಬಿತವಾಗಬೇಕು. ಈ ಉದ್ದೇಶದಿಂದ ಪ್ರಾರಂಭವಾದ ಕನ್ನಡ ಭಾಷೆಯ ಪ್ರಪ್ರಥಮ ವಿಜ್ಞಾನ ಪತ್ರಿಕೆಯ ಸಂಚಿಕೆಗಳನ್ನು ಈ ಜಾಲತಾಣದಲ್ಲಿ ಓದಬಹುದು. ಹಾಗೆಯೇ ಅಡಿಗರು ಪ್ರಾರಂಭಿಸಿದ ಸಾಕ್ಷಿ ಪತ್ರಿಕೆಯ ಸಂಚಿಕೆಗಳೂ ಇಲ್ಲಿವೆ.

ಡೌನ್‌ಲೋಡ್

ಗಣಕ ಸ್ವಚ್ಛ ಮಾಡಿ

ಗಣಕದಲ್ಲಿ ತಂತ್ರಾಂಶಗಳನ್ನು ಮತ್ತೆ ಮತ್ತೆ ಇನ್‌ಸ್ಟಾಲ್ ಮತ್ತು ಅನ್‌ಇನ್‌ಸ್ಟಾಲ್ ಮಾಡಿದರೆ ಕೆಲವೊಮ್ಮೆ ತಂತ್ರಾಂಶಗಳು ಪೂರ್ತಿಯಾಗಿ ತೆಗೆಯಲ್ಪಡುವುದಿಲ್ಲ. ಹಾಗೆ ಆಗುತ್ತ ಗಣಕ ನಿಧಾನವಾಗಿ ಕೆಲಸ ಮಾಡಲು ಪ್ರಾರಂಭಿಸುತ್ತದೆ. ಗಣಕದಲ್ಲೇ ಇರುವ ಅನ್‌ಇನ್‌ಸ್ಟಾಲ್ ಸವಲತ್ತು ಇಂತಹ ಸಂದರ್ಭದಲ್ಲಿ ಸಹಾಯಕ್ಕೆ ಬರುವುದಿಲ್ಲ. ಎಷ್ಟು ಪ್ರಯತ್ನ ಮಾಡಿದರೂ ತನ್ನ ಪಳೆಯುಳಿಕೆಯನ್ನು ಬಿಟ್ಟುಕೊಡದ ತಂತ್ರಾಂಶದ ಅವಶೇಷಗಳನ್ನು ತೆಗೆಯುವುದು ಅಷ್ಟು ಸುಲಭವಲ್ಲ. ತಂತ್ರಾಂಶಗಳನ್ನು ಯಾವುದೇ ಅವಶೇಷವಿಲ್ಲದೆ ಸ್ವಚ್ಛವಾಗಿ ತೆಗೆದುಹಾಕುವ ತಂತ್ರಾಂಶ Revo Uninstaller. ಇದು ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ http://bit.ly/bPK5Fb. ಇಲ್ಲಿ ನಿಮಗೆ ಉಚಿತ ಮತ್ತು ವಾಣಿಜ್ಯಕ ಎಂಬ ಎರಡು ಆವೃತ್ತಿಗಳು ಲಭ್ಯ. 

e - ಸುದ್ದಿ

ಆರ್ಕುಟ್ ಭಗ್ನಪ್ರೇಮಿ

ಭಗ್ನಪ್ರೇಮಿಗಳು ಆತ್ಮಹತ್ಯೆ ಮಾಡಿಕೊಳ್ಳುವುದು ಹಳೆಯ ಕಥೆ. ಅದರ ಬಗ್ಗೆ ರೀಲುಗಟ್ಟಲೆ ಸಿನಿಮಾ ಮಾಡಿ ಆಗಿದೆ. ಇತ್ತೀಚೆಗೆ ನಮ್ಮದೇ ಭಾರತ ದೇಶದ ತ್ರಿಪುರಾ ರಾಜ್ಯದಿಂದ ವರದಿಯಾದ ಕಥೆ ಸ್ವಲ್ಪ ಆಧುನಿಕವಾಗಿದೆ. ಇದನ್ನು ಆರ್ಕುಟ್ ಭಗ್ನಪ್ರೇಮದ ಕಥೆ ಎನ್ನಬಹುದು. ವೈದ್ಯಕೀಯ ವಿದ್ಯಾರ್ಥಿ ರೂಪಕ್ ಆರ್ಕುಟ್‌ನಲ್ಲಿ ಒಂದು ಹುಡುಗಿಯನ್ನು ಪ್ರೀತಿಸಿದ್ದ. ಆಕೆ ಈತನನ್ನು ಕಡೆಗಣಿಸುತ್ತಿದ್ದಾಳೆ ಎಂದು ನೊಂದುಕೊಂಡ ಆತ ಆತ್ಮಹತ್ಯೆ ಮಾಡಿಕೊಂಡ. ಸ್ವಾರಸ್ಯವೆಂದರೆ ಆತ ಆಕೆಯನ್ನು ಒಮ್ಮೆಯೂ ಮುಖತಃ ಭೇಟಿ ಆಗಿರಲಿಲ್ಲ. ಕೊಲ್ಕತ್ತಾ ಮೂಲದ ಬೆಂಗಳೂರಿನಲ್ಲಿ ಇಂಜಿನಿಯರಿಂಗ್ ಕಲಿಯುತ್ತಿದ್ದ ಆಕೆಯನ್ನು ಎರಡು ವರ್ಷಗಳ ಹಿಂದೆ ಆತ ಆರ್ಕುಟ್‌ನಲ್ಲಿ ಭೇಟಿಯಾಗಿದ್ದ.

e- ಪದ

ಚತುರವಾಣಿ (ಸ್ಮಾರ್ಟ್‌ಫೋನ್ - smartphone) - ಮೊಬೈಲ್ ಫೋನಿನ ಕೆಲಸಗಳನ್ನೂ ಮಾಡಬಲ್ಲ ಕಿಸೆಗಣಕ. ಇತ್ತೀಚೆಗೆ ಇಂತಹ ಫೋನುಗಳು ಅಗ್ಗವಾಗುತ್ತ ಜನಸಾಮಾನ್ಯರ ಕೈಗೆಟುಕುವಂತಾಗುತ್ತಿವೆ. ಈ ಫೋನುಗಳಲ್ಲಿ ಅಂತರಜಾಲ ನೋಡುವುದು, ಇಮೈಲ್ ಮಾಡುವುದು, ಪದಸಂಸ್ಕರಣೆ, ಜಿಪಿಎಸ್ ಬಳಸಿ ತಾನು ಇರುವ ಸ್ಥಾನ ತಿಳಿಯುವುದು, ಇನ್ನೂ ಏನೇನೋ ಮಾಡಬಹುದು. ಇಂತಹ ಫೋನುಗಳಿಗೆ ಸಹಸ್ರಾರು ತಂತ್ರಾಂಶಗಳು ಅಂತರಜಾಲದಲ್ಲಿ ಲಭ್ಯವಿವೆ. ಇವುಗಳು ಕೆಲಸ ಮಾಡಲು ಆಂಡ್ರೋಯಿಡ್, ವಿಂಡೋಸ್ ಫೋನ್, ಐಓಎಸ್, ಇತ್ಯಾದಿ ಯಾವುದಾದರೊಂದು ಕಾರ್ಯಾಚರಣೆಯ ವ್ಯವಸ್ಥೆ ಅಗತ್ಯ.

e - ಸಲಹೆ

ಗಿರೀಶ್ ಅವರ ಪ್ರಶ್ನೆ: ನನ್ನ ಗಣಕದ ಡೆಸ್ಕ್‌ಟಾಪ್ ಮೇಲೆ ಇರುವ ಎಲ್ಲ ಐಕಾನ್‌ಗಳು ತುಂಬ ಚಿಕ್ಕದಾಗಿವೆ. ಆವನ್ನು ದೊಡ್ಡದಾಗಿಸುವುದು ಹೇಗೆ? ನಾನು ವಿಂಡೋಸ್೭ ಬಳಸುತ್ತಿದ್ದೇನೆ.
ಉ: ಎಲ್ಲ ತಂತ್ರಾಂಶಗಳ ಕಿಟಿಕಿಗಳನ್ನು ಕಿರಿದಾಗಿಸಿ ಅಂದರೆ ಕೇವಲ ಡೆಸ್ಕ್‌ಟಾಪ್ ಮಾತ್ರ ಇರುವಂತೆ ಮಾಡಿ. ಈಗ Ctrl-A ಒತ್ತುವ ಮೂಲಕ ಎಲ್ಲ ಐಕಾನ್‌ಗಳನ್ನು ಆಯ್ಕೆ ಮಾಡಿ. ನಂತರ Ctrl ಕೀಲಿಯನ್ನು ಒತ್ತಿ ಹಿಡಿದುಕೊಂಡು ಮೌಸ್‌ನ ಚಕ್ರವನ್ನು ತಿರುಗಿಸಿ. 

ಕಂಪ್ಯೂತರ್ಲೆ

ಕೋಲ್ಯನಲ್ಲಿ ಇರುವ ಫೋನಿನಲ್ಲಿ ಕನ್ನಡ ಅಕ್ಷರಗಳು ಮೂಡಿಬರುತ್ತಿರಲಿಲ್ಲ. ನವಂಬರ್ ತಿಂಗಳು ಬಂದಿದೆ. ಮೊಬೈಲ್ ಫೋನಿನಲ್ಲಿ ಕನ್ನಡ ಮೂಡಿಬರದಿದ್ದರೆ ಚೆನ್ನಾಗಿರುವುದಿಲ್ಲ ತಾನೆ? ಆತ ಕಾಗದದಲ್ಲಿ ಕನ್ನಡ ಎಂದು ಬರೆದು ಅದನ್ನು ಕತ್ತರಿಸಿ ಫೋನಿಗೆ ಅಂಟಿಸಿ ಎಲ್ಲರಿಗೂ “ನನ್ನ ಫೋನಿನಲ್ಲಿ ಕನ್ನಡ ಕಾಣಿಸುತ್ತಿದೆ” ಎಂದು ತೋರಿಸಿದ.

ಸೋಮವಾರ, ನವೆಂಬರ್ 1, 2010

ಗಣಕಿಂಡಿ - ೦೭೬ (ನವಂಬರ್ ೦೧, ೨೦೧೦)

ಅಂತರಜಾಲಾಡಿ

ಕಂಪ್ಯೂನಲ್ಲಿಕನ್ನಡ

ಮಾಹಿತಿ ತಂತ್ರಜ್ಞಾನದಲ್ಲಿ ಕನ್ನಡ ಬೆಳೆಯಬೇಕಾಗಿದೆ. ಗಣಕದಲ್ಲಿ ಕನ್ನಡ ಬಳಕೆಯ ಬಗ್ಗೆ ಜನರಲ್ಲಿ ಹಲವಾರು ಸಂಶಯಗಳಿರುತ್ತವೆ. ಹಾಗೆಯೇ ಗಣಕ ಮತ್ತು ಅಂತರಜಾಲ ಬಳಕೆ ಬಗ್ಗೆ ಕನ್ನಡದಲ್ಲಿ ಮಾಹಿತಿ ಜನರಿಗೆ ಬೇಕಾಗಿದೆ. ಮಾಹಿತಿ ತಂತ್ರಜ್ಞಾನವೆಂದರೆ ಕೇವಲ ಗಣಕ ಮತ್ತು ಅಂತರಜಾಲವಲ್ಲ. ಮೊಬೈಲ್ ಫೋನು ಕೂಡ ಈ ಪಟ್ಟಿಗೆ ಸೇರುತ್ತದೆ. ೨೧ನೆಯ ಶತಮಾನದಲ್ಲಿ ಕನ್ನಡ ಉಳಿದು ಬೆಳೆಯಬೇಕಾದರೆ ಮಾಹಿತಿ ತಂತ್ರಜ್ಞಾನದ ಎಲ್ಲ ಅಂಗಗಳಲ್ಲಿ ಕನ್ನಡದ ಅಳವಡಿಕೆ ಮತ್ತು ಬಳಕೆ ವ್ಯಾಪಕವಾಗಿ ಆಗಬೇಕು. ಈ ಆಶಯಗಳಿಗೆ ಪೂರಕವಾಗಿರುವ ಒಂದು ಜಾಲತಾಣ compuinkannada.co.cc. ಈ ಜಾಲತಾಣದಲ್ಲಿ ಕನ್ನಡ ಭಾಷೆಯಲ್ಲಿ ಮಾಹಿತಿ ತಂತ್ರಜ್ಞಾನದ ವಿವಿಧ ಅಂಗಗಳ ಬಗ್ಗೆ ಲೇಖನ, ಟ್ಯುಟೋರಿಯಲ್, ಉಚಿತ ತಂತ್ರಾಂಶ ಎಲ್ಲ ಇವೆ.

ಡೌನ್‌ಲೋಡ್

ಆಂಡ್ರೋಯಿಡ್‌ಗೆ ತಂತ್ರಾಂಶ

ಇತ್ತೀಚೆಗೆ ತುಂಬ ಜನಪ್ರಿಯವಾಗುತ್ತಿರುವ ಮೊಬೈಲ್ ಫೋನ್ ಕಾರ್ಯಾಚರಣೆಯ ವ್ಯವಸ್ಥೆ ಆಂಡ್ರೋಯಿಡ್. ಇದು ಗೂಗಲ್‌ನವರು ಬಿಡುಗಡೆ ಮಾಡಿದ ಕಾರ್ಯಾಚರಣೆಯ ವ್ಯವಸ್ಥೆ. ಇವುಗಳನ್ನು ಸಾಮಾನ್ಯವಾಗಿ ಸ್ಮಾರ್ಟ್‌ಫೋನ್ ಎಂದು ಕರೆಯಲಾಗುವ ಮೊಬೈಲ್ ಫೋನ್‌ಗಳಲ್ಲಿ ಬಳಸುತ್ತಾರೆ. ಈ ಕಾರ್ಯಾಚರಣೆಯ ವ್ಯವಸ್ಥೆಯಲ್ಲಿ ಕೆಲಸ ಮಾಡುವ ತಂತ್ರಾಂಶಗಳು ಲಕ್ಷದಷ್ಟಿವೆ. ಇವುಗಳಲ್ಲಿ ಎಂದಿನಂತೆ ಉಚಿತ ಮತ್ತು ವಾಣಿಜ್ಯಕ ಎಂಬ ವಿಭಾಗಗಳಿವೆ. ಈ ಆಂಡ್ರೋಯಿಡ್ ಫೋನ್ ತಂತ್ರಾಂಶಗಳು ಬೇಕಿದ್ದರೆ ನೀವು ಭೇಟಿ ನೀಡಬೇಕಾದ ಜಾಲತಾಣ www.android.com. ಈ ಜಾಲತಾಣವನ್ನು ಗಣಕದ ಮೂಲಕ ಅಥವಾ ನಿಮ್ಮ ಆಂಡ್ರೋಯಿಡ್ ಫೋನ್ ಮೂಲಕವೂ ಪ್ರವೇಶಿಸಬಹುದು.

e - ಸುದ್ದಿ

ಉತ್ತಮ ಕಳ್ಳ

ಸ್ವೀಡನ್ ದೇಶದ ಪ್ರೊಫೆಸರ್ ಒಬ್ಬರು ತಮ್ಮ ಗಣಕವಿದ್ದ ಚೀಲವನ್ನು ತಮ್ಮ ಕಟ್ಟಡದ ಮೆಟ್ಟಿಲ ಬಳಿ ಇಟ್ಟು ಬಟ್ಟೆ ತೊಳೆಯುವ ಯಂತ್ರದ ಬಳಿಗೆ ಹೋಗಿದ್ದರು. ವಾಪಾಸು ಬಂದಾಗ ಅವರ ಚೀಲ ಕಳವಾಗಿತ್ತು. ಅವರು ಕೂಡಲೆ ಪೋಲೀಸರಿಗೆ ತಿಳಿಸಿದರು. ಒಂದು ಘಂಟೆಯ ನಂತರ ನೋಡಿದಾಗ ಅವರು ಚೀಲ ಇಟ್ಟ ಜಾಲಗದಲ್ಲಿ ಅವರ ಚೀಲ ಪ್ರತ್ಯಕ್ಷವಾಗಿತ್ತು. ಅದರಲ್ಲಿದ್ದ ಕ್ರೆಡಿಟ್ ಕಾರ್ಡ್, ಫೋನ್, ಡೈರಿ, ಇತ್ಯಾದಿ ವಸ್ತುಗಳು ಸುರಕ್ಷಿತವಾಗಿದ್ದವು. ಆದರೆ ಅವರ ಲ್ಯಾಪ್‌ಟಾಪ್ ಮಾತ್ರ ಇರಲಿಲ್ಲ. ಸುಮಾರು ಒಂದು ವಾರದ ನಂತರ ಅವರಿಗೆ ಒಂದು ಪ್ಯಾಕೆಟ್ ಕೋರಿಯರ್ ಮೂಲಕ ಬಂತು. ಅದರಲ್ಲಿ ಒಂದು ಯುಎಸ್‌ಬಿ ಡ್ರೈವ್ ಇತ್ತು. ಅದನ್ನು ಪರಿಶೀಲಿಸಿದಾಗ ಅವರಿಗೆ ಆಶ್ಚರ್ಯ ಕಾದಿತ್ತು. ಅವರ ಲ್ಯಾಪ್‌ಟಾಪ್‌ನಲ್ಲಿ ಇದ್ದ ಅವರಿಗೆ ಅಗತ್ಯವಾಗಿದ್ದ ಎಲ್ಲ ಮಾಹಿತಿಗಳು ಆ ಯುಎಸ್‌ಬಿ ಡ್ರೈವ್‌ನಲ್ಲಿದ್ದವು. ಕಳ್ಳರಲ್ಲೂ ಒಳ್ಳೆಯವರಿರುತ್ತಾರೆ ಅಲ್ಲವೇ?

e- ಪದ

ಆಂಡ್ರೋಯಿಡ್ (Android) - ಮೊಬೈಲ್ ಫೋನ್‌ಗಳಲ್ಲಿ ಬಳಕೆಯಾಗುವ ಒಂದು ವಿಧದ ಕಾಯಾಚರಣೆಯ ವ್ಯವಸ್ಥೆ. ಇದು ಮೂಲತಃ ಮುಕ್ತ ತಂತ್ರಾಂಶವಾದ ಲಿನಕ್ಸ್‌ನಿಂದ ವಿಕಾಸವಾದುದು. ೨೦೦೫ರಲ್ಲಿ ಇದೇ ಹೆಸರಿನ ಕಂಪೆನಿ ಇದನ್ನು ಪ್ರಥಮವಾಗಿ ತಯಾರು ಮಾಡಿತು. ನಂತರ ಗೂಗಲ್ ಈ ಕಂಪೆನಿಯನ್ನು ಕೊಂಡುಕೊಂಡು ಮುಕ್ತವಾಗಿ ಬಿಡುಗಡೆ ಮಾಡಿದೆ. ಈಗ ಪ್ರಪಂಚದ ಸುಮಾರು ಶೇಕಡ ೨೦ ಸ್ಮಾರ್ಟ್‌ಫೋನ್‌ಗಳು ಈ ಕಾರ್ಯಾಚರಣೆಯ ವ್ಯವಸ್ಥೆಯನ್ನು ಬಳಸುತ್ತವೆ. ಈ ನಮೂನೆಯ ಫೋನುಗಳಲ್ಲಿ ಅಂತರಜಾಲ ಸಂಪರ್ಕ, ಇಮೈಲ್, ಜಿಪಿಎಸ್, ಇತ್ಯಾದಿ ಎಲ್ಲ ಸೌಲಭ್ಯಗಳಿರುತ್ತವೆ.

e - ಸಲಹೆ

ಆಂಡ್ರೋಯಿಡ್ ಫೋನಿನಲ್ಲಿ ಕನ್ನಡ

ಆಂಡ್ರೋಯಿಡ್ ಫೋನಿನಲ್ಲಿ ಕನ್ನಡ ಯುನಿಕೋಡ್ ಜಾಲತಾಣ ವೀಕ್ಷಣೆ ಮಾಡಬೇಕೇ? ಅದಕ್ಕಾಗಿ ನೀವು ಪ್ರಥಮವಾಗಿ ಒಪೆರಾ ಮಿನಿ ಎಂಬ ಜಾಲತಾಣ ವೀಕ್ಷಣೆಯ ತಂತ್ರಾಂಶವನ್ನು ಆಂಡ್ರೋಯಿಡ್ ಜಾಲತಾಣದಿಂದ ಫೋನಿಗೆ ಡೌನ್‌ಲೋಡ್ ಮಾಡಿಕೊಳ್ಳಬೇಕು. ನಂತರ ಜಾಲತಾಣದ ವಿಳಾಸ ನಮೂದಿಸುವ ಜಾಗದಲ್ಲಿ about:config ಎಂದು ಟೈಪಿಸಬೇಕು. ಅಲ್ಲಿ ಮೂಡಿಬರುವ ಆಯ್ಕೆಗಳಲ್ಲಿ Use bitmap fonts for complex scripts ಎಂದು ಆಯ್ಕೆ ಮಾಡಿಕೊಳ್ಳಬೇಕು. ನಂತರ ಕನ್ನಡ ಯುನಿಕೋಡ್‌ನಲ್ಲಿರುವ ಜಾಲತಾಣಗಳ ವೀಕ್ಷಣೆ ಮಾಡಬಹುದು.

ಕಂಪ್ಯೂತರ್ಲೆ

ಐಟಿ ಮಂದಿ ಹಾಡು

ಮುದ್ದು ಕಂದನಾಗಿ ಹುಟ್ಟಿ ಕೀಬೋರ್ಡ್ ಮೌಸ್ ಕುಟ್ಟಿಕೊಂಡು
ಹಂಗೂ ಹಿಂಗೂ ಪ್ರೋಗ್ರಾಮ್ ಮಾಡಿ ಲೈಫು ಇಷ್ಟೇನೆ

ಸೋಮವಾರ, ಅಕ್ಟೋಬರ್ 25, 2010

ಗಣಕಿಂಡಿ - ೦೭೫ (ಅಕ್ಟೋಬರ್ ೨೫, ೨೦೧೦)

ಅಂತರಜಾಲಾಡಿ

ಕೃಷಿ ಮಾಧ್ಯಮ ಕೇಂದ್ರ

ಪತ್ರಿಕೆಗಳು ನೂರಾರಿವೆ. ಕೃಷಿಪರವಾಗಿರುವವೂ ಕೆಲವಿವೆ. ಕೃಷಿಪತ್ರಿಕೋದ್ಯಮದ ಬೆಳವಣಿಗೆಗೆ ಪೂರಕವಾಗಿ ಅಸ್ತಿತ್ವಕ್ಕೆ ಬಂದದ್ದು ಕೃಷಿ ಮಾಧ್ಯಮ ಕೇಂದ್ರ. ಈಗ ಇದಕ್ಕೆ ದಶಕದ ಸಂಭ್ರಮ. ಕೃಷಿ ಗ್ರಾಮೀಣ ಪತ್ರಿಕೋದ್ಯಮ ತರಬೇತಿ, ಕೃಷಿ ಪತ್ರಿಕೋದ್ಯಮ ಪ್ರಶಸ್ತಿ, ಅಭಿವೃದ್ಧಿ ಪತ್ರಿಕೋದ್ಯಮ ಕಾರ್ಯಾಗಾರ, ಈ ಎಲ್ಲ ವಿಷಯಗಳಿಗೆ ಸಂಬಂಧಿಸಿದ ಪುಸ್ತಕ ಪ್ರಕಟಣೆ -ರೀತಿ ಹಲವಾರು ಚಟುವಟಿಕೆಗಳನ್ನು ಈ ಕೇಂದ್ರ ಹಮ್ಮಿಕೊಂಡಿದೆ. ಈ ಕೇಂದ್ರದ ಜಾಲತಾಣ krushimadhyama.org. ಈ ಜಾಲತಾಣ ಕನ್ನಡ ಹಾಗೂ ಇಂಗ್ಲಿಶ್ ಭಾಷೆಗಳಲ್ಲಿವೆ. ಕಾಮ್ ನ್ಯೂಸ್ ಹೆಸರಿನ ಸುದ್ದಿಪತ್ರಿಕೆಯ ಈಗಿನ ಮತ್ತು ಹಳೆಯ ಸಂಚಿಕೆಗಳನ್ನೂ ಇದೇ ಜಾಲತಾಣದಲ್ಲಿ ಓದಬಹುದು. ಅಂದ ಹಾಗೆ ಇದೇ ಅಕ್ಟೋಬರ್ ೨೮ರಂದು ಚಿಕ್ಕಮಗಳೂರಿನಲ್ಲಿ ಈ ಕೇಂದ್ರ ತನ್ನ ದಶಮಾನೋತ್ಸವವನ್ನು ಆಚರಿಸುತ್ತಿದೆ.

ಡೌನ್‌ಲೋಡ್

ಮುಕ್ತ ಆಫೀಸ್

ಎಲ್ಲರೂ ಉಚಿತ ಹಾಗೂ ಮುಕ್ತವಾಗಿ ಬಳಸಬಲ್ಲ ಆಫೀಸ್ ತಂತ್ರಾಂಶಗುಚ್ಛ openoffice. ಇದು ಸನ್‌ಮೈಕ್ರೋಸಿಸ್ಟಮ್ ಕಂಪೆನಿಗೆ ಸೇರಿತ್ತು. ಸನ್ ಕಂಪೆನಿಯನ್ನು ಅರೇಕಲ್ ಕಂಪೆನಿ ಕೊಂಡುಕೊಂಡಿತು. ಆಗ ಈ ಮುಕ್ತ ಆಫೀಸ್‌ಗೆ ತೊಂದರೆಯಾಯಿತು. ಈ ತಂತ್ರಾಂಶವನ್ನು ಮುಕ್ತವಾಗಿಯೇ ಮುಂದುವರಿಯಲು ಅದು ಅನುವು ಮಾಡಿಕೊಡುತ್ತದೆಯೇ ಎಂಬ ಅನುಮಾನ ಈ ತಂತ್ರಾಂಶಕ್ಕಾಗಿ ಕೆಲಸ ಮಾಡುತ್ತಿರುವವರಿಗೆ ಬಂತು. ಈಗ ಅವರೆಲ್ಲ ಸೇರಿ libreoffice ಎಂಬ ಹೊಸ ಹೆಸರಿನಲ್ಲಿ ಇದನ್ನು ಬಿಡುಗಡೆ ಮಾಡಲು ಪ್ರಾರಂಭಿಸಿದ್ದಾರೆ. ಇದು ದೊರೆಯುವ ಜಾಲತಾಣ  www.documentfoundation.org. ಈ ಜಾಲತಾಣದಿಂದ ಕಾಲಕಾಲಕ್ಕೆ ಬಿಡುಗಡೆಯಾಗುವ ಹೊಸ ಹೊಸ ಆವೃತ್ತಿಗಳನ್ನು ಡೌನ್‌ಲೋಡ್ ಮಾಡಿಕೊಂಡು ಬಳಸಿಕೊಳ್ಳಬಹುದು.

e - ಸುದ್ದಿ

ಯುನಿಕೋಡ್‌ನಲ್ಲಿ ರೂಪಾಯಿ

ಭಾರತ ಸರಕಾರವು ನಮ್ಮ ಹಣ ರೂಪಾಯಿಗೆ ಒಂದು ಹೊಸ ಚಿಹ್ನೆಯನ್ನು ಘೋಷಿಸಿದ್ದು ಎಲ್ಲರಿಗೂ ನೆನಪಿರಬಹುದು. ಈ ಚಿಹ್ನೆ ಮಾಹಿತಿ ತಂತ್ರಜ್ಞಾನದ ಎಲ್ಲ ಕಡೆ ಬಳಕೆಗೆ ಬರಬೇಕಿದ್ದರೆ ಪ್ರಥಮವಾಗಿ ಇದು ಯುನಿಕೋಡ್‌ನಲ್ಲಿ ಅಳವಡಿಕೆಯಾಗಬೇಕು. ಸಂತಸದ ಸುದ್ದಿಯೇನೆಂದರೆ ಅಕ್ಟೋಬರ್ ೧೧ರಂದು ಘೋಷಿಸಲ್ಲಪಟ್ಟ ಯುನಿಕೋಡ್‌ನ ಆವೃತ್ತಿ ೬.೦ ರಲ್ಲಿ ಭಾರತದ ರೂಪಾಯಿ ಚಿಹ್ನೆಗೆ ಸ್ಥಾನ ನೀಡಲಾಗಿದೆ. ಇದರ ಯುನಿಕೋಡ್ ಸಂಕೇತಸ್ಥಾನ 20B9. ಫಾಂಟ್ ತಯಾರಕರು ಇನ್ನುಮುಂದೆ ಈ ಸ್ಥಾನದಲ್ಲಿ ಹೊಸ ರೂಪಾಯಿ ಚಿಹ್ನೆಯನ್ನು ಸೇರಿಸಬಹುದು. ಆದರೆ ಎಲ್ಲ ಕಾರ್ಯಾಚರಣೆಯ ವ್ಯವಸ್ಥೆ, ದತ್ತಸಂಗ್ರಹ (ಡಾಟಾಬೇಸ್) ತಂತ್ರಾಂಶಗಳಲ್ಲಿ ಈ ಚಿಹ್ನೆಯನ್ನು ಅಳವಡಿಸಿಕೊಳ್ಳಬೇಕಾದರೆ ಇನ್ನೂ ಕನಿಷ್ಠ ಒಂದು ವರ್ಷ ಕಾಲಾವಧಿ ಬೇಕು. ಅಂದಹಾಗೆ ತಮಿಳು, ಗುಜರಾತಿ ಹಾಗೂ ಬೆಂಗಾಳಿ ಭಾಷೆಯ ರೂಪಾಯಿ ಚಿಹ್ನೆಗಳಿಗೆ ಯುನಿಕೋಡ್‌ನಲ್ಲಿ ಪ್ರತ್ಯೇಕ ಜಾಗವಿದೆ. ಕನ್ನಡ ಲಿಪಿಯಲ್ಲಿ ತುಳು, ಕೊಡವ, ಬ್ಯಾರಿ, ಇತ್ಯಾದಿ ಭಾಷೆಗಳನ್ನು ಯುನಿಕೋಡ್‌ನಲ್ಲಿ ಸೇರಿಸುವ ಬಗ್ಗೆ ಯಾರೂ ಕೆಲಸ ಮಾಡುತ್ತಿಲ್ಲ.

e- ಪದ

ಜಾಹೀರಾತು ತಂತ್ರಾಂಶ (adware) -ಬಳಕೆದಾರರಿಗೆ ಉಚಿತವಾಗಿರುವ ಆದರೆ ಜಾಹೀರಾತುಗಳನ್ನು ಪ್ರದರ್ಶಿಸುವ ತಂತ್ರಾಂಶ. ಕೆಲವು ತಂತ್ರಾಂಶಗಳು ಬಳಕೆಗೇನೋ ಉಚಿತವಾಗಿ ದೊರೆಯುತ್ತವೆ. ಆದರೆ ಅವುಗಳನ್ನು ಬಳಸುವಾಗ ಜಾಹೀರಾತುಗಳನ್ನು ಪ್ರದರ್ಶಿಸುತ್ತವೆ. ಆ ಜಾಹೀರಾತಿನ ಮೇಲೆ ಕ್ಲಿಕ್ ಮಾಡಿದರೆ ಅದು ನಿಮ್ಮನ್ನು ಸಂಬಂಧಪಟ್ಟ ಜಾಲತಾಣಕ್ಕೆ ಕರೆದೊಯ್ಯುತ್ತದೆ. ತಂತ್ರಾಂಶ ತಯಾರಿಯ ವೆಚ್ಚವನ್ನು ತಯಾರಕರು ಹೀಗೆ ಜಾಹೀರಾತುಗಳ ಮೂಲಕ ಪಡೆಯುತ್ತಾರೆ.

e - ಸಲಹೆ

ಸಂತೋಷಕುಮಾರರ ಪ್ರಶ್ನೆ: ಕನ್ನಡ ಭಾಷೆಯ e-ಪುಸ್ತಕಗಳ ಜಾಲತಾಣ ಇದೆಯೇ?
ಉ: ಕೇಂದ್ರ ಸರಕಾರದ ವಿದ್ಯನ್ಮಾನ ಗ್ರಂಥಾಲಯ ಜಾಲತಾಣದಲ್ಲಿ ಹಲವಾರು ಕನ್ನಡ ಪುಸ್ತಕಗಳಿವೆ. ಅದರ ವಿಳಾಸ www.dli.ernet.in.

ಕಂಪ್ಯೂತರ್ಲೆ


ಕೋಲ್ಯನ ಹುಟ್ಟುಹಬ್ಬಕ್ಕೆ ಯಾರೋ ಕೇಕ್‌ನ ಚಿತ್ರವನ್ನು ಶುಭಾಶಯವೆಂದು ಇಮೈಲ್ ಮೂಲಕ ಕಳುಹಿಸಿದ್ದರು. ಕೋಲ್ಯ ಅದನ್ನು ಮುದ್ರಿಸಿ ತಿನ್ನಲು ಹೊರಟ!

ಸೋಮವಾರ, ಅಕ್ಟೋಬರ್ 18, 2010

ಗಣಕಿಂಡಿ - ೦೭೪ (ಅಕ್ಟೋಬರ್ ೧೮, ೨೦೧೦)

ಅಂತರಜಾಲಾಡಿ

ಮೊಬೈಲ್‌ಫೋನು ಕೊಳ್ಳಬೇಕೇ?

ಒಂದು ಕಾಲವಿತ್ತು. ಮೊಬೈಲ್ ಫೋನ್ ಎಂದರೆ ಯಾರಿಗಾದರು ಕರೆ ಮಾಡುವುದು, ಯಾರಾದರು ಕರೆ ಮಾಡಿದರೆ ಮಾತನಾಡುವುದು, ಎಸ್‌ಎಂಎಸ್ ಕಳುಹಿಸುವುದು -ಇವಿಷ್ಟೆ ಮೊಬೈಲ್ ಫೋನಿನ ಕೆಲಸಗಳಾಗಿತ್ತು. ಆದರೆ ಈಗ ಕಾಲ ಬದಲಾಗಿದೆ. ಮೊಬೈಲ್ ಫೋನು ಒಂದು ಕಿಸೆಗಣಕವಾಗಿ ಪರಿವರ್ತಿತವಾಗಿದೆ. ಅದರಲ್ಲಿ ಇಮೈಲ್, ಅಂತರಜಾಲ ವೀಕ್ಷಣೆ, ಕ್ಯಾಮರಾ ಬಳಸಿ ಫೋಟೋ ತೆಗೆಯುವುದು, ಬ್ಯಾಂಕಿಂಗ್, ತಾವಿರುವ ಸ್ಥಳದ ಮ್ಯಾಪ್ ನೋಡುವುದು, ಹೀಗೆ ಇನ್ನೂ ಏನೇನೋ ಮಾಡಬಹುದಾಗಿದೆ. ಫೋನಿನ ಗುಣಲಕ್ಷಣಗಳಿಗನುಗುಣವಾಗಿ ಬೆಲೆಯಲ್ಲೂ ವ್ಯತ್ಯಾಸವಿದೆ. ಮಾರುಕಟ್ಟೆಯಲ್ಲಿ ಲಭ್ಯವಿರುವ ಸಾವಿರಾರು ಫೋನುಗಳಲ್ಲಿ ಯಾವುದನ್ನು ಕೊಳ್ಳುವುದು, ಯಾವ ಫೋನಿನಲ್ಲಿ ಯಾವ ಸೌಲಭ್ಯಗಳಿವೆ ತಿಳಿಯುವುದು ಹೇಗೆ? ಈ ಎಲ್ಲ ಪ್ರಶ್ನೆಗಳಿಗೆ ಉತ್ತರ ದೊರೆಯುವ ಜಾಲತಾಣ  www.fonearena.com.

ಡೌನ್‌ಲೋಡ್


ರೇಡಿಯೋ ಆಲಿಸಿರಿ


ಕಾಲ ಬದಲಾದಂತೆ ರೇಡಿಯೋವೂ ಬದಲಾಗಿದೆ. ಈಗ ಅಂತರಜಾಲದಲ್ಲಿ ಹಲವಾರು ರೇಡಿಯೋ ಕೇಂದ್ರಗಳಿವೆ. ಅವುಗಳ ಜಾಲತಾಣ ವಿಳಾಸ ತಿಳಿದಿದ್ದರೆ ಬ್ರೌಸರ್ ಮೂಲಕ ಅವುಗಳನ್ನು ಆಲಿಸಬಹುದು. ಇನ್ನೂ ಸರಳ ವಿಧಾನವೆಂದರೆ ಈ ಜಾಲತಾಣಗಳನ್ನು ತೆರೆದು ರೇಡಿಯೋ ಆಲಿಸಲು ಅನುವು ಮಾಡಿಕೊಡುವ ತಂತ್ರಾಂಶದ ಬಳಕೆ. ಇಂತಹ ತಂತ್ರಾಂಶಗಳೂ ಹಲವಾರಿವೆ. ಅಂತಹ ಒಂದು ಉಚಿತ ತಂತ್ರಾಂಶ  TapinRadio. ಇದು ತುಂಬ ಸರಳವಾಗಿದೆ. ಪ್ರಪಂಚದ ಸಾವಿರಾರು ರೇಡಿಯೋ ಜಾಲತಾಣಗಳಿಗೆ ಸೂಚಿ ಇದರಲ್ಲಿದೆ. ರೇಡಿಯೋ ಆಲಿಸುವುದು ಮಾತ್ರವಲ್ಲದೆ ಕಾರ್ಯಕ್ರಮಗಳನ್ನು ಮುದ್ರಿಸಿಕೊಳ್ಳುವ ಸವಲತ್ತೂ ಈ ತಂತ್ರಾಂಶದಲ್ಲಿದೆ. ಈ ಉಚಿತ ತಂತ್ರಾಂಶ ಬೇಕಿದ್ದರೆ ನೀವು ಭೇಟಿ ನೀಡಬೇಕಾದ ಜಾಲತಾಣ http://bit.ly/derkS3.

e - ಸುದ್ದಿ

ಟ್ವಿಟ್ಟರ್ ಮದುವೆ


ಅಂತರಜಾಲದಲ್ಲಿ ಚರ್ಚಾವೇದಿಕೆಗಳಲ್ಲಿ ಅಥವಾ ಬ್ಲಾಗ್‌ತಾಣಗಳಲ್ಲಿ ಭೇಟಿಯಾಗಿ ಪ್ರೇಮದಲ್ಲಿ ಪರಿವರ್ತನೆಯಾಗಿ ಮದುವೆಯಲ್ಲಿ ಅಂತ್ಯವಾಗುವುದು ಹೊಸದೇನಲ್ಲ. ಅದರದೇ ಮುಂದುವರಿದ ಅಧ್ಯಾಯ ಟ್ವಿಟ್ಟರ್. ಪಾಲ್ ಮತ್ತು ಸಾಯಿರಾ ಅವರು ಟ್ವಿಟ್ಟರ್‌ನಲ್ಲಿ ಯಾವಾಗಲೂ ಒಬ್ಬರನ್ನೊಬ್ಬರು ಹಿಂಬಾಲಿಸುತ್ತಿದ್ದರು, ಒಬ್ಬರಿಗೊಬ್ಬರು ಟ್ವೀಟ್ ಮಾಡುತ್ತಿದ್ದರು. ಹೀಗೆ ಮುಂದುವರಿದು ಕೊನೆಗೆ ಮದುವೆಯೂ ಆದರು. ಅಷ್ಟೇ ಅಲ್ಲ. ಈ ಮದುವೆಯ ಆಹ್ವಾನ, ಮದುವೆ ನಡೆದಾಗ ಎಲ್ಲ ನಡಾವಳಿಗಳು ಎಲ್ಲ ಟ್ವಿಟ್ಟರ್ ಮೂಲಕವೇ ಜರುಗಿದವು.

e- ಪದ

ಸೈಮಲ್‌ಕಾಸ್ಟ್ (Simulcast =simultaneous broadcast) - ಏಕಕಾಲದಲ್ಲಿ ಹಲವಾರು ವಿಧಾನಗಳಲ್ಲಿ ಬಹುಮಾಧ್ಯಮ ಕಾರ್ಯಕ್ರಮದ ಪ್ರಸಾರ. ಈ ಹಲವಾರು ವಿಧಾನಗಳಲ್ಲಿ ರೇಡಿಯೋ, ಟಿವಿ, ಅಂತರಜಾಲ, ಎಫ್‌ಎಂ, ಉಪಗ್ರಹ ಮೂಲಕ ಪ್ರಸಾರ ಎಲ್ಲ ಸೇರಿವೆ.

e - ಸಲಹೆ

ಜಗದೀಶರ ಪ್ರಶ್ನೆ: IMEI ಹಾಗೂ ಮೊಬೈಲ್ ಹ್ಯಾಂಡ್ ಸೆಟ್ ಸಂಖ್ಯೆಯ ಆಧಾರದ ಮೇಲೆ ಕಳೆದುಹೊದ ಮೊಬೈಲ್‌ಅನ್ನು ಪತ್ತೆ ಹಚ್ಚಲು ಯಾವುದಾದರೂ ಜಾಲತಾಣ ಇದೆಯೇ? ಇದ್ದರೆ ಈ ಬಗ್ಗೆ ಮಾಹಿತಿ ನೀಡಬೇಕಾಗಿ ವಿನಂತಿ. 
ಉ: trackimei.com

ಕಂಪ್ಯೂತರ್ಲೆ

ಫ್ಲಾಪಿ ಹೋಯ್ತು ಸಿ.ಡಿ. ಬಂತು ಡುಂ ಡುಂ
ಸಿ.ಡಿ. ಹೋಯ್ತು ಡಿ.ವಿ.ಡಿ. ಬಂತು ಡುಂ ಡುಂ
ಡಿ.ವಿ.ಡಿ. ಹೋಯ್ತು ಯು.ಎಸ್.ಬಿ ಬಂತು ಡುಂ ಡುಂ

ಸೋಮವಾರ, ಅಕ್ಟೋಬರ್ 11, 2010

ಗಣಕಿಂಡಿ - ೦೭೩ (ಅಕ್ಟೋಬರ್ ೧೧, ೨೦೧೦)

ಅಂತರಜಾಲಾಡಿ

ಕಾನೂನು ಮಾತನಾಡಿ

ಕಾನೂನು ಎಲ್ಲರಿಗೂ ಬೇಕು. ಆದರೆ ಕಾನೂನುಗಳ ಬಗ್ಗೆ ಎಷ್ಟು ಜನರಿಗೆ ಸರಿಯಾದ ಮಾಹಿತಿ ಇದೆ? ಕಾನೂನು ಪುಸ್ತಕಗಳೇನೋ ಮಾರುಕಟ್ಟೆಯಲ್ಲಿ ದೊರೆಯುತ್ತವೆ. ಅವನ್ನು ಓದಿ ಅರ್ಥಮಾಡಿಕೊಳ್ಳಬೇಕಾದರೆ ಪ್ರತಿಯೊಬ್ಬರೂ ವಕೀಲರೇ ಆಗಬೇಕು. ಜನಸಾಮಾನ್ಯರಿಗೆ ಕಾನೂನುಗಳ ಬಗ್ಗೆ ಮಾಹಿತಿ ನೀಡುವ ಜಾಲತಾಣ www.lawisgreek.com. ಕಾನೂನು ಗ್ರೀಕ್ ಭಾಷೆ ಆಗಬೇಕಾಗಿಲ್ಲ, ಎಲ್ಲರಿಗೂ ಅರ್ಥವಾಗಬೇಕು ಎಂಬ ಉದ್ದೇಶದಿಂದ ಸರಳ ಭಾಷೆಯಲ್ಲಿ ಕಾನೂನುಗಳನ್ನು ಇಲ್ಲಿವಿವರಿಸಲಾಗಿದೆ. ವಕೀಲರುಗಳ ಬ್ಲಾಗ್ ಕೂಡ ಇಲ್ಲಿದೆ. ಜನಸಾಮಾನ್ಯರಿಗೆ ಮಾತ್ರವಲ್ಲ, ಕಾನೂನು ವಿದ್ಯಾರ್ಥಿಗಳಿಗೂ ವಕೀಲರಿಗೂ ಈ ಜಾಲತಾಣ ಉಪಯುಕ್ತವಾಗಿದೆ.

ಡೌನ್‌ಲೋಡ್

ಇನ್‌ವಾಯಿಸ್ ತಯಾರಿಸಿ

ನೀವು ಒಬ್ಬ ಚಿಕ್ಕ ವ್ಯಾಪಾರಿಯೇ (ಗಾತ್ರದಲ್ಲಲ್ಲ, ವ್ಯಾಪಾರದಲ್ಲಿ :))? ಹಾಗಿದ್ದಲ್ಲಿ ನಿಮಗೆ ಇನ್‌ವಾಯಿಸ್ ತಯಾರಿಸುವ ತಲೆನೋವು ಇದ್ದಿದ್ದೇ. ಈಗಂತೂ ವ್ಯಾಟ್ ಕಡ್ಡಾಯವಾಗಿರುವುದರಿಂದ ಯಾವುದೇ ವ್ಯವಹಾರ ಇನ್‌ವಾಯಿಸ್ ಇಲ್ಲದೆ ಸಾಧ್ಯವಿಲ್ಲ. ಇನ್‌ವಾಯಿಸ್ ತಯಾರಿಸಲು ಹಲವಾರು ವಾಣಿಜ್ಯಕ ತಂತ್ರಾಂಶಗಳಿವೆ. ಇವುಗಳಲ್ಲಿ ಹಲವಾರು ಸವಲತ್ತುಗಳೇನೋ ಇವೆ. ಅಂತೆಯೇ ಅವು ದುಬಾರಿ ಕೂಡ. ಸಣ್ಣ ವ್ಯಾಪಾರಿಗಳಿಗೆ ದುಬಾರಿ ತಂತ್ರಾಂಶ ಕೊಳ್ಳುವುದು ಕಷ್ಟ. ಇನ್‌ವಾಯಿಸ್ ತಯಾರಿಸಲು ಉಚಿತ ತಂತ್ರಾಂಶ ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ http://bit.ly/c8ssgX.  

e - ಸುದ್ದಿ

ವಿಮಾನ ಪತ್ತೆ

ಆಪಲ್ ಐಫೋನ್‌ಗೆ ವಿಮಾನ ಪತ್ತೆಯ ತಂತ್ರಾಂಶ ಈಗ ಮಾರುಕಟ್ಟೆಯಲ್ಲಿ ದೊರೆಯುತ್ತಿದೆ. ಅದನ್ನು ಬಳಸಿ ಜಿಪಿಎಸ್ ತಂತ್ರಜ್ಞಾನದ ಮೂಲಕ ನೀವಿರುವ ಸ್ಥಳದ ಮೇಲೆ ಎಷ್ಟು ಹೊತ್ತಿಗೆ ಯಾವ ವಿಮಾನ ಹಾರಲಿದೆ ಎಂಬುದನ್ನು ಅದು ತಿಳಿಸುತ್ತದೆ. ಯಾವ ಕಂಪೆನಿಯ ವಿಮಾನ, ಎಲ್ಲಿಂದ ಎಲ್ಲಿಗೆ ಹೋಗುತ್ತದೆ, ಎಷ್ಟು ಎತ್ತರದಲ್ಲಿ ಹಾರುತ್ತದೆ ಇತ್ಯಾದಿ ಎಲ್ಲ ವಿವರಗಳು ಸುಲಭದಲ್ಲಿ ಲಭ್ಯ. ಈ ತಂತ್ರಾಂಶ ಈಗ ಅಮೆರಿಕದ ಪೋಲೀಸರಿಗೆ ತಲೆನೋವಾಗಿ ಪರಿಣಮಿಸಿದೆ. ಈ ತಂತ್ರಾಂಶವನ್ನು ಬಳಸಿ ರಾಕೆಟ್ ಮೂಲಕ ವಿಮಾನವನ್ನು ಉರುಳಿಸಿದರೆ ಎಂಬುದು ಅವರ ಚಿಂತೆ. ಈ ತಂತ್ರಾಂಶ ಕೆಲಸ ಮಾಡದಂತೆ ಮಾಡಲು ಅವರು ತಿಣುಕಾಡುತ್ತಿದ್ದಾರೆ.

e- ಪದ

ಜಿಪಿಎಸ್(GPS -Global Positioning System) - ಅಂತರಿಕ್ಷದಲ್ಲಿ ಹಾರಾಡುತ್ತಿರುವ ಉಪಗ್ರಹಗಳನ್ನು ಬಳಸಿ ಒಂದು ಸ್ಥಳದ ನಿಖರವಾದ ಅಕ್ಷಾಂಶ ರೇಖಾಂಶವನ್ನು ಪತ್ತೆಹಚ್ಚುವುದು. ಇತ್ತೀಚೆಗೆ ಮಾರುಕಟ್ಟೆಯಲ್ಲಿ ಇಂತಹ ಸರಳವಾದ ಉಪಕರಣಗಳು ದೊರೆಯುತ್ತಿವೆ. ಕಾರುಗಳಲ್ಲೂ ಅವುಗಳನ್ನು ಅಳವಡಿಸಬಹುದು. ಇದರ ಜೊತೆ ದೊರೆಯುವ ತಂತ್ರಾಂಶವನ್ನು ಬಳಸಿ ಒಂದು ಸ್ಥಳದಿಂದ ಇನ್ನೊಂದು ಸ್ಥಳಕ್ಕೆ ಹೋಗಲು ದಾರಿ ತಿಳಿಯಬಹುದು. ರಸ್ತೆಬದಿಯಲ್ಲಿ ಇರುವವರನ್ನು ದಾರಿ ಕೇಳಬೇಕಾಗಿಲ್ಲ. ಕೆಲವು ಮೊಬೈಲ್ ಫೋನುಗಳಲ್ಲೂ ಈ ತಂತ್ರಜ್ಞಾನವಿದೆ. ಆದರೆ ಅದು ಮೊಬೈಲ್ ಗೋಪುರಗಳನ್ನು ಬಳಸಿ ಫೋನು ಇರುವ ಸ್ಥಳವನ್ನು ಹೇಳುತ್ತದೆ.

e - ಸಲಹೆ

ಚೇತನ ವಾಲಿಶೆಟ್ಟರ ಪ್ರಶ್ನೆ: ನನಗೆ ನನ್ನ ಸಿ.ಡಿ. ಡ್ರೈವ್ ಅನ್ನು ಅದರಲ್ಲಿರುವ ಗುಂಡಿ ಬಳಸದೆ ಕೀಬೋರ್ಡ್ ಮೂಲಕವೇ ತೆರಯಬೇಕು. ಇದು ಸಾಧ್ಯವೇ?
ಉ: ಸಾಧ್ಯ. ಸಿ.ಡಿ. ಡ್ರೈವ್‌ನ ಐಕಾನ್ ಮೇಲೆ ಮೌಸ್ ಇಟ್ಟು ಬಲ-ಕ್ಲಿಕ್ ಮಾಡಿ eject ಎಂದು ಆಯ್ಕೆ ಮಾಡಿ.

ಕಂಪ್ಯೂತರ್ಲೆ

ಗಣಕವಾಡು

ನೀ ಕುಟ್ಟುವ ಕೀಬೋರ್ಡ್ ಅದೆ ಕನ್ನಡ
ನೀ ನೋಡುವ ನೆಟ್ ಅದೆ ಕನ್ನಡ

ಸೋಮವಾರ, ಅಕ್ಟೋಬರ್ 4, 2010

ಗಣಕಿಂಡಿ - ೦೭೨ (ಅಕ್ಟೋಬರ್ ೦೪, ೨೦೧೦)

ಅಂತರಜಾಲಾಡಿ

ಮೈಸೂರು ಅರಮನೆ

ಮೈಸೂರು ಅಂಬಾವಿಲಾಸ ಅರಮನೆ ಜಗದ್ವಿಖ್ಯಾತ. ಇದೊಂದನ್ನೇ ನೋಡಲೆಂದು ಭಾರತಕ್ಕೆ ಬರುವ ಪ್ರವಾಸಿಗರಿದ್ದಾರೆ. ನೀವು ಮೈಸೂರು ಅರಮನೆ ನೊಡಿದ್ದೀರಾ? ನೋಡಿಲ್ಲವಾದರೆ ಅದನ್ನು ನೋಡಬೇಕಾದರೆ ಮೈಸೂರಿಗೇ ಹೋಗಬೇಕಾಗಿಲ್ಲ. ಅರಮನೆಯ ಪೂರ್ತಿ ಮೂರು ಆಯಾಮಗಳ ಚಿತ್ರ ಹಾಗೂ ವಾಸ್ತವ ಸದೃಶ ಪ್ರತಿಕೃತಿ ನೋಡಬೇಕಾದರೆ ನೀವು mysorepalace.tv ಜಾಲತಾಣಕ್ಕೆ ಭೇಟಿ ನೀಡಬೇಕು. ಅರಮನೆಯ ಒಳಗೆಲ್ಲ ಓಡಾಡಿದಂತೆ ನಿಮಗೆ ಭಾಸವಾಗುವ ಪ್ರತಿಕೃತಿಗಳು ಇಲ್ಲಿವೆ. ಅರಮನೆಯ ಬಗ್ಗೆ ಇತರೆ ಮಾಹಿತಿಗಳೂ ಇಲ್ಲಿವೆ. ಅರಮನೆ ನೋಡಿದವರಿಗೂ ನೋಡಿದ ಅನುಭವ ಮತ್ತೊಮ್ಮೆ ಮೂಡುವಂತೆ ಮಾಡುವ ಅತ್ಯತ್ತಮ ಜಾಲತಾಣ ಇದು. ಕನ್ನಡ ಭಾಷೆಯಲ್ಲೂ ಇದೆ.

ಡೌನ್‌ಲೋಡ್

ಆಟ ತಯಾರಿಸಿ

ಗಣಕದಲ್ಲಿ ಆಟ ಆಡುವುದು ತುಂಬ ಜನರಿಗೆ ಇಷ್ಟವಾದ ಕೆಲಸ. ಕೆಲವೊಮ್ಮೆ ಅದು ಒಂದು ಚಟವೂ ಹೌದು. ಆಟಗಳನ್ನು ಆಡುವಾಗ ನಾನೂ ಒಂದು ಗಣಕ ಆಟ ತಯಾರಿಸುವಂತಿದ್ದರೆ ಎಂದು ಅನ್ನಿಸಿದೆಯೇ? ಅದಕ್ಕಾಗಿ ತುಂಬ ಕ್ಲಿಷ್ಟವಾದ ಪ್ರೋಗ್ರಾಮ್ಮಿಂಗ್ ಕಲಿಯಬೇಕು ಅಂದುಕೊಂಡಿದ್ದೀರಾ? ಯಾವುದೇ ಪ್ರೋಗ್ರಾಮ್ಮಿಂಗ್ ಕಲಿಯದೇ ಗಣಕ ಆಟ ತಯಾರಿಸಲು ಅನುವು ಮಾಡಿಕೊಡುವ ತಂತ್ರಾಂಶ ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ www.scirra.com.  

e - ಸುದ್ದಿ

ಇಂಗ್ಲೆಂಡಿನಲ್ಲಿ ೧೪ ವರ್ಷ ತುಂಬಿ ೧೫ನೆಯ ವರ್ಷಕ್ಕೆ ಕಾಲಿಟ್ಟ ಹುಡುಗಿಯೊಬ್ಬಳಿಗೆ ತನ್ನ ೧೫ನೆಯ ಹುಟ್ಟುಹಬ್ಬಕ್ಕೆ ೧೫ ಜನ ಆಪ್ತ ಸ್ನೇಹಿತೆಯರನ್ನು ಆಹ್ವಾನಿಸಬೇಕು ಎಂಬ ಬಯಕೆ ಆಯಿತು. ಅದಕ್ಕೆಂದೇ ಆಕೆ ಫೇಸ್‌ಬುಕ್ ಜಾಲತಾಣದಲ್ಲಿ ಒಂದು ಆಹ್ವಾನಪತ್ರಿಕೆಯನ್ನು ತಯಾರಿಸಿ ಹಾಕಿದಳು. ಆದರೆ ಆಕೆ ಮಾಡಿದ ತಪ್ಪೇನೆಂದರೆ ಆ ಆಹ್ವಾನ ಪತ್ರಿಕೆಯನ್ನು ಎಲ್ಲರಿಗೂ ಓದಲು ಸಾಧ್ಯವಾಗುವಂತೆ ಮಾಡಿದ್ದು. ಕೇವಲ ಸ್ನೇಹಿತರು ಮಾತ್ರ ಓದಬಲ್ಲರು ಎಂದು ಆಕೆ ಆಯ್ಕೆ ಮಾಡಿರಲಿಲ್ಲ. ಅದನ್ನು ಓದಿದ ೨೧,೦೦೦ ಮಂದಿ ಆಹ್ವಾನವನ್ನು ಸ್ವೀಕರಿಸಿ ಕಾರ್ಯಕ್ರಮಕ್ಕೆ ಬರುತ್ತೇವೆ ಎಂದು ನಮೂದಿಸಿದ್ದಾರೆ. ಈಗ ಆಕೆಯ ತಾಯಿಗೆ ತಲೆಬಿಸಿಯಾಗಿದೆ. ಅಕ್ಟೋಬರ್ ೭ರಂದು ಆಕೆಯ ಹುಟ್ಟುಹಬ್ಬಕ್ಕೆ ನಿಜಕ್ಕೂ ಎಷ್ಟು ಮಂದಿ ಬರುತ್ತಾರೆ ಎಂದು ಕಾದು ನೋಡಬೇಕಾಗಿದೆ.

e- ಪದ

ವಾಸ್ತವ ಸದೃಶ (virtual reality) - ಗಣಕ ಯಂತ್ರಾಂಶ ಮತ್ತು ತಂತ್ರಾಂಶ ಬಳಸಿ ನಿಜವಾದ ಸನ್ನಿವೇಶವನ್ನು ಅನುಭವಿಸಿದ ಭ್ರಮೆ ಉಂಟು ಮಾಡುವುದು. ಗಣಕ ಆಟಗಳಲ್ಲಿ ಇದು ತುಂಬ ಜನಪ್ರಿಯ. ನಿಜವಾಗಿಯೂ ವೈರಿಯನ್ನು ಹೊಡೆಯುತ್ತಿದ್ದೇನೆ ಎಂಬ ಭಾವನೆ ಬರುತ್ತದೆ. ವಿಮಾನ ಚಾಲನೆ, ಶಸ್ತ್ರಕ್ರಿಯೆ, ಇತ್ಯಾದಿಗಳನ್ನು ಕಲಿಸಲೂ ಈಗೀಗ ಈ ವಿಧಾನವನ್ನು ಬಳಸಲಾಗುತ್ತಿದೆ.

e - ಸಲಹೆ

ಗಿರಿ ಅವರ ಪ್ರಶ್ನೆ: ನಾನು ಯುಟ್ಯೂಬ್ ಬಳಸುತ್ತಿದ್ದೇನೆ. ಆದರೆ ಅದರಲ್ಲಿ ಡೌನ್‌ಲೋಡ್ ಐಕಾನ್ ಇಲ್ಲ. ಯುಟ್ಯೂಬ್‌ನಿಂದ ಡೌನ್‌ಲೋಡ್ ಮಾಡಲು ಏನು ಮಾಡಬೇಕು?
ಉ: ನೀವು YouTube Downloader ತಂತ್ರಾಂಶವನ್ನು ಬಳಸಬಹುದು. ಇದು ದೊರೆಯುವ ಜಾಲತಾಣ http://bit.ly/oRMpZ.

ಕಂಪ್ಯೂತರ್ಲೆ

ಗಣಕತಗಾದೆ: ತಂತ್ರಾಂಶದಲ್ಲಿಯ ಬಗ್ (ದೋಷ) ವು ಕುರ್ಚಿ ಮತ್ತು ಕೀಬೋರ್ಡ್ ಮಧ್ಯೆ ಕುಳಿತಿರುತ್ತದೆ.

ಸೋಮವಾರ, ಸೆಪ್ಟೆಂಬರ್ 27, 2010

ಗಣಕಿಂಡಿ - ೦೭೧ (ಸಪ್ಟಂಬರ್ ೨೭, ೨೦೧೦)

ಅಂತರಜಾಲಾಡಿ

ಇನ್ನೊಂದು ನೋಬೆಲ್

ದನದ ಸೆಗಣಿಯಿಂದ ಐಸ್‌ಕ್ರೀಂ ತಯಾರಿಸುವುದು. ದನಗಳನ್ನು ಮನುಷ್ಯರಂತೆ ಪ್ರೀತಿಯಿಂದ ಮಾತನಾಡಿಸಿದರೆ ಅವು ಜಾಸ್ತಿ ಹಾಲು ಕೊಡುತ್ತವೆ. ಹೆಚ್ಚು ಹಣಕೊಟ್ಟು ಕೊಂಡುಕೊಂಡ ನಕಲಿ ಔಷಧಿ ಕಡಿಮೆ ಹಣಕೊಟ್ಟು ಕೊಂಡುಕೊಂಡ ನಕಲಿ ಔಷಧಿಗಿಂತ ಹೆಚ್ಚು ಪರಿಣಾಮಕಾರಿಯಾಗಿ ಕೆಲಸ ಮಾಡುತ್ತದೆ. ಇವೆಲ್ಲ ಕಪೋಲಕಲ್ಪಿತ ಸಂಗತಿಗಳಲ್ಲ. ವೈಜ್ಞಾನಿಕವಾಗಿ ಸಂಶೋಧನೆ ಮಾಡಿ ಪ್ರಕಟಿಸಲ್ಪಟ್ಟ ಸಂಶೋಧನೆಗಳು. ಈ ಎಲ್ಲ ಸಂಶೋಧನೆಗಳಲ್ಲಿ ಒಂದು ಸಮಾನ ಅಂಶವಿದೆ. ಅದುವೇ ಇಗ್‌ನೋಬೆಲ್ ಪ್ರಶಸ್ತಿ. ಪ್ರತಿ ವರ್ಷ ಸಪ್ಟಂಬರ್ ಕೊನೆಗೆ ಅಥವಾ ಅಕ್ಟೋಬರ್ ತಿಂಗಳಿನಲ್ಲಿ ಈ ಪ್ರಶಸ್ತಿ ನೀಡಲಾಗುತ್ತದೆ. ಜನರಲ್ಲಿ ನಗು ಮೂಡಿಸಿ ನಂತರ ಚಿಂತನೆಗೆ ಹಚ್ಚುವಂತಹ ಸಂಶೋಧನೆಗಳಿಗೆ ಈ ಪ್ರಶಸ್ತಿ ನೀಡಲಾಗುತ್ತದೆ. ಈ ಪ್ರಶಸ್ತಿಯ ಜಾಲತಾಣ  improbable.com. ಈ ವರ್ಷ ಸಪ್ಟಂಬರ್ ೩೦ಕ್ಕೆ ಈ ಪ್ರಶಸ್ತಿ ಘೋಷಣೆಯ ನೇರಪ್ರಸಾರವನ್ನು ಇದೇ ಜಾಲತಾಣದಲ್ಲಿ ವೀಕ್ಷಿಸಬಹುದು.

ಡೌನ್‌ಲೋಡ್

ಇಮೈಲ್ ವೀಕ್ಷಿಸಿ

ಇಮೈಲ್ ಎಲ್ಲರೂ ಬಳಸುತ್ತಿದ್ದಾರೆ. ಒಂದಕ್ಕಿಂತ ಹೆಚ್ಚು ಇಮೈಲ್ ವಿಳಾಸ ಹೊಂದಿರುವುದೂ ಸಾಮಾನ್ಯವಾಗಿದೆ. ಬೇರೆ ಬೇರೆ ಖಾತೆಗಳಲ್ಲಿ ಇಮೈಲ್ ಬಂದಿದೆಯೇ ಎಂದು ಆಗಾಗ ವೀಕ್ಷಿಸಿ ನೋಡುತ್ತಿರಬೇಕಾಗುತ್ತದೆ. ಹಲವಾರು ಖಾತೆ ಹೊಂದಿರುವವರಿಗೆ ಇದು ಸ್ವಲ್ಪ ಸಮಯ ಹಿಡಿಯುವ ಕೆಲಸ. ಈ ಕೆಲಸವನ್ನು ಸ್ವಯಂಚಾಲಿತವಾಗಿ ಮಾಡಲು ಒಂದು ತಂತ್ರಾಂಶವಿದೆ. ಇದನ್ನು ಗಣಕದಲ್ಲಿ ಇನ್‌ಸ್ಟಾಲ್ ಮಾಡಿಕೊಂಡು ಎಲ್ಲಇಮೈಲ್ ಖಾತೆಗಳ ವಿವರಗಳನ್ನು ದಾಖಲಿಸಿದರೆ ಇದುವೇ ಆ ಎಲ್ಲ ಖಾತೆಗಳನ್ನು ಆಗಾಗ ಪರಿಶೀಲಿಸಿ ಇಮೈಲ್ ಬಂದಿದೆಯೇ ಎಂದು ತಿಳಿಸುತ್ತದೆ. ಜನಪ್ರಿಯವಾಗಿರುವ ಎಲ್ಲ (ಜಿಮೈಲ್, ಹಾಟ್‌ಮೈಲ್, ಯಾಹೂ, ..) ಇಮೈಲ್‌ಗಳನ್ನು ಇದು ಪರಿಶೀಲಿಸಬಲ್ಲುದು. ಈ ತಂತ್ರಾಂಶ ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ www.poppeeper.com.  

e - ಸುದ್ದಿ

ಆಟ ಅತಿಯಾದಾಗ 

ಗಣಕ ಆಟಗಳಿಂದಾಗುವ ತೊಂದರೆಗಳ ಬಗ್ಗೆ ಓದಿರಬಹುದು. ಇದೀಗ ಇಂಗ್ಲೆಂಡಿನಿಂದ ಬಂದ ಸುದ್ದಿ. ಮೂರು ಮಕ್ಕಳ ತಾಯಿಯೊಬ್ಬಳು ಅಂತರಜಾಲ ಮೂಲಕ ಆಡುವ ಆಟದಲ್ಲಿ ತಿಂಗಳುಗಳಿಂದ ಎಷ್ಟು ತಲ್ಲೀನಳಾಗಿದ್ದಳೆಂದರೆ ಆಕೆ ಮಕ್ಕಳಿಗೆ ಊಟ ತಿಂಡಿ ಕೊಡುವುದನ್ನೇ ಮರೆತಿದ್ದಳು. ಆಕೆಯ ಮನೆಯಲ್ಲಿ ಇದ್ದ ನಾಯಿಗಳು ಆಹಾರವಿಲ್ಲದೆ ಸತ್ತು ಕೊಳೆತು ಹೋಗಿದ್ದವು. ಮಕ್ಕಳಿಗೆ ಆಕೆ ಬಿಸಿ ಅಡುಗೆ ಮಾಡುವ ಅಗತ್ಯವಿಲ್ಲದ ಅಂದರೆ ನೇರವಾಗಿ ಡಬ್ಬದಿಂದಲೇ ತಿನ್ನಿಸಬಲ್ಲ ಆಹಾರ ಕೊಡುತ್ತಿದ್ದಳು, ಅದೂ ಎಷ್ಟು ಹೊತ್ತಿಗೆ ಎಂಬ ಪರಿವೆಯೂ ಇಲ್ಲದೆ. ಕೊನೆಗೊಮ್ಮೆ ಆಕೆಯ ಪಕ್ಕದ ಮನೆಯವರು ಕಿಟಿಕಿಯ ಮೂಲಕ ಮನೆಯ ದುರವಸ್ತೆಯನ್ನು ಗಮನಿಸಿ ಪೋಲೀಸಿರಿಗೆ ತಿಳಿಸಿ ಅವರು ಬಂದು ಮಕ್ಕಳನ್ನು ಕಾಪಾಡಬೇಕಾಯಿತು. ಗಂಡ ಸತ್ತ ನಂತರ ಮಾನಸಿಕವಾಗಿ ಆಕೆ ಅಸ್ವಸ್ಥಳಾಗಿ ಹೀಗೆಲ್ಲ ಮಾಡಿದ್ದಾಳೆ ಎಂದು ಆಕೆಯ ವಕೀಲರು ವಾದಿಸುತ್ತಿದ್ದಾರೆ.

e- ಪದ

ಸೈಬರ್ ಸ್ಕ್ವಾಟಿಂಗ್ (cybersquatting) - ಮಾಹಿತಿ ಹೆದ್ದಾರಿಯಲ್ಲಿ (ಅಂತರಜಾಲ) ಅಡ್ಡವಾಗಿ ಕುಳಿತುಕೊಳ್ಳುವುದು? squatting ಪದಕ್ಕೆ ಕುಳಿತುಕೊಳ್ಳುವುದು ಎಂಬ ಅರ್ಥವಿದೆ. ಯಾವುದಾದರೊಂದು ಖ್ಯಾತ ಕಂಪೆನಿ ಅಥವಾ ಸಂಸ್ಥೆಯ ಹೆಸರಿನಲ್ಲಿ ಜಾಲತಾಣವೊಂದನ್ನು ನಮೂದಿಸಿ ಇಟ್ಟುಕೊಂಡು ಅನಂತರ ಅದನ್ನು ಅವರಿಗೇ ಅತಿ ಹೆಚ್ಚು ಹಣಕ್ಕೆ ಮಾರಲು ಪ್ರಯತ್ನಿಸುವುದು. ಇದು ಒಂದು ರೀತಿಯ ಬ್ಲ್ಯಾಕ್‌ಮೈಲ್ ತಂತ್ರ. ಆದರೆ ಈ ರೀತಿ ಮಾಡುವುದು ಕಾನೂನು ಪ್ರಕಾರ ಅಪರಾಧ ಎಂದು ನ್ಯಾಯಾಲಯಗಳು ತೀರ್ಮಾನ ನೀಡಿವೆ ಹಾಗೂ ಜಾಲತಾಣದ ಹೆಸರನ್ನು ನಿಜವಾಗಿ ಯಾರಿಗೆ ಸೇರಬೇಕೊ ಅವರಿಗೆ ನೀಡಿವೆ.

e - ಸಲಹೆ


ಮೈಸೂರಿನ ವಿಜಯಲಕ್ಷ್ಮಿಯವರ ಪ್ರಶ್ನೆ: ನನ್ನ ಗಣಕದಲ್ಲಿ ಸಂಗ್ರಹಿಸಿಟ್ಟದ್ದ ಹಲವಾರು ಫೋಟೋಗಳು ನಾಪತ್ತೆಯಾಗಿವೆ. ಅವುಗಳನ್ನು ವಾಪಾಸು ಪಡೆಯಲು ಯಾವುದದರೂ ತಂತ್ರಾಂಶವಿದೆಯೇ? 
ಉ: ನೀವು www.piriform.com/recuva ಬಳಸಿ ಪ್ರಯತ್ನಿಸಿ ನೋಡಿ.

ಕಂಪ್ಯೂತರ್ಲೆ

ನಾಯಿಗಳೇಕೆ ಟ್ವಿಟ್ಟರ್ ಬಳಸುವುದಿಲ್ಲ?
·    ಟ್ವಿಟ್ಟರ್‌ನಲ್ಲಿ ಬೊಗಳುವಿಕೆಯನ್ನು ಸೂಚಿಸಲಿಕ್ಕೆ ಆಗುವುದಿಲ್ಲ.
·    ಟ್ವಿಟ್ಟರ್‌ನಲ್ಲಿ ಬಾಲ ಅಲ್ಲಾಡಿಸುವುದನ್ನು ಸೂಚಿಸಲು ಆಗುವುದಿಲ್ಲ.

ಸೋಮವಾರ, ಸೆಪ್ಟೆಂಬರ್ 20, 2010

ಗಣಕಿಂಡಿ - ೦೭೦ (ಸಪ್ಟಂಬರ್ ೨೦, ೨೦೧೦)

ಅಂತರಜಾಲಾಡಿ

ವೈದ್ಯಕೀಯಜಾಲ

ವೈದ್ಯರಿಂದ ನಡೆಸಲ್ಪಡುವ ಜಾಲತಾಣ www.medicinenet.com. ಇದರ ಮುಖ್ಯ ಉದ್ದೇಶ ಜನರಿಗೆ ಖಾಯಿಲೆ ಮತ್ತು ಔಷಧಗಳ ಬಗೆಗೆ ಜನರಿಗೆ ತಿಳಿವಳಿಕೆ ನೀಡುವುದು. ಜನಸಾಮಾನ್ಯರಿಗೆ ಖಾಯಿಲೆಗಳ ಬಗ್ಗೆ ಹಲವು ತಪ್ಪು ಕಲ್ಪನೆಗಳಿರುತ್ತವೆ. ಬಹುಪಾಲು ವೈದ್ಯರಿಗೆ ತಮ್ಮಲ್ಲಿ ಬರುವವರಿಗೆ ತಿಳಿವಳಿಕೆ ನೀಡಲು ತಾಳ್ಮೆ ಇರುವುದಿಲ್ಲ ಮತ್ತು ಸಮಾಯಾಭಾವವಿರುತ್ತದೆ. ಇಂತಹ ಸಂದರ್ಭಗಳಲ್ಲಿ ತಮ್ಮ ಖಾಯಿಲೆ ಬಗ್ಗೆ ಸರಿಯಾದ ಮಾಹಿತಿ ಪಡೆಯಲು ಈ ಜಾಲತಾಣದ ಸಹಾಯ ಪಡೆಯಬಹುದು. ಕೆಲವು ಪ್ರಮುಖ ಚಿಕಿತ್ಸೆಗಳ ಬಗ್ಗೆಯೂ ಇಲ್ಲಿ ವಿವರಗಳಿವೆ. ಯಾವ ಔಷಧವನ್ನು ಯಾವ ಖಾಯಿಲೆಗೆ ಔಷಧಿಯಾಗಿ ಬಳಸಲಾಗುತ್ತದೆ ಹಾಗೂ ಅದರ ದುಷ್ಪರಿಣಾಮಗಳೇನು ಎಂಬ ವಿವರಗಳೂ ಇವೆ. ಇದು ಬಹಳ ಉಪಯುಕ್ತವಾದ ಸವಲತ್ತು. ಹಲವು ಬಾರಿ ನಾವು ತೆಗೆದುಕೊಳ್ಳುವ ಔಷಧದ ದುಷ್ಪರಿಣಾಮಗಳ ಬಗ್ಗೆ ನಮಗೆ ಅರಿವೇ ಇರುವುದಿಲ್ಲ. ವೈದ್ಯರೂ ತಿಳಿಸಿ ಹೇಳುವುದಿಲ್ಲ.

ಡೌನ್‌ಲೋಡ್

ಟೊರೆಂಟ್ ಹುಡುಕಿ

ಅಂತರಜಾಲದಲ್ಲಿ ತಂತ್ರಾಂಶ, ಸಂಗೀತ, ಚಲನಚಿತ್ರ, ಅಥವಾ ಇನ್ಯಾವುದೇ ಫೈಲುಗಳನ್ನು ಪ್ರಪಂಚಾದ್ಯಂತ ವಿವಿಧ ವ್ಯಕ್ತಿಗಳು ತಮ್ಮ ಗಣಕಗಳಲ್ಲಿ ಸಂಗ್ರಹಿಸಿಟ್ಟು ಆಸಕ್ತರಿಗೆ ಡೌನ್‌ಲೋಡ್ ಮಾಡಲು ಬಿಟ್‌ಟೊರೆಂಟ್ ಮೂಲಕ ಅವಕಾಶ ಮಾಡಿಕೊಟ್ಟಿರುತ್ತಾರೆ. ಆದರೆ ಯಾರ ಗಣಕದಲ್ಲಿ ಯಾವ ಕಡತ ಇದೆ ಎಂದು ಪತ್ತೆ ಹಚ್ಚುವುದು ಸುಲಭವಲ್ಲ. ಅದಕ್ಕೆಂದೇ ಹಲವಾರು ಜಾಲತಾಣಗಳಿವೆ. ನಮಗೆ ಬೇಕಾದ ಕಡತ ಹುಡುಕಲು ಪ್ರತಿ ಜಾಲತಾಣವನ್ನೂ ಜಾಲಾಡಬೇಕು. ಹೀಗೆ ಹಲವಾರು ಜಾಲತಾಣಗಳನ್ನು ಒಮ್ಮೆಗೇ ಹುಡುಕಲು ಒಂದು ತಂತ್ರಾಂಶವಿದೆ. ಅದುವೇ Torrent Search. ಇದನ್ನು ನಿಮ್ಮ ಗಣಕದಲ್ಲಿ ಅನುಸ್ಥಾಪಿಸಿಕೊಂಡರೆ ಇದನ್ನು ಬಳಸಿ ಹಲವಾರು ಟೊರೆಂಟ್ ಹುಡುಕುವ ಜಾಲತಾಣಗಳನ್ನು ಪ್ರತ್ಯೇಕವಾಗಿ ತೆರೆದು ಪ್ರಯತ್ನಪಡಬೇಕಾಗಿಲ್ಲ. ಈ ತಂತ್ರಾಂಶ ದೊರೆಯುವ ಜಾಲತಾಣ http://bit.ly/dfkfvv.

e - ಸುದ್ದಿ

ಮನೆ ದರೋಡೆ ಯಾಕಾಯಿತು?

ಫೇಸ್‌ಬುಕ್ ತುಂಬ ಜನಪ್ರಿಯ ಸೋಶಿಯಲ್ ನೆಟ್‌ವರ್ಕಿಂಗ್ ಜಾಲತಾಣ. ಇತ್ತೀಚೆಗೆ ಭಾರತದಲ್ಲೂ ಇದು ಜನಪ್ರಿಯತೆಯಲ್ಲಿ ಆರ್ಕುಟ್ ಅನ್ನು ಹಿಂದೆ ಹಾಕಿದೆ. ಜನರು ತಾವು ಏನು ಮಾಡುತ್ತಿದ್ದೇವೆ ಎಂಬುದಾಗಿ ಈ ಜಾಲತಾಣದಲ್ಲಿ ಬರೆಯತ್ತಾರೆ. ಅಮೆರಿಕಾದ ನಗರವೊಂದರಲ್ಲಿ ಅಗಸ್ಟ್ ಒಂದು ತಿಂಗಳಿನಲ್ಲಿ ಸುಮಾರು ೫೦ ಮನೆಗಳ ದರೋಡೆ ನಡೆದಿತ್ತು. ಎಲ್ಲ ಮನೆಗಳ ದರೋಡೆಯೂ ಮನೆಯವರು ಇಲ್ಲದಿದ್ದಾಗ ಆದುದು. ಪೋಲೀಸರು ಈ ಮನೆ ಮಾಲಿಕರ ಫೇಸ್‌ಬುಕ್ ಪುಟಗಳನ್ನು ಓದಿದಾಗ ಒಂದು ವಿಷಯ ಅವರಿಗೆ ವೇದ್ಯವಾಯಿತು. ಅವರೆಲ್ಲರೂ ನಾವು ಇಂತಹ ದಿನಾಂಕಗಳಂದು ಇಂತಹ ಊರಿಗೆ ಹೋಗುತ್ತಿದ್ದೇವೆ ಎಂದು ಬರೆದಿದ್ದರು. ಕಳ್ಳರು ಅವುಗಳನ್ನು ಓದಿ ಆ ಮನೆಗಳನ್ನು ದರೋಡೆ ಮಾಡಿದ್ದರು. ಕಳ್ಳರು ಸಿಕ್ಕಬಿದ್ದಾಗ ಅವರಿಂದ ಈ ಮಾಹಿತಿ ಪೋಲೀಸರಿಗೆ ದೊರಕಿತು. ಟ್ವಿಟ್ಟರ್, ಆರ್ಕುಟ್, ಫೇಸ್‌ಬುಕ್ ಇಂತಹ ಜಾಲತಾಣಗಳಲ್ಲಿ ನಿಮ್ಮ ಸಂಪೂರ್ಣ ಪ್ರವಾಸ ಮಾಹಿತಿ ನೀಡುವಾಗ ಎಚ್ಚರವಾಗಿರಿ. 

e- ಪದ

ದುರುಳ ತಂತ್ರಾಂಶ (malware) - ಇದು malicious software ಎಂಬುದರ ಸಂಕ್ಷಿಪ್ತ ರೂಪ. ಗಣಕದ ಒಡೆಯನಿಗೆ ಗೊತ್ತಿಲ್ಲದೆ ಗಣಕದೊಳಗೆ ನುಸುಳಿ ದುರುದ್ದೇಶದಿಂದ ಗಣಕದಿಂದ ಮಾಹಿತಿ ಕದಿಯುವ, ಪಾಸ್‌ವರ್ಡ್ ಕದಿಯುವ, ಗಣಕದಲ್ಲಿಯ ಮಾಹಿತಿಯನ್ನು ಕೆಡಿಸುವ ಹಾಗೂ ಇನ್ನೂ ಬೇರೆ ರೀತಿಯಲ್ಲಿ ಕೆಡುಕನ್ನುಂಟುಮಾಡುವ ಎಲ್ಲ ತಂತ್ರಾಂಶಗಳು ಇದರಡಿಯಲ್ಲಿ ಬರುತ್ತವೆ. ಇವುಗಳಲ್ಲಿ ತುಂಬ ಕುಖ್ಯಾತವಾದುದು ಸಾಮಾನ್ಯವಾಗಿ ಎಲ್ಲರಿಗೂ ತಿಳಿದಿರುವ ಕಂಪ್ಯೂಟರ್ ವೈರಸ್‌ಗಳು.

e - ಸಲಹೆ

ಶಾಂತಾಪಡಿ ಅವರ ಪ್ರಶ್ನೆ: ನನ್ನ ಫಯರ್‌ಫಾಕ್ಸ್ ಬ್ರೌಸರ್‌ನಲ್ಲಿ ಅಕ್ಷರಗಳು ತುಂಬ ಚಿಕ್ಕವಾಗಿ ಕಾಣಿಸುತ್ತವೆ. ಅವುಗಳನ್ನು ದೊಡ್ಡದಾಗಿ ಮಾಡುವುದು ಹೇಗೆ?
ಉ: ಒಂದು ಸರಳ ವಿಧಾನವಿದೆ. ಇದು ಫೈರ್‌ಫಾಕ್ಸ್, ಇಂಟರ್‌ನೆಟ್ ಎಕ್ಸ್‌ಪ್ಲೋರರ್ ಮತ್ತು ಗೂಗ್ಲ್ ಕ್ರೋಮ್‌ನಲ್ಲೂ ಕೆಲಸ ಮಾಡುತ್ತದೆ. Ctrl ಕೀಲಿಯನ್ನು ಒತ್ತಿ ಹಿಡಿದುಕೊಂಡು ಮೌಸ್‌ನ ಚಕ್ರವನ್ನು ತಿರುಗಿಸಿ. 

ಕಂಪ್ಯೂತರ್ಲೆ

ಟ್ವಿಟ್ಟರ್ ವ್ಯಸನಿ

·    ತನ್ನ ನಾಯಿಯ ಕುತ್ತಿಗೆಗೆ ಅದರ ಟ್ವಿಟ್ಟರ್ ಹೆಸರನ್ನು ಬರೆದು ನೇತುಹಾಕುತ್ತಾನೆ.
·    ಮನೆ ವಿಳಾಸ ಕೇಳಿದರೆ ತನ್ನ ಟ್ವಿಟ್ಟರ್ ಹೆಸರು ಹೇಳುತ್ತಾನೆ.
·    ತನ್ನ ಮನೆ ಮುಂದೆ ತನ್ನ ಟ್ವಿಟ್ಟರ್ ಹೆಸರನ್ನು ಬರೆದು ನೇತುಹಾಕುತ್ತಾನೆ.
·    ನಾನು ಊಟಕ್ಕೆ ಬರುತ್ತಿದ್ದೇನೆ ಎಂಬ ಸಂದೇಶವನ್ನು ತನ್ನ ಹೆಂಡತಿಗೆ ಟ್ವಿಟ್ಟರ್ ಮೂಲಕ ರವಾನಿಸುತ್ತಾನೆ.

ಸೋಮವಾರ, ಸೆಪ್ಟೆಂಬರ್ 13, 2010

ಗಣಕಿಂಡಿ - ೦೬೯ (ಸಪ್ಟಂಬರ್ ೧೩, ೨೦೧೦)

ಅಂತರಜಾಲಾಡಿ

ಪುಸ್ತಕಬೆಲೆ ಹೋಲಿಸಿ ಕೊಳ್ಳಿರಿ

ಪುಸ್ತಕಪ್ರಿಯರುಗಳಿಗೆ ಅಂತರಜಾಲದಲ್ಲಿ ಪುಸ್ತಕ ಕೊಳ್ಳಲು ಹಲವಾರು ಜಾಲತಾಣಗಳಿವೆ. ಅಂತರಜಾಲದ ಮೂಲಕ ಪುಸ್ತಕ ಕೊಳ್ಳುವುದರಿಂದ ಒಂದು ಲಾಭವಿದೆ. ಸಾಮಾನ್ಯವಾಗಿ ಪುಸ್ತಕದ ಮುಖಬೆಲೆಯ ಮೇಲೆ ಶೇಕಡ ೨೦ರ ವರೆಗೂ ರಿಯಾಯಿತಿ ಸಿಗುತ್ತದೆ. ಆದರೆ ಸಮಸ್ಯೆ ಏನೆಂದರೆ ಬೇರೆ ಬೇರೆ ಜಾಲತಾಣದವರು ಬೇರೆ ಬೇರೆ ರಿಯಾಯಿತಿ ನೀಡುತ್ತಾರೆ. ಎಲ್ಲ ಜಾಲತಾಣಗಳನ್ನು ಜಾಲಾಡಿ ಯಾವ ಜಾಲತಾಣದಲ್ಲಿ ನಿಮಗೆ ಬೇಕಾದ ಪುಸ್ತಕ ಕಡಿಮೆ ದರದಲ್ಲಿಸಿಗುತ್ತದೆ ಎಂದು ಪತ್ತೆಹಚ್ಚಬೇಕೇ? ಅದಕ್ಕೆಂದೇ ಒಂದು ಜಾಲತಾಣವಿದೆ.  ಅದುವೇ www.mysmartprice.com. ಭಾರತದ ಪ್ರಮುಖ ಪುಸ್ತಕ ಮಾರಾಟದ ಜಾಲತಾಣಗಳಲ್ಲಿ ಹುಡುಕಾಡಿ ಯಾವ ಜಾಲತಾಣದಲ್ಲಿ ನಿಮಗೆ ಬೇಕಾದ ಪುಸ್ತಕ ಅತಿ ಕಡಿಮೆ ಬೆಲೆಗೆ ಇದೆ ಎಂದು ಪತ್ತೆಹಚ್ಚಿ ಇದು ತಿಳಿಸುತ್ತದೆ.

ಡೌನ್‌ಲೋಡ್

ವಿಂಡೋಸ್೭ಕ್ಕೆ ಕನ್ನಡದ ಹೊದಿಕೆ


ಮೈಕ್ರೋಸಾಫ್ಟ್ ವಿಂಡೋಸ್ ೭ ಕಾರ್ಯಾಚರಣೆಯ ವ್ಯವಸ್ಥೆಗೆ (ಆಪರೇಟಿಂಗ್ ಸಿಸ್ಟಮ್) ಕನ್ನಡದ ಹೊದಿಕೆ ಲಭ್ಯವಿದೆ. ಇದನ್ನು ಡೌನ್‌ಲೋಡ್ ಮಾಡಿಕೊಂಡು ಇನ್‌ಸ್ಟಾಲ್ ಮಾಡಿಕೊಂಡರೆ ವಿಂಡೋಸ್‌ನ ಬಹುಪಾಲು ಆದೇಶ ಮತ್ತು ಸಂದೇಶಗಳು ಕನ್ನಡ ಭಾಷೆಯಲ್ಲೇ ಬರುತ್ತವೆ. ಇದನ್ನು ಲಾಂಗ್ವೇಜ್ ಇಂಟರ್‌ಫೇಸ್ ಪ್ಯಾಕ್ ಎಂದು ಕರೆಯುತ್ತಾರೆ. ಇದರಲ್ಲಿ ದಿನನಿತ್ಯ ಬಳಕೆಗೆ ಬೇಕಾಗುವ ಶೇಕಡ ೮೦ ಕನ್ನಡದ ಅನುಭವ ಬರುವಂತೆ ಅನುವಾದ ಮಾಡಲಾಗಿದೆ. ಈ ಕನ್ನಡದ ಲಾಂಗ್ವೇಜ್ ಇಂಟರ್‌ಫೇಸ್ ಪ್ಯಾಕ್ ಅನ್ನು bit.ly/bBdJ63  ಜಾಲತಾಣದಿಂದ ಡೌನ್‌ಲೋಡ್ ಮಾಡಿಕೊಳ್ಳಬಹುದು. ಅಧಿಕೃತ ವಿಂಡೋಸ್ ೭ ಇರುವವರು ಮಾತ್ರ ಇದನ್ನು ಡೌನ್‌ಲೋಡ್ ಮಾಡಿಕೊಳ್ಳಬಹುದು. ಈ ಹೊದಿಕೆಯನ್ನು ಅಳವಡಿಸಿದ ಮೇಲೆ ಗಣಕ ಪ್ರಾರಂಭಿಸಿದಾಗ ಇಂಟರ್‌ನೆಟ್ ಎಕ್ಸ್‌ಪ್ಲೋರರ್, ನೋಟ್‌ಪ್ಯಾಡ್, ಇತ್ಯಾದಿಗಳು ಕನ್ನಡದಲ್ಲಿರುತ್ತವೆ. ಅಂದರೆ ಅವುಗಳ ಮೆನುಗಳು ಕನ್ನಡ ಭಾಷೆಯಲ್ಲಿರುತ್ತವೆ. ಸಂವಾದ ಚೌಕಗಳೂ ಕನ್ನಡ ಭಾಷೆಯಲ್ಲಿ ಕಾಣಿಸುತ್ತವೆ. ಆದರೆ ಸಹಾಯ ಕಡತಗಳು ಮಾತ್ರ ಇಂಗ್ಲೀಷಿನಲ್ಲಿರುತ್ತವೆ.

e - ಸುದ್ದಿ

ಅಂತರಜಾಲವೇ ಸಹಾಯಕ್ಕೆ

ಅಂತರಜಾಲದಲ್ಲಿ ವಧುವರರ ಸಮಾವೇಶಕ್ಕೆ ಹಲವಾರು ಜಾಲತಾಣಗಳಿರುವುದು ನಿಮಗೆ ತಿಳಿದೇ ಇರಬಹುದು. ಈ ಜಾಲತಾಣಗಳಲ್ಲಿ ವಿವರ ದಾಖಲಿಸುವವರು ಸಾಚಾ ಎಂದೇ ಏನು ನಂಬಿಕೆ? ಈಗಾಗಲೇ ಮದುವೆ ಆದವರು ಈ ಸಂಗತಿಯನ್ನು ಮುಚ್ಚಿಟ್ಟು ಮತ್ತೊಮ್ಮೆ ಮದುವೆಗೆ ಜಾಹೀರಾತು ನೀಡುವುದು ವಿಶೇಷವೇನಲ್ಲ. ಆದರೆ ಇಂತಹ ಸಂಗತಿಯನ್ನು ಅಂತರಜಾಲವೇ ಹೊರಹಾಕಿದ್ದು ಮಾತ್ರ ಕೌತುಕ. ಕೊಲ್ಕತ್ತಾದ ಹುಡುಗಿಯೊಬ್ಬಳು ಅಮೇರಿಕಾದವನನ್ನು ಜಾಲತಾಣವೊಂದರಲ್ಲಿಯ ಜಾಹೀರಾತಿನ ಮೂಲಕ ಸಂಪರ್ಕಿಸಿ ಅಂತರಜಾಲದ ಮೂಲಕವೇ ಮಾತನಾಡಿ ವಿವಾಹಕ್ಕೆ ನಿಶ್ಚಯ ಮಾಡಿಕೊಂಡಿದ್ದಳು. ಆಕೆ ವಿವಾಹಕ್ಕೆ ಸಂಬಂಧಪಟ್ಟ ಏರ್ಪಾಡುಗಳನ್ನು ನೆರವೇರಿಸುವ ಜಾಲತಾಣವೊಂದರಲ್ಲಿ ತನ್ನ ಮದುವೆಗೆ ಬೇಕಾದ ಏರ್ಪಾಡುಗಳನ್ನು ಮಾಡಲು ಹೊರಟಳು. ಆಗ ಆಕೆಗೆ ಆಕಸ್ಮಿಕವಾಗಿ ತಾನು ಈಗ ಮದುವೆ ಮಾಡಿಕೊಳ್ಳಲು ಹೊರಟ ಹುಡುಗ ಇದೇ ಜಾಲತಾಣದಲ್ಲಿ ಎರಡು ವರ್ಷಗಳ ಹಿಂದೆ ಮದುವೆಗೆ ಕಲ್ಯಾಣ ಮಂಟಪವನ್ನು ಕಾದಿರಿಸಿದ್ದ ಎಂದು. ನಂತರ ಆಕೆ ಅಂತರಜಾಲದ ಮೂಲಕವೇ ಆತ ಯಾರನ್ನು ಮದುವೆ ಆಗಿದ್ದ ಎಂದೆಲ್ಲ ಪತ್ತೆ ಹಚ್ಚಿ ಆತ ಸುಳ್ಳುಗಾರ ಎಂಬುದನ್ನು ಕಂಡುಹಿಡಿದಳು. ಮದುವೆ ಮುರಿದುಬಿತ್ತು ಎಂದು ಪ್ರತ್ಯೇಕವಾಗಿ ಹೇಳಬೇಕಾಗಿಲ್ಲ ತಾನೆ?

e- ಪದ

ವೈರಲ್ ಮಾರ್ಕೆಟಿಂಗ್ (viral marketing) - ಅಂತರಜಾಲದಲ್ಲಿರುವ ಸೋಶಿಯಲ್ ನೆಟ್‌ವಕಿಂಗ್ (ಆರ್ಕುಟ್, ಫೇಸ್‌ಬುಕ್, ಟ್ವಿಟ್ಟರ್, ಇತ್ಯಾದಿ) ಜಾಲತಾಣಗಳನ್ನು ಬಳಸಿ ಜಾಹೀರಾತು ಮತ್ತು ವ್ಯಾಪಾರ. ಇದರಲ್ಲಿರುವ ವೈಶಿಷ್ಟ್ಯವೇನೆಂದರೆ ಜಾಹೀರಾತಿಗೆ ಅವರು ಹಣ ನೀಡುವುದು ಕಡಿಮೆ. ಜನರನ್ನೇ ಬಳಸಿ ತಮ್ಮ ಜಾಹೀರಾತನ್ನು ಇತರರು ಮತ್ತೆ ಪುನರುಚ್ಚರಿಸುವಂತೆ ಮಾಡುವುದು. ಉದಾಹರಣೆಗೆ ತಮ್ಮ ಜಾಲತಾಣದಲ್ಲಿ ಹೊಸ ನಮೂನೆಯ ಟೀಶರ್ಟ್ ಇದೆ. ಅದರ ಬಗ್ಗೆ ಟ್ವೀಟ್ ಮಾಡಿದವರಲ್ಲೊಬ್ಬರಿಗೆ ಉಚಿತ ಟೀಶರ್ಟ್ ಕೊಡುತ್ತೇವೆ ಎನ್ನುವುದು.

e - ಸಲಹೆ

ಬಾಲಾಜಿ ಅವರ ಪ್ರಶ್ನೆ: ನನಗೆ ಗ್ರಂಥಾಲಯ ಉಸ್ತುವಾರಿಯ ತಂತ್ರಾಂಶ ಬೇಕು. ಎಲ್ಲಿ ಸಿಗುತ್ತದೆ?
ಉ: calibre-ebook.com  ಜಾಲತಾಣದಿಂದ ಇಂತಹ ಒಂದು ತಂತ್ರಾಂಶವನ್ನು ನೀವು ಡೌನ್‌ಲೋಡ್ ಮಾಡಿಕೊಳ್ಳಬಹುದು.

ಕಂಪ್ಯೂತರ್ಲೆ

ಸೂಪರ್ ಹೀರೋ ರಜನೀಕಾಂತ್ ಮತ್ತು ಗಣಕ

·    ರಜನೀಕಾಂತ್ ಗಣಕಕ್ಕೆ ವೈರಸ್ ಬರುವ ಮೊದಲೇ ರಜನೀಕಾಂತ್ ಅದನ್ನು ಕೊಲ್ಲುತ್ತಾರೆ.
·    ರಜನೀಕಾಂತ್ ಯಾರಿಗಾದರೂ ಒದ್ದರೆ ಅವರು ಎಷ್ಟು ದೂರ ಹೋಗಿ ಬೀಳುತ್ತಾರೆ ಎಂದರೆ ಗೂಗ್ಲ್ ಕೂಡ ಅವರನ್ನು ಹುಡುಕಲಾರದು.
·    ರಜನೀಕಾಂತ್ ಒಂದು ಸ್ಥಳಕ್ಕೆ ಅವರು ಕಳುಹಿಸಿದ ಇಮೈಲ್ ತಲುಪುವ ಮೊದಲೇ ತಲುಪಬಲ್ಲರು.
·    ರಜೀಕಾಂತ್ ಅವರ ಗಣಕಕ್ಕೆ ಯಾರದರೂ ಹ್ಯಾಕ್ ಮಾಡುವ ಮೊದಲೇ ರಜನೀಕಾಂತ್ ಅವರನ್ನು ದಾಳಿ ಮಾಡಿ ನಾಶ ಮಾಡಬಲ್ಲರು.

ಸೋಮವಾರ, ಸೆಪ್ಟೆಂಬರ್ 6, 2010

ಗಣಕಿಂಡಿ - ೦೬೮ (ಸಪ್ಟಂಬರ್ ೦೬, ೨೦೧೦)

ಅಂತರಜಾಲಾಡಿ

ಮುಕ್ತ ಸೃಜನಶೀಲರು

ನೀವು ಒಬ್ಬ ಸೃಜನಶಿಲ ಲೇಖಕ ಅಥವಾ ಕಲಾವಿದರಾಗಿರಬಹುದು. ನಿಮ್ಮ ಸೃಷ್ಟಿಯನ್ನು ಇತರರಿಗೆ ಹಂಚಲು ನಿಮಗೆ ಇಷ್ಟವಿದೆ. ಆದರೆ ಅದನ್ನು ಯಾವ ಪರವಾನಗಿಯಲ್ಲಿ ನೀಡುತ್ತೀರಿ? ಸಂಪೂರ್ಣ ಉಚಿತವೇ? ಅದನ್ನು ಲಾಭರಹಿತ ಉದ್ದೇಶಕ್ಕೆ ಮಾತ್ರ ಬಳಸಿಕೊಳ್ಳಬಹುದು; ವಾಣಿಜ್ಯಕ ಉದ್ದೇಶಕ್ಕೆ ಬಳಸಿಕೊಳ್ಳಬೇಕಿದ್ದರೆ ನಿಮಗೆ ಹಣ ನೀಡಬೇಕು ಆಥವಾ ವಾಣಿಜ್ಯಕ ಉದ್ದೇಶಕ್ಕೆ ಖಂಡಿತ ಪರವಾನಗಿ ಇಲ್ಲ; ಬದಲಾವಣೆ ಮಾಡಲು ಪರವಾನಗಿ ಇದೆಯೇ? ಇದ್ದರೆ ಯಾವ ರೀತಿ? -ಹೀಗೆ ಹಲವಾರು ಸಾಧ್ಯತೆಗಳಿವೆ. ಹೀಗೆ ಎಲ್ಲ ನಮೂನೆಯ ಪರವಾನಗಿಗಳನ್ನು ಪಟ್ಟಿ ಮಾಡಿ ಅದರಲ್ಲಿ ಯಾವುದು ಬೇಕೋ ಅದನ್ನು ಬಳಸಲು ನಿಮಗೆ ಅನುವು ಮಾಡಿಕೊಡುವ ಜಾಲತಾಣ creativecommons.org. ಇದನ್ನು ಸಾಮಾನ್ಯವಾಗಿ ತಂತ್ರಾಂಶ ಕ್ಷೇತ್ರದಲ್ಲಿ ಬಳಕೆಯಾಗುವ ಮುಕ್ತ ತಂತ್ರಾಂಶ (opensource software) ಪರವಾನಗಿಗೆ ಪರ್ಯಾಯವಾಗಿ ಬಳಸುತ್ತಾರೆ. ಆದರೆ ಇವೆರಡೂ ಒಂದೇ ಅಲ್ಲ.

ಡೌನ್‌ಲೋಡ್

e-ಪುಸ್ತಕ ಓದುಗರಿಗೆ  

ಇತ್ತೀಚೆಗೆ ವಿದ್ಯುನ್ಮಾನ ಪುಸ್ತಕಗಳು ತುಂಬ ಜನಪ್ರಿಯವಾಗುತ್ತಿವೆ. ಇವುಗಳಲ್ಲಿ ಅತ್ಯಂತ ಸರಳವಾಗಿರುವುದು ಎಂದರೆ ಅಡೋಬಿ ಪಿಡಿಎಫ್ ವಿಧಾನದ ಕಡತಗಳು. ಇವುಗಳನ್ನು ಸುಮ್ಮನೆ ಮೌಸ್ ಬಳಸಿ ಮುಂದಿನ ಪುಟಕ್ಕೆ, ಅಂದರೆ ಕೆಳಗಡೆ, ಸರಿಸಿ ಓದಬಹುದು. ಈ ರೀತಿ ಓದುವುದರಿಂದ ಪುಸ್ತಕ ಓದಿದ ಪೂರ್ತಿ ಭಾವನೆ ಬರುವುದಿಲ್ಲ. ಪುಸ್ತಕ ಓದಿದಂತೆ ಒಂದು ಪುಟ ಆದ ನಂತರ ಇನ್ನೊಂದು ಪುಟಕ್ಕೆ ಹೋಗಬೇಕಾದರೆ ಪುಟವನ್ನು ಗಣಕದ ಪರದೆಯಲ್ಲಿ ತಿರುವಿದಂತೆ ಭಾಸವಾಗುವಂತೆ ಮಾಡಿದರೆ ಚೆನ್ನಾಗಿರುತ್ತದಲ್ಲವೇ? ಇಂತಹ ತಂತ್ರಾಂಶಗಳು ಹಲವಾರಿವೆ. ಅಂತಹ ಒಂದು ಉಚಿತ ತಂತ್ರಾಂಶ martview. ಇದನ್ನು ಬಳಸಿ ಅವರು ತಮ್ಮ ಅಂತರಜಾಲತಾಣದಲ್ಲಿ ನೀಡಿರುವ ಪುಸ್ತಕಗಳನ್ನು ಡೌನ್‌ಲೋಡ್ ಮಾಡಿ ಓದಬಹುದು ಮಾತ್ರವಲ್ಲ, ನಿಮ್ಮ ಗಣಕದಲ್ಲಿರುವ ಯಾವುದೇ ಪಿಡಿಎಫ್ ಪುಸ್ತಕವನ್ನು ಕೂಡ ಈ ವಿಧಾನದಲ್ಲಿ ಓದಬಹುದು. ಈ ತಂತ್ರಾಂಶ ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ http://martview.com/index.php

e - ಸುದ್ದಿ

ತನ್ನನ್ನು ತಾನೆ ವಿವರಿಸಿ ಸಿಕ್ಕಿಹಾಕಿಕೊಂಡ

ಪತ್ರಿಕೆಗಳಲ್ಲಿ ಬರುವ ವರದಿಗಳಲ್ಲಿ ತಪ್ಪಿರುವುದು ಸಹಜ. ಘಟನೆ ನಡೆದ ಸ್ಥಳದಲ್ಲಿ ಇದ್ದವರಿಗೆ ತಪ್ಪು ವರದಿ ಓದಿದಾಗ ಮೈ ಉರಿಯುತ್ತದೆ. ಸಂಪಾದಕ ಅಥವಾ ವರದಿಗಾರರಿಗೆ ಪತ್ರ ಅಥವಾ ಇಮೈಲ್ ಮೂಲಕ ಸರಿಯಾದ ಘಟನೆಯನ್ನು ವಿವರಿಸಿ ಬರೆಯುತ್ತಾರೆ. ಜರ್ಮನಿಯಲ್ಲಿ ಹೀಗೆಯೇ ಆಯಿತು. ಒಬ್ಬ ದರೋಡೆಗಾರನ ಚಹರೆಯನ್ನು ಪತ್ರಿಕೆಯಲ್ಲಿ ವಿವರಿಸಿದುದು ಸರಿಯಿರಲಿಲ್ಲ. ಆತನ ವಿವರ ಸರಿಯಿಲ್ಲ, ಅದು ಈ ರೀತಿ ಇರಬೇಕು, ಎಂದು ವಿವರಿಸುವ ಇಮೈಲ್ ಪತ್ರಿಕಾ ಕಛೇರಿಗೆ ಬಂತು. ಹಾಗೆ ಕಳುಹಿಸಿದ್ದು ಘಟನೆ ನಡೆದ ಸ್ಥಳದಲ್ಲಿದ್ದ ವೀಕ್ಷಕ ಅಲ್ಲ. ಆ ದರೋಡೆಗಾರನೇ ಅದನ್ನು ಕಳುಹಿಸಿದ್ದ. ವಿವರ ಓದಿದ ಪೋಲೀಸರು ಅತನನ್ನು ಹಿಡಿದರು ಎಂದು ಪ್ರತ್ಯೇಕವಾಗಿ ಹೇಳುವ ಅಗತ್ಯವಿಲ್ಲ ತಾನೆ?

e- ಪದ

ಮುಕ್ತ ಸೃಜನಶೀಲರು (creative commons) - ಸೃಜನಶೀಲ ಕೆಲಸವನ್ನು ಇತರರಿಗೆ ಉಚಿತವಾಗಿ ಹಂಚಲು ನೀಡುವ ಹಲವು ನಮೂನೆಯ ಪರವಾನಗಿಗಳನ್ನು ವಿವರಿಸುವ ನಿಯಮಗಳು. ಅಂತರಜಾಲದಲ್ಲಿ ಈ ಪರವಾನಗಿಯಲ್ಲಿ ನೀಡಿರುವ ಹಲವು ಲೇಖನ, ಸಂಗೀತ, ಧ್ವನಿ ಮತ್ತು ವೀಡಿಯೋ ಪಾಠಗಳು ಲಭ್ಯವಿವೆ. ಇವನ್ನು ಸಾಮಾನ್ಯವಾಗಿ ವೈಯಕ್ತಿಕ ಅಥವಾ ಶೈಕ್ಷಣಿಕ ಉದ್ದೇಶಗಳಿಗೆ ಉಚಿತವಾಗಿ ಬಳಸಿಕೊಳ್ಳಲು ಪರವಾನಗಿ ನೀಡಿರುತ್ತಾರೆ.

e - ಸಲಹೆ

ನಾರಾಯಣ ಭಟ್ ಅವರ ಪ್ರಶ್ನೆ: ಕ್ಯಾಮರಾದಿಂದ ತೆಗೆದ ಫಿಲಂಗಳನ್ನು(35mm; ಕಪ್ಪು-ಬಿಳುಪು, ಕಲರ್) ಡಿಜಿಟಲ್ ಮಾಧ್ಯಮಕ್ಕೆ ಸುಲಭವಾಗಿ ಪರಿವರ್ತಿಸಬಹುದೆ? ದಯವಿಟ್ಟು ತಿಳಿಸಿ.
ಉ: ಸಾಧ್ಯ. ಅದಕ್ಕೆಂದೇ ಇರುವ ವಿಶೇಷ ಫಿಲ್ಮ್/ಸ್ಲೈಡ್ ಸ್ಕ್ಯಾನರ್ ಬಳಸಿ ಫಿಲಂನ್ನು ಸ್ಕ್ಯಾನ್ ಮಾಡಬೇಕಾಗುತ್ತದೆ. ಬೆಂಗಳೂರು, ಮುಂಬೈ ಮುಂತಾದ ಮಹಾನಗರಗಳಲ್ಲಿ ಈ ರೀತಿಯ ಸೇವೆ ನೀಡುವವರಿದ್ದಾರೆ.

ಕಂಪ್ಯೂತರ್ಲೆ

ಕೋಲ್ಯ: ನನ್ನ ಸಿ.ಡಿ. ಡ್ರೈವ್‌ನಲ್ಲಿ ನಾಲ್ಕು ಸಿ.ಡಿ.ಗಳನ್ನು ಒಟ್ಟಿಗೆ ಹಾಕಲು ಆಗುತ್ತಿಲ್ಲ.
ತಂತ್ರಜ್ಞ: ಆದರೆ ನಾಲ್ಕು ಸಿ.ಡಿ. ಹಾಕಬಹುದು ಎಂದು ನಿಮಗೆ ಯಾರು ಹೇಳಿದ್ದು?
ಕೋಲ್ಯ: ಸಿ.ಡಿ. ಡ್ರೈವ್‌ನ ಮೇಲೆ 4xCD ಎಂದು ಬರೆದಿದೆ.

ಮಂಗಳವಾರ, ಆಗಸ್ಟ್ 31, 2010

ಗಣಕಿಂಡಿ - ೦೬೭ (ಆಗಸ್ಟ್ ೩೦, ೨೦೧೦)

ಅಂತರಜಾಲಾಡಿ

ಖಾನ್ ಅಕಾಡೆಮಿ

ಅಂತರಜಾಲದಲ್ಲಿ ಶೈಕ್ಷಣಿಕ ಪಾಠಗಳನ್ನು ವೀಡಿಯೋ ಮೂಲಕ ನಡೆಸುವ ಹಲವಾರು ಜಾಲತಾಣಗಳಿವೆ. ಅವುಗಳಲ್ಲಿ ಬಹುಪಾಲು ವಾಣಿಜ್ಯಕವಾಗಿವೆ. ಪ್ರಾಥಮಿಕ, ಮಾಧ್ಯಮಿಕ ಮತ್ತು ಪಿ.ಯು.ಸಿ. ಮಟ್ಟದ ಉಚಿತ ವೀಡಿಯೋ ಪಾಠಗಳಿಗೆ ನೀವು www.khanacademy.org ಜಾಲತಾಣಕ್ಕೆ ಭೇಟಿ ನೀಡಬಹುದು. ಈ ಜಾಲತಾಣದಲ್ಲಿ ಭೌತಶಾಸ್ತ್ರ, ಗಣಿತ, ರಸಾಯನಶಾಸ್ತ್ರ, ಹೀಗೆ ಹಲವಾರು ವಿಷಯಗಳ ಬಗ್ಗೆ ವೀಡಿಯೋ ಪಾಠಗಳಿವೆ. ಇಲ್ಲಿರುವ ಒಟ್ಟು ವೀಡಿಯೋಗಳ ಸಂಖ್ಯೆ ೧೬೦೦ಕ್ಕಿಂತ ಹೆಚ್ಚು. ಇಷ್ಟೆಲ್ಲವನ್ನೂ ಸಲ್ಮಾನ್ ಖಾನ್ ಎಂಬ ಒಬ್ಬನೇ ವ್ಯಕ್ತಿ ತಯಾರಿಸಿದ್ದು ಎನ್ನುವುದು ಅಚ್ಚರಿಯ ಸಂಗತಿ. ಇವುಗಳ ಪ್ರಯೋಜನವನ್ನು ನೀವು, ಶಾಲಾವಿದ್ಯಾರ್ಥಿಗಳು, ಶಿಕ್ಷಕರು ಎಲ್ಲರೂ ಪಡೆದುಕೊಳ್ಳಬಹುದು.

ಡೌನ್‌ಲೋಡ್

ಫ್ಲಿಕರ್‌ನಿಂದ ಡೌನ್‌ಲೋಡ್ ಮಾಡಿ

flickr.com ಜಾಲತಾಣ ನಿಮಗೆ ತಿಳಿದಿರಬಹುದು. ಈ ಜಾಲತಾಣದಲ್ಲಿ ಜನರು ಸೇರಿಸಿದ ಛಾಯಾಚಿತ್ರಗಳಿವೆ. ಈ ಜಾಲತಾಣಕ್ಕೆ ನೀವೂ ಛಾಯಾಚಿತ್ರ ಸೇರಿಸಿ ಜಗತ್ತಿಗೆಲ್ಲ ಹಂಚಬಹುದು. ಆದರೆ ಈ ಜಾಲತಾಣದಿಂದ ಚಿತ್ರಗಳನ್ನು ನಿಮ್ಮ ಗಣಕಕ್ಕೆ ಡೌನ್‌ಲೋಡ್ ಮಾಡಬೇಕಾದರೆ ಪ್ರತಿಯೊಂದು ಚಿತ್ರವನ್ನೂ ತೆರೆದು ಒಂದೊಂದಾಗಿ ಡೌನ್‌ಲೋಡ್ ಮಾಡಬೇಕು. ನಿಮ್ಮ ಸ್ನೇಹಿತನ ಜೊತೆ ಹಂಪಿಗೆ ಹೋಗಿದ್ದಾಗ ತೆಗೆದ ನೂರಾರು ಛಾಯಾಚಿತ್ರಗಳನ್ನು ಆತ ಪ್ಲಿಕರ್‌ನಲ್ಲಿ ಸೆರಿಸಿ ನಿಮಗೆ ಅದರ ಕೊಂಡಿ ಕಳುಸಿದ್ದಾನೆ ಎಂದಿಟ್ಟುಕೊಳ್ಳಿ. ಎಲ್ಲ ಚಿತ್ರಗಳನ್ನು ಒಂದೆ ಆದೇಶ ಮೂಲಕ ಡೌನ್‌ಲೋಡ್ ಮಾಡಲು ಒಂದು ಉಪಯುಕ್ತ ತಂತ್ರಾಂಶವಿದೆ. ಅದುವೇ Bulkr.  ಇದು ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ clipyourphotos.com/bulkr. ಆದರೆ ನೆನಪಿಟ್ಟುಕೊಳ್ಳಿ -ಅಂತರಜಾಲದಲ್ಲಿರುವ ಛಾಯಾಚಿತ್ರಗಳನ್ನೆಲ್ಲ ನೀವು ಪ್ರತಿಮಾಡಿಕೊಳ್ಳುವಂತಿಲ್ಲ. ಯಾವ ಚಿತ್ರಗಳನ್ನು ಯಾರು ಬೇಕಾದರೂ ಬಳಸಿಕೊಳ್ಳಬಹುದು ಎಂಬುದಾಗಿ ಜಾಲತಾಣದಲ್ಲಿ ಹೇಳಿಕೆ ಇದೆಯೋ ಅಂತಹ ಜಾಲತಾಣದಿಂದ ಮಾತ್ರ ನೀವು ಡೌನ್‌ಲೋಡ್ ಮಾಡಿಕೊಳ್ಳಬಹುದು.  

e - ಸುದ್ದಿ

ಫೋಟೋದಲ್ಲಿ ಸಿಕ್ಕಿಬಿದ್ದ ಕಳ್ಳ

ಅಮೃತವರ್ಷಿಣಿ ಚಲನಚಿತ್ರ ನೀವು ನೋಡಿರಬಹುದು. ಅದರಲ್ಲಿ ಕೊಲೆಗಾರನನ್ನು ಸೆರೆಹಿಡಿದಿದ್ದು ಕ್ಯಾಮರ. ನಿಜಜೀವನದಲ್ಲೂ ಇಂತಹುದೇ ಘಟನೆ ನಡೆದಿದೆ. ಅಮೇರಿಕದ ಮ್ಯಾಡಿಸನ್ ನಗರದಲ್ಲಿ ಒಬ್ಬಾತನಿಗೆ ಒಂದು ಕಟ್ಟಡದ ಮುಂದೆ  ತನ್ನ ಮತ್ತು ಕುಟುಂಬದವರ ಫೋಟೋ ತೆಗಸಿಕೊಳ್ಳಬೇಕಿತ್ತು. ಅದಕ್ಕಾಗಿ ಆತ ತನ್ನ ಬ್ಯಾಗನ್ನು ಸ್ವಲ್ಪ ದೂರ, ಕಟ್ಟಡದ ಮೆಟ್ಟಿಲಲ್ಲಿಟ್ಟು, ಕ್ಯಾಮರಾವನ್ನು ಒಂದು ಕಡೆ ನಿಲ್ಲಿಸಿ ಅದರಲ್ಲಿರುವ ಸ್ವಯಂಚಾಲಿತವಾಗಿ ಫೋಟೋ ತೆಗೆಯುವ ಸವಲತ್ತನ್ನು ಬಳಸಿದ. ಫೋಟೋ ತೆಗೆದ ನಂತರ ನೋಡಿದಾಗ ಆತನ ಬ್ಯಾಗ್ ನಾಪತ್ತೆಯಾಗಿತ್ತು. ಆತನ ಅದೃಷ್ಟಕ್ಕೆ ಬ್ಯಾಗ್ ಕದಿಯುವಾಗ ಕಳ್ಳ ಆತ ತೆಗೆದ ಫೋಟೋದಲ್ಲಿ ಸಿಕ್ಕಿಬಿದ್ದಿದ್ದ. ಆ ಫೋಟೋ ಪೋಲೀಸರಿಗೆ ತೋರಿಸಿದಾಗ ಅರ್ಧ ಘಂಟೆಯ ಒಳಗೆ ಕಳ್ಳನನ್ನು ಬ್ಯಾಗ್ ಸಮೇತ ಹಿಡಿದರು.

e- ಪದ

ಸ್ಟೆಗನೋಗ್ರಾಫಿ (Steganography) -ಒಂದು ಚಿತ್ರ ಅಥವಾ ಕಡತದೊಳಗೆ ಗುಪ್ತವಾಗಿ ಮಾಹಿತಿಯನ್ನು ಅಡಗಿಸಿ ಇನ್ನೊಬ್ಬರಿಗೆ ಕಳುಹಿಸುವುದು. ಸಾಮಾನ್ಯವಾಗಿ ಮಾಹಿತಿಯನ್ನು ಗೂಢಲಿಪೀಕರಿಸಿ (encryption) ಇನ್ನೊಬ್ಬರಿಗೆ ಕಳುಹಿಸುತ್ತಾರೆ. ಹಾಗೆ ಕಳುಹಿಸಿದಾಗ ಅದು ಏನೆಂದು ಆ ಮಾಹಿತಿ ತಲುಪಬೇಕಾದವರಿಗೆ ಹೊರತು ಬೇರೆ ಯಾರಿಗೂ ಏನೂ ಅರ್ಥವಾಗುವುದಿಲ್ಲ. ಆದರೆ ಗುಪ್ತ ಮಾಹಿತಿ ಹೋಗಿದೆ ಎಂದು ತಿಳಿಯುತ್ತದೆ. ಆದರೆ ಒಂದು ಚಿತ್ರದೊಳಗೆ ಮಾಹಿತಿ ಅಡಗಿಸಿ ಕಳುಹಿಸಿದರೆ ಬೇರೆಯವರಿಗೆ ಯಾವ ಸಂದೇಹವೂ ಬರುವುದಿಲ್ಲ.

e - ಸಲಹೆ

ಸಹನ ಅವರ ಪ್ರಶ್ನೆ: ನನಗೆ ಮನೆಬಳಕೆಗೆ ಉತ್ತಮ ಮತ್ತು ಉಚಿತ ವೈರಸ್ ನಿರೋಧಕ ತಂತ್ರಾಂಶ ಬೇಕು. ಯಾವುದನ್ನು ಬಳಸಬೇಕು? ಎಲ್ಲಿ ಸಿಗುತ್ತದೆ?
ಉ: ನೀವು Microsoft Security Essentials ಬಳಸಬಹುದು. ಇದು ಬೇಕಿದ್ದಲ್ಲಿ http://bit.ly/cHMEjx ಜಾಲತಾಣಕ್ಕೆ ಭೇಟಿ ನೀಡಿ.

ಕಂಪ್ಯೂತರ್ಲೆ

ಗಣಕವಾಡು

ಡೆಸ್ಕ್‌ಟಾಪ್ ಆದರೇನು ಶಿವ
ಲ್ಯಾಪ್‌ಟಾಪ್ ಆದರೇನು ಶಿವ
ವೈರಸ್‌ಗೆಲ್ಲ ಒಂದೇ ಶಿವ

ಸೋಮವಾರ, ಆಗಸ್ಟ್ 23, 2010

ಗಣಕಿಂಡಿ - ೦೬೬ (ಆಗಸ್ಟ್ ೨೩, ೨೦೧೦)

ಅಂತರಜಾಲಾಡಿ

ಪತ್ರಿಕಾಸಂಗ್ರಹಾಲಯ

ಹಳೆಯ ವಸ್ತುಗಳಿಗೆ, ಅಪರೂಪದ ವಸ್ತುಗಳಿಗೆ, ವಿಜ್ಞಾನ ಮತ್ತು ತಂತ್ರಜ್ಞಾನದ ಮಾದರಿಗಳಿಗೆ ಎಲ್ಲ ವಸ್ತುಸಂಗ್ರಹಾಲಯಗಳಿರುವುದು ತಿಳಿದಿರಬಹುದು. ಪತ್ರಿಕೆಗಳಿಗೆ? ಹೌದು. ಅವುಗಳಿಗೂ ಸಂಗ್ರಹಾಲಯವಿದೆ. ಈ ಸಂಗ್ರಹಾಲಯ ೨,೫೦,೦೦೦ ಚದರ ಅಡಿಗಳಷ್ಟು ವಿಸ್ತಾರವಾಗಿದ್ದು ಅಮೇರಿಕ ದೇಶದ ವಾಶಿಂಗ್ಟನ್ ನಗರದಲ್ಲಿದೆ. ಈ ಸಂಗ್ರಹಾಲಯಕ್ಕೆ ಪೂರಕವಾಗಿರುವ ಜಾಲತಾಣ www.newseum.org. ಇದರಲ್ಲಿ ವಸ್ತುಸಂಗ್ರಹಾಲಯದ ಭೇಟಿಗೆ ಟಿಕೆಟು, ಪುಸ್ತಕಗಳು, ಇನ್ನಿತರೆ ಸಂಬಂಧಿ ವಸ್ತುಗಳು ಎಲ್ಲ ಮಾರಾಟಕ್ಕಿವೆ. ಜೊತೆಗೆ ಪ್ರಪಂಚದ ಬಹುಪಾಲು ದೇಶಗಳ ಖ್ಯಾತ ಪತ್ರಿಕೆಗಳ ಈ ದಿನದ ಮುಖಪುಟವನ್ನೂ ನೋಡಬಹುದು. ಇವುಗಳಲ್ಲದೆ ಪತ್ರಿಕೋದ್ಯವಮಕ್ಕೆ ಸಂಬಂಧಿಸಿದ ಇನ್ನೂ ಹಲವಾರು ಉಪಯುಕ್ತ ಮಾಹಿತಿಗಳು ಇಲ್ಲಿವೆ. ಜನಸಾಮಾನ್ಯರಿಗೆ ಮಾತ್ರವಲ್ಲ, ಪತ್ರಿಕೋದ್ಯಮ ವಿದ್ಯಾರ್ಥಿಗಳಿಗೆ ಮತ್ತು ಅಧ್ಯಾಪಕರುಗಳಿಗೂ ತುಂಬ ಉಪಯುಕ್ತ ಜಾಲತಾಣ.

ಡೌನ್‌ಲೋಡ್

ಅಣು ಮಾದರಿ

ರಸಾಯನ ಶಾಸ್ತ್ರದಲ್ಲಿ ಒಂದು ಕಷ್ಟದ ಕೆಲಸವೆಂದರೆ ಪರಮಾಣುಗಳ ಸಂಯೋಜನೆಯಿಂದಾಗುವ ಅಣುಗಳ ರಚನೆಗಳನ್ನು ಸಮರ್ಥವಾಗಿ ಚಿತ್ರದಲ್ಲಿ ಮೂಡಿಸುವುದು. ಈ ಅಣುಗಳು ಮೂರು ಆಯಾಮದಲ್ಲಿರುತ್ತವೆ. ಅವುಗಳನ್ನು ಎರಡು ಆಯಾಮದಲ್ಲಿ ರಾಸಾಯನಿಕ ಸೂತ್ರದ ಮೂಲಕ ಬರೆಯುತ್ತೇವೆ. ಕೆಲವು ರಾಸಾಯನಿಕಗಳಿಗೆ ಬೇರೆ ಬೇರೆ ರಚನೆಗಳಿದ್ದರೂ ಅವುಗಳ ರಾಸಾಯನಿಕ ಸೂತ್ರ ಒಂದೇ ಆಗಿರುತ್ತದೆ. ಅಣುಗಳನ್ನು ಮೂರು ಆಯಾಮದಲ್ಲಿ ತೋರಿಸುವ ತಂತ್ರಾಂಶ Avogadro. ಇದು ತುಂಬ ಕ್ಲಿಷ್ಟವಾದ ಸಂರಚನೆಗಳನ್ನು ಪರದೆಯ ಮೇಲೆ ಮೂರು ಆಯಾಮದಲ್ಲಿ ಮೂಡಿಸಿ ತೋರಿಸುತ್ತದೆ. ಇದು ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ http://bit.ly/bb86CN. ವಿದ್ಯಾರ್ಥಿಗಳಿಗೂ ಶಿಕ್ಷಕರಿಗೂ ಉಪಯುಕ್ತ ತಂತ್ರಾಂಶ ಇದು. ಇದನ್ನು ಬಳಸಬೇಕಾದರೆ ರಸಾಯನಶಾಸ್ತ್ರದಲ್ಲಿ ಪರಿಣತರಾಗಿರಬೇಕು. ಅಣುವಿನಲ್ಲಿರುವ ಪ್ರತಿಯೊಂದು ಪರಮಾಣುವನ್ನೂ ತಿರುಗಿಸಿ, ಎಳೆದು, ತಿರುಚಿ, ಎಲ್ಲ ಮಾಡಬಹುದು, ರಾಸಾಯನಿಕ ಬಂಧಗಳ ಗುಣ ತಿಳಿಯಬಹುದು, ಪರಮಾಣುಗಳ ನಡುವಿನ ಕೋನ ಅಳೆಯಬಹುದು -ಹೀಗೆ ಹಲವು ಉಪಯುಕ್ತ ಸವಲತ್ತುಗಳು ಇದರಲ್ಲಿವೆ.

e - ಸುದ್ದಿ

ಬೊಗಳೆಗೆ ಶಿಕ್ಷೆ

“ನಾನು ಇವತ್ತು ಎಷ್ಟು ವೇಗವಾಗಿ ವಾಹನ ಓಡಿಸಿಕೊಂಡು ಬಂದೆ ಗೊತ್ತಾ” ಎಂದು ಬಡಾಯಿಕೊಚ್ಚಿಕೊಳ್ಳುವವರು ತುಂಬ ಇದ್ದಾರೆ. ಹಾಗೆ ಹೇಳಿಕೊಂಡು ಅದರಿಂದಾಗಿ ಶಿಕ್ಷೆಗೆ ಗುರಿಯಾದ ಸುದ್ದಿ ನಮಗೆ ತಿಳಿದಿಲ್ಲ. ಆದರೆ ಕೆನಡ ದೇಶದಲ್ಲಿ ೧೯ ವರ್ಷದ ಯುವಕನೊಬ್ಬ ಬಡಾಯಿಕೊಚ್ಚಿಕೊಂಡು ಶಿಕ್ಷೆಗೆ ಗುರಿಯಾದ ಸುದ್ದಿ ಬಂದಿದೆ. ಆದರೆ ಆತ ಬಡಾಯಿಕೊಚ್ಚಿಕೊಂಡಿದ್ದು ಸುತ್ತಮುತ್ತಲಿನವರ ಜೊತೆ ಅಲ್ಲ, ಅಂತರಜಾಲದಲ್ಲಿ. ಕಾರುಗಳ ಬಗ್ಗೆ ವಿಚಾರವಿನಿಮಯ ಮಾಡಲು ಇರುವ ಜಾಲತಾಣವೊಂದರಲ್ಲಿ ಆತ “ನಾನು ೪೦ ಕಿ.ಮೀ. ವೇಗದ ಮಿತಿ ಇರುವ ರಸ್ತೆಯಲ್ಲಿ ೧೪೦ ಕಿ.ಮೀ. ವೇಗದಲ್ಲಿ ಕಾರು ಓಡಿಸಿದೆ” ಎಂದು ಬರೆದಿದ್ದ. ಇದನ್ನು ಓದಿದ ಒಬ್ಬಾತ ಪೋಲೀಸರಿಗೆ ದೂರು ನೀಡಿ ಅವರು ಆತನನ್ನು ಬಂಧಿಸಿ ಶಿಕ್ಷೆಗೆ ಗುರಿಪಡಿಸಿದರು.

e- ಪದ

ಟ್ವೀಟಪ್ (Tweetup) - ಟ್ವಿಟ್ಟರ್ ಮೂಲಕ ಏರ್ಪಾಡು ಮಾಡಿದ ಸಭೆ ಅಥವಾ ಜನರ ಒಟ್ಟುಗೂಡುವಿಕೆ. ಟ್ವಿಟ್ಟರ್‌ನಲ್ಲಿ ಯಾವಾಗಲು ಮಾತುಕತೆ ನಡೆಸುವ ಸಮಾನಮನಸ್ಕರು ಟ್ವಿಟ್ಟರ್‌ನ ಮೂಲಕವೇ ಎಲ್ಲಿ ಯಾವಾಗ ಸಭೆ ಸೇರುವುದು ಎಂದು ಚರ್ಚಿಸಿ, ನಿರ್ಧರಿಸಿ ಅನಂತರ ಜೊತೆಗೂಡುವುದಕ್ಕೆ ಟ್ವೀಟಪ್ ಎನ್ನುತ್ತಾರೆ. ಈ ಪದ ಈಗ ಆಕ್ಸ್‌ಫರ್ಡ್ ನಿಘಂಟುವನ್ನು ಸೇರಿದೆ.

e - ಸಲಹೆ

ಮಧುಸೂದನ ಶೆಟ್ಟಿ ಅವರ ಪ್ರಶ್ನೆ: ನನಗೆ Microsoft Visual Studio full version ಬೇಕು. ಎಲ್ಲಿ ಸಿಗುತ್ತದೆ?
ಉ: www.microsoft.com/express ಜಾಲತಾಣದಲ್ಲಿ ನಿಮಗೆ ಉಚಿತ ಆವೃತ್ತಿ ಸಿಗುತ್ತದೆ. ಪೂರ್ತಿ ಆವೃತ್ತಿ ಉಚಿತವಾಗಿ ಸಿಗುವುದಿಲ್ಲ. ಅದನ್ನು ಕೊಂಡುಕೊಳ್ಳಬೇಕು.

ಕಂಪ್ಯೂತರ್ಲೆ

ಗಣಕತಜ್ಞನ ಹೆಂಡತಿ ಆತನಿಗೆ ದಬಾಯಿಸಿದಳು “ಸ್ವಲ್ಪ ಆ ನಿಮ್ಮ ಕಂಪ್ಯೂಟರ್ ಬಂದ್ ಮಾಡಿ ಮಗುವಿನ ತೊಟ್ಟಲು ತೂಗಿ”. ಆತ ಏನು ಮಾಡಿದ ಗೊತ್ತೆ? ಗಣಕದ ಸಿ.ಡಿ. ಡ್ರೈವ್‌ಗೆ ಒಂದು ಹಗ್ಗ ಕಟ್ಟಿ ಅದನ್ನು ತೊಟ್ಟಿಲಿಗೆ ಕಟ್ಟಿದ. ಗಣಕದಲ್ಲಿ ಸಿ.ಡಿ.ಡ್ರೈವ್ ಅನ್ನು ನಿರಂತರವಾಗಿ ತೆರದು ಮುಚ್ಚಿ ಮಾಡುವ ಒಂದು ಸಣ್ಣ ಪ್ರೋಗ್ರಾಮ್ ಬರೆದು ಅದನ್ನು ಚಲಾಯಿಸಿದ.

ಸೋಮವಾರ, ಆಗಸ್ಟ್ 16, 2010

ಗಣಕಿಂಡಿ - ೦೬೫ (ಆಗಸ್ಟ್ ೧೬, ೨೦೧೦)

ಅಂತರಜಾಲಾಡಿ

ವಾಟ್? ಏನೇನು?

ನಮ್ಮ ದೇಶದ ಎಲ್ಲ ರಾಜ್ಯಗಳು ಮಾರಾಟ ತೆರಿಗೆಯ ಬದಲಿಗೆ ಮೌಲ್ಯವರ್ಧಿತ ತೆರಿಗೆಯ (VAT) ವಿಧಾನವನ್ನು ಅಳವಡಿಸಿಕೊಂಡಿದ್ದು ನಿಮಗೆ ತಿಳಿದಿರಬಹುದು. ಈ ತೆರಿಗೆ ರಾಜ್ಯದಿಂದ ರಾಜ್ಯಕ್ಕೆ ಬದಲಾಗುತ್ತದೆ. ಆಯಾ ರಾಜ್ಯಗಳಲ್ಲೂ ಕಾಲಕಾಲಕ್ಕೆ ಈ ತೆರಿಗೆ ಬೇರೆ ಬೇರೆ ವಸ್ತುಗಳಿಗೆ ಬದಲಾಗುತ್ತಲೇ ಇರುತ್ತದೆ. ನೀವು ವ್ಯವಹಾರ ಮಾಡುವವರಾದರೆ ಈ ಬಗ್ಗೆ ನಿಮಗೆ ಮಾಹಿತಿ ಇರತಕ್ಕದ್ದು. ದೇಶಮಟ್ಟದಲ್ಲಿ ವ್ಯಾಪಾರ ಮಾಡುವವರಾದರೆ ಪ್ರತಿಯೊಂದು ರಾಜ್ಯದ ವ್ಯಾಟ್ ದರ ತಿಳಿದಿರಬೇಕು. ಬೇರೆ ಬೇರೆ ರಾಜ್ಯಗಳಲ್ಲಿ ಚಾಲ್ತಿಯಲ್ಲಿರುವ ವ್ಯಾಟ್ ದರಗಳು, ಕಾಲಕಾಲಕ್ಕೆ ಸರಕಾರವು ಹೊರಡಿಸಿರುವ ಘೋಷಣೆಗಳು, ಇತ್ಯಾದಿ ಎಲ್ಲ ತಿಳಿಸುವ ಜಾಲತಾಣ www.stvat.com. ಇತ್ತೀಚೆಗೆ ಯಾಕೋ ಈ ಜಾಲತಾಣ ಸ್ವಲ್ಪ ನಿದ್ದೆಹೊಡೆದಂತೆ ಅನ್ನಿಸುತ್ತಿದೆ.

ಡೌನ್‌ಲೋಡ್

ಇಲಿಯ ಜಾಡನು ಹಿಡಿದು

ಗಣಕದಲ್ಲಿ ಕೆಲಸ ಮಾಡಿ ಮಾಡಿ ಸುಸ್ತಾದಾಗ ಸ್ವಲ್ಪ ಮೌಸ್ ಕಡೆಗೆ ಗಮನ ನೀಡೋಣ. ನೀವು ಕೆಲಸ ಮಾಡುವಾಗ ಮೌಸ್ ಅನ್ನು ಎಲ್ಲೆಲ್ಲ ಓಡಾಡಿಸಿದ್ದೀರಾ? ಯಾವ ಯಾವ ಜಾಗದಲ್ಲಿ ಎಷ್ಟು ಹೊತ್ತು ಅದನ್ನು ಅಲ್ಲಾಡಿಸದೆ ಹಿಡಿದಿದ್ದೀರಾ? ಇವನ್ನೆಲ್ಲ ಒಂದು ಸರಳ ರೇಖಾ ಚಿತ್ರದ ರೂಪದಲ್ಲಿ ಸೆರೆಹಿಡಿದು ತೊರಿಸವ ತಂತ್ರಾಂಶ  IOGraph. ಇದು ತಯಾರಿಸಿ ಕೊಡುವ ಚಿತ್ರ ಒಂದು ನವ್ಯ ಚಿತ್ರದಂತೆ ಕಂಡುಬಂದರೆ ಅದರಲ್ಲಿ ಆಶ್ಚರ್ಯವಿಲ್ಲ. ಅಥವಾ ನಿಮ್ಮ ಕಣ್ಣಿಗೆ ಅದು ಯಾವನೋ ಒಬ್ಬ ಪೋರ ಸುಮ್ಮನೆ ಅಡ್ಡಾದಿಡ್ಡಿ ಗೀಚಿದಂತೆ ಕಂಡುಬಂದರೂ ಬರಬಹುದು. ಈ ತಂತ್ರಾಂಶ ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ iographica.com.

e - ಸುದ್ದಿ

ಆಟದಿಂದ ಕಣ್ಣು ಗುಣಮುಖ

ಗಣಕ ಮತ್ತು ಗಣಕಾಧಾರಿತ ಆಟದ ಸಾಧನಗಳನ್ನು ಕೈಯಲ್ಲಿ ಹಿಡಿದು ಗಂಟೆಗಟ್ಟಳೆ ಆಡುವ ಮಕ್ಕಳನ್ನು ಗದರುವುದು ಸಹಜ. ಹೀಗೆ ಆಡುವುದರಿಂದ ದೋಷಪೂರಿತ ಕಣ್ಣನ್ನು ಸರಿಪಡಿಸಿಕೊಂಡ ಉದಾಹರಣೆ ಕೇಳಿದ್ದೀರಾ? ಬೆನ್ ಮಿಖೈಲಿಸ್ ಎಂಬ ಆರು ವರ್ಷದ ಹುಡುಗನ ಒಂದು ಕಣ್ಣಿನ ದೃಷ್ಟಿ ಶಕ್ತಿ ಕುಂಠಿತವಾಗುತ್ತಲೇ ಇತ್ತು. ಇದಕ್ಕೆ ಪರಿಹಾರವಾಗಿ ನೈನ್‌ಟೆನ್ಡು ಎಂಬ ಆಟದ ಸಾಧನದಲ್ಲಿ ದಿನಕ್ಕೆ ಎರಡು ಘಂಟೆಗಳ ಕಾಲ ಆಟ ಆಡಬೇಕು ಎಂದು ವೈದ್ಯರು ಸೂಚಿಸಿದರು. ಸರಿಯಾಗಿರುವ ಕಣ್ಣಿಗೆ ಆಡುವಾಗ ಪಟ್ಟಿ ಕಟ್ಟಿಕೊಳ್ಳಬೇಕು ಎಂದೂ ಜೊತೆಗೆ ಸೂಚಿಸಿದ್ದರು. ಹೀಗೆ ಆಡಿ ಆಡಿ ಆತನ ಕಣ್ಣಿನ ದೃಷ್ಟಿ ಸುಧಾರಿಸಿತು. ಆಟವೆಲ್ಲವೂ ಕೆಟ್ಟದಲ್ಲ.
 
e- ಪದ


ನಿಷ್ಪಕ್ಷ ಅಂತರಜಾಲ (net neutrality, Internet neutrality) - ಅಂತರಜಾಲವು ಎಲ್ಲ ನಮೂನೆಯ ನಿಯಮ ನಿರ್ಬಂಧಗಳಿಂದ ಮುಕ್ತವಾಗಿರಬೇಕು ಎಂಬ ಚಿಂತನೆ. ಅಂತರಜಾಲದ ಮೇಲೆ ಸರಕಾರ ಮತ್ತು ಅಂತರಜಾಲ ಸಂಪರ್ಕ ಸೇವೆ ನೀಡುವವರು ಕೆಲವೊಮ್ಮೆ ಕೆಲವು ನಮೂನೆಯ ನಿರ್ಬಂಧಗಳನ್ನು ಹೇರುತ್ತಾರೆ. ಉದಾಹರಣೆಗೆ ಇತ್ತೀಚೆಗೆ ಪಾಕಿಸ್ತಾನ ಸರಕಾರವು ಫೇಸ್‌ಬುಕ್ ಜಾಲತಾಣವನ್ನು ಆ ದೇಶದಲ್ಲಿ ನಿರ್ಬಂಧಿಸಿತ್ತು.

e - ಸಲಹೆ

ಆದರ್ಶ ಅವರ ಪ್ರಶ್ನೆ: ನಾನು ಕೆಲವು ಸಿ.ಡಿ. ಮತ್ತು ಡಿ.ವಿ.ಡಿ.ಗಳಲ್ಲಿ ಈಗಾಗಲೇ ಹಲವು ಮಾಹಿತಿ ಸೇರಿಸಿದ್ದೇನೆ, ಹಾಡುಗಳನ್ನು ಬರೆದಿದ್ದೇನೆ. ಅವುಗಳಲ್ಲಿ ಇನ್ನೂ ಖಾಲಿ ಜಾಗ ಇದೆ. ಅವುಗಳಿಗೆ ಇನ್ನೂ ಮಾಹಿತಿ ಸೇರಿಸಬಹುದೇ?
ಉ: ಸಾಧ್ಯ. ಆದರೆ ಅದಕ್ಕೆ ನೀವು ಸಿ.ಡಿ. ಅಥವಾ ಡಿ.ವಿ.ಡಿ.ಗೆ  ಮಾಹಿತಿ ಸೇರಿಸಿದಾಗ ಕೊನೆಯಲ್ಲಿ session close ಮಾಡಿರಬಾರದು.

ಕಂಪ್ಯೂತರ್ಲೆ


ನಿಧಾನ ಸಂಪರ್ಕವಿರುವಾಗ ಅಂತರಜಾಲದಿಂದ ದೊಡ್ಡ ಕಡತಗಳನ್ನು ಡೌನ್‌ಲೋಡ್ ಮಾಡುವಾಗ ಅದು ಪೂರ್ತಿಯಾಗಲು ಕಾಯುತ್ತಿರುವಾಗ ನೀವು ಏನೇನು ಮಾಡಬಹುದು? ಕೆಳಗೆ ನೀಡಿರುವವುಗಳನ್ನು ಪಟ್ಟಿ ಮಾಡಬಹುದು:-
·    ದೇವೇಗೌಡರು ಹೇಳಿರುವ ಎಲ್ಲ ಬೈಗುಳಗಳು
·    ಬಂಗಾರಪ್ಪನವರು ಬದಲಿಸಿರುವ ಎಲ್ಲ ಪಕ್ಷಗಳ ಹೆಸರುಗಳು
·    ಯಡ್ಯೂರಪ್ಪನವರು ಘೋಷಿಸಿ ನಂತರ ಬದಲಾಯಿಸಿದ ಅಥವಾ ಹಿಂದಕ್ಕೆ ಪಡೆದ ತೀರ್ಮಾನಗಳು
·    ಶಂಕುಸ್ಥಾಪನೆ ಮಾಡಿ ನಂತರ ಅರ್ಧಕ್ಕೆ ನಿಂತ ಅಥವಾ ಪ್ರಾರಂಭವೇ ಆಗಿರದ ಸರಕಾರಿ ಯೋಜನೆಗಳು
·    ಮತ್ತೆ ಮತ್ತೆ ಓದಿದರೂ ನಗು ಬಾರದ ಕಂಪ್ಯೂತರ್ಲೆ ಜೋಕುಗಳು

ಸೋಮವಾರ, ಆಗಸ್ಟ್ 9, 2010

ಗಣಕಿಂಡಿ - ೦೬೪ (ಆಗಸ್ಟ್ ೦೯, ೨೦೧೦)

ಅಂತರಜಾಲಾಡಿ

ರೈಲ್ವೆ ಮಾಹಿತಿ ಬೇಕೆ?

ಯಾವ ರೈಲು ಯಾವಾಗ ಬರುತ್ತದೆ? ಯಾವ ನಗರಕ್ಕೆ ಯಾವ್ಯಾವ ರೈಲುಗಳಿವೆ? ನಮ್ಮ ನಗರದ ಮೂಲಕ ಯವ್ಯಾವ ರೈಲುಗಳು ಹಾದು ಹೋಗುತ್ತವೆ? ಒಂದು ನಿಲ್ದಾಣದಿಂದ ಇನ್ನೊಂದು ನಿಲ್ದಾಣಕ್ಕೆ ತಲುಪಲು ಯಾವ ರೈಲಿಗೆ ಎಷ್ಟು ಸಮಯ ಹಿಡಿಯುತ್ತದೆ? ಇತ್ಯಾದಿ ಮಾಹಿತಿ ಬೇಕೆ? ಇದಕ್ಕಾಗಿ ನೀವು ಮಾಡಬೇಕಾದುದೆಂದರೆ www.trainenquiry.com ಜಾಲತಾಣವನ್ನು ವೀಕ್ಷಿಸುವುದು. ರೈಲುಗಳು ಸಮಯಕ್ಕೆ ಸರಿಯಾಗಿ ಚಲಿಸುತ್ತಿವೆಯೇ ಎಂಬ ಮಾಹಿತಿ ಕೂಡ ಇಲ್ಲಿ ಸಿಗುತ್ತದೆ. ರೈಲು ಟಿಕೆಟುಗಳನ್ನು ಮುಂಗಡ ಕಾದಿರಿಸಬೇಕೇ? ಹಾಗಿದ್ದರೆ ನೀವು www.irctc.co.in ಜಾಲತಾಣಕ್ಕೆ ಭೇಟಿ ನೀಡಬೇಕು.

ಡೌನ್‌ಲೋಡ್

ಸಂಗೀತ ಸಂಯೋಜಕರಾಗಿ

ಎ. ಆರ್. ರೆಹಮಾನ್ ಅವರು ಗಣಕ ಬಳಸಿ ಸಂಗೀತ ಸಂಯೋಜನೆ ಮಾಡುತ್ತಾರೆ ಎಂದು ಓದಿರಬಹುದು. ನಿಮ್ಮಲ್ಲಿ ಸಂಗೀತ ಸಂಯೋಜಕನಾಗುವಂತಹ ಪ್ರತಿಭೆ ಇದ್ದಲ್ಲಿ ಎಲ್ಲ ವಾದ್ಯಗಳೂ ನಿಮ್ಮೊಡನೆ ಇರದಿದ್ದಲ್ಲಿ ಗಣಕ ಬಳಸಿಯೇ ಸಂಗೀತ ಸಂಯೋಜನೆ ಮಾಡಬಹುದು. ಅದಕ್ಕೆ ಬೇಕಾದುದೇನೆಂದರೆ ಎಲ್ಲ ಬಗೆಯ ವಾದ್ಯಗಳ ಸ್ವರ ಸೃಷ್ಠಿಸಬಲ್ಲ ತಂತ್ರಾಂಶ. ಇಂತಹ ದುಬಾರಿ ತಂತ್ರಾಂಶಗಳು ಹಲವಾರಿವೆ. ಉಚಿತ ತಂತ್ರಾಂಶ ಬೇಕಿದ್ದಲ್ಲಿ ನೀವು jOrgan ಬಳಸಬಹುದು. ಇದು ದೊರೆಯುವ ಜಾಲತಾಣ http://bit.ly/bHYVpQ. ಇದನ್ನು ಬಳಸಲು ನಿಮ್ಮ ಗಣಕದಲ್ಲಿ ಜಾವಾ ಇರತಕ್ಕದ್ದು. ಈ ತಂತ್ರಾಂಶವನ್ನು ಬಳಸಲು ಹಲವು ಬಗೆಯ ವಾದ್ಯಗಳನ್ನೂ ನೀವು ಅದೇ ಜಾಲತಾಣದಿಂದ ಪ್ರತ್ಯೇಕವಾಗಿ ಡೌನ್‌ಲೋಡ್ ಮಾಡಿಕೊಳ್ಳಬೇಕು. ಇನ್ನು ಕೆಲವು ಬೇರೆ ಕಡೆ ದೊರೆಯುತ್ತವೆ. ಅದಕ್ಕೆ  ಕೊಂಡಿಗಳನ್ನು ಇದೇ ಜಾಲತಾಣದಲ್ಲಿ ನೀಡಲಾಗಿದೆ. ಈ ತಂತ್ರಾಂಶವು ಕೆಲವು ನಿಜವಾದ ವಾದ್ಯಗಳನ್ನೂ ಅವು ಗಣಕಕ್ಕೆ ಸಂಪರ್ಕಗೊಂಡಿದ್ದಲ್ಲಿ ನಿಯಂತ್ರಿಸಬಲ್ಲುದು.

e - ಸುದ್ದಿ

ಅಂತರಿಕ್ಷಕ್ಕೆ ಆಂಡ್ರೋಯಿಡ್ ಫೋನು

ಅಮೇರಿಕಾದ ಬಾಹ್ಯಾಕಾಶ ಸಂಸ್ಥೆ ನಾಸಾವು ಇತ್ತೀಚೆಗೆ ಒಂದು ಪ್ರಯೋಗ ನಡೆಸಿತು. ಗೂಗ್ಲ್‌ನವರ ಆಂಡ್ರೋಯಿಡ್ ಫೋನನ್ನು ಅವರು ಒಂದು ಉಪಗ್ರಹಕ್ಕೆ ಕಟ್ಟಿ ಅಂತರಿಕ್ಷಕ್ಕೆ ಕಳುಹಿಸಿದರು. ಎರಡು ಫೋನುಗಳನ್ನು ಹೀಗೆ ಕಳುಹಿಸಲಾಗಿತ್ತು. ರಾಕೆಟ್ ಹಾರುತ್ತಿದ್ದಂತೆ ಅದು ವಿಡಿಯೋ ಚಿತ್ರೀಕರಣ ಮಾಡುತ್ತಿತ್ತು. ಕೊನೆಗೆ ಉಪಗ್ರಹ ಭೂಮಿಗೆ ವಾಪಾಸು ಬಂದಾಗ ಒಂದು ಫೋನು ಪ್ಯಾರಾಚೂಟ್ ತೊಂದರೆಯಿಂದಾಗಿ ಪುಡಿಪುಡಿಯಾಯಿತು. ಇನ್ನೊಂದು ಫೋನು ಹಾಗೆಯೇ ಇತ್ತು. ಅದು ಚಿತ್ರೀಕರಿಸಿದ ವೀಡಿಯೋ ಕೂಡ ಚೆನ್ನಾಗಿಯೇ ಇತ್ತು. ಅಂತರಿಕ್ಷಕ್ಕೆ ಕಳುಹಿಸುವಾಗಿನ ವಿಪರೀತವಾದ ಹವಾಮಾನ ಬದಲಾವಣೆಗಳನ್ನು ಫೋನು ಸಹಿಸಿಕೊಂಡಿತ್ತು. ಒಂದು ಮಾಮೂಲಿ ಫೋನಿನಲ್ಲಿ ಬಳಸುವ ಮಾಮೂಲಿ ಇಲೆಕ್ಟ್ರಾನಿಕ್ಸ್ ಉಪಕರಣಗಳು ಇಂತಹ ವಿಪರೀತ ಹವಾಮಾನವನ್ನು ಸಹಿಸಿಕೊಳ್ಳಬಲ್ಲುದೇ ಎಂದು ತಿಳಿಯುವುದು ನಾಸಾದವರ ಉದ್ದೇಶವಾಗಿತ್ತು. ಅದು ಸಾಧ್ಯ ಎಂದು ಸಾಬೀತಾಯಿತು.

e- ಪದ

ಸೈಬರ್ ಅಪರಾಧ (cybercrime) - ಗಣಕ ಅಥವಾ ಮಾಹಿತಿ ತಂತ್ರಜ್ಞಾನ ಬಳಸಿ ಮಾಡುವ ಅಪರಾಧ. ಗಣಕ ಅಥವಾ ಗಣಕ ಜಾಲಕ್ಕೆ ಅನಧಿಕೃತವಾಗಿ ಪ್ರವೇಶ ಮಾಡುವುದು, ಮಾಹಿತಿ ಕದಿಯುವುದು, ವೈರಸ್ ತಯಾರಿಸಿ ಧಾಳಿ ಇಡುವುದು, ಇಮೈಲ್ ಬಾಂಬ್ ಕಳುಹಿಸುವುದು, ಒಬ್ಬರನ್ನು ಬಿಡದೇ ಬೆಂಬತ್ತಿ ಇಮೈಲ್ ಕಳುಹಿಸಿ ಪೀಡಿಸುವುದು, ಪಾಸ್‌ವರ್ಡ್ ಕದಿಯುವುದು -ಇವೆಲ್ಲ ಕೆಲವು ಸೈಬರ್ ಅಪರಾಧಗಳು. ಇವೆಲ್ಲ ಶಿಕ್ಷಾರ್ಹ ಕೂಡ.

e - ಸಲಹೆ

ಅಜಿತ್ ಅವರ ಪ್ರಶ್ನೆ: ಗೂಗ್ಲ್ ಆಡ್‌ಸೆನ್ಸ್ (adsense) ಎಂದರೇನು?
ಉ: ಗೂಗ್ಲ್‌ನವರು ಅಂತರಜಾಲ ತಾಣಗಳಲ್ಲಿ ಜಾಹೀರಾತು ನೀಡಲು ಬಳಸುವ ವಿಧಾನ. ಉದಾಹರಣೆಗೆ ನೀವೊಂದು ಜಾಲತಾಣ ನಡೆಸುತ್ತಿದ್ದೀರೆಂದಿಟ್ಟುಕೊಳ್ಳೋಣ. ಗೂಗ್ಲ್ ಆಡ್‌ಸೆನ್ಸ್ ಮೂಲಕ ನಿಮ್ಮ ಜಾಲತಾಣದಲ್ಲಿ ಜಾಹೀರಾತು ಕಾಣಿಸಿಕೊಳ್ಳುತ್ತದೆ. ಅದರ ಮೇಲೆ ಕ್ಲಿಕ್ ಮಾಡಿದರೆ ನಿಮಗೆ ಹಣ ಬರುತ್ತದೆ. ಜಾಹೀರಾತು ನೀಡುವವರು ಗೂಗ್ಲ್‌ಗೆ ಹಣ ನೀಡಬೇಕು.

ಕಂಪ್ಯೂತರ್ಲೆ

ಗಣಕ(ತ)ಗಾದೆ

·    ಒಂದು ಚಿತ್ರ ಸಾವಿರ ಶಬ್ದಗಳನ್ನು ಹೇಳುತ್ತದೆ. ಒಂದು ಫೋಟೋಶಾಪ್ ಮಾಡಿದ ಚಿತ್ರ ಸಾವಿರ ಸುಳ್ಳುಗಳನ್ನು ಹೇಳುತ್ತದೆ.
·    ಫೋಟೋಶಾಪ್‌ನಲ್ಲಿ ಚಿತ್ರ ಬದಲಾಯಿಸಿದ ಮಾತ್ರಕ್ಕೆ ಹುಡುಗಿಗೆ ಹುಡುಗ ಸಿಗಲಾರ.

ಮಂಗಳವಾರ, ಆಗಸ್ಟ್ 3, 2010

ಗಣಕಿಂಡಿ - ೦೬೩ (ಆಗಸ್ಟ್ ೦೨, ೨೦೧೦)

ಅಂತರಜಾಲಾಡಿ

ಆಟವಾಡೋಣ

ಆಟ ಆಡುವುದು ಯಾರಿಗೆ ಇಷ್ಟವಿಲ್ಲ? ಗಣಕಾಧಾರಿತ ಆಟಗಳಲ್ಲಿ ಪ್ರಮುಖವಾಗಿ ಎರಡು ಬಗೆ. ಗಣಕದಲ್ಲೇ ಆಡುವಂತದ್ದು ಮತ್ತು ಅಂತರಜಾಲತಾಣದಲ್ಲಿ ಆಡುವಂತದ್ದು. ಅಂತರಜಾಲದಲ್ಲೇ ಅಂದರೆ ಜಾಲತಾಣದಲ್ಲಿ ಆಡುವಂತಹ ಆಟಗಳನ್ನು ನೀಡುವಂತಹ ಜಾಲತಾಣಗಳು ಹಲವಾರಿವೆ. ಅಂತಹ ಒಂದು ಭಾರತೀಯ ಜಾಲತಾಣ zapak.com. ಈ ಜಾಲತಾಣದಲ್ಲಿ ಉಚಿತವಾಗಿ ಆಡಬಲ್ಲ ಆಟಗಳು ಹಲವಾರಿವೆ. ಸಾಮಾನ್ಯವಾಗಿ ಆಟಗಳ ಕಡತಗಳು ತುಂಬ ದೊಡ್ಡ ಗಾತ್ರದಾಗಿರುತ್ತವೆ. ಅಂದರೆ ಒಳ್ಳೆಯ ಬ್ರಾಡ್‌ಬ್ಯಾಂಡ್ ಸಂಪರ್ಕ ಇದ್ದರೆ ಈ ಆಟಗಳನ್ನು ಚೆನ್ನಾಗಿ ಆಡಬಹುದು. ಭಾರತದಲ್ಲಿ ಎಲ್ಲರಿಗೂ ಇಂತಹ ಸಂಪರ್ಕ ಇಲ್ಲವೆಂದು ಅರಿತಿರುವ ಈ ಜಾಲತಾಣದವರು ಕಡಿಮೆ ವೇಗದ ಸಂಪರ್ಕ ಇರುವವರಿಗೆಂದೇ ಇನ್ನೊಂದು ಆವೃತ್ತಿಯನ್ನೂ ನೀಡಿದ್ದಾರೆ.


ಡೌನ್‌ಲೋಡ್

ಆಟ ತಯಾರಿಸಿ

ಗಣಕದಲ್ಲಿ ಆಟ ಆಡುವುದೇನೋ ಸರಿ. ಅದರಲ್ಲಿ ನಿಮ್ಮದೇನು ಸಾಧನೆ? ಸಾಧ್ಯವಿದ್ದರೆ ಆಟ ತಯಾರಿಸಿ ನೋಡೋಣ ಎಂದು ಯಾರಾದರು ನಿಮಗೆ ಪಂಥಾಹ್ವಾನ ಮಾಡಿದ್ದಾರೆಯೇ? “ಅಯ್ಯೋ ಅದಕ್ಕೆ ತುಂಬ ವರ್ಷಗಳಿಂದ ಪ್ರೋಗ್ರಾಮ್ಮಿಂಗ್ ಕಲಿತಿರಬೇಕು. ಅದು ಕಲಿಯದವರಿಂದ ಅಸಾಧ್ಯ” ಎಂದು ಕರುಬಬೇಕಿಲ್ಲ. ಯಾವುದೇ ಪ್ರೋಗ್ರಾಮ್ಮಿಂಗ್ ಕಲಿಯದೆಯೇ ಆಟ ತಯಾರಿಸಲು ಅನುವು ಮಾಡಿಕೊಡುವ ತಂತ್ರಾಂಶ Gamemaker. ಇದರಲ್ಲಿ ಉಚಿತ ಮತ್ತು ಹಣ ನೀಡಬೇಕಾಗಿರುವ ಎಂಬ ಎರಡು ಆವೃತ್ತಿಗಳಿವೆ. ಉಚಿತ ಆವೃತ್ತಿಯನ್ನು ಡೌನ್‌ಲೋಡ್ ಮಾಡಿ ಅದನ್ನು ಕಲಿತ ನಂತರ ಬೇಕಿದ್ದರೆ ಹಣ ನೀಡಿ ಪೂರ್ತಿ ಆವೃತ್ತಿಯನ್ನು ಕೊಂಡುಕೊಳ್ಳಬಹುದು. ಗಣಕ ಆಟ ತಯಾರಿಸಿ ಅದನ್ನು ಮಾರಿ ಹಣ ಸಂಪಾದಿಸಲೂ ಬಹುದು. ಈ ತಂತ್ರಾಂಶ ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ http://bit.ly/9Sz28S.


e - ಸುದ್ದಿ

ಚಿತ್ರವ ತಿದ್ದಿದರೆ ಶಿಕ್ಷೆಯ ತಿದ್ದಿದಂತೆಯೇ?

ಅಮೇರಿಕದ ಡಾರಿಲ್ ಸೈಮನ್ ಎಂಬಾತನಿಗೆ ಹಲವು ಕಲೆಗಳು ತಿಳಿದಿದ್ದವು. ಅವುಗಳಲ್ಲಿ ಪ್ರಮುಖವಾದವು -ಕ್ರೆಡಿಟ್ ಕಾರ್ಡ್ ನಕಲು ಮಾಡುವುದು, ಕಾರು ಕಳವು ಮಾಡುವುದು, ಜಾದೂ ಮಾಡುವುದು ಹಾಗೂ ಫೋಟೋಶಾಪ್ ಮಾಡುವುದು. ಈತನ ಪಾಂಡಿತ್ಯ ಈ ಕಲೆಗಳಲ್ಲಿ ಚೆನ್ನಾಗಿದ್ದವು, ಒಂದನ್ನು ಹೊರತು ಪಡಿಸಿ. ಅದುವೇ ಫೋಟೋಶಾಪ್ ಬಳಸಿ ಪೋಟೋ ತಿದ್ದುವ ಕಲೆ. ಅದೊಂದರಲ್ಲಿ ಆತನ ಪರಿಣತಿ ಕಡಿಮೆಯಾಗಿತ್ತು. ಆತ ಪೋಲೀಸರ ಕೈಯಲ್ಲಿ ಸಿಕ್ಕಿಹಾಕಿಕೊಂಡಾಗ, ತಾನು ಸಮಾಜ ಸೇವೆ ಕೂಡ ಮಾಡಿದ್ದೇನೆ ಎಂದು ತೋರಿಸಿ ಕಡಿಮೆ ಶಿಕ್ಷೆಗೆ ಪ್ರಯತ್ನಿಸಿದ. ಅದಕ್ಕಾಗಿ ಕೆಲವು ಸಮಾಜ ಸೇವೆಯ ಸಂಸ್ಥೆಗಳಲ್ಲಿ ಅನಾಥ ಮಕ್ಕಳಿಗೆ ತಾನು ಸಹಾಯ ಮಾಡುತ್ತಿರುವಂತೆ ತೋರಿಸುವ ಚಿತ್ರಗಳನ್ನು ಫೋಟೋಶಾಪ್ ಬಳಸಿ ತಯಾರಿಸಿ ಆತ ನ್ಯಾಯಾಧೀಶರಿಗೆ ನೀಡಿದ್ದ. ಆದರೆ ಈ ಚಿತ್ರಗಳನ್ನು ಸೂಕ್ಷ್ಮವಾಗಿ ಪರಿಶೀಲಿಸಿದ ತಂತ್ರಜ್ಞರು ಆತನ ಕರಾಮತಿಯನ್ನು ಪತ್ತೆಹಚ್ಚಿದರು. ಈಗ ಆತನಿಗೆ ೨೪ ವರ್ಷ ಶಿಕ್ಷೆಯಾಗಿದೆ. 

e- ಪದ

ಫೋಟೋಶಾಪ್ (photoshop) - ಗಣಕದಲ್ಲಿ ಚಿತ್ರ (ಗ್ರಾಫಿಕ್ಸ್) ತಯಾರಿಸಲು, ಛಾಯಾಚಿತ್ರಗಳನ್ನು ತಿದ್ದಲು ಅನುವು ಮಾಡಿಕೊಡುವ ಅಡೋಬಿ ಕಂಪೆನಿಯವರ ಜಗತ್ಪ್ರಸಿದ್ಧ ತಂತ್ರಾಂಶ. ಇದು ಎಷ್ಟು ಜನಪ್ರಿಯವೆಂದರೆ ಫೋಟೋಶಾಪ್ ಪದವನ್ನು ಇಂಗ್ಲಿಷ್ ನಿಘಂಟುವಿಗೆ ಸೇರಿಸಲಾಗಿದೆ. ಛಾಯಾಚಿತ್ರಗಳನ್ನು ತಿದ್ದುವುದಕ್ಕೆ ಫೋಟೋಶಾಪ್ ಮಾಡಿದೆ ಎಂದು ಹೇಳುವ ವಾಡಿಕೆಯೇ ಆಗಿಬಿಟ್ಟಿದೆ.

e - ಸಲಹೆ

ಚಿತ್ರದುರ್ಗದ ತಿಪ್ಪೇಸ್ವಾಮಿಯವರ ಪ್ರಶ್ನೆ: ನನಗೆ ಛಾಯಾಚಿತ್ರಗಳನ್ನು ಚಲನಚಿತ್ರವಾಗಿಸಿಕೊಡುವ ತಂತ್ರಾಂಶ ಬೇಕು (ಫೋಟೋ ಸ್ಲೈಡ್‌ಶೋ ಮೇಕರ್). ನಾನು ಕೆಲವನ್ನು ಡೌನ್‌ಲೋಡ್ ಮಾಡಿ ನೋಡಿದೆ. ಅವು ಫ್ಲಾಶ್ ಫೈಲ್ ಮಾಡಿಕೊಡುತ್ತವೆ. ನನಗೆ ಡಿ.ವಿ.ಡಿ. ಪ್ಲೇಯರ್‌ನಲ್ಲಿ ಬಳಸಬಲ್ಲ ಡಿ.ವಿ.ಡಿ.ಯನ್ನಾಗಿಸಿಕೊಡುವ ಉಚಿತ ತಂತ್ರಾಂಶ ಬೇಕು. ಅಂತಹ ತಂತ್ರಾಂಶ ಸಿಗುತ್ತದೆಯೇ?
ಉ: ನೀವು DVD slideshow GUI ಬಳಸಬಹುದು. ಇದು http://bit.ly/bE3pJO ಜಾಲತಾಣದಲ್ಲಿ ಸಿಗುತ್ತದೆ. ಇದು ನಿಮ್ಮ ಫೊಟೋಗಳನ್ನು ಡಿ.ವಿ.ಡಿ. ಸಿನಿಮಾದ ISO ಆಗಿ ಮಾಡಿಕೊಡುತ್ತದೆ. ನಂತರ ಇದನ್ನು ಡಿ.ವಿ.ಡಿ.ಗೆ ನೀವು ಬರೆದರೆ ನಿಮಗೆ ಡಿ.ವಿ.ಡಿ. ಪ್ಲೇಯರ್‌ನಲ್ಲಿ ಚಲಾಯಿಸಬಲ್ಲ ಚಲನಚಿತ್ರ ಸಿಗುತ್ತದೆ.

ಕಂಪ್ಯೂತರ್ಲೆ

ಒಮ್ಮೆ ಕೈಲಾಸದಲ್ಲಿ ಸುಬ್ರಹ್ಮಣ್ಯನಿಗೂ ಗಣಪನಿಗೂ ಪಂದ್ಯ ಏರ್ಪಟ್ಟಿತ್ತು -ಯಾರು ಮೊದಲು ಇಡೀ ಪ್ರಪಂಚಕ್ಕೆ ಮೂರು ಸಲ ಸುತ್ತು ಬರುತ್ತಾರೆ ಎಂದು. ಶಿವ ತೀರ್ಪುಗಾರ. ಆತ ಒಂದು ನಿಯಮ ರೂಪಿಸಿದ. ಅದರಂತೆ ಸುಬ್ರಹ್ಮಣ್ಯ ಮತ್ತು ಗಣಪ ಇಬ್ಬರೂ ಪ್ರಪಂಚ ಸುತ್ತಿದ್ದಕ್ಕೆ ದಾಖಲೆಗೆ ಎಲ್ಲ ಪ್ರಮುಖ ಸ್ಥಳಗಳಲ್ಲಿ ತಾನು ಇರುವ ಫೋಟೋ ನೀಡಬೇಕಿತ್ತು. ಸುಬ್ರಹ್ಮಣ್ಯ ನವಿಲು ಹತ್ತಿ ನಿಧಾನವಾಗಿ ಪ್ರಪಂಚ ಸುತ್ತಿ ಎಲ್ಲ ಜಾಗಗಳ ಫೋಟೋ ಸಮೇತ ಹಿಂತಿರುಗಿ ಬಂದ. ಆದರೆ ಗಣಪ ಆಗಲೇ ಪಂದ್ಯ ಗೆದ್ದಿದ್ದಾನೆ ಎಂದು ಘೋಷಿಸಲಾಗಿತ್ತು. ಆತ ಮಾಡಿದ್ದೇನೆಂದರೆ ಗೂಗ್ಲ್ ಮೂಲಕ ಎಲ್ಲ ಖ್ಯಾತ ಸ್ಥಳಗಳ ಚಿತ್ರ ಪಡೆದು ಅದನ್ನು ಫೊಟೋಶಾಪ್ ಮಾಡಿ ಎಲ್ಲ ಸ್ಥಳಗಳಲ್ಲಿ ತಾನಿರುವಂತೆ ಮೂಡಿಸಿ ಶಿವನಿಗೆ ಒಪ್ಪಿಸಿದ್ದ!

ಸೋಮವಾರ, ಜುಲೈ 26, 2010

ಗಣಕಿಂಡಿ - ೦೬೨ (ಜುಲೈ ೨೬, ೨೦೧೦)

ಅಂತರಜಾಲಾಡಿ

ಕಾನೂನು ದುರುಪಯೋಗ ನಿಲ್ಲಿಸಿ

ವರದಕ್ಷಿಣೆ ವಿರೋಧಿ ಕಾನೂನು ನಮ್ಮ ದೇಶದಲ್ಲಿ ಅಸ್ತಿತ್ವದಲ್ಲಿದೆ. ಈ ಕಾನೂನು ಎಷ್ಟು ತೀಕ್ಷ್ಣವಾಗಿದೆಯೆಂದರೆ ಇದರ ಉಪಯೋಗದ ಜೊತೆ ದುರುಪಯೋಗವೂ ತುಂಬ ಆಗುತ್ತಿದೆ. ಈ ಕಾನೂನು ಪ್ರಕಾರ ಯಾವುದೇ ಹೆಂಗಸು ತನ್ನ ಗಂಡ, ಮಾವ, ಅತ್ತೆ ಯಾ ಗಂಡನ ಹತ್ತಿರದ ಸಂಬಂಧಿಗಳ ವಿರುದ್ಧ ವರದಕ್ಷಿಣೆ ವಿರೋಧಿ ಕಾನೂನು ಪ್ರಕಾರ ದೂರು ಸಲ್ಲಿಸಿದರೆ ಅವರನ್ನು ಜಾಮೀನು ರಹಿತವಾಗಿ ಬಂಧಿಸಲಾಗುವುದು. ಅವರು ನಿರಪರಾಧಿ ಎಂದು ತೀರ್ಮಾನವಾಗುವಾಗ ಕನಿಷ್ಠ ೫ ವರ್ಷಗಳಾಗಿರುತ್ತವೆ. ಈ ಕಾನೂನಿಗೆ ಕೆಲವು ಮಾರ್ಪಾಡುಗಳನ್ನು ತರಬೇಕು ಎಂದು ಹಲವು ಮಂದಿ ಒತ್ತಾಯಿಸುತ್ತಿದ್ದಾರೆ. ಈ ಕಾನೂನಿನ ದುರುಪಯೋಗಕ್ಕೆ ಸಿಲುಕಿ ನೊಂದವರಿಗಾಗಿ ಹಾಗೂ ಇತರರಿಗೆ ಮಾಹಿತಿಗಾಗಿ ಒಂದು ಜಾಲತಾಣವಿದೆ. ಅದರ ವಿಳಾಸ www.498a.org. ಮನೆಗಳಲ್ಲಿ ನಡೆಯುವ ಹಿಂಸೆಯ ವಿರುದ್ಧ ಇತ್ತೀಚೆಗೆ ಅಸ್ತಿತ್ವಕ್ಕೆ ಬಂದಿರುವ ಹೊಸ ಕಾನೂನಿನ ಬಗ್ಗೆಯೂ ಇದೇ ಜಾಲತಾಣದಲ್ಲಿ ಒಂದು ವಿಭಾಗವಿದೆ. 

ಡೌನ್‌ಲೋಡ್

ಡಿ.ವಿ.ಡಿ. ಕತ್ತರಿಸಿ

ನಿಮ್ಮಲ್ಲಿ ಚಲನಚಿತ್ರದ ಡಿ.ವಿ.ಡಿ. ಇದೆ. ಅದನ್ನು ನಿಮ್ಮ ಗಣಕದ ಹಾರ್ಡ್‌ಡಿಸ್ಕ್‌ಗೆ ಪ್ರತಿಮಾಡಿಕೊಳ್ಳಬೇಕೇ? ಒಂದು ವಿಧಾನವೆಂದರೆ ಅದರಲ್ಲಿರುವ ಫೈಲುಗಳನ್ನು ಸುಮ್ಮನೆ ಗಣಕಕ್ಕೆ ಪ್ರತಿ ಮಾಡಿಕೊಳ್ಳುವುದು. ಆದರೆ ಅದು ಸರಿಯಾದ ವಿಧಾನವಲ್ಲ. ಸಿ.ಡಿ. ಅಥವಾ ಡಿ.ವಿ.ಡಿ.ಯಲ್ಲಿರುವ ಹಾಡು ಅಥವಾ ಚಲಚಿತ್ರವನ್ನು ಗಣಕದಲ್ಲಿ ಚಾಲೂ ಮಾಡಬಲ್ಲ ವಿಧಾನಕ್ಕೆ ಪರಿವರ್ತಿಸುವುದಕ್ಕೆ ರಿಪ್ಪಿಂಗ್ ಎನ್ನುತ್ತಾರೆ. ಇದು ನಿಜವಾದ ಅರ್ಥದಲ್ಲಿ ಸಿ.ಡಿ. ಅಥವಾ ಡಿ.ವಿ.ಡಿ.ಯನ್ನು ಕತ್ತರಿಸುವುದಲ್ಲ. ಅದರಲ್ಲಿರುವ ಬಹುಮಾಧ್ಯಮ ಮಾಹಿತಿಯನ್ನು ಕತ್ತರಿಸಿ ಪರಿವರ್ತಿಸಿ ಗಣಕಕ್ಕೆ ಇಳಿಸುವುದು. ಈ ರೀತಿ ಮಾಡುವುದಕ್ಕೆ ಅನುವುಮಾಡಿಕೊಡುವ ಉಚಿತ ಹಾಗೂ ಮುಕ್ತ ತಂತ್ರಾಂಶ HandBrake. ಇದು ದೊರೆಯುವ ಜಾಲತಾಣ handbrake.fr.

e - ಸುದ್ದಿ

ಟ್ವಿಟ್ಟರಿನಲ್ಲಿ ಆತ್ಮಹತ್ಯೆ

ಟ್ವಿಟ್ಟರ್‌ನ ಅತಿರೇಕಗಳಿಗೆ ಇನ್ನೊಂದು ಸೇರ್ಪಡೆ. ದಕ್ಷಿಣ ಕೊರಿಯಾದ ೨೭ ವರ್ಷ ಪ್ರಾಯದ ಲೀ ಕ್ಯೀ ಹ್ವಾ ಎಂಬಾತ ಆತ್ಮಹತ್ಯೆ ಮಾಡಿಕೊಂಡ. ಆದರೆ ಆತ ಅದನ್ನು ಘೋಷಿಸಿದ್ದು ಟ್ವಿಟ್ಟರ್ ಮೂಲಕ. “ನಾನು ಆತ್ಮಹತ್ಯೆ ಮಾಡಿಕೊಳ್ಳುತ್ತಿದ್ದೇನೆ” ಎಂದಾತ ಟ್ವಿಟ್ಟರಿನಲ್ಲಿ ಸಂದೇಶ ಸೇರಿಸಿದ್ದ. ಅದನ್ನು ಓದಿದ ಆತನ ಸ್ನೇಹಿತರು ಆತನಿಗೆ ಹುಡುಕಾಡಿದರು. ಕೊನೆಗೂ ಅತ ಸಿಕ್ಕಿದ, ಅಲ್ಲ, ಆತನ ಶವ ಸಿಕ್ಕಿತು.

e- ಪದ

ರಿಪ್ಪರ್ (ripper) - ಸಿ.ಡಿ. ಅಥವಾ ಡಿ.ವಿ.ಡಿ.ಯಿಂದ ಬಹುಮಾಧ್ಯಮ ಮಾಹಿತಿಯನ್ನು ಅಂದರೆ ಹಾಡು ಅಥವಾ ಚಲನಚಿತ್ರವನ್ನು ಪ್ರತ್ಯೇಕಿಸಿ ಗಣಕಕ್ಕೆ ಪ್ರತಿಮಾಡುವ ತಂತ್ರಾಂಶ. ಈ ರೀತಿ ಪರಿವರ್ತಿಸುವುದನ್ನು ರಿಪ್ಪಿಂಗ್ ಎನ್ನುತ್ತಾರೆ.

e - ಸಲಹೆ

ಬೆಳ್ತಂಗಡಿಯ ರಾಜೇಂದ್ರ ಕೃಷ್ಣರ ಪ್ರಶ್ನೆ: ನನಗೆ ಎಂಪಿ೩ ಕತ್ತರಿಸುವ ಉಚಿತ ತಂತ್ರಾಂಶ ಬೇಕು. ಎಲ್ಲಿ ಸಿಗುತ್ತದೆ?  
ಉ: http://bit.ly/clqOi8

ಕಂಪ್ಯೂತರ್ಲೆ

ಕೋಲ್ಯ ಯಾವಾಗಲೂ ಗಣಕಕ್ಕೆ ಅಂಟಿಕೊಂಡೇ ಇರುತ್ತಿದ್ದ. ಇದರಿಂದ ಬೇಸತ್ತ ಕೋಲ್ಯನ ಹೆಂಡತಿ ಸುವಾಸನೆಗಳನ್ನು ಮಾರುವ ಅಂಗಡಿಗೆ ಹೋಗಿ ಕೇಳಿದಳು “ನಿಮ್ಮಲ್ಲಿ ಕಂಪ್ಯೂಟರಿನಂತೆ ವಾಸನೆ ಸೂಸುವ ಪರ್ಫ್ಯೂಮ್ ಇದೆಯೇ?”

ಸೋಮವಾರ, ಜುಲೈ 19, 2010

ಗಣಕಿಂಡಿ - ೦೬೧ (ಜುಲೈ ೧೯, ೨೦೧೦)

ಅಂತರಜಾಲಾಡಿ

ಫಾಂಟ್ ಬೇಕೇ

ಗಣಕದಲ್ಲಿ ಮೂಡುವ ಅಕ್ಷರಭಾಗಗಳಿಗೆ ಫಾಂಟ್ ಎನ್ನುತ್ತಾರೆ. ನೀವು ಬಳಸುವ ಕೆಲವು ಪ್ರಮುಖ ಫಾಂಟ್‌ಗಳು Arial, Times New Roman, Verdana, BRH Kannada ಇತ್ಯಾದಿ. ಫಾಂಟ್‌ಗಳಿಗೆ ಹಕ್ಕುಸ್ವಾಮ್ಯ ಇದೆ. ಅಂದರೆ ನೀವು ನಿಮ್ಮ ಸ್ನೇಹಿತನ ಗಣಕದಲ್ಲಿ ನೋಡಿದ ಸುಂದರವಾದ ಫಾಂಟ್‌ನ್ನು ಪ್ರತಿಮಾಡಿಕೊಂಡು ನಿಮ್ಮ ಗಣಕದಲ್ಲಿ ಬಳಸುವಂತಿಲ್ಲ. ನಿಮಗೆ ಕೆಲವು ಉಚಿತ ಹಾಗೂ ಮುಕ್ತ ಫಾಂಟ್‌ಗಳು ಬೇಕೇ? ಹಾಗಿದ್ದಲ್ಲಿ ನೀವು openfontlibrary.org ಜಾಲತಾಣಕ್ಕೆ ಭೇಟಿ ನೀಡಬೇಕು. ನೀವು ಫಾಂಟ್ ತಯಾರಕರಾಗಿದ್ದಲ್ಲಿ ನಿಮ್ಮ ಫಾಂಟ್‌ನ್ನು ಉಚಿತವಾಗಿ ನೀಡುವ ಇರಾದೆ ಇದ್ದರೆ ಅದನ್ನು ಇಲ್ಲಿ ಸೇರಿಸಬಹುದು. ಇಲ್ಲಿ ದೊರೆಯುವ ಫಾಂಟ್‌ನ್ನು ಬದಲಿಸಿ ಅದನ್ನು ಅಲ್ಲಿಗೇ (ಬೇರೆ ಹೆಸರಿನಲ್ಲಿ) ಸೇರಿಸಲೂ ಬಹುದು. ಅಂದರೆ ಈಗಷ್ಟೆ ಸರಕಾರವು ಘೋಷಿಸಿರುವ ರುಪಾಯಿ ಚಿಹ್ನೆಯನ್ನು ಇಲ್ಲಿರುವ ಫಾಂಟ್‌ಗಳಿಗೆ ಸೇರಿಸಿ ಪುನಃ ಅಲ್ಲಿಗೆ ಸೇರಿಸಿ ಜನರಿಗೆ ಉಪಕಾರ ಮಾಡಬಹುದು.

ಡೌನ್‌ಲೋಡ್

ಫಾಂಟ್ ತಯಾರಿಸಿ

ಫಾಂಟ್ ತಯಾರಿಸಬೇಕೇ? ಹಾಗಿದ್ದಲ್ಲಿ ಅದಕ್ಕಾಗಿ ಇರುವ ದುಬಾರಿ ತಂತ್ರಾಂಶ ಕೊಳ್ಳಬೇಕಾಗುತ್ತದೆ ಎಂದು ಚಿಂತಿಸಬೇಕಾಗಿಲ್ಲ. ಫಾಂಟ್ ತಯಾರಿಸಲು ಒಂದು ಮುಕ್ತ ಹಾಗೂ ಉಚಿತ ತಂತ್ರಾಂಶ ಇದೆ. ಇದು ದೊರಕುವ ಜಾಲತಾಣ fontforge.sourceforge.net. ಇದು ಲೈನಕ್ಸ್ ಕಾರ್ಯಾಚರಣೆಯ ವ್ಯವಸ್ಥೆಯಲ್ಲಿ ಕೆಲಸ ಮಾಡಲು ತಯಾರಿಸಿದುದಾಗಿದೆ. ವಿಂಡೋಸ್‌ನಲ್ಲಿ ಇದನ್ನು ಬಳಸಬೇಕಾದರೆ CygWin (www.cygwin.com) ಎಂಬ ತಂತ್ರಾಂಶವನ್ನು ಬಳಸಬೇಕು. ಈ ಜಾಲತಾಣದಲ್ಲಿ ಎಲ್ಲ ಆವೃತ್ತಿಗಳು ಲಭ್ಯವಿವೆ. ನೆನಪಿಡಿ. ಫಾಂಟ್ ತಯಾರಿಸುವುದು ಕೇವಲ ಪರಿಣತರಿಂದ ಸಾಧ್ಯ. ಇದನ್ನು ಕಲಿಯಲು ಪರಿಶ್ರಮಪಡಬೇಕು.


e - ಸುದ್ದಿ

ಬಾಲಕಿಯ ರಕ್ಷಣೆಗೆ ಫೇಸ್‌ಬುಕ್

ತನ್ನ ತಾಯಿಯ ಮಾಜಿ ಪ್ರಿಯಕರ ತನ್ನ ಮೇಲೆ ಲೈಂಗಿಕ ಧಾಳಿ ಮಾಡಲು ಬಂದಾಗ ಆತನಿಂದ ತಪ್ಪಿಸಿಕೊಂಡು ಆತನನ್ನು ಸೆರೆಗೆ ಕಳುಹಿಸಿಲು ಅಮೇರಿಕಾದ ೧೨ ವರ್ಷದ ಬಾಲಕಿ ಬಳಸಿದ್ದು ಫೇಸ್‌ಬುಕ್ ಅನ್ನು. ತನ್ನ ತಾಯಿ ಮನೆಯಲ್ಲಿ ಇಲ್ಲದಿದ್ದಾಗ ಆತ ಆಕೆಯ ಮೇಲೆ ಧಾಳಿ ಮಾಡಿದ. ಆತನನ್ನು ಹೇಗೋ ಕೋಣೆಯಿಂದ ಆಕೆ ಹೊರದೂಡಿದಳು. ಆಕೆಯ ಫೋನನ್ನೂ ಆತ ಕಿತ್ತುಕೊಂಡಿದ್ದ. ಆದರೆ ಆಕೆಯ ಬಳಿ ಐಪ್ಯಾಡ್ ಇತ್ತು. ಅದನ್ನು ಬಳಸಿ ಆಕೆ ತನ್ನ ಪರಿಸ್ಥಿತಿ ವಿವರಿಸಿ ಯಾರಾದರೂ ಕೂಡಲೆ ತನ್ನ ತಾಯಿಯನ್ನು ಸಂಪರ್ಕಿಸಿ ತನ್ನನ್ನು ರಕ್ಷಿಸಬೇಕಾಗಿ ಫೇಸ್‌ಬುಕ್‌ನಲ್ಲಿ ಕೋರಿಕೆ ಸಲ್ಲಿಸಿದಳು. ಅದನ್ನು ಓದಿದ ಆಕೆಯ ಗೆಳತಿ ಆಕೆಯ ತಾಯಿಯನ್ನು ಸಂಪರ್ಕಿಸಿದಳು. ತಾಯಿ ಕೂಡಲೆ ಕಾರ್ಯಪ್ರವೃತ್ತಳಾಗಿ ಪೋಲೀಸರೊಂದಿಗೆ ಮನೆಗೆ ಬಂದು ಆತನ ಬಂಧನಕ್ಕೆ ಕಾರಣೀಭೂತಳಾದಳು.

e- ಪದ

ಕಾರ್ಪಸ್ (corpus) - ಒಂದು ನಿರ್ದಿಷ್ಟ ನಿಯಮವನ್ನು ಅನುಸರಿಸಿ ಸಂಗ್ರಹಿಸಿದ ಪದ, ವಾಕ್ಯ ಅಥವಾ ಲೇಖನಗಳ ಸಂಗ್ರಹ. ಸಾಮಾನ್ಯವಾಗಿ ಭಾಷಾಸಂಸ್ಕರಣೆಯಲ್ಲಿ ಇವುಗಳ ಬಳಕೆಯಾಗುತ್ತದೆ. ಇವುಗಳಲ್ಲಿ ಪದಗಳನ್ನು ನಾಮಪದ, ಕ್ರಿಯಾಪದ, ಅನ್ವಯ, ಗುಣವಾಚಕ, ಇತ್ಯಾದಿಯಾಗಿ ಲಗತ್ತಿಸಿರುತ್ತಾರೆ. ಇಂತಹ ಲಕ್ಷಗಟ್ಟಳೆ ಪದಗಳ ಕಾರ್ಪಸ್ ಬಳಸಿ ಲೇಖನಗಳನ್ನು ಗಣಕ ಬಳಸಿ ವಿಶ್ಲೇಷಿಸಲಾಗುತ್ತದೆ. ಗಣಕ ಬಳಸಿ ತರ್ಜುಮೆ ಮಾಡಲೂ ಇಂತಹ ಕಾರ್ಪಸ್ ಅಗತ್ಯವಿದೆ.


e - ಸಲಹೆ

ಪ್ರದೀಪಕುಮಾರರ ಪ್ರಶ್ನೆ: ಯುಟ್ಯೂಬ್‌ನಿಂದ ವಿಡಿಯೋಗಳನ್ನು ಡೌನ್‌ಲೋಡ್ ಮಾಡುವುದು ಹೇಗೆ?
ಉ: youtubedownload.altervista.org ಜಾಲತಾಣದಲ್ಲಿ ದೊರೆಯುವ ತಂತ್ರಾಂಶ ಬಳಸಿ.  

ಕಂಪ್ಯೂತರ್ಲೆ

ಗಣಕವಾಡು

ನಾಯಿಮರಿ ನಾಯಿಮರಿ ಮೌಸ್ ಬೇಕೇ?
ಮೌಸ್ ಬೇಕು ಕೀಬೋರ್ಡ್ ಬೇಕು ಎಲ್ಲ ಬೇಕು
ನಾಯಿಮರಿ ಮೌಸ್ ನಿನಗೆ ಏಕೆ ಬೇಕು
ಮೌಸ್ ಹಿಡಿದು ಗಣಕದಲ್ಲಿ ಆಡಬೇಕು

ಸೋಮವಾರ, ಜುಲೈ 12, 2010

ಗಣಕಿಂಡಿ - ೦೬೦ (ಜುಲೈ ೧೨, ೨೦೧೦)

ಅಂತರಜಾಲಾಡಿ

ಗಾಳಿಮಾತು ಪತ್ತೆಹಚ್ಚಿ

ಇಮೈಲ್ ಬಂದುದರಿಂದ ಒಳ್ಳೆಯದರ ಜೊತೆಗೆ ಕೆಟ್ಟದೂ ಆಗುತ್ತಿದೆ. ಹಿಂದೆ ವಂಚನೆ, ವದಂತಿಗಳು, ಗಾಳಿಮಾತುಗಳು, ಇವೆಲ್ಲ ನಿಧಾನವಾಗಿ ಒಂದೆಡೆಯಿಂದ ಇನ್ನೊಂದೆಡೆಗೆ ಸಾಗುತ್ತಿದ್ದವು. ಈಗ ಇಮೈಲ್ ಬಂದುದರಿಂದ ಅವೆಲ್ಲ ಕ್ಷಣಮಾತ್ರದಲ್ಲಿ ಚಲಿಸುತ್ತಿವೆ. ಉದಾಹರಣೆಗೆ ಬರಾಕ್ ಒಬಾಮ ರಾಜೀನಾಮೆ ಕೊಟ್ಟಿದ್ದಾರೆ ಎಂದು ಹೇಳುವ ಇಮೈಲ್. ಇದು ಸುಳ್ಳು ಎಂದು ವಿಚಾರಿಸಿ ತಿಳಿದುಕೊಳ್ಳದೆ ಆ ಇಮೈಲನ್ನು ನೂರಾರು ಜನ ನಿಮ್ಮ ಸ್ನೇಹಿತರಿಗೆ ನೀವು ಕಳುಹಿಸಿಕೊಟ್ಟಿರೆಂದಿಟ್ಟುಕೊಳ್ಳೋಣ. ಅದನ್ನು ಓದಿದವರಲ್ಲೊಬ್ಬ ಅದರ ನಿಜ ಪತ್ತೆಹಚ್ಚಿ ಅದು ಸುಳ್ಳೆಂದು ತಿಳಿಸಿ ನಿಮ್ಮನ್ನು ಜಾಢಿಸುತ್ತಾನೆ. ಆಗ ನಿಮಗೆ ಮಾನಹೋಗುತ್ತದೆ. ಹಾಗಾದರೆ ನಿಮಗೆ ಬಂದ ಇಮೈಲ್ ವದಂತಿ ಸತ್ಯವೇ ಸುಳ್ಳೇ ಎಂದು ತಿಳಿಯುವುದು ಹೇಗೆ? ಇಂತಹ ವದಂತಿ ಗಾಳಿಮಾತುಗಳಿಗಾಗಿಯೇ ಒಂದು ಜಾಲತಾಣವಿದೆ - www.hoax-slayer.com. ಇಮೈಲನ್ನು ಇತರರಿಗೆ ಕಳುಹಿಸುವ ಮುನ್ನ ಈ ಜಾಲತಾಣಕ್ಕೆ ಭೇಟಿ ನೀಡಿ.

ಡೌನ್‌ಲೋಡ್


೩-ಆಯಾಮದ ಮಾದರಿ ರಚಿಸಿರಿ


ವಸ್ತುಗಳ ಅಥವಾ ಶಿಲ್ಪಕಲೆಯ ಮೂರು ಆಯಾಮದ ಮಾದರಿ ರಚಿಸಲು ಹಲವು ದುಬಾರಿ ತಂತ್ರಾಂಶಗಳಿವೆ. ಅವುಗಳಲ್ಲಿ ನೀಡಿರುವ ಸವಲತ್ತುಗಳೂ ಅಂತೆಯೇ ಇವೆ. ನಮಗೆ ಅವೆಲ್ಲ ಬೇಡ. ಸರಳವಾದ ಹಾಗೂ ಉಚಿತವಾದ ತಂತ್ರಾಂಶ ಬೇಕು ಎನ್ನುವವರಿಗಾಗಿ ಒಂದು ತಂತ್ರಾಂಶವಿದೆ. ಅದುವೇ  Sculptris. ಇದನ್ನು ಬಳಸಿ ಸರಳವಾದ ಮೂರು ಆಯಾಮದ ರಚನೆಗಳನ್ನು ಮಾಡಬಹುದು. ಅವು ಗಣಿತದ ಸಮೀಕರಣಗಳಿರಬಹುದು, ಶಿಲ್ಪಕಲೆಯಿರಬಹುದು ಅಥವಾ ನಿಮಗಿಷ್ಟವಾದ ಇನ್ನೇನಾದರೂ ಆಗಿರಬಹುದು. ಇದು ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ www.sculptris.com.


e - ಸುದ್ದಿ

ಮರಣದಂಡನೆಯ ಘೋಷಣೆಗೂ ಟ್ವಿಟ್ಟರ್

ಟ್ವಿಟ್ಟರ್ ಮೂಲಕ ರಾಜಕಾರಣಿಗಳು, ನಟ ನಟಿಯರು, ಇನ್ನಿತರ ಖ್ಯಾತನಾಮರು ಇತ್ತೀಚೆಗಿನ ಬೆಳವಣಿಗೆಗಳ ಬಗ್ಗೆ ಜನರಿಗೆ ಮಾಹಿತಿ ನೀಡುವುದು ತಿಳಿದಿರಬಹುದು. ಆದರೆ ಅಮೇರಿಕದ ಉತಾ ನಗರದ ಅಟಾರ್ನಿ ಜನರಲ್ ಅವರು ಕೊಲೆಗಡುಕನೊಬ್ಬನಿಗೆ ಮರಣದಂಡನೆ ವಿಧಿಸಿದ್ದೇವೆ ಎಂಬುದನ್ನು ಕೂಡ ಟ್ವೀಟ್ ಮಾಡುವ ಮೂಲಕ ಎಲ್ಲರಿಗೆ ತಿಳಿಸಿದ್ದಾರೆ. “ನಾನು ಈಗಷ್ಟೆ ಗಾರ್ಡನರ್‌ಗೆ ಮರಣದಂಡನೆ ವಿಧಿಸಿದ್ದೇನೆ. ತನ್ನ ಬಲಿಪಶುಗಳಿಗೆ ಆತ ನಿರಾಕರಿಸಿದ ದಯೆಯನ್ನು ದೇವರು ಆತನಿಗೆ ದಯಪಾಲಿಸಲಿ” ಎಂದು ಅವರು ಟ್ವೀಟ್ ಮಾಡಿದ್ದರು.

e- ಪದ


ಡಿಜಿಟಲ್ ವಿಂಡೋ ಶಾಪಿಂಗ್ (digital window shopping) -ಅಂತರಜಾಲದಲ್ಲಿರುವ ವ್ಯಾಪಾರಿ ಜಾಲತಾಣಗಳಿಗೆ ಸುಮ್ಮನೆ ಭೇಟಿ ನೀಡಿ ಮಾರಾಟಕ್ಕಿಟ್ಟಿರುವ ವಿವಿಧ ವಸ್ತುಗಳನ್ನು ವೀಕ್ಷಿಸಿ ಯಾವುದನ್ನೂ ಕೊಳ್ಳದಿರುವುದು. ಹೀಗೆ ಮಾಡುವವರು ಹಲವು ಕಾರಣಗಳಿಗೆ ಕೊಳ್ಳದಿರುತ್ತಾರೆ. ಅದರಲ್ಲಿ ತುಂಬ ಪ್ರಮುಖವಾಗಿರುವುದು ಅವರು ಸಾಮಾನಿನ ಬಗ್ಗೆ ವಿವರ ತಿಳಿಯಲಷ್ಟೆ ಜಾಲತಾಣಕ್ಕೆ ಭೇಟಿ ನೀಡಿರುತ್ತಾರೆ ಎಂಬುದು. ನಂತರ ಅವರು ಯಾವುದಾದರೂ ಅಂಗಡಿಗೆ ಭೇಟಿ ನೀಡಿ ಅದೇ ವಸ್ತುವನ್ನು ಕೊಳ್ಳುವ ಸಾಧ್ಯತೆಯೂ ಇದೆ.


e - ಸಲಹೆ

ಮೋಹನ ರಾಜರ ಪ್ರಶ್ನೆ: ಯಾವುದಾದರೊಂದು ವೀಡಿಯೋವನ್ನು ಒಂದು ವಿಧಾನದಿಂದ ಇನ್ನೊಂದು ವಿಧಾನಕ್ಕೆ ಪರಿವರ್ತಿಸುವ ಉಚಿತ ತಂತ್ರಾಂಶ ಇದೆಯೇ?
ಉ: ಇದೆ. ಈ ಬಗ್ಗೆ ಗಣಕಿಂಡಿ ಅಂಕಣದಲ್ಲಿ ಸೂಚಿಸಲಾಗಿತ್ತು. ಅದುವೇ ಮೀಡಿಯಾಕೋಡರ್. ಅದು ಸಿಗುವ ಜಾಲತಾಣ - www.mediacoderhq.com.  

ಕಂಪ್ಯೂತರ್ಲೆ

ಗಣಕವಾಡು

ಬೆಕ್ಕೇ ಬೆಕ್ಕೇ
ಮುದ್ದಿನ ಸೊಕ್ಕೆ
ಎಲ್ಲಿಗೆ ಹೋಗಿದ್ದೆ
ಎಲ್ಲಿಗೂ ಇಲ್ಲ
ಇಲ್ಲೇ ಇಲ್ಲೊ
ಮೌಸ್ ಹುಡುಕುತ್ತಿದ್ದೆ

ಬುಧವಾರ, ಜುಲೈ 7, 2010

ಗಣಕಿಂಡಿ - ೦೫೯ (ಜುಲೈ ೦೫, ೨೦೧೦)

ಅಂತರಜಾಲಾಡಿ

ಹಳೆ ಪುಸ್ತಕ ಮಾರಿ

ನಿಮ್ಮಲ್ಲಿರುವ ನಿಮಗೀಗ ಬೇಡವಾಗಿರುವ ಹಳೆಯ ಪುಸ್ತಕ ಮಾರಬೇಕಿದ್ದರೆ ಏನು ಮಾಡಬೇಕು? ಬೆಂಗಳೂರಿನ ಅವೆನ್ಯೂ ರಸ್ತೆಗೆ ಹೋಗಬೇಕು ಎನ್ನುತ್ತೀರಾ? ಅದಕ್ಕಾಗಿ ಟ್ರಾಫಿಕ್ ಜಾಮ್‌ಗಳ ನಗರಿ ಬೆಂಗಳೂರಿಗೆ ಹೋಗುವವರಾರು ಎನ್ನುತ್ತೀರಾ? ಬೇಡ. ಮನೆಯಿಂದಲೇ ಅದನ್ನು ಅಂತರಜಾಲದ ಮೂಲಕ ಮಾರುವಂತಿದ್ದರೆ ಎಷ್ಟು ಚೆನ್ನ ಅಲ್ಲವೇ? ಹೌದು. ಅಂತಹ ಒಂದು ಜಾಲತಾಣವೂ ಇದೆ. ಅದುವೇ  indianusedbooks.com. ಈ ಜಾಲತಾಣವು ಹಳೆಯ ಪುಸ್ತಕಗಳನ್ನು ಮಾರುವವರನ್ನೂ ಕೊಳ್ಳುವವರನ್ನೂ ಒಂದುಗೂಡಿಸುತ್ತದೆ.

ಡೌನ್‌ಲೋಡ್

ಆವರ್ತಕೋಷ್ಟಕ

ಆವರ್ತಕೋಷ್ಟಕ (periodic table) ಶಾಲಾ ಕಾಲೇಜು ವಿದ್ಯಾರ್ಥಿಗಳಿಗೆ ಬಹುಮುಖ್ಯ. ಮೂಲವಸ್ತುಗಳ ವಿವಿಧ ಗುಣವೈಶಿಷ್ಟ್ಯಗಳನ್ನು ಒಂದು ಕ್ರಮದಲ್ಲಿ ಇದರಲ್ಲಿ ಜೋಡಿಸಲಾಗಿದೆ. ಇದಕ್ಕಾಗಿ pElement ಎಂಬ ತಂತ್ರಾಂಶವಿದೆ. ಇದನ್ನು ಬಳಸಿ ಮೂಲವಸ್ತುಗಳ ರಾಸಾಯನಿಕ ಮತ್ತು ಭೌತಿಕ ಗುಣಗಳನ್ನು ತಿಳಿಯಬಹುದು. ಇದು ಬೇಕಿದ್ದಲ್ಲಿ ನೀವು ಭೇಟಿ ನಿಡಬೇಕಾದ ಜಾಲತಾಣ http://bit.ly/9isKkO

e - ಸುದ್ದಿ

ದಂತಕಥೆ

ಅಮೇರಿಕದ ಡೇವಿಡ್ ಎಂಬ ಮೂರನೆಯ ತರಗತಿಯ ಹುಡುಗ ಹಲ್ಲಿನ ಶಸ್ತ್ರಚಿಕಿತ್ಸೆಗೆ ದಂತವೈದ್ಯರಲ್ಲಿಗೆ ಹೋಗಿದ್ದ. ಅಲ್ಲಿಂದ ಹೊರ ಬಂದಾಗ ಅತ ಇನ್ನೂ ಅರಿವಳಿಕೆಯ ಮಂಪರಿನಲ್ಲಿದ್ದ. ನಾನು ಎಲ್ಲಿದ್ದೇನೆ? ಇಲ್ಲಿ ನಡೆಯುತ್ತಿರುವುದೇನು ಇತ್ಯಾದಿ ಬಡಬಡಿಸಿದ. ಅವನ ಅಪ್ಪ ಅದನ್ನೆಲ್ಲ ವೀಡಿಯೋ ಕ್ಯಾಮರಾದಲ್ಲಿ ಸೆರೆಹಿಡಿಯುತ್ತಿದ್ದ. ಆತ ಅದನ್ನು ಯುಟ್ಯೂಬ್‌ಗೆ ಸೇರಿಸಿದ. ಮೂರು ದಿನಗಳಲ್ಲಿ ೩೦ ಲಕ್ಷ ಜನರು ಅದನ್ನು ವೀಕ್ಷಿಸಿ ದಿನಬೆಳಗಾಗುವುದರೊಳಗೆ ಡೇವಿಡ್ ಒಬ್ಬ ತಾರೆಯಾಗಿಬಿಟ್ಟ. ಆತನ ಅಪ್ಪ ಈ ವೀಡಿಯೋ ಒಂದರಿಂದಲೇ ೧,೫೦,೦೦೦ ಡಾಲರ್ ಸಂಪಾದಿಸಿದ ಎಂದರೆ ನಂಬುತ್ತೀರಾ? ನಿಜವಾದ ದಂತಕಥೆಯೆಂದರೆ ಇದುವೇ!

e- ಪದ

ವಿ-ಕಲಿಕೆ (e-learning) -ವಿದ್ಯುನ್ಮಾನ ಆಧಾರಿತ ಕಲಿಕೆ. ಇದರಲ್ಲಿ ಪ್ರಮುಖವಾಗಿ ಗಣಕ, ಅಂತರಜಾಲ, ಅಂತರಜಾಲ ಸಂಪರ್ಕವಿರುವ ಗ್ಯಾಜೆಟ್ (ಸ್ಮಾರ್ಟ್‌ಫೋನ್) ಎಲ್ಲ ಒಳಗೊಂಡಿರುತ್ತದೆ. ಸಾಮಾನ್ಯವಾಗಿ ಗಣಕಾಧಾರಿತ ಶಿಕ್ಷಣವನ್ನೇ ವಿ-ಕಲಿಕೆ ಎಂದು ಬಹುಮಂದಿ ಕರೆಯುತ್ತಾರೆ. ಗಣಕಗಳಲ್ಲಿ ಸಿ.ಡಿ. ಹಾಕಿ ಬಹುಮಾಧ್ಯಮ ಮೂಲಕ ಕಲಿಯುವುದು ಇದರಲ್ಲಿ ಒಂದು ಪ್ರಮುಖ ವಿಧಾನ. ದೂರಶಿಕ್ಷಣದ ವಿದ್ಯಾರ್ಥಿಗಳು ಅಂತರಜಾಲದ ಮೂಲಕ ಪಠ್ಯ ಪಡೆಯುವುದು, ಪರೀಕ್ಷೆ ತೆಗೆದುಕೊಳ್ಳುವುದು, ವಾಸ್ತವಸದೃಶ ತರಗತಿಯಲ್ಲಿ ಪಾಲುಗೊಳ್ಳುವುದು ಎಲ್ಲ ಇದರಲ್ಲಿ ಅಡಕಗೊಂಡಿವೆ.

e - ಸಲಹೆ

ರಾಘವೇಂದ್ರ ಜೋಶಿಯವರ ಪ್ರಶ್ನೆ: ನನಗೆ ವಾಸ್ತವಸದೃಶ ಕೇಶವಿನ್ಯಾಸ ತೋರಿಸುವಂತಹ ಅಂತರಜಾಲದ ವಿಳಾಸ ಬೇಕಾಗಿದೆ. ಅದರಲ್ಲಿ ನಮ್ಮ ಫೋಟೋ ಅಪ್‌ಲೋಡ್ ಮಾಡಿ ವಿವಿಧ ರೀತಿಯ ಕೇಶವಿನ್ಯಾಸ ತೋರಿಸುವಂತಿರಬೇಕು ಮತ್ತು ಅದು ಉಚಿತವಾಗಿರಬೇಕು.
ಉ: www.hairstyles.knowage.info
  
ಕಂಪ್ಯೂತರ್ಲೆ

ಫೇಸ್‌ಬುಕ್ ಕವನ

ಫೇಸ್‌ಬುಕ್ ಒಂದು ಶತಮೂರ್ಖ
ಸೂಚಿಸುತ್ತಿದೆ ಗೆಳತಿಯಾಗಬಹುದೆಂದು ನನ್ನ ಮಾಜಿ ಪ್ರೇಯಸಿಯ
ಗೀಚಬಹುದೆಲ್ಲರು ನನ್ನ ಗೋಡೆಯ ಮೇಲೆ
ಮಿಥ್ಯಾ ತೋಟವ ಮಾಡುತಿಹರೆಲ್ಲರು
ತಾಳಲಾರೆ ಸೆಖೆಯ ಎಂದರೊಬ್ಬ ಕ್ಲಿಕ್ಕಿಸಬೇಕು ನಾ ನನಗಿಷ್ಟ ಎಂದು

ಸೋಮವಾರ, ಜೂನ್ 28, 2010

ಗಣಕಿಂಡಿ - ೦೫೮ (ಜೂನ್ ೨೮, ೨೦೧೦)

ಅಂತರಜಾಲಾಡಿ

ಸೈಬರ್ ಕಾನೂನು

ಅಂತರಜಾಲ ಮತ್ತು ಗಣಕ ಬಳಸಿ ಮಾಡುವ ಅಪರಾಧಗಳಿಗೆ ಸೈಬರ್ ಕ್ರೈಮ್ ಎಂಬ ಹೆಸರಿದೆ. ಈ ರೀತಿಯ ಅಪರಾಧಗಳ ಬಗ್ಗೆ ಇರುವ ಕಾನೂನು ಸೈಬರ್ ಲಾ (ಕಾನೂನು). ಭಾರತ ಸರಕಾರದ ಮಾಹಿತಿ ತಂತ್ರಜ್ಞಾನ ಕಾಯಿದೆಯಲ್ಲಿ ಸೈಬರ್ ಅಪರಾಧಗಳ ಬಗ್ಗೆ ವಿಭಾಗವಿದೆ. ಈ ಬಗ್ಗೆ ಎಲ್ಲರಿಗೂ ತಿಳಿವಳಿಕೆ ಇರುವುದು ಒಳ್ಳೆಯದು. ಹಲವು ವಿಶ್ವವಿದ್ಯಾಲಯಗಳು ಸೈಬರ್ ಅಪರಾಧ ಮತ್ತು ಸೈಬರ್ ಕಾನೂನು ಬಗ್ಗೆ ಪದವಿ ನೀಡುತ್ತಿವೆ. ಈ ಎಲ್ಲ ವಿಷಯಗಳ ಬಗ್ಗೆ ಮಾಹಿತಿ ನಿಡುವ ಜಾಲತಾಣ naavi.org. ಇದರಲ್ಲಿ ಮಾಹಿತಿಗಳು ಕನ್ನಡದಲ್ಲೂ ಇವೆ. ಸೈಬರ್ ಕಾಲೇಜು ಬಗ್ಗೆ ಕೂಡ ಮಾಹಿತಿ ಇಲ್ಲಿದೆ. ಇದನ್ನು ನಡೆಸುತ್ತಿರುವವರು ಕನ್ನಡಿಗರೇ ಆದ ನಾ. ವಿಜಯಶಂಕರ ಅವರು.


ಡೌನ್‌ಲೋಡ್

ಬ್ಯಾಕ್‌ಅಪ್ ಮಾಡಿ

ಗಣಕದ ಹಾರ್ಡ್‌ಡಿಸ್ಕ್‌ನಲ್ಲಿರುವ ಮಾಹಿತಿ ಬಹು ಮುಖ್ಯ. ಗಣಕ ಹಾಳಾದರೆ ಹೊಸತು ತರಬಹುದು. ವರ್ಷಗಳಿಂದ ಮಾಡಿದ ಕೆಲಸ ಕಳೆದು ಹೋದರೆ ಸಿಗಲಾರದು. ಹಾರ್ಡ್‌ಡಿಸ್ಕ್ ಕೆಡುವುದು ಸಹಜ. ವೈರಸ್ ಧಾಳಿಯಿಂದಲೂ ಮಾಹಿತಿ ಕೆಡಬಹುದು. ಆದುದರಿಂದ ಆಗಾಗ ಮಾಹಿತಿಯನ್ನು ಗಣಕದ ಹಾರ್ಡ್‌ಡಿಸ್ಕ್‌ನಿಂದ ಬಾಹ್ಯ ಹಾರ್ಡ್‌ಡಿಸ್ಕ್‌ಗೆ ಪ್ರತಿ ಮಾಡಿಕೊಳ್ಳುವುದು ಅತೀ ಅಗತ್ಯ. ಇದಕ್ಕೆ ಬ್ಯಾಕ್‌ಅಪ್ ಮಾಡುವುದು ಎನ್ನುತ್ತಾರೆ. ಇದರಲ್ಲೂ ಹಲವು ವಿಧ. ಕಳೆದ ವಾರ ಬ್ಯಾಕ್‌ಅಪ್ ಮಾಡಿಕೊಂಡಿದ್ದೀರೆಂದುಕೊಳ್ಳೋಣ. ಈ ವಾರ ನೀವು ಎಲ್ಲ ಫೈಲುಗಳನ್ನು ಪುನಃ ಪ್ರತಿ ಮಾಡುವ ಅಗತ್ಯವಿಲ್ಲ. ಯಾವ ಫೈಲುಗಳು ಬದಲಾಗಿವೆ ಎಂದು ಪರಿಶೀಲಿಸಿ ಅಂತಹ ಫೈಲುಗಳನ್ನು ಮಾತ್ರವೇ ಪ್ರತಿಮಾಡಿಕೊಂಡರೆ ಬೇಗ ಕೆಲಸ ಆಗುತ್ತದೆ. ಈ ರೀತಿ ಮಾಡಲು ನಿಮಗೆ ಅನುವು ಮಾಡಿಕೊಡುವ ತಂತ್ರಾಂಶ PureSync. ಇದು ಬೇಕಿದ್ದರೆ ನೀವು ಭೇಟಿ ನೀಡಬೇಕಾದ ಜಾಲತಾಣ http://bit.ly/czq5K6.

e - ಸುದ್ದಿ

ಅಂತರಜಾಲವೇ ನಂಬಿಕಸ್ತ

ಅಮೇರಿಕಾದಲ್ಲಿ ಇತ್ತೀಚೆಗೆ ಒಂದು ಸಮೀಕ್ಷೆ ನಡೆಸಲಾಯಿತು. ಪರಂಪರಾಗತ ಮಾಧ್ಯಮ ಅಂದರೆ ಮುದ್ರಿತ ಸುದ್ದಿಪತ್ರಿಕೆ ಹಾಗೂ ಟೆಲಿವಿಷನ್‌ಗಳು ಮತ್ತು ಅಂತರಜಾಲ ಇವುಗಳಲ್ಲಿ ಯಾವುದನ್ನು ನೀವು ಹೆಚ್ಚು ನಂಬುತ್ತೀರಿ ಎಂಬು ಜನರನ್ನು ಪ್ರಶ್ನಿಸಲಾಯಿತು. ಬಹುಪಾಲು ಜನರು ತಾವು ಅಂತರಜಾಲ ತಾಣಗಳನ್ನು ಹೆಚ್ಚು ನಂಬುತ್ತೇವೆ ಎಂದು ಉತ್ತರಿಸಿದ್ದಾರೆ. ಶೇಕಡ ೧೫ರಷ್ಟು ಜನರು ತಾವು  ಅಂತರಜಾಲತಾಣಗಳನ್ನು ನಂಬುತ್ತೇವೆ ಎಂದಿದ್ದಾರೆ. ಆದರೆ ಕೇವಲ ಶೇಕಡ ೮ರಷ್ಟು ಜನರು ಮಾತ್ರ ನಾವು ಪರಂಪರಾಗತ ಸುದ್ದಿ ಮಾಧ್ಯಮಗಳನ್ನು ನಂಬುತ್ತೇವೆ ಎಂದಿದ್ದಾರೆ. ಟಿಆರ್‌ಪಿ ಮೇಲೆ ಮಾತ್ರವೇ ಗಮನವಿತ್ತಿರುವ ಸುದ್ದಿ ಮಾಧ್ಯಮಗಳು ಗಮನಿಸುತ್ತಿದ್ದೀರಾ?

e- ಪದ

ವೆಬ್‌ಕಾಸ್ಟ್ (webcast) -ಅಂತರಜಾಲ ಮೂಲಕ ಧ್ವನಿ ಮತ್ತು ದೃಶ್ಯಗಳ ನೇರ ಪ್ರಸಾರ. ಸರಳ ಮಾತಿನಲ್ಲಿ ಹೇಳುವುದಾದರೆ ಅಂತರಜಾಲ ದೂರದರ್ಶನ ಪ್ರಸಾರ. ಆದರೆ ಅಷ್ಟೇ ಅಲ್ಲ. ಅಂತರಜಾಲ ಮೂಲಕ ಭಾಷಣ, ತಂತ್ರಜ್ಞಾನದ ಬಗ್ಗೆ ಸ್ಲೈಡ್ ಶೋ ಮೂಲಕ ಭಾಷಣ, ವೀಡಿಯೋ, ಚಲನಚಿತ್ರ ಇತ್ಯಾದಿ ಎಲ್ಲ ಪ್ರಸಾರ ಇದರಲ್ಲಿ ಅಡಕವಾಗಿರಬಹುದು.

e - ಸಲಹೆ

ಗಣೇಶ ಶಾನಭಾಗರ ಪ್ರಶ್ನೆ: ನಿಮ್ಮ ಅಂಕಣ ಉಪಯುಕ್ತವಾಗಿದೆ. ಈ ಲೇಖನಗಳು ಪುಸ್ತಕ ರೂಪದಲ್ಲಿ ಸಿಗಬಹುದೇ? ನನ್ನ ಮಗ ೬ನೆಯ ತರಗತಿಯಲ್ಲಿ ಓದುತ್ತಿದ್ದಾನೆ. ಅವನಿಗೆ ಗಣಿತ ಕಷ್ಟವಾಗುತ್ತಿದೆ. ಗಣಿತ ಕಲಿಸುವ ಜಾಲತಾಣಗಳು ಇವೆಯೇ? ಅದೇ ರಿತಿ ಮಕ್ಕಳಿಗೆ ವಿಜ್ಞಾನದಲ್ಲಿ ಆಸಕ್ತಿ ಮೂಡಿಸಿ ಅವುಗಳನ್ನು ವಿವರಿಸಿ ಹೇಳುವ ಜಾಲತಾಣಗಳಿದ್ದರೆ ತಿಳಿಸಿ.
ಉ: ಗಣಕಿಂಡಿ ಅಂಕಣದ ಎಲ್ಲ ಲೇಖನಗಳನ್ನು ganakindi.blogspot.com ಜಾಲತಾಣದಲ್ಲಿ ಓದಬಹುದು. ಗಣಿತ ಕಲಿಯಲು ಸಹಾಯವಾಗುವ ಕೆಲವು ಜಾಲತಾಣಗಳನ್ನು ಈಗಾಗಲೆ ಸೂಚಿಸಿದ್ದೆ. ಇನ್ನೂ ಕೆಲವು - visualmathlearning.com, coolmath-games.com, mathsisfun.com. ವಿಜ್ಞಾನದ ಬಗ್ಗೆ ಇರುವ ಹಲವು ಜಾಲತಾಣಗಳನ್ನು ಈಗಾಗಲೆ ಗಣಕಿಂಡಿ ಅಂಕಣದಲ್ಲಿ ಸೂಚಿಸಿದ್ದೇನೆ.
   
ಕಂಪ್ಯೂತರ್ಲೆ


ಕೋಲ್ಯನಿಗೆ ವಿಮಾನದಲ್ಲಿ ಹೋಗಬೇಕಿತ್ತು. ಜೊತೆಯಲ್ಲಿ ಲ್ಯಾಪ್‌ಟಾಪ್ ಇತ್ತು. ಚೀಲ ತೂಕಮಾಡಿ ನೋಡಿ ವಿಮಾನಯಾನ ಕಂಪೆನಿಯ ಅಧಿಕಾರಿಗಳು ಆತನಿಗೆ ಚೀಲದ ತೂಕ ಜಾಸ್ತಿ ಇದೆ ಎಂದು ಹೇಳಿದರು. ಕೋಲ್ಯ ಪಕ್ಕಕ್ಕೆ ಸರಿದು ಲ್ಯಾಪ್‌ಟಾಪ್ ತೆರೆದು ಅದರ ಹಾರ್ಡ್‌ಡಿಸ್ಕ್‌ನಲ್ಲಿದ್ದ ಎಲ್ಲ ಮಾಹಿತಿಗಳನ್ನು ಅಳಿಸಿ ಹಾಕಿದ -ತೂಕ ಕಡಿಮೆಯಾಗಲು.

ಮಂಗಳವಾರ, ಜೂನ್ 22, 2010

ಗಣಕಿಂಡಿ - ೦೫೭ (ಜೂನ್ ೨೧, ೨೦೧೦)

ಅಂತರಜಾಲಾಡಿ

ಪುಟಾಣಿಗಳಿಗೆ ವಿಜ್ಞಾನ

ಮಕ್ಕಳಿಗೆ ವಿಜ್ಞಾನದಲ್ಲಿ ಆಸಕ್ತಿ ಮೂಡಿಸಲು ಹಲವು ಜಾಲತಾಣಗಳಿವೆ. ಅಂತಹ ಒಂದು ಜಾಲತಾಣ www.sciencekids.co.nz. ಈ ಜಾಲತಾಣದಲ್ಲಿ ವಿಜ್ಞಾನದ ಬೇರೆ ವಿಭಾಗಗಳ ಬಗ್ಗೆ ವಿಷಯಗಳಿವೆ. ವಿಜ್ಞಾನ, ಖಗೋಳಶಾಸ್ತ್ರ, ತಂತ್ರಜ್ಞಾನ, ಹೀಗೆ ಹಲವಾರು ವಿಷಯಗಳ ಮಾಹಿತಿ ಇಲ್ಲಿ ಲಭ್ಯ. ಕೆಲವು ವಿಶಿಷ್ಟ ಮಾಹಿತಿಗಳೂ ಇವೆ. ವಿಜ್ಞಾನ ಪಾಠಗಳು, ವೀಡಿಯೋಗಳು ಕೂಡ ಇವೆ. ವಿಜ್ಞಾನದಲ್ಲಿ ಮಕ್ಕಳು ಯಾವುದಾದರೂ ಪರಿಯೋಜನೆ ನಡೆಸಬೇಕೇ? ಅದಕ್ಕೂ ಸಹಾಯ ಇಲ್ಲಿ ಲಭ್ಯ. ಮಕ್ಕಳಿಗೆ ಆಟ ಎಂದರೆ ಇಷ್ಟ ತಾನೆ? ಇಲ್ಲಿ ಮಕ್ಕಳು ಆಟ ಆಡಿ ವಿಜ್ಞಾನವನ್ನು ಕಲಿಯಬಹುದು. ಅಂತಹ ಆಟಗಳು ಇಲ್ಲಿವೆ.

ಡೌನ್‌ಲೋಡ್

ಡಾಸ್ ಪೆಟ್ಟಿಗೆ

ಈಗ ಎಲ್ಲರೂ ಅತ್ಯಾಧುನಿಕ ಗಣಕಗಳನ್ನು ಬಳಸುತ್ತಿದ್ದಾರೆ. ಅದರಲ್ಲಿರುವ ಕಾರ್ಯಾಚರಣೆಯ ವ್ಯವಸ್ಥೆ (ಆಪರೇಟಿಂಗ್ ಸಿಸ್ಟಮ್) ಸಾಮಾನ್ಯವಾಗಿ ವಿಂಡೋಸ್ ಎಕ್ಸ್‌ಪಿ, ವಿಸ್ಟ ಅಥವಾ ೭ ಇರುತ್ತದೆ. ಇವುಗಳಲ್ಲಿ ಹಳೆಯ ಡಾಸ್ ಕಾರ್ಯಾಚರಣೆಯ ವ್ಯವಸ್ಥೆಯಲ್ಲಿಕೆಲಸ ಮಾಡುತ್ತಿದ್ದಂತಹ ತಂತ್ರಾಂಶಗಳು, ಆಟಗಳು ಕೆಲಸ ಮಾಡುವುದಿಲ್ಲ. ಉದಾಹರಣೆಗೆ ದಶಕಗಳ ಹಿಂದೆ ನೀವು ಮಾಡುತ್ತಿದ್ದ ಬೇಸಿಕ್ ಪ್ರೋಗ್ರಾಮ್ ಅಥವಾ ನೀವು ಆಡುತ್ತಿದ್ದ ಪ್ಯಾಕ್‌ಮಾನ್, ಪ್ರಿನ್ಸ್ ಆಫ್ ಪರ್ಶಿಯಾ ೧ ಆಟಗಳು. ಇವುಗಳನ್ನೆಲ್ಲ ಇನ್ನೂ ನೀವು ಬಳಸಬೇಕಿದ್ದರೆ DOSBox ಎಂಬ ತಂತ್ರಾಂಶವನ್ನು ಬಳಸಬಹುದು. ಇದು www.dosbox.com ಜಾಲತಾಣದಲ್ಲಿ ಲಭ್ಯ.

e - ಸುದ್ದಿ

ಆಮೆ ಚಿತ್ರೀಕರಿಸಿದ ವೀಡಿಯೋ

ಫ್ಲಾರಿಡಾದ ಸಮುದ್ರ ಕಿನಾರೆಯಲ್ಲಿ ಒಬ್ಬ ಸುರಕ್ಷ ಅಧಿಕಾರಿಗೆ ಒಂದು ಕ್ಯಾಮರಾ ಸಿಕ್ಕಿತು. ಅದು ನೀರಿನಡಿಯಲ್ಲೂ ಕೆಲಸ ಮಾಡುವಂತಹುದಾಗಿತ್ತು. ಅದನ್ನು ನೋಡಿದೊಡನೆ ಆತನಿಗೆ ಅದು ತಿಂಗಳುಗಳಿಂದ ಸಮುದ್ರದಲ್ಲಿತ್ತು ಎಂದು ಖಾತ್ರಿಯಾಯಿತು. ಆದರೆ ಕ್ಯಾಮರಾದಲ್ಲಿದ್ದ ಚಿತ್ರ ಹಾಗೂ ವೀಡಿಯೋಗಳಿಂದ ಅದರ ಒಡೆಯ ಯಾರು ಎಂದು ಆತನಿಗೆ ಪತ್ತೆಹಚ್ಚಲಾಗಲಿಲ್ಲ. ಕೊನೆಗೆ ಆತ ಅದರಲ್ಲಿದ್ದ ಚಿತ್ರ ಹಾಗೂ ವೀಡಿಯೋಗಳನ್ನು ಅಂತರಜಾಲಕ್ಕೆ ಸೇರಿಸಿ ಅದರ ಬಗ್ಗೆ ವಿವರ ಸೇರಿಸಿ ಓದುಗರಿಂದ ಸಹಾಯ ಕೇಳಿದ. ಅದರಲ್ಲಿಯ ಚಿತ್ರಗಳನ್ನು ವೀಕ್ಷಿಸಿದ ಜನರು ಅದು ೧೧೦೦ ಮೈಲು ದೂರದ ಡಚ್ ದ್ವೀಪ ಅರುಬಾಕ್ಕೆ ಸೇರಿದ್ದು ಎಂದು ತಿಳಿಸಿದರು. ಆತ ಆ ದ್ವೀಪದ ಜಾಲತಾಣದಲ್ಲಿ ಅದರ ಬಗ್ಗೆ ಬರೆದ. ಕೊನೆಗೂ ಅದರ ಒಡೆಯ ಪತ್ತೆ ಆದ. ಈ ಕಥೆಯಲ್ಲಿ ಇನ್ನೂ ಒಂದು ಸ್ವಾರಸ್ಯವಿದೆ. ಆ ಕ್ಯಾಮರಾವನ್ನು ಒಂದು ಆಮೆ ಎಳೆದೊಯ್ಯುವಾಗ ಒಂದು ವೀಡಿಯೋ ಚಿತ್ರೀಕರಣವಾಗಿತ್ತು. ಬಹುಶಃ ಇದು ಆಮೆ ಚಿತ್ರೀಕರಿಸಿದ ಏಕೈಕ ವೀಡಿಯೋ ಎಂಬ ಖ್ಯಾತಿಗೆ ಪಾತ್ರವಾಗಬಹುದು.

e- ಪದ

ಕ್ಲಿಪ್‌ಬೋರ್ಡ್ (clipboard) - ಒಂದು ಜಾಗದಿಂದ ಇನ್ನೊಂದು ಜಾಗಕ್ಕೆ ಅಥವಾ ಒಂದು ತಂತ್ರಾಂಶದಿಂದ ಇನ್ನೊಂದು ತಂತ್ರಾಂಶಕ್ಕೆ ನಕಲು ಮಾಡಬೇಕಾದುದನ್ನು ತಾತ್ಕಾಲಿಕವಾಗಿ ಮೆಮೊರಿಯಲ್ಲಿ ಇಟ್ಟುಕೊಳ್ಳುವ ಸ್ಥಳ. ಸಾಮಾನ್ಯವಾಗಿ ಬಹುಮಟ್ಟಿನ ತಂತ್ರಾಂಶಗಳಲ್ಲಿ ನಕಲು ಮಾಡಬೇಕಾದುದನ್ನು ಆಯ್ಕೆ ಮಾಡಿ ನಂತರ Ctrl ಮತ್ತು C ಕೀಲಿಗಳನ್ನು ಒಟ್ಟಿಗೆ ಒತ್ತಿದರೆ ಅದು ಕ್ಲಿಪ್‌ಬೋರ್ಡ್‌ಗೆ ಹೋಗಿ ಸೇರಿಕೊಳ್ಳುತ್ತದೆ.

e - ಸಲಹೆ

ಒಂದಕ್ಕಿಂತ ಹೆಚ್ಚು ಪಿಡಿಎಫ್ ಕಡತಗಳನ್ನು ಒಂದರ ಕೊನೆಯಲ್ಲಿ ಇನ್ನೊಂದನ್ನು ಸೇರಿಸಿ ಒಂದೇ ಪಿಡಿಎಫ್ ಕಡತ ಮಾಡಬೇಕೇ? ಹಾಗಿದ್ದರೆ ಗಣಕಿಂಡಿ ಅಂಕಣದಲ್ಲಿ ಈ ಹಿಂದೆಯೇ ಸೂಚಿಸಿದ್ದ PDFCreator ತಂತ್ರಾಂಶವನ್ನು ಬಳಸಿ. ಇದು ದೊರೆಯುವ ಜಾಲತಾಣ http://bit.ly/i1OXM
   
ಕಂಪ್ಯೂತರ್ಲೆ

ರಾಮಾಯಣದ ಕಾಲದಲ್ಲೇ ವಿಮಾನಯಾನ ನಮ್ಮವರಿಗೆ ಗೊತ್ತಿತ್ತು ಎಂಬ ವಾದ ನಿಮಗೆ ತಿಳಿದೇ ಇದೆ ತಾನೆ? ಇತ್ತೀಚೆಗೆ ಗಣಕ ಕ್ಷೇತ್ರದಲ್ಲಿ ಹೆಚ್ಚು ಸುದ್ದಿಯಲ್ಲಿರುವ ಒಂದು ವಿಧಾನ ಎಂದರೆ cloud computing (ನೋಡಿ: ಗಣಕಿಂಡಿ ಮಾರ್ಚ್ ೨೨, ೨೦೧೦). ಇದನ್ನು ಶಬ್ದಾನುವಾದ ಮಾಡಿದರೆ ಮೇಘ ಗಣಿಸು ಎಂದಾಗುತ್ತದೆ. ರಾವಣನ ಒಬ್ಬ ಮಗನ ಹೆಸರು ಮೇಘನಾದ. ಇದು ಮೇಘ ಗಣಿಸುವಿಕೆಗೆ ಶಬ್ದ ಸೇರಿಸಿದರೆ ಆಗುವಂತದ್ದು. ಅಂದರೆ cloud computing ಗೆ multimedia (ಬಹುಮಾಧ್ಯಮ) ಸೇರಿಸಿದಂತೆ. ಆದುದರಿಂದ ರಾಮಾಯಣದ ಕಾಲದಲ್ಲೆ ನಮ್ಮಲ್ಲಿ ಮೇಘ ಗಣಿಸುವಿಕೆಯೂ ಇತ್ತು ಎನ್ನಬಹುದು.

ಬುಧವಾರ, ಜೂನ್ 16, 2010

ಗಣಕಿಂಡಿ - ೦೫೬ (ಜೂನ್ ೧೪, ೨೦೧೦)

ಅಂತರಜಾಲಾಡಿ


ಕಾರ್ಟೂನ್ ಬಿಡಿಸಿ

ಕಾರ್ಟೂನ್ ಇಲ್ಲದ ಪತ್ರಿಕೆಗಳೇ ಇಲ್ಲ ಎನ್ನಬಹುದು. ನಿಮಗೂ ಕಾರ್ಟೂನ್ ರಚಿಸಲು ಆಸಕ್ತಿಯೇ? ಆದರೆ ರಚಿಸಲು ಬೇಕಾದ ಸವಲತ್ತುಗಳಿಲ್ಲವೇ? ಹಾಗಿದ್ದರೆ ನೀವು www.toondoo.com ಜಾಲತಾಣಕ್ಕೆ ಭೇಟಿ ನೀಡಬೇಕು. ಇದು ಮುಖ್ಯವಾಗಿ ಮಕ್ಕಳಿಗೋಸ್ಕರ ಇರುವುದು. ಈ ಜಾಲತಾಣದಲ್ಲಿ ಖಾತೆ ಸೃಷ್ಠಿಸಿ ನಂತರ ಕಾರ್ಟೂನ್ ಬಿಡಿಸಬಹುದು. ಅದಕ್ಕಾಗಿ ಅಗತ್ಯ ಸವಲತ್ತುಗಳು ಈ ಜಾಲತಾಣದಲ್ಲೇ ಇವೆ. ಬೇರೆ ಯಾವ ತಂತ್ರಾಂಶದ ಅಗತ್ಯ ಇಲ್ಲ. ನೀವು ತಯಾರಿಸಿದ ಕಾರ್ಟೂನ್‌ಗಳನ್ನು ಸ್ನೇಹಿತರ ಜೊತೆ ಹಂಚಿಕೊಳ್ಳಬಹುದು. ಅದನ್ನು ಮುಂದುವರಿಸಲು ಅವರಿಗೂ ಅವಕಾಶ ನೀಡಬಹುದು.


ಡೌನ್‌ಲೋಡ್

ಕಾರು ಓಟದ ಸ್ಪರ್ಧೆ

ಗಣಕದಲ್ಲಿ ಕಾರು ಓಡಿಸುವ ಸ್ಪರ್ಧೆಯ ಆಟಗಳು ತುಂಬ ಜನಪ್ರಿಯ. ಅದರೆ ಬಹುಪಾಲು ಅಂತಹ ಆಟಗಳು ದುಬಾರಿ. ಕಾರ್ ರೇಸಿನ ಒಂದು ಉಚಿತ ಆಟ ಬೇಕೇ? ಅದೂ ಲಭ್ಯ. ಅದರ ಹೆಸರು Extreme Velocity. ಇದು ಬೇಕಿದ್ದಲ್ಲಿ ನೀವು ಭೇಟಿ ನಿಡಬೇಕಾದ ಜಾಲತಾಣ www.streetchallenge3d.com. ಈ ಆಟ ಮೂರು ಆಯಾಮಗಳಲ್ಲಿದೆ. ಆದುದರಿಂದ ಆಡುವಾಗ ನಿಜವಾದ ಕಾರು ಓಡಿಸಿದ ಭಾವನೆ ಬರುತ್ತದೆ. ಈ ಆಟ ತಯಾರಿಸಿದವರು ಪ್ರತಿ ವಾರ ಹೊಸ ಹೊಸ ರಸ್ತೆ, ಕಾರುಗಳನ್ನು ನೀಡುತ್ತಾರೆ. ಅವುಗಳನ್ನು ಡೌನ್‌ಲೋಡ್ ಮಾಡಿಕೊಂಡು ಆಟಕ್ಕೆ ಸೇರಿಸಿಕೊಳ್ಳಬಹುದು. ಡೌನ್‌ಲೋಡ್ ಮಾಡಲು ಹೊರಡುವ ಮೊದಲು ಒಂದೆರಡು ವಿಷಯಗಳನ್ನು ಗಮನದಲ್ಲಿಟ್ಟುಕೊಳ್ಳಬೇಕು. ಈ ರೀತಿಯ ಎಲ್ಲ ಆಟಗಳಂತೆ ಇದೂ ತುಂಬ ದೊಡ್ಡ ಫೈಲು (೨೨೨ ಮೆಗಾಬೈಟ್). ನಿಮ್ಮ ಗಣಕದಲ್ಲಿ ಮೈಕ್ರೋಸಾಫ್ಟ್ ಡಾಟ್‌ನೆಟ್, ಡೈರೆಕ್ಟ್ ಎಕ್ಸ್ -ಇವೆಲ್ಲ ಇರತಕ್ಕದ್ದು. ಇವೆಲ್ಲ ಉಚಿತವಾಗಿ ಲಭ್ಯವಿರುವ ತಂತ್ರಾಂಶಗಳು. ಆಧುನಿಕ ಗ್ರಾಫಿಕ್ಸ್ ಕಾರ್ಡ್ ಕೂಡ ಇರತಕ್ಕದ್ದು.

e - ಸುದ್ದಿ

ಗೂಗ್ಲ್ ಮೇಲೆ ದಾವೆ

ಅಮೆರಿಕದಲ್ಲಿ ಈಗೀಗ ಎಲ್ಲರೂ ಗೂಗ್ಲ್‌ನ್ನೇ ಅವಲಂಬಿಸತೊಡಗಿದ್ದಾರೆ. ಅಲ್ಲಿ ಯಾರೂ ರಸ್ತೆನಕ್ಷೆ ನೋಡುವುದೇ ಇಲ್ಲ. ಅತ್ಯಾಧುನಿಕ ಫೋನಿನಲ್ಲಿ ಗೂಗ್ಲ್ ಮ್ಯಾಪ್ ನೋಡಿಕೊಂಡು ವಾಹನ ಚಲಾಯಿಸುತ್ತಾರೆ. ಗೂಗ್ಲ್ ಮ್ಯಾಪ್ ನಡೆಯಲು ಕೂಡ ದಾರಿ ತೋರಿಸುತ್ತದೆ. ಹೀಗೆ ಗೂಗ್ಲ್ ಮ್ಯಾಪ್ ನಂಬಿ ಒಬ್ಬಾಕೆ ರಸ್ತೆಯ ಪಕ್ಕದಲ್ಲಿ ನಡೆಯತೊಡಗಿದಳು. ಅದರೆ ಆಕೆ ಒಂದು ವಿಷಯ ಗಮನಿಸಿರಲಿಲ್ಲ. ಅದೇನೆಂದರೆ ಆಕೆ ನಡೆಯುತ್ತಿದ್ದ ರಸ್ತೆ ಕೇವಲ ವಾಹನಗಳಿಗಾಗಿತ್ತು. ಅದರ ಪಕ್ಕದಲ್ಲಿ ಪಾದಚಾರಿ ಮಾರ್ಗ ಇರಲಿಲ್ಲ. ವೇಗವಾಗಿ ಬಂದ ಕಾರೊಂದು ಆಕೆಗೆ ಢಿಕ್ಕಿ ಹೊಡೆಯಿತು. ಈಗ ಆಕೆ ಗೂಗ್ಲ್ ವಿರುದ್ಧ ದಾವೆ ಹೂಡಿದ್ದಾಳೆ.

e- ಪದ

ಫಾಂಟ್ (font) - ಪಠ್ಯ ಮಾಹಿತಿಯನ್ನು ಪರದೆಯ ಮೇಲೆ ತೋರಿಸಲು ಮತ್ತು ಮುದ್ರಿಸಲು ಬಳಸುವ ಅಕ್ಷರಭಾಗಗಳ ಸಂಗ್ರಹ. ಹಿಂದಿನ ಕಾಲದಲ್ಲಿ ಮುದ್ರಣ ಕ್ಷೇತ್ರದಲ್ಲಿ ಅಚ್ಚಿನ ಮೊಳೆಗಳ ಗುಂಪಿಗೆ ಈ ಹೆಸರಿತ್ತು. ಫಾಂಟ್‌ನ್ನು ಬದಲಿಸಿ ಬೇರೆ ಬೇರೆ ಶೈಲಿಯಲ್ಲಿ ಪುಸ್ತಕ, ಆಹ್ವಾನ ಪತ್ರಿಕೆ, ಇತ್ಯಾದಿಗಳನ್ನು ತಯಾರಿಸುತ್ತಾರೆ. ಕೆಲವು ಫಾಂಟ್‌ಗಳು:- Times New Roman, Arial, BRH Kannada, Tunga.


e - ಸಲಹೆ

ವೀರು ಅವರ ಪ್ರಶ್ನೆ: ನನಗೆ ಒಂದೇ ಗಣಕದಲ್ಲಿ ವಿಂಡೋಸ್ ಎಕ್ಸ್‌ಪಿ ಮತ್ತು ವಿಂಡೋಸ್ ೭ ಹಾಕಿಕೊಳ್ಳಬೇಕಾಗಿದೆ. ಇದು ಸಾಧ್ಯವೇ?
ಉ: ಸಾಧ್ಯ. ಎರಡನ್ನೂ ಹಾರ್ಡ್‌ಡಿಸ್ಕ್‌ನ ಬೇರೆ ಬೇರೆ ವಿಭಾಗಗಳಲ್ಲಿ (ಪಾರ್ಟೀಶನ್) ಹಾಕಿಕೊಳ್ಳಬೇಕು. ಮೊದಲು ವಿಂಡೋಸ್ ಎಕ್ಸ್‌ಪಿಯನ್ನು ಇನ್‌ಸ್ಟಾಲ್ ಮಾಡಿಕೊಂಡು ನಂತರ ವಿಂಡೋಸ್ ೭ ಅನ್ನು ಇನ್‌ಸ್ಟಾಲ್ ಮಾಡಿಕೊಳ್ಳಬೇಕು. ನಿಮ್ಮ ಗಣಕದಲ್ಲಿ ವಿಂಡೋಸ್ ೭ ಅನ್ನು ಹಾಕಿಕೊಳ್ಳಬಹುದೇ, ಅದಕ್ಕೆ ಸರಿಹೊಂದಬಹುದಾದ ಎಲ್ಲ ಯಂತ್ರಾಂಶಗಳು ಇವೆಯೇ ಎಂದೆಲ್ಲ ಪರಿಶೀಲಿಸಲು ಮೈಕ್ರೋಸಾಫ್ಟ್‌ನವರು ಒಂದು ತಂತ್ರಾಂಶ ನೀಡಿದ್ದಾರೆ. ಅದನ್ನು http://bit.ly/cZQTcl ಜಾಲತಾಣದಿಂದ ಡೌನ್‌ಲೋಡ್ ಮಾಡಿಕೊಂಡು ಮೊದಲು ನಿಮ್ಮ ಗಣಕವನ್ನು ಪರಿಶೀಲಿಸಿಕೊಳ್ಳಿ.
   
ಕಂಪ್ಯೂತರ್ಲೆ

ಒಮ್ಮೆ ದೇವಲೋಕದಲ್ಲಿ ಎಲ್ಲ ದೇವತೆಗಳ ನಡುವೆ ಗಣಕ ಬಳಸುವ ಬಗ್ಗೆ ಒಂದು ಸ್ಪರ್ಧೆ ಏರ್ಪಾಡಾಯಿತು. ಅದರಲ್ಲಿ ಗಣಪತಿ ವಿಜೇತನಾದ. ಯಾಕೆ ಗೊತ್ತೆ? ಅವನಿಗೆ ಮಾತ್ರ ಮೌಸ್ (ಇಲಿ) ಬಳಸಲು ಗೊತ್ತಿತ್ತು!

ಸೋಮವಾರ, ಜೂನ್ 7, 2010

ಗಣಕಿಂಡಿ - ೦೫೪ (ಜೂನ್ ೦೭, ೨೦೧೦)

ಅಂತರಜಾಲಾಡಿ

ಕಂಠಲಂಗೋಟಿ ಬಿಗಿಯುವುದು ಹೇಗೆ?

ಈ ಕಂಠಲಂಗೋಟಿ ಅಂದರೆ ಟೈ ಕಟ್ಟುವುದು ಇದೆಯಲ್ಲ ಅದು ತುಂಬ ಕಿರಿಕಿರಿಯ ಕೆಲಸ. ಮೊದಲನೆಯ ಸರ್ತಿಗೇ ಅದು ಸರಿಯಾಗಿ ಬರುವುದು ತುಂಬ ಕಷ್ಟ. ದಿನಾ ಟೈ ಕಟ್ಟುವವರಿಗೆ ಅದೇನೂ ಕಷ್ಟದ ಕೆಲಸವಲ್ಲ. ಆದರೆ ಸಮಸ್ಯೆ ಬರುವುದು ಯಾವಾಗಾದರೊಮ್ಮೆ ಟೈ ಬಿಗಿಯುವವರಿಗೆ. ಟೈ ಕಟ್ಟುವುದನ್ನು ಕಲಿಯಬೇಕೇ? ಹಾಗಿದ್ದರೆ ನೀವು ಭೇಟಿ ನೀಡಬೇಕಾದ ಜಾಲತಾಣ www.tie-a-tie.net. ಬೇರೆ ಬೇರೆ ವಿಧಗಳಲ್ಲಿ ಟೈ ಕಟ್ಟುವುದನ್ನು ಈ ಜಾಲತಾಣ ನೋಡಿ ಕಲಿಯಬಹುದು. ನಿಮ್ಮ ಎತ್ತರ ಮತ್ತು ಕುತ್ತಿಗೆಯ ಸುತ್ತಳತೆ ಕೊಟ್ಟರೆ ನಿಮಗೆ ಎಷ್ಟು ಉದ್ದದ ಟೈ ಬೇಕು ಎಂಬುದನ್ನು ಅದು ಲೆಕ್ಕಹಾಕಿ ಹೇಳುತ್ತದೆ!


ಡೌನ್‌ಲೋಡ್

ಬೇಸಿಕ್ ಪ್ರೋಗ್ರಾಮ್ಮಿಂಗ್ ಕಲಿಯಿರಿ

ಒಂದು ಕಾಲದಲ್ಲಿ ಎಲ್ಲ ಪ್ರೌಢ ಶಾಲೆಗಳಲ್ಲಿ ವಿದ್ಯಾರ್ಥಿಗಳಿಗೆ ಬೇಸಿಕ್ (BASIC) ಪ್ರೋಗ್ರಾಮ್ಮಿಂಗ್ (ಗಣಕ ಕ್ರಮವಿಧಿ ರಚನೆಯ) ಭಾಷೆಯನ್ನು ಕಲಿಸಲಾಗುತ್ತಿತ್ತು. ಆಗ ವಿಂಡೋಸ್ ಇಷ್ಟು ಜನಪ್ರಿಯವಾಗಿರಲಿಲ್ಲ. ವಿಂಡೋಸ್ ಮತ್ತು ಅದರ ಜೊತೆ ಹೊಸ ಸುಧಾರಿತ ಪ್ರೋಗ್ರಾಮ್ಮಿಂಗ್ ಭಾಷೆಗಳ ಕಾಲ ಬಂದಂತೆ ಹಳೆಯ ಬೇಸಿಕ್ ಮೂಲೆಗುಂಪಾಗತೊಡಗಿತು. ಹಳೆಯ ಡಾಸ್ (DOS) ಆಧಾರಿತ ಬೇಸಿಕ್ ಈಗಿನ ಹೊಸ ವಿಂಡೋಸ್‌ನಲ್ಲಿ ಕೆಲಸ ಮಾಡುವುದೂ ಇಲ್ಲ. ಈ ಸಮಸ್ಯೆಗೆ ಪರಿಹಾರವಾಗಿ BASIC256 ಎಂಬ ತಂತ್ರಾಂಶ ಲಭ್ಯವಿದೆ. ಇದು ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ - http://bit.ly/dwFQLz. ಶಾಲೆಗಳಲ್ಲಿ ಗಣಕ ಕಲಿಸುವ ಅಧ್ಯಾಪಕರುಗಳಿಗೆ ಇದು ಖಂಡಿತ ಉಪಯುಕ್ತ ತಂತ್ರಾಂಶ.


e - ಸುದ್ದಿ

ಮಿಥ್ಯಾ ಕೊಲೆಗಾರನಿಗೆ ನಿಜ ದಾಳಿ

ಅಂತರಜಾಲದ ಮೂಲಕ ಯಾವುದೋ ದೇಶದಲ್ಲಿರುವ ಯಾರದೋ ಜೊತೆ ಆಟ ಆಡುವ ಸೌಲಭ್ಯವನ್ನು ಹಲವು ಜಾಲತಾಣಗಳು ನೀಡುತ್ತಿವೆ. ಇಂತಹ ಆಟವೊಂದರಲ್ಲಿ ಫ್ರಾನ್ಸ್ ದೇಶದ ೨೦ರ ಹರೆಯದ ಯುವಕನೊಬ್ಬ ಯಾರದೋ ಜೊತೆ “ಕಾಳಗ” ಮಾಡುತ್ತಿದ್ದ. ಅದರಲ್ಲಿ ಇವನ ಮಿಥ್ಯಾಸೈನಿಕನನ್ನು ಆತನ ಎದುರಾಳಿಯ ಮಿಥ್ಯಾಸೈನಿಕ ಕೊಂದು ಹಾಕಿದ. ಅದರಲ್ಲೇನು ಮಹಾ ವಿಶೇಷ ಅನ್ನುತ್ತೀರಾ? ಮುಂದೆ ಕೇಳಿ. ತನ್ನ ಮಿಥ್ಯಾಸೈನಿಕನನ್ನು ಕೊಂದವನನ್ನು ಆರು ತಿಂಗಳುಗಳ ಕಾಲ ಹುಡುಕಾಡಿ ಆತ ಕೊನೆಗೂ ಪತ್ತೆಹಚ್ಚಿದ. ನಿಜವಾದ ಚೂರಿ ಕೈಯಲ್ಲಿ ಹಿಡಿದುಕೊಂಡು ಆತನ ಮೇಲೆ ದಾಳಿ ಮಾಡಿದ. ಮಿಥ್ಯಾಕಾಳಗದಲ್ಲಿ ಆತ ಹೇಗೆ ಸೋತಿದ್ದನೋ ಹಾಗೆಯೇ ನಿಜ ಕಾಳಗದಲ್ಲೂ ಸೋತು ಪೋಲೀಸರ ಅತಿಥಿಯಾದ. ಆತನಿಗೆ ಎರಡು ವರ್ಷ ಕಾರಾಗೃಹವಾಸದ ಶಿಕ್ಷೆ ವಿಧಿಸಲಾಗಿದೆ.

e- ಪದ

ಐವಿಆರ್ (IVR - Interactive Voice Response) - ಪ್ರತಿಸ್ಪಂದನಾತ್ಮಕ ಮಾರುಲಿ. ಕಂಪೆನಿಗಳಿಗೆ, ಫೋನ್ ಸಂಪರ್ಕ ಸೇವೆ ನೀಡುವವರಿಗೆ, ಬ್ಯಾಂಕ್‌ಗಳಿಗೆ -ಹೀಗೆ ಹಲವಾರು ಕಡೆ ದೂರವಾಣಿ ಮೂಲಕ ಅವರ ಗ್ರಾಹಕ ಸೇವೆಯವರನ್ನು ಸಂಪರ್ಕಿಸಿದಾಗ ಸ್ವಯಂಚಾಲಿತವಾಗಿ ಗಣಕದ ಮೂಲಕ ನಿಮಗೆ ಉತ್ತರ ಕೇಳಿ ಬರುತ್ತದೆ -“ಕನ್ನಡ ಭಾಷೆಗೆ ಸಂಖ್ಯೆ ಒಂದನ್ನು ಒತ್ತಿ, ... ನಿಮ್ಮ ದೂರವಾಣಿ ಸಂಖ್ಯೆಯನ್ನು ಒತ್ತಿ, ಬಿಲ್ ಮಾಹಿತಿಗೆ ಸಂಖ್ಯೆ ಐದನ್ನು ಒತ್ತಿ, ..” -ಇತ್ಯಾದಿ. ನೀವು ಒತ್ತಿದ ಸಂಖ್ಯೆಗೆ ಅನುಗುಣವಾಗಿ ನಿಮಗೆ ಬೇಕಾದ ಸೌಲಭ್ಯ ಗಣಕದ ಮೂಲಕ ಸಿಗುತ್ತದೆ. ನಿವು ನಿಮ್ಮ ದೂರವಾಣಿ ಯಂತ್ರದಲ್ಲಿ ಯಾವ ಸಂಖ್ಯೆಯನ್ನು ಒತ್ತಿದ್ದೀರಿ ಎಂಬುದನ್ನು ಗಣಕವೇ ಅರ್ಥೈಸಿಕೊಂಡು ಅದನ್ನು ವಿಶ್ಲೇಷಿಸಿ, ಗಣಕದಿಂದ ಮಾಹಿತಿಯನ್ನು ತೆಗೆದು ನಿಮಗೆ ನೀಡುತ್ತದೆ. ಇವೆಲ್ಲ ಸ್ವಯಂಚಾಲಿತವಾಗಿ ನಡೆಯುತ್ತದೆ.

e - ಸಲಹೆ

ಸೂರಜ್ ಪಾಟೀಲರ ಪ್ರಶ್ನೆ: ನನಗೆ ಕರಾಓಕೆ ಸಿ.ಡಿ.ಗಳು ಬೇಕು. ಯಾವ ಜಾಲತಾಣದಲ್ಲಿ ಸಿಗುತ್ತವೆ?
ಉ: totalkannada.com ಜಾಲತಾಣದಲ್ಲಿ ಸಿಗುತ್ತವೆ. ಕರಾಓಕೆ ವಿಭಾಗಕ್ಕೆ ನೇರವಾಗಿ ಹೋಗಬೇಕಾಗಿದ್ದರೆ ನೀವು http://bit.ly/cfdUGM ಗೆ ಭೇಟಿ ನೀಡಿ.
   
ಕಂಪ್ಯೂತರ್ಲೆ

ಪ್ರ: ಗೂಗ್ಲ್ ಮತ್ತು ಇಬೇ ಕಂಪೆನಿಗಳು ಒಂದಾದರೆ ಆ ಕಂಪೆನಿಯ ಹೆಸರು ಏನಿರುತ್ತದೆ?
ಉ: ಗೂಬೆ.

ಸೋಮವಾರ, ಮೇ 31, 2010

ಗಣಕಿಂಡಿ - ೦೫೪ (ಮೇ ೩೧, ೨೦೧೦)

ಅಂತರಜಾಲಾಡಿ

ಪರಿಸರಪ್ರಿಯರಾಗಿ

ಜೂನ್ ೫ ವಿಶ್ವ ಪರಿಸರ ದಿನ. ಪ್ರಪಂಚಾದ್ಯಂತ ಪರಿಸರದ ಬಗ್ಗೆ ಜನರಿಗೆ ತಿಳಿವಳಿಕೆ ಮೂಡಿಸಲು ಆ ದಿನ ಹಲವಾರು ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳುತ್ತಾರೆ. ವಿಶ್ವ ಪರಿಸರ ಕಾರ್ಯಕ್ರಮಗಳ ಬಗ್ಗೆ ಒಂದು ಜಾಲತಾಣವಿದೆ. ಅದರ ವಿಳಾಸ www.unep.org. ವಿಶ್ವ ಪರಿಸರ ದಿನ, ಜೀವ ವೈವಿಧ್ಯ, ಹವಾಮಾನದ ಬದಲಾವಣೆ, ಹಲವಾರು ಬಹುಮಾಧ್ಯಮ ಕಡತಗಳು, ಪರಿಸರ ಕಾರ್ಯಕ್ರಮಗಳ ಕ್ಯಾಲೆಂಡರ್, ಹೀಗೆ ಹಲವಾರು ಉಪಯುಕ್ತ ಮಾಹಿತಿಗಳು ಈ ಜಾಲತಾಣದಲ್ಲಿ ಲಭ್ಯ. ಗೊರಿಲ್ಲಕ್ಕೆ ಹೆಸರು ನೀಡಿ ಬಹುಮಾನ ಗೆಲ್ಲಬೇಕೆ? ಹಾಗಿದ್ದರೆ ಜೂನ್ ೫ರ ಒಳಗೆ ಹೆಸರು ಸೂಚಿಸಿ. ನಾವು ವಾಸಿಸುತ್ತಿರುವ ಭೂಗ್ರಹದ ಬಗ್ಗೆ ಇದೇ ಮಾದರಿಯ ಇನ್ನೊಂದು ಉಪಯುಕ್ತ ಜಾಲತಾಣ www.goodplanet.org. ಇದು ತೆರೆದಾಗ ಫ್ರೆಂಚ್ ಭಾಷೆಯಲ್ಲಿರುತ್ತದೆ. ಇಂಗ್ಲಿಷ್ ಭಾಷೆಗೆ ಬದಲಾಯಿಸಿಕೊಂಡು ಓದಿ. ಇದರಲ್ಲೂ ಹಲವಾರು ಉಪಯುಕ್ತ ಮಾಹಿತಿಗಳು ಬಹುಮಾಧ್ಯಮಗಳು ಇವೆ.

ಡೌನ್‌ಲೋಡ್

ಈ ಭೂಮಿ ನಮ್ಮ ಮನೆ

ಈ ಭೂಗ್ರಹಕ್ಕೆ ೪.೫೪ ಬಿಲಿಯನ್ (ಶತಕೋಟಿ) ವರ್ಷಗಳ ಪ್ರಾಯ. ಇಷ್ಟು ದೀರ್ಘ ಇತಿಹಾಸವಿರುವ ಭೂಗ್ರಹದಲ್ಲಿ ಮಾನವನ ಹುಟ್ಟು ಆಗಿದ್ದು ಸುಮಾರು ಎರಡು ಲಕ್ಷ ವರ್ಷಗಳ ಹಿಂದೆ. ಆತ ಕೃಷಿ ಮಾಡಿ ಅಡುಗೆ ಮಾಡಲು ಕಲಿತಿದ್ದು ಸುಮಾರು ೧೫ ಸಾವಿರ ವರ್ಷಗಳ ಹಿಂದೆ. ಆದರೆ ಇತ್ತೀಚೆಗಿನ ಕೇವಲ ೫೦ ವರ್ಷಗಳ ಕಾಲದಲ್ಲಿ ಇದೇ ಮಾನವ ತನಗೆ ಆಶ್ರಯ ನೀಡಿ ಪೊರೆದ ಭೂಮಿಯನ್ನು ಇತಿಮಿತಿಯಿಲ್ಲದೆ ಹಾಳುಗೆಡವಿದ್ದಾನೆ. ಈ ಎಲ್ಲ ವಿಷಯಗಳನ್ನು ಚೆನ್ನಾಗಿ ಮನದಟ್ಟುಮಾಡುವ ಚಲನಚಿತ್ರ ಹೋಮ್ (Home). ಇದು ಫ್ರೆಂಚ್, ಸ್ಪಾನಿಶ್, ಇಂಗ್ಲಿಶ್ ಇತ್ಯಾದಿ ಭಾಷೆಗಳಲ್ಲಿ ಲಭ್ಯವಿದೆ. ಇದನ್ನು ವೀಕ್ಷಿಸಲು ನೀವು www.youtube.com/homeproject ಜಾಲತಾಣಕ್ಕೆ ಭೇಟಿ ನೀಡಬೇಕು. ಇದನ್ನು ನಿಮ್ಮ ಗಣಕಕ್ಕೆ ಡೌನ್‌ಲೋಡ್ ಮಾಡಿಕೊಳ್ಳಬೇಕಾದರೆ ಇದೇ ಗಣಕಿಂಡಿ ಅಂಕಣದಲ್ಲಿ ಹಿಂದೊಮ್ಮೆ ಸೂಚಿಸಿದ್ದ ಯುಟ್ಯೂಬ್ ಡೌನ್‌ಲೋಡರ್ (http://bit.ly/oRMpZ) ತಂತ್ರಾಂಶವನ್ನು ಬಳಸಿ.


e - ಸುದ್ದಿ

ಮಾನವನಿಗೆ ಕಂಪ್ಯೂಟರ್ ವೈರಸ್

ಕಂಪ್ಯೂಟರ್‌ಗಳಿಗೆ ವೈರಸ್ ಪೀಡೆ ಬರುವುದು ಎಲ್ಲರಿಗೂ ಗೊತ್ತು. ಮನುಷ್ಯರಿಗೂ ವೈರಸ್ ಪೀಡೆ ಬರುತ್ತದೆ. ಆದರೆ ಈ ಎರಡು ವೈರಸ್‌ಗಳು ಬೇರೆ ಬೇರೆ ನಮೂನೆಯವು. ಮಾನವನ ದೇಹಕ್ಕೆ ಕಂಪ್ಯೂಟರ್ ವೈರಸ್ ಸೇರಿಸಿದರೆ? ಏನು ಅಸಂಬದ್ಧ ಮಾತು ಅನ್ನುತ್ತೀರಾ? ಮಾರ್ಕ್ ಗ್ಯಾಸನ್ ಎಂಬ ಬ್ರಿಟಿಷ್ ವಿಜ್ಞಾನಿಯೊಬ್ಬರು ತನ್ನ ದೇಹಕ್ಕೆ ಕಂಪ್ಯೂಟರ್ ವೈರಸ್ ಇರುವ ಚಿಪ್ ಒಂದನ್ನು ಶಸ್ತ್ರಕ್ರಿಯೆಯ ಮೂಲಕ ಸೇರಿಸಿದ್ದಾರೆ. ಅವರು ಗಣಕಜಾಲಗಳಿಗೆ ಈ ಚಿಪ್ ಮೂಲಕ ವೈರಸ್ ಸೇರಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಅವರು ಗಣಕಜಾಲಗಳಿರುವಲ್ಲಿ ನಡೆದಾಡಿ ಈ ಸಾಧನೆ ಮಾಡಿ ತೋರಿಸದ್ದಾರೆ. ಮುಂದೆ ಕಿಡಿಗೇಡಿಗಳು ಯಾವ ರೀತಿಯಲ್ಲಿ ಗಣಕಜಾಲಗಳನ್ನು ಕೆಡಿಸಬಹುದು ಎಂಬುದನ್ನು ವೈಜ್ಞಾನಿಕವಾಗಿ ತೋರಿಸಲು ಅವರು ಈ ಪ್ರಯೋಗ ಮಾಡಿ ತೋರಿಸಿ ಅದರಲ್ಲಿ ಯಶಸ್ವಿಯಾಗಿದ್ದಾರೆ.

e- ಪದ

ಹಸಿರು ಗಣಿಸು (Green computing) -ಪರಿಸರ ಸ್ನೇಹಿ ಗಣಕೀಕರಣ ಅಥವಾ ಮಾಹಿತಿ ತಂತ್ರಜ್ಞಾನ. ಮಾಹಿತಿ ತಂತ್ರಜ್ಞಾನಕ್ಕೆ ಸಂಬಂಧಿಸಿದ ಎಲ್ಲ ಯಂತ್ರಾಂಶಗಳು ಪರಿಸರ ಸ್ನೇಹಿಯಾಗಿದ್ದು ಅವುಗಳು ಪುನರ್ಬಳಕೆ ಮಾಡಬಲ್ಲವಾಗಿರುವುದು ಅಥವಾ ಜೈವಿಕವಾಗಿ ಕೊಳೆಯಬಲ್ಲವು. ಮಾಹಿತಿ ತಂತ್ರಜ್ಞಾನ ಕ್ಷೇತ್ರದಲ್ಲಿ ಬಳಕೆಯಾಗುವ ಎಲ್ಲ ಯಂತ್ರಾಂಶಗಳ ಆಯುಷ್ಯ ಮುಗಿದ ನಂತರ ಅವುಗಳನ್ನು ಅಲ್ಲಿ ಇಲ್ಲಿ ಎಸೆಯುವುದರಿಂದ ಪರಿಸರದ ಮೇಲೆ ದೊಡ್ಡ ಹಾನಿಯಾಗುತ್ತದೆ. ಇತ್ತೀಚೆಗೆ ಇಂತಹ ಹಾನಿಯನ್ನು ಕಡಿಮೆ ಮಾಡಬೇಕು ಎಂಬ ಅರಿವು ಜನರಲ್ಲಿ ಮೂಡಿದೆ.

e - ಸಲಹೆ

ಎ. ರಾಮಚಂದ್ರ ಅವರ ಪ್ರಶ್ನೆ: ನನಗೆ ಹಿಂದಿ ಭಾಷೆಯಲ್ಲಿ ಮುದ್ರಿತ ಪಠ್ಯವನ್ನು ಸ್ಕ್ಯಾನ್ ಮಾಡಿ ಗಣಕದಲ್ಲಿ ಪಠ್ಯವನ್ನಾಗಿ ಪರಿವರ್ತಿಸುವ ತಂತ್ರಾಂಶ ಬೇಕು. ಅಂತಹ ತಂತ್ರಾಂಶ ಸಿಗುತ್ತದೆಯೇ? ಸಿಗುವುದಿದ್ದರೆ ಎಲ್ಲಿ?
ಉ: ಕೇಂದ್ರ ಸರಕಾರದ ಅಧೀನಕ್ಕೊಳಪಟ್ಟ ಸಿ-ಡ್ಯಾಕ್ ಸಂಸ್ಥೆಯವರು ಚಿತ್ರಾಂಕಣ ಎನ್ನುವ ತಂತ್ರಾಂಶವನ್ನು ತಯಾರಿಸಿದ್ದಾರೆ. ಇದನ್ನು ನೀವು ಬಳಸಿ ನೋಡಬಹುದು. ಇದು ಎಷ್ಟು ಪರಿಪೂರ್ಣವಾಗಿದೆ, ಇದಕ್ಕೆ ಬೆಲೆಯಿದೆಯೇ, ಅಥವಾ ಉಚಿತವೇ ಇತ್ಯಾದಿ ಮಾಹಿತಿಗಳು ಅವರ ಜಾಲತಾಣದಲ್ಲಿ ಇಲ್ಲ. ಜಾಲತಾಣದ ವಿಳಾಸ http://bit.ly/bClU2B.
   
ಕಂಪ್ಯೂತರ್ಲೆ

ಕೋಲ್ಯನಿಗೆ ಯಾರೋ ಗಣಕೀಕರಣದಿಂದಾಗಿ ಪರಿಸರದ ಮೇಲೆ ಆಗುವ ಹಾನಿಯ ಬಗ್ಗೆ ಹೇಳಿದರು. ಹಸಿರು ಗಣನೆಯ (Green computing) ಬಗ್ಗೆ ಆತನಿಗೆ ಎಚ್ಚರವಾಯಿತು. ತಾನೂ ಈ ಬಗ್ಗೆ ಏನಾದರೂ ಮಾಡಬೇಕೆಂದುಕೊಂಡ. ಕೂಡಲೆ ಮಾರುಕಟ್ಟೆಗೆ ಹೋಗಿ ಒಂದು ಡಬ್ಬ ಹಸಿರು ಬಣ್ಣ ಕೊಂಡುಕೊಂಡು ಬಂದ. ತನ್ನ ಗಣಕ, ಪರದೆ, ಮೌಸ್, ಕೀಬೋರ್ಡ್ ಎಲ್ಲವಕ್ಕೂ ಹಸಿರು ಬಣ್ಣ ಬಳಿದ.

ಸೋಮವಾರ, ಮೇ 24, 2010

ಗಣಕಿಂಡಿ - ೦೫೩ (ಮೇ ೨೪, ೨೦೧೦)

ಅಂತರಜಾಲಾಡಿ

ಮುಕ್ತ ವೈದ್ಯಕೀಯ ವಿಶ್ವಕೋಶ

ಅಂತರಜಾಲದಲ್ಲೊಂದು ಮುಕ್ತ ವೈದ್ಯಕೀಯ ವಿಶ್ವಕೋಶವಿದೆ. ಅದರ ವಿಳಾಸ www.medpedia.com. ಇದು ಬಹುಮಟ್ಟಿಗೆ ಮುಕ್ತ ವಿಶ್ವಕೋಶ ವಿಕಿಪೀಡಿಯಾ ಮಾದರಿಯಲ್ಲಿ ಕೆಲಸ ಮಾಡುತ್ತದೆ. ಇದರ ಉದ್ದೇಶ ವೈದ್ಯಕೀಯ ಜ್ಞಾನವನ್ನು ಎಲ್ಲರಿಗೂ ಉಚಿತವಾಗಿ ತಲುಪಿಸುವುದು. ಇದಕ್ಕೆ ಎಲ್ಲರೂ ಮಾಹಿತಿ ತುಂಬಿಸಬಹುದು. ಇದರಲ್ಲಿ ಕೇವಲ ಮುಕ್ತ ವಿಶ್ವಕೋಶ ಮಾತ್ರವಲ್ಲ. ಲೇಖನಗಳು, ಪ್ರಶ್ನೋತ್ತರಗಳು, ವೈದ್ಯಕೀಯ ಮಾಹಿತಿ, ಎಲ್ಲವೂ ಇವೆ. ಇದನ್ನು ಜನಸಾಮಾನ್ಯರು, ವೈದ್ಯರು, ವಿಜ್ಞಾನಿಗಳು, ಲೇಖಕರು, ಎಲ್ಲರೂ ಬಳಸಬಹುದು.


ಡೌನ್‌ಲೋಡ್

ಯುಎಸ್‌ಬಿ ಗಣಕ ರಕ್ಷಕ

ನಿಮ್ಮ ಗಣಕದಲ್ಲಿ ಕೆಲಸ ಮಾಡುತ್ತಿದ್ದಾಗ ಮಧ್ಯೆ ಎದ್ದು ಹೋಗಬೇಕಾಗಿ ಬಂದಿದೆ. ಹಾಗೆ ಹೋದಾಗ ನಿಮ್ಮ ಗಣಕವನ್ನು ಬೇರೆಯವರು ಬಳಸದಂತೆ ರಕ್ಷಿಸಬೇಕಲ್ಲವೇ? ಗುಪ್ತಪದ (ಪಾಸ್‌ವರ್ಡ್) ಬಳಸುವುದು ಒಂದು ವಿಧ. ಆದರೆ ಅದನ್ನು ಮುರಿಯುವುದು ಅಷ್ಟು ಕಷ್ಟವೇನಲ್ಲ. ಯುಎಸ್‌ಬಿ ಡ್ರೈವ್ ಅನ್ನು ಕೀಲಿಯಂತೆ ಬಳಸುವುದು ಇನ್ನೊಂದು ವಿಧಾನ. ಅದಕ್ಕಾಗಿ ಒಂದು ತಂತ್ರಾಂಶ PREDATOR ಲಭ್ಯವಿದೆ. ಅದು ಬೇಕಿದ್ದಲ್ಲಿ ನೀವು ಭೇಟಿ ನಿಡಬೇಕಾದ ಜಾಲತಾಣ http://bit.ly/alGe4Y. ಈ ತಂತ್ರಾಂಶವನ್ನು ಇನ್‌ಸ್ಟಾಲ್ ಮಾಡಿಕೊಳ್ಳಬೇಕು. ನಂತರ ಕೆಲಸ ಮಾಡುತ್ತಿದ್ದಲ್ಲಿಂದ ಎದ್ದು ಹೋಗುವಾಗ ಯುಎಸ್‌ಬಿ ಡ್ರೈವ್ ಅನ್ನು ಗಣಕದಿಂದ ಕಿತ್ತು ತೆಗೆದುಕೊಂಡು ಹೋದರೆ ಆಯಿತು. ಆ ಯುಎಸ್‌ಬಿ ಡ್ರೈವ್ ಅನ್ನು ಪುನಃ ತುರುಕಿಸುವ ತನಕ ನಿಮ್ಮ ಗಣಕ ಕೆಲಸ ಮಾಡುವುದಿಲ್ಲ. ಆ ಯುಎಸ್‌ಬಿ ಡ್ರೈವ್ ಅನ್ನು ತುರುಕಿಸಿದಾಗ ನೀವು ಗಣಕದಲ್ಲಿ ಕೆಲಸಗಳನ್ನು ಯಾವ ಸ್ಥಿತಿಯಲ್ಲಿ ಬಿಟ್ಟುಹೋಗಿದ್ದೀರೋ ಅದೇ ಸ್ಥಿತಿಯಿಂದ ಕೆಲಸ ಮುಂದುವರಿಸಬಹುದು. ನಿಮ್ಮ ಅನುಪಸ್ಥಿತಿಯಲ್ಲಿ ಯಾರಾದರೂ ಗಣಕವನ್ನು ಬಳಸಲು ಪ್ರಯತ್ನಿಸಿದರೆ ಅದನ್ನೂ ಅದು ದಾಖಲಿಸಿ ನಿಮಗೆ ತಿಳಿಸುತ್ತದೆ.


e - ಸುದ್ದಿ

ಸೆಗಣಿ ಅನಿಲದಿಂದ ಸರ್ವರ್‌ಗೆ ವಿದ್ಯುತ್

ನಮ್ಮೂರ ಹಳ್ಳಿಗಳಲ್ಲಿ ದನ ಸಾಕುವವರ ಮನೆಗಳಲ್ಲಿ ಸೆಗಣಿ ಅನಿಲದಿಂದ ಅಡುಗೆ ಮಾಡುವುದು, ದೀಪ ಉರಿಸುವುದು ನಿಮಗೆ ತಿಳಿದೇ ಇರಬಹುದು. ಇದೇ ವಿಧಾನದಿಂದ ಸಾವಿರಾರು ಸರ್ವರ್‌ಗಳನ್ನು ಒಟ್ಟಿಗೆ ಇಟ್ಟಿರುವ ಡಾಟಾಸೆಂಟರ್‌ಗೆ ವಿದ್ಯುತ್ ಸರಬರಾಜು ಮಾಡಬಹುದು ಎಂದಿ ವಿಜ್ಞಾನಿಗಳು ಪ್ರತಿಪಾದಿಸುತ್ತಿದ್ದಾರೆ. ಡಾಟಾಸೆಂಟರ್‌ಗಳನ್ನು ಸಾವಿರಾರು ದನಗಳನ್ನು ಸಾಕುತ್ತಿರುವ ಡೈರಿಯ ಪಕ್ಕ ಸ್ಥಾಪಿಸಿ ಅದಕ್ಕೆ ಬೇಕಾದ ವಿದ್ಯುತ್ತನ್ನು ಡೈರಿಯಲ್ಲಿ ದೊರೆಯುವ ಸೆಗಣಿಯಿಂದ ತಯಾರಿಸಿದ ಅನಿಲದ ಮೂಲಕ ಪಡೆಯಬಹುದು ಎಂದು ಅವರು ನಿಖರವಾದ ಲೆಕ್ಕಾಚಾರದ ಮೂಲಕ ತೋರಿಸಿ ಕೊಟ್ಟಿದ್ದಾರೆ. ಇದನ್ನು ಇನ್ನೂ ಯಾರೂ ಆಚರಣೆಗೆ ತಂದಿಲ್ಲ.


e- ಪದ

ಡಾಟಾ ಸೆಂಟರ್ (data center) - ಕೇಂದ್ರೀಕೃತ ಮಾಹಿತಿ ಸಂಗ್ರಹ ವ್ಯವಸ್ಥೆ. ಇದನ್ನು ಸಾಮಾನ್ಯವಾಗಿ ಅಂತರಜಾಲ ಸರ್ವರ್‌ಗಳನ್ನು ಇಡಲು ಬಳಸುತ್ತಾರೆ. ಹಾಗೆಯೇ ಇತರೆ ಅಗಾಧ ಪ್ರಮಾಣದ ಮಾಹಿತಿಗಳನ್ನು ಸಂಗ್ರಹಿಸಡಲೂ ಬಳಸುತ್ತಾರೆ. ಇಂತಹ ಕೇಂದ್ರಗಳಲ್ಲಿ ನೂರಾರು ಗಣಕಗಳು ಮತ್ತು ಸಾವಿರಾರು ಹಾರ್ಡ್‌ಡಿಸ್ಕ್‌ಗಳು ಕೆಲಸ ಮಾಡುತ್ತಿರುತ್ತವೆ. ಇವುಗಳನ್ನು ನಡೆಸಲು ಅಗಾಧ ಪ್ರಮಾಣದ ವಿದ್ಯುತ್ ಅಗತ್ಯವಿರುತ್ತದೆ. ಅಲ್ಲದೆ ಇವು ಹೊರಸೂಸುವ ಅಗಾಧ ಪ್ರಮಾಣದ ಉಷ್ಣವನ್ನು ಹೀರುವ ಸವಲತ್ತೂ ಬೇಕು.

e - ಸಲಹೆ


ಮಹೇಶ ಅವರ ಪ್ರಶ್ನೆ: ನಾನು ಪ್ರೈಮರಿ ಶಾಲೆಯಲ್ಲಿ ಶಿಕ್ಷಕ. ನನಗೆ ಪ್ರಶ್ನೆ ಪತ್ರಿಕೆ ತಯಾರಿಸುವ ತಂತ್ರಾಂಶ ಲಭ್ಯವಿದ್ದರೆ ಬೇಕಿತ್ತು. ಅಂತಹ ತಂತ್ರಾಂಶ ಸಿಗುತ್ತದೆಯೇ? 
ಉ: ಖಂಡಿತವಾಗಿಯೂ ಅಂತಹ ತಂತ್ರಾಂಶ ಲಭ್ಯವಿದೆ. ಅದಕ್ಕಾಗಿ ನೀವು http://bit.ly/aTpEh1 ಜಾಲತಾಣಕ್ಕೆ ಭೇಟಿ ನೀಡಿ. ಇದನ್ನು ಬಳಸಲು ಸ್ವಲ್ಪ ಮಟ್ಟಿನ ಗಣಕ ಪರಿಣತಿ ಇದ್ದರೆ ಒಳ್ಳೆಯದು. ಇದರಲ್ಲಿ ಎರಡು ಅಂಗಗಳಿವೆ. ಒಂದನ್ನು ಬಳಸಿ ನೀವು ಪ್ರಶ್ನೆ ಬ್ಯಾಂಕ್ ಮತ್ತು ಪ್ರಶ್ನೆ ಪತ್ರಿಕೆ ತಯಾರಿಸಬಹುದು. ಇನ್ನೊಂದನ್ನು ಬಳಸಿ ವಿದ್ಯಾರ್ಥಿ ಉತ್ತರಿಸಬಹುದು. ಪ್ರಶ್ನೆ ಬ್ಯಾಂಕ್ ಮತ್ತು ಪ್ರಶ್ನೆ ಪತ್ರಿಕೆಗಳನ್ನು ಸರ್ವರ್‌ನಲ್ಲಿ ಇಟ್ಟು ಆಂತರಿಕಜಾಲದಲ್ಲಿ ಸಂಪರ್ಕದಲ್ಲಿರುವ ಗಣಕಗಳಲ್ಲಿ ವಿದ್ಯಾರ್ಥಿಗಳು ಏಕಕಾಲದಲ್ಲಿ ಪರೀಕ್ಷೆ ಉತ್ತರಿಸುವಂತೆ ಏರ್ಪಾಡು ಮಾಡಬಹುದು.
   
ಕಂಪ್ಯೂತರ್ಲೆ

ಕೋಲ್ಯ ಗಣಕ ತೆಗೆದುಕೊಂಡ. ಒಂದು ತಿಂಗಳು ಬಳಸಿದ ನಂತರ ಬಿಲ್‌ಗೇಟ್ಸ್‌ಗೆ ಇಮೈಲ್ ಮಾಡಿದ-
“ನನ್ನ ಗಣಕದಲ್ಲಿ Start ಬಟನ್ ಇದೆ. ಆದರೆ Stop ಬಟನ್ ಇಲ್ಲ. ದಯವಿಟ್ಟು ಅದನ್ನು ಸೇರಿಸಿ ಕೊಡಿ.”
“Re-cycle bin ಎಂದು ಇದೆ. ಆದರೆ ನನ್ನಲ್ಲಿ ಸೈಕಲ್ ಇಲ್ಲ. ಸ್ಕೂಟರ್ ಇದೆ. ಆದುದರಿಂದ Re-scooter bin ಕೊಡಿ.”
“ನನ್ನ ಮಗನಿಗೆ Word ಕಲಿತು ಆಯಿತು. ಆದುದರಿಂದ Sentence ಕೊಡಿ.”
“ನಿಮ್ಮ ಹೆಸರು Gates. ಆದರೆ ಯಾಕೆ Windows ಮಾರುತ್ತಿದ್ದೀರಾ?”

ಸೋಮವಾರ, ಮೇ 17, 2010

ಗಣಕಿಂಡಿ - ೦೫೨ (ಮೇ ೧೭, ೨೦೧೦)

ಅಂತರಜಾಲಾಡಿ

ಸಂಶೋಧನಾ ಪತ್ರಿಕೆಗಳ ಸೂಚಿ

ಬೆಂಗಳೂರಿನಿಂದ ದೂರ ಇರುವ ಲೇಖಕರ ಮತ್ತು ಅಧ್ಯಾಪಕರ ಒಂದು ದೂರು ಏನೆಂದರೆ ಸಂಶೋಧನಾ ಪತ್ರಿಕೆಗಳು ಸಿಗದಿರುವುದು. ಕನ್ನಡದಲ್ಲಿ ವಿಜ್ಞಾನ ತಂತ್ರಜ್ಞಾನ ಬಗ್ಗೆ ಬರೆಯುವವರು ಕೇವಲ ಬೆರಳೆಣಿಕೆಯಷ್ಟು ಮಂದಿ. ಅವರಲ್ಲಿ ಬಹುಪಾಲು ಮಂದಿ ಬೆಂಗಳೂರಿನಲ್ಲೇ ಇದ್ದಾರೆ. ಬೆಂಗಳೂರಿನಿಂದ ದೂರ ಇರುವ ಕೆಲವರಿಗೆ ವಿಜ್ಞಾನ ತಂತ್ರಜ್ಞಾನ ಮತ್ತು ಇತರೆ ಆಧುನಿಕ ವಿಷಯಗಳ ಬಗ್ಗ ಲೇಖನ ಬರೆಯಲು ಆಸಕ್ತಿ ಇದ್ದರೂ ಮಾಹಿತಿಯ ಕೊರತೆ ಬಾಧಿಸುತ್ತಿದೆ. ಹಾಗಾಗಿ ನಮ್ಮಲ್ಲಿ ವಿಷಯಸಾಹಿತ್ಯದ ಬಗ್ಗೆ ಲೇಖನ ಬರೆಯುವವರು ಕಡಿಮೆ. ಅಂತರಜಾಲದಲ್ಲಿ ವಿಷಯಜ್ಞಾನ ಎಷ್ಟು ಬೇಕಾದರೂ ಸಿಗುತ್ತದೆ. ಎಲ್ಲಿ? ಹಲವಾರು ಸಂಶೋಧನಾ ಪತ್ರಿಕೆಗಳು ಅಂತರಜಾಲದಲ್ಲಿ ಉಚಿತವಾಗಿ ಓದಲು ಸಿಗುತ್ತವೆ. ಅಂತಹ ಪತ್ರಿಕೆಗಳ ಸೂಚಿ ಇರುವ ಜಾಲತಾಣ www.doaj.org.


ಡೌನ್‌ಲೋಡ್

ಚಿತ್ರ ಬದಲಾವಣೆ ಮಾಡಿ


ಅಂತರಜಾಲದಲ್ಲಿ ಛಾಯಾಚಿತ್ರಗಳನ್ನು ಸೇರಿಸಲು ಅವುಗಳನ್ನು ನಿಮ್ಮ ಗೆಳೆಯರ ಜೊತೆ ಹಂಚಿಕೊಳ್ಳು ಹಲವಾರು ಜಾಲತಾಣಗಳಿವೆ (ಉದಾ -ಪಿಕಾಸಾ, ಫ್ಲಿಕರ್). ಸಾಮಾನ್ಯವಾಗಿ ಕ್ಯಾಮರಾದಲ್ಲಿ ತೆಗೆದ ಛಾಯಾಚಿತ್ರಗಳ ಗಾತ್ರ ತುಂಬ ದೊಡ್ಡದಿರುತ್ತದೆ. ಅಂತರಜಾಲದಲ್ಲಿ ಸೇರಿಸಲು ಅಷ್ಟು ದೊಡ್ಡ ಗಾತ್ರದ ಚಿತ್ರಗಳ ಅಗತ್ಯವಿಲ್ಲ. ಅದೂ ಅಲ್ಲದೆ ದೊಡ್ಡ ಗಾತ್ರದ ಚಿತ್ರಗಳನ್ನು ಸೇರಿಸುವಾಗ ಮಾಹಿತಿಯ ಸಂವಹನ ಜಾಸ್ತಿಯಾಗುತ್ತದೆ. ಅಂದರೆ ನಿಮ್ಮ ಅಂತರಜಾಲ ಸೇವೆಯ ಬಿಲ್ ಜಾಸ್ತಿ ಆಗುತ್ತದೆ. ನಿಮ್ಮ ಚಿತ್ರಗಳನ್ನು ಅಂತರಜಾಲದಿಂದ ಪ್ರತಿ ಮಾಡಿಕೊಂಡು ತಮ್ಮದೇ ಎಂಬಂತೆ ಹಂಚುವವರೂ ಇರುತ್ತಾರೆ. ಈ ಎಲ್ಲ ಸಮಸ್ಯೆಗಳಿಗೆ ಪರಿಹಾರ ಎಂದರೆ ಚಿತ್ರಗಳ ಗಾತ್ರ ಚಿಕ್ಕದಾಗಿಸುವ ಮತ್ತು ಚಿತ್ರದ ಮೇಲೆ ಹಕ್ಕುಸ್ವಾಮ್ಯದ ಸಂದೇಶ ಮತ್ತು ನಿಮ್ಮ ಹೆಸರನ್ನು ಸೇರಿಸುವ ತಂತ್ರಾಂಶದ ಅಗತ್ಯ. ಇಂತಹ ಒಂದು ಉಚಿತ ತಂತ್ರಾಂಶ FastStone Photo Resizer. ಇದು ಬೇಕಿದ್ದಲ್ಲಿ ನೀವು ಭೇಟಿನೀಡಬೇಕಾದ ಜಾಲತಾಣ http://bit.ly/aPXDDc.


e - ಸುದ್ದಿ

ಟಾಯ್ಲೆಟ್ ಪೇಪರ್ ಪಡೆಯಲು ಟ್ವಿಟ್ಟರ್ ಸಹಾಯ

ಜಪಾನ್ ದೇಶದಲ್ಲೊಬ್ಬ ಶೌಚಾಲಯದಲ್ಲಿ ಕೆಲಸ ಪ್ರಾರಂಭಿಸಿದ ನಂತರ ಆತನಿಗೆ ತಿಳಿಯಿತು ಅಲ್ಲಿ ಟಾಯ್ಲೆಟ್ ಪೇಪರ್ ಮುಗಿದಿದೆ ಎಂದು. ಆತ ಏನು ಮಾಡಬೇಕು? ಪಕ್ಕಾ ತಂತ್ರವ್ಯಸನಿಯಾದ (ಗೀಕ್) ಆತ ಅಲ್ಲಿಂದಲೇ ತನ್ನ ಪರಿಸ್ಥಿತಿಯನ್ನು ಟ್ವೀಟ್ ಮಾಡಿದ. ಅದನ್ನು ಓದಿದ ಪುಣ್ಯಾತ್ಮನೊಬ್ಬ ಆತನಿಗೆ ಟಾಯ್ಲೆಟ್ ಪೇಪರ್ ಒದಗಿಸಿದ. ಅದಕ್ಕಾಗಿ ಆತ ೨೦ ನಿಮಿಷ ಕಾಯಬೇಕಾಗಿ ಬಂತು. ಬಾಲಿವುಡ್ ನಟಿ ಗುಲ್‌ಪನಾಗ್ ಒಮ್ಮೆ ಶತಾಬ್ದಿ ರೈಲಿನ ಟಾಯ್ಲೆಟ್ ಒಳಗೆ ಸಿಕ್ಕಿಹಾಕಿಕೊಂಡಾಗ ತನ್ನ ಪರಿಸ್ಥಿತಿ ಬಗ್ಗೆ ಅಲ್ಲಿಂದಲೇ ಟ್ವೀಟ್ ಮಾಡಿದ್ದಳು.

e- ಪದ

ಸ್ಟಾಟಸ್‌ಬಾರ್ (status bar) - ಯಾವುದೇ ತಂತ್ರಾಂಶದ (ಉದಾ -ಬ್ರೌಸರ್) ಕೆಳಭಾಗದಲ್ಲಿರುವ ಪಟ್ಟಿ. ಇದು ಆ ತಂತ್ರಾಂಶದ ಸದ್ಯದ ಸ್ಥಿತಿಯನ್ನು ತೋರಿಸುತ್ತಿರುತ್ತದೆ. ಆದುದರಿಂದಲೇ ಅದಕ್ಕೆ ಆ ಹೆಸರು ಬಂದಿರುವುದು. ಉದಾಹರಣೆಗೆ ಬ್ರೌಸರ್‌ನಲ್ಲಿ ಒಂದು ಜಾಲತಾಣದ ವಿಳಾಸವನ್ನು ಬೆರಳಚ್ಚು ಮಾಡಿ ತೆರೆಯಲು ಪ್ರಯತ್ನಿಸಿದಾಗ ಆ ಜಾಲತಾಣ ತೆರೆಯಲು ಸ್ವಲ್ಪ ಸಮಯ ಹಿಡಿಯುತ್ತದೆ. ಅ ಸಂದರ್ಭದಲ್ಲಿ ಈ ಸ್ಟಾಟಸ್ ಬಾರ್ ಅದನ್ನೇ ಕಾಯುತ್ತಿದ್ದೇನೆ, ತೆರೆಯುತ್ತಿದ್ದೇನೆ, ಇತ್ಯಾದಿಯಾಗಿ ಹೇಳುತ್ತದೆ.

e - ಸಲಹೆ

ವಿಡೋಸ್೭ ರಲ್ಲಿ ಎಕ್ಸ್‌ಪಿ 

ಪ್ರ: ನಾನು ಇತ್ತೀಚೆಗೆ ಒಂದು ಲ್ಯಾಪ್‌ಟಾಪ್ ಕೊಂಡುಕೊಂಡೆ. ಅದರಲ್ಲಿ ವಿಂಡೋಸ್ ೭ ಪ್ರೊಫೆಶನಲ್ ಇದೆ. ನನಗೆ ಫೋಟೋಶಾಪ್, ಕೋರೆಲ್‌ಡ್ರಾ, ಪೇಜ್‌ಮೇಕರ್, ಇತ್ಯಾದಿ ಕೆಲವು ಹಳೆಯ ತಂತ್ರಾಂಶಗಳನ್ನು ಈ ಲ್ಯಾಪ್‌ಟಾಪ್‌ನಲ್ಲಿ ಇನ್‌ಸ್ಟಾಲ್ ಮಾಡಲು ಆಗುತ್ತಿಲ್ಲ. ಇದಕ್ಕೆ ಏನು ಪರಿಹಾರ?
ಉ: ಈ ಸಮಸ್ಯೆ ವಿಂಡೋಸ್೭ರ ೬೪ಬಿಟ್ ಆವೃತ್ತಿಯನ್ನು ಬಳಸುವವರಿಗೆ ಇದೆ. ಇದಕ್ಕೆ ಪರಿಹಾರವೆಂದರೆ ವಿಂಡೋಸ್೭ರಲ್ಲಿ ಎಕ್ಸ್‌ಪಿಯನ್ನು ಒಂದು ಮಿಥ್ಯಾ ಕಾರ್ಯಾಚರಣೆಯ ವ್ಯವಸ್ಥೆಯಾಗಿ ಅಳವಡಿಸಿಕೊಳ್ಳುವುದು. ಇದನ್ನು ಎಕ್ಸ್‌ಪಿ ಮೋಡ್ ಎನ್ನುತ್ತಾರೆ. ಇದು ಉಚಿತವಾಗಿ ಮೈಕ್ರೋಸಾಫ್ಟ್ ಜಾಲತಾಣದಲ್ಲಿ ದೊರೆತಯುತ್ತದೆ (http://bit.ly/b8YTSF). 
   
ಕಂಪ್ಯೂತರ್ಲೆ

ಮೈಗಳ್ಳ ಸರಕಾರಿ ಗುಮಾಸ್ತರಿಗಾಗಿಯೆಂದೇ ಒಂದು ಹೊಸ ನಮೂನೆಯ ಗಣಕ ತಯಾರಾಗಿದೆ. ಅದರಲ್ಲಿ ಒಂದು ಗುಪ್ತ ಕೀಲಿ ಇರುತ್ತದೆ. ಅದನ್ನು ಒತ್ತಿದೊಡನೆ ಪರದೆಯ ಮೇಲೆ “ಸದ್ಯ ಗಣಕ ಸರಿಯಾಗಿ ಕೆಲಸ ಮಾಡುತ್ತಿಲ್ಲ ಒಂದೆರಡು ಘಂಟೆಗಳ ನಂತರ ಪ್ರಯತ್ನಿಸಿ” ಎಂಬ ಸಂದೇಶ ಮೂಡುತ್ತದೆ. ಸಾರ್ವಜನಿಕರಿಗೆ ಆ ಸಂದೇಶವನ್ನು ತೋರಿಸಿ ಗುಮಾಸ್ತರು ತಮ್ಮ ಎಂದಿನ ಚಾಳಿಯಲ್ಲಿರಬಹುದು.