ಸೋಮವಾರ, ಡಿಸೆಂಬರ್ 26, 2011

ಗಣಕಿಂಡಿ - ೧೩೬ (ಡಿಸೆಂಬರ್ ೨೬, ೨೦೧೧)

ಅಂತರಜಾಲಾಡಿ

ಟೆಲಿಮಾತು

ನಮ್ಮ ದೇಶದ ಶೇಕಡ ೭೦ರಷ್ಟು ಜನರಲ್ಲಿ ಈಗ ಮೊಬೈಲ್ ಮತ್ತು ಸ್ಥಿರ ದೂರವಾಣಿ ಸಂಪರ್ಕ ಇದೆ. ಸರಕಾರದ ಬಿಎಸ್‌ಎನ್‌ಎಲ್ ಜೊತೆ ಹಲವಾರು ಖಾಸಗಿ ಕಂಪೆನಿಗಳು ಕೂಡ ಸೇವೆ ನೀಡುತ್ತಿವೆ. ಒಬ್ಬರಿಂದೊಬ್ಬರು ಜಿದ್ದಿಗೆ ಇಳಿದವರಂತೆ ನೂರಾರು ನಮೂನೆಯ ಮತ್ತು ಬೆಲೆಯ ಸೇವೆಗಳನ್ನು ನೀಡುತ್ತಿವೆ. ಹಾಗೂ ಪ್ರ್ರತಿದಿನ ಹೊಸಹೊಸ ಸ್ಕೀಮ್‌ಗಳ ಘೋಷಣೆ ಮಾಡುತ್ತಿರುತ್ತವೆ. ಯಾವ ಕಂಪೆನಿಯ ಯಾವ ಸ್ಕೀಮ್ ಕೊಂಡರೆ ನಿಮ್ಮ ಅಗತ್ಯಕ್ಕೆ ಸರಿಹೊಂದುತ್ತದೆ ಮತ್ತು ನಿಮಗೆ ಅತ್ಯಧಿಕ ಉಪಯೋಗ ಆಗುತ್ತದೆ ಎಂದು ತಿಳಿಯುವುದು ಹೇಗೆ? ಈ ಸಮಸ್ಯೆಗೆ ಪರಿಹಾರವೆಂಬಂತೆ telecomtalk.info ಜಾಲತಾಣವಿದೆ.

ಡೌನ್‌ಲೋಡ್

ಮತ್ತೊಂದು ಎಕ್ಸ್‌ಪ್ಲೋರರ್

ಮೈಕ್ರೋಸಾಫ್ಟ್ ವಿಂಡೋಸ್ ಬಳಸುತ್ತಿರುವವರಿಗೆ ಅದರಲ್ಲಿ ಅಡಕವಾಗಿರುವ ಎಕ್ಸ್‌ಪ್ಲೋರರ್ ಗೊತ್ತಿರುತ್ತದೆ. ಅದನ್ನು ಬಳಸಿ ಫೈಲ್‌ಗಳ ಬಗ್ಗೆ ವಿವರ ತಿಳಿಯುವುದು, ಫೋಲ್ಡರ್ ಒಳಗೆ ಏನೇನು ಫೈಲ್‌ಗಳಿವೆ, ಒಂದು ಫೋಲ್ಡರಿನಿಂದ ಇನ್ನೊಂದು ಫೋಲ್ಡರಿಗೆ ಫೈಲ್ ಪ್ರತಿ ಮಾಡುವುದು -ಇತ್ಯಾದಿ ಎಲ್ಲ ಕೆಲಸಗಳನ್ನು ಮಾಡಬಹುದು. ಈಗ ಬೆಟರ್ ಎಕ್ಸ್‌ಪ್ಲೋರರ್ ಎಂಬ ಹೆಸರಿನ ಇನ್ನೊಂದು ಉಚಿತ ಹಾಗೂ ಮುಕ್ತ ಎಕ್ಸ್‌ಪ್ಲೋರರ್ ಲಭ್ಯವಿದೆ. ವಿಂಡೋಸ್ ಎಕ್ಸ್‌ಪ್ಲೋರರ್‌ನ ಎಲ್ಲ ಗುಣಗಳು ಇದರಲ್ಲಿವೆ. ಜೊತೆಗೆ ಇನ್ನೂ ಕೆಲವು ಹೆಚ್ಚಿನ ಸೌಲಭ್ಯಗಳಿವೆ. ಒಂದು ಪ್ರಮುಖವಾದುದೆಂದರೆ ಆಫಿಸ್ ೨೦೦೭ ಮತ್ತು ೨೦೧೦ರಲ್ಲಿ ಕಂಡುಬರುವ ಮಾದರಿಯ ರಿಬ್ಬನ್. ಇದು ತುಂಬ ಉಪಯುಕ್ತ. ನಿಮಗೆ ಈ ತಂತ್ರಾಂಶ ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ bexplorer.codeplex.com.  

e - ಸುದ್ದಿ

ಕಡತ ಹಂಚಲನುವುಮಾಡುವುದು ತಪ್ಪಲ್ಲ

ವ್ಯಕ್ತಿಯಿಂದ ವ್ಯಕ್ತಿಗೆ ಅಂತರಜಾಲದ ಮೂಲಕ ಕಡತಗಳನ್ನು ಹಂಚುವುದಕ್ಕೆ person to person ಆರ್ಥಾತ್ P2P ಎಂಬ ಹೆಸರಿದೆ. ಈ ತಂತ್ರಜ್ಞಾನದಲ್ಲಿ ಒಂದು ಪ್ರಮುಖವಾದ ತಂತ್ರಾಂಶ ಬಿಟ್‌ಟೊರೆಂಟ್ ಪ್ರೊಟೊಕಾಲ್. ಇದೇ ಮಾದರಿಯ ಇನ್ನೊಂದು ತಂತ್ರಾಂಶವನ್ನು ಸ್ಪೈನ್ ದೇಶದಲ್ಲೊಬ್ಬ ತಯಾರಿಸಿದ್ದ. ಸಂಗೀತ ಮತ್ತು ವೀಡಿಯೊಗಳನ್ನು ತಯಾರಿಸುವ ಕಂಪೆನಿಗಳು ಆತನ ವಿರುದ್ಧ ನ್ಯಾಯಾಲಯದಲ್ಲಿ ದಾವೆ ಹೂಡಿದ್ದವು. ಈಗ ನ್ಯಾಯಾಲಯದಿಂದ ತೀರ್ಪು ಹೊರಬಂದಿದೆ. ಆತ ತಪ್ಪಿತಸ್ಥನಲ್ಲ. ಆತ ಕೇವಲ ತಂತ್ರಾಂಶ ಮಾತ್ರ ತಯಾರಿಸಿದ್ದ. ಅದನ್ನು ಬಳಸಿ ಸಂಗೀತ ಹಂಚಿಕೊ೦ಡು ಕೃತಿಚೌರ್ಯ ಮಾಡಿದ್ದರೆ ಅದು ಹಾಗೆ ಮಾಡಿದವರ ತಪ್ಪೇ ಹೊರತು ತಂತ್ರಾಂಶ ತಯಾರಕನದಲ್ಲ ಎಂದು ತೀರ್ಮಾನ ಬಂದಿದೆ.       

e- ಪದ

ಕ್ರಮವಿಧಿ (program) - ಗಣಕಕ್ಕೆ ಕೆಲಸ ಮಾಡಲು ನೀಡುವ ತರ್ಕಬದ್ಧವಾದ ಹಾಗೂ ಕ್ರಮಬದ್ಧವಾದ ಆದೇಶಗಳ ಗುಚ್ಛ. ಗಣಕಕ್ಕೆ ಸ್ವಂತ ಮೆದುಳಿಲ್ಲ. ನಾವು ನೀಡಿದ ಆದೇಶಗಳಂತೆ ಅದು ಕೆಲಸ ಮಾಡುತ್ತದೆ. ಒಂದು ವೃತ್ತದ ತ್ರಿಜ್ಯವನ್ನು ನೀಡಿ ಅದರ ವಿಸ್ತೀರ್ಣವನ್ನು ಲೆಕ್ಕ ಹಾಕಿ ಕೊಡು ಎಂದು ಅದಕ್ಕೆ ಸುಮ್ಮನೆ ಆದೇಶ ನೀಡುವಂತಿಲ್ಲ. ತ್ರಿಜ್ಯ ಗೊತ್ತಿದ್ದರೆ ವಿಸ್ತೀರ್ಣ ಲೆಕ್ಕ ಹಾಕುವ ಸೂತ್ರವನ್ನೂ ನೀಡಬೇಕಾಗುತ್ತದೆ. ತಪ್ಪು ಸೂತ್ರ ನೀಡದರೆ ಅದಕ್ಕೆ ಗೊತ್ತಾಗುವುದಿಲ್ಲ. ಎಲ್ಲರಿಗೂ ಪರಿಚಿತವಿರುವ ಇದೇ ಕ್ರಿಯೆಗೆ ಕ್ರಮವಿಧಿ ರಚನೆ ಅರ್ಥಾತ್ programming ಎನ್ನುತ್ತಾರೆ.

e - ಸಲಹೆ

ಗುಲ್ಬರ್ಗದ ಬಿರಾದಾರ ಅವರ ಪ್ರಶ್ನೆ: ಕಳೆದ ವಾರದ ಸಂಚಿಕೆಯಲ್ಲಿ ಕನ್ನಡಕ್ಕೆ ಯುನಿಕೋಡ್ ಫಾಂಟ್‌ಗಳು ಸಾಕಷ್ಟಿಲ್ಲ. ಆದುದರಿಂದ ಯುನಿಕೋಡ್ ಬಳಕೆ ಕಡಿಮೆ ಎಂದು ಬರೆದಿದ್ದೀರಿ. ಹಾಗಿದ್ದರೆ ಯುನಿಕೋಡ್ ಬಳಸಲು ಸಾಧ್ಯವಿಲ್ಲವೇ?
ಉ: ಯುನಿಕೋಡ್ ಒಂದು ಜಾಗತಿಕ ಶಿಷ್ಟತೆ. ಪ್ರಪಂಚದ ಎಲ್ಲ ತಂತ್ರಾಂಶ ಮತ್ತು ಜಾಲತಾಣಗಳು ಅದನ್ನು ಬಳಸುತ್ತಿವೆ. ಕನ್ನಡ ಯುನಿಕೋಡ್ ಬಳಸಲು ಯಾವ ಅಡ್ಡಿ ಆತಂಕಗಳೂ ಇಲ್ಲ. ನಾನು ಹೇಳಿದ್ದು ಉತ್ತಮ ಮುದ್ರಣ ಗುಣಮಟ್ಟದ ಫಾಂಟ್‌ಗಳ ಕೊರತೆ ಇದೆ ಎಂದು ಮಾತ್ರ. ಕ್ರಮವಿಧಿ ರಚನೆಗೆ ಯುನಿಕೋಡನ್ನೇ ಬಳಸಬೇಕು. ಕನ್ನಡಕ್ಕೆ ಈಗಾಗಲೇ ಹಲವಾರು ಯುನಿಕೋಡ್ ಬೆಂಬಲಿತ ಓಪನ್‌ಟೈಪ್ ಫಾಂಟ್‌ಗಳು ಲಭ್ಯವಿವೆ. ಅವುಗಳಲ್ಲಿ ಕೆಲವು - ತುಂಗ, ಏರಿಯಲ್ ಯುನಿಕೋಡ್ ಎಂಎಸ್ (ಇವೆರಡು ಮೈಕ್ರೋಸಾಫ್ಟ್ ಕಂಪೆನಿಗೆ ಸೇರಿದ್ದು), ಸಂಪಿಗೆ, ಮಲ್ಲಿಗೆ, ಕೇದಗೆ, ಸಕಲಭಾರತಿ, ಸರಸ್ವತಿ, ಜನಕನ್ನಡ, ಪೂರ್ಣಚಂದ್ರಜೇಜಸ್ವಿ, ಇತ್ಯಾದಿ.

ಕಂಪ್ಯೂತರ್ಲೆ

ಅಂತರಜಾಲದ ಕೊನೆ

ಅಂತರಜಾಲದಲ್ಲಿ ಸುತ್ತಾಡಿ ಸುತ್ತಾಡಿ ಬೋರ್ ಆಯಿತೇ? ಈ ಅನಂತಜಾಲಕ್ಕೆ ಕೊನೆಯೇ ಇಲ್ಲವೇ ಎಂದು ಆಶ್ಚರ್ಯಪಡುತ್ತಿದ್ದೀರಾ? ಇದೆ. ಎಲ್ಲದರಂತೆ ಅಂತರಜಾಲಕ್ಕೂ ಒಂದು ಕೊನೆ ಇದೆ. ಅದನ್ನು ನೋಡಬೇಕಾದರೆ ನೀವು ಮಾಡಬೇಕಾದ್ದು ಇಷ್ಟೆ. www.internet-end.com ಜಾಲತಾಣಕ್ಕೆ ಭೇಟಿ ನೀಡಬೇಕು. ಅಷ್ಟೆ.

ಸೋಮವಾರ, ಡಿಸೆಂಬರ್ 19, 2011

ಗಣಕಿಂಡಿ - ೧೩೫ (ಡಿಸೆಂಬರ್ ೧೯, ೨೦೧೧)

ಅಂತರಜಾಲಾಡಿ

ನವೀನ ತಂತ್ರಜ್ಞಾನ ಸುದ್ದಿ

ಕೈಮೇಲೆ ಅಥವಾ ಯಾವುದೇ ಮೇಲ್ಮೈ ಮೇಲೆ ಬೆರಳಚ್ಚು ಮಾಡುವುದು, ಮೊದಲು ಫೋಟೋ ತೆಗೆದು ನಂತರ ಫೋಕಸ್ ಮಾಡುವ ಕ್ಯಾಮರಾ, ಬೆಳಕಿನ ಕಣಗಳ ಫೋಟೋ ತೆಗೆಯುವುದು, ಕೇವಲ ೩ ಮೈಕ್ರೋಮೀಟರ್ (೧ ಮೈಕ್ರೋಮೀಟರ್ = ಮೀಟರಿನ ದಶಲಕ್ಷದಲ್ಲೊಂದು ಭಾಗ) ಗಾತ್ರದ ಉಗಿಯಂತ್ರ - ಇವೆಲ್ಲ ಕಾಣಸಿಗುವುದು ಮುಂಬರುವ ಜೇಮ್ಸ್ ಬಾಂಡ್ ಸಿನಿಮಾದಲ್ಲಲ್ಲ. ಇವೆಲ್ಲ ಪ್ರಪಂಚದ ಬೇರೆಬೇರೆ ಪ್ರಯೋಗಶಾಲೆಗಳಲ್ಲಿ ತಯಾರಾಗಿರುವ ಸದ್ಯ ಸುದ್ದಿಯಲ್ಲಿರುವ ನವೀನ ತಂತ್ರಜ್ಞಾನಗಳು. ಇಂಗ್ಲಿಶಿನಲ್ಲಿ ಇಂತಹವುಗಳಿಗೆ innovations ಅನ್ನುತ್ತಾರೆ. ಇಂತಹ ಹೊಸ ಕಲ್ಪನೆ, ಸಾಧ್ಯತೆ, ಸಾಧಸನೆಗಳ ಸುದ್ದಿಗಳನ್ನೇ ಪ್ರತಿನಿತ್ಯ ಹೊತ್ತು ತರುವ ಜಾಲತಾಣ www.innovationnewsdaily.com.

ಡೌನ್‌ಲೋಡ್

ಕನ್ನಡಕ್ಕೆರಡು ಉಚಿತ ಯುನಿಕೋಡ್ ಫಾಂಟ್

ಜಾಗತಿಕ ಶಿಷ್ಟತೆ ಯುನಿಕೋಡ್. ಇದನ್ನು ಬಳಸುವುದರಿಂದ ಲಭ್ಯವಾಗುವ ಅನುಕೂಲಕಗಳು ಅನೇಕ. ಆದರೂ ಗಣಕದಲ್ಲಿ ಕನ್ನಡ ಯುನಿಕೋಡ್ ಬಳಸುವವರ ಸಂಖ್ಯೆ ಇನ್ನೂ ಗಣನೀಯವಾಗಿಲ್ಲ. ಇದಕ್ಕೆ ಒಂದು ಬಲವಾದ ಕಾರಣವೆಂದರೆ ಕನ್ನಡಕ್ಕೆ ಯುನಿಕೋಡ್ ಬೆಂಬಲಿತ ಓಪನ್‌ಟೈಪ್ ಫಾಂಟ್‌ಗಳ ಕೊರತೆ. ಮೈಕ್ರೋಸಾಫ್ಟ್‌ನವರು ನೀಡಿರುವ “ತುಂಗ” ಹೆಸರಿನ ಫಾಂಟ್ ಮಾತ್ರ ಸದ್ಯ ಪರಿಪೂರ್ಣ ಕನ್ನಡ ಓಪನ್‌ಟೈಪ್ ಫಾಂಟ್. ಆದರೆ ಇದು ಪರದೆಯಲ್ಲಿ ಓದಲಿಕ್ಕಾಗಿ ತಯಾರಾಗಿರುವ ಫಾಂಟ್. ಮುದ್ರಣಕ್ಕಾಗಿ ಅತ್ಯುತ್ತಮ ಗುಣಮಟ್ಟದ ಫಾಂಟ್‌ಗಳು ಇನ್ನೂ ಬಂದಿಲ್ಲ. ಕೆಲವು ಕನ್ನಡ ತಂತ್ರಜ್ಞಾನಾಸಕ್ತರು ಇತ್ತೀಚೆಗೆ “ಗುಬ್ಬಿ” ಮತ್ತು “ನವಿಲು” ಹೆಸರಿನ ಎರಡು ಓಪನ್‌ಟೈಪ್ ಫಾಂಟ್‌ಗಳನ್ನು ಕನ್ನಡಕ್ಕೆ ಮುಕ್ತವಾಗಿ ನೀಡಿದ್ದಾರೆ. ಇವನ್ನು bit.ly/t9JwoE  ಜಾಲತಾಣದಿಂದ ಪಡೆದುಕೊಳ್ಳಬಹುದು. ಇವು ಇನ್ನೂ ಪರಿಪೂರ್ಣವಾಗಿಲ್ಲ ಆದರೆ ಇವು ಮುಕ್ತವಾಗಿರುವುದರಿಂದ ನೀವೂ ಇವನ್ನು ಸುಧಾರಿಸಬಹುದು. ಹವ್ಯಾಸಿಗಳಿಗೆ ಫಾಂಟ್‌ಗಳನ್ನು ಮುಕ್ತವಾಗಿ ನೀಡಲು ಸಾಧ್ಯವಾಗಿರುವಾಗ ಸರಕಾರದಿಂದ ಅನುದಾನ ಪಡೆಯುವ ಸಂಸ್ಥೆಗಳಿಗೆ ಯಾಕೆ ಇದು ಇನ್ನೂ ಸಾಧ್ಯವಾಗಿಲ್ಲ ಎಂಬುದು ತಿಳಿಯುತ್ತಿಲ್ಲ.

e - ಸುದ್ದಿ

ಸಹಪ್ರಯಾಣಿಕ ಆರಿಸಿ

ದೂರದ ಊರಿಗೆ ಸುದೀರ್ಘ ಪ್ರಯಾಣ ಮಾಡುವಾಗ ನಮ್ಮ ಪಕ್ಕದ ಆಸನದಲ್ಲಿ ನಮ್ಮ ಪರಿಚಿತರೇ ಇದ್ದರೆ ಒಳ್ಳೆಯದಲ್ಲವೇ? ಸಾಮಾನ್ಯವಾಗಿ ನಾವು ಒಬ್ಬರಿಗೊಬ್ಬರು ಫೋನ್ ಅಥವಾ ಇಮೈಲ್ ಮಾಡಿ ಯಾರಾದರೂ ಸಿಗುತ್ತಾರೋ ಎಂದು ವಿಚಾರಿಸುತ್ತೇವೆ. ವಿಮಾನದಲ್ಲಿ ಹೋಗುವಾಗ ಹಾಗೆ ಮಾಡುವುದು ಕಷ್ಟ. ಏಕೆಂದರೆ ವಿಮಾನದಲ್ಲಿ ದೀರ್ಘ ಪ್ರಯಾಣ ಮಾಡುವುದು ಯಾವಾಗಲೂ ಮಾಡುವ ಕೆಲಸವಲ್ಲ. ಅಂತಹ ಸಂದರ್ಭದಲ್ಲಿ ಪಕ್ಕದ ಆಸನಕ್ಕೆ ನಮಗಿಷ್ಟ ಬಂದವರನ್ನು ಆರಿಸುವುದು ಇನ್ನೂ ಕಷ್ಟ. ಈ ಸಮಸ್ಯೆಗೆ ಕೆಎಲ್‌ಎಂ ವಿಮಾನ ಸಾರಿಗೆ ಒಂದು ಪರಿಹಾರ ಕಂಡುಕೊಂಡಿದೆ. ೨೦೧೨ರಲ್ಲಿ ಅಸ್ತಿತ್ವಕ್ಕೆ ಬರುವ ಈ ಸೌಲಭ್ಯವನ್ನು ಬಳಸಿ ಪ್ರಯಾಣಿಕರು ಫೇಸ್‌ಬುಕ್ ಅಥವಾ ಇತರೆ ಸಾಮಾಜಿಕ ಜಾಲತಾಣಗಳ ಮೂಲಕ ತಮಗಿಷ್ಟ ಸಹಪ್ರಯಾಣಿಕರನ್ನು ಆರಿಸಿಕೊಳ್ಳಬಹುದು.       

e- ಪದ

ಪಠ್ಯದಿಂದ ಧ್ವನಿಗೆ (text-to-speech) - ಗಣಕದ ಪರೆದೆಯಲ್ಲಿ ಮೂಡಿಬರುವ ಪಠ್ಯಗಳನ್ನು ಧ್ವನಿಗೆ ಪರಿವರ್ತಿಸುವ ತಂತ್ರಾಂಶ. ಇಂತಹ ತಂತ್ರಾಂಶಗಳು ದೃಷ್ಟಿಶಕ್ತಿವಂಚಿತರಿಗೆ ತುಂಬ ಉಪಯುಕ್ತ. ಕನ್ನಡಕ್ಕೂ ಇವು ಲಭ್ಯ. ಹೆಚ್ಚಿನ ಮಾಹಿತಿಗೆ kanaja.in ತಾಲತಾಣ ನೋಡಿ.

e - ಸಲಹೆ

ಬಸವರಾಜ ಚಿಕ್ಕಮಠ ಅವರ ಪ್ರಶ್ನೆ: ನನ್ನ ಅಂಕಲ್ ಅಮೆರಿಕದಿಂದ ಐಫೋನ್ 4S ತರುತ್ತಿದ್ದಾರೆ. ಅದಕ್ಕೆ ಭಾರತದಲ್ಲಿ ಗ್ಯಾರಂಟಿ ಸಿಗಬಹುದೇ? ಅಮೆರಿಕದಿಂದ ತರಬೇಕಿದ್ದರೆ ಏನೆಲ್ಲ ಎಚ್ಚರಿಕೆ ವಹಿಸಬೇಕು?
ಉ: ಅಮೆರಿಕದಲ್ಲಿ ಗ್ಯಾಜೆಟ್ ಕೊಳ್ಳುವಾಗ ಸ್ವಲ್ಪ ಜಾಸ್ತಿ ಹಣ ನೀಡಿದರೆ ಆಂತಾರಾಷ್ಟ್ರೀಯ ಗ್ಯಾರಂಟಿ ನೀಡುತ್ತಾರೆ. ಅದನ್ನು ಪಡೆದುಕೊಳ್ಳಬೇಕು. ಭಾರತದ ಸಿಮ್ ಕಾರ್ಡ್ ಬಳಸಬೇಕಾದರೆ ಫೋನ್‌ಗೆ ಅಮೆರಿಕದಲ್ಲಿ ಯಾವುದೇ ಮೊಬೈಲ್ ಸೇವೆಗೆ ಚಂದಾದಾರರಾಗಿರಬಾರದು ಅಥವಾ ಅದು ಅನ್‌ಲಾಕ್ ಆಗಿರಬೇಕು. ಅನ್‌ಲಾಕ್ ಆದ ಫೋನಿಗೆ ಯಾವ ಸಿಮ್ ಬೇಕಿದ್ದರೂ ಹಾಕಬಹುದು.

ಕಂಪ್ಯೂತರ್ಲೆ

ವಿಕಿಪೀಡಿಯ: ನನಗೆ ಎಲ್ಲವೂ ಗೊತ್ತು.
ಗೂಗಲ್: ನನ್ನ ಬಳಿ ಎಲ್ಲವೂ ಇವೆ.
ಫೇಸ್‌ಬುಕ್: ನನಗೆ ಎಲ್ಲರೂ ಗೊತ್ತು.
ಇಂಟರ್‌ನೆಟ್: ನಾನಿಲ್ಲದೆ ನೀವೇನೂ ಇಲ್ಲ.
ಕರ್ನಾಟಕ ಸರಕಾರ: ಕರೆಂಟ್ ಇದ್ದರೆ ತಾನೆ ಇದೆಲ್ಲ?!
(ಫೇಸ್‌ಬುಕ್‌ನಿಂದ ಕದ್ದದ್ದು. ಜೋಕುಗಳಿಗೆ ಕಾಪಿರೈಟ್ ಇಲ್ಲ!)

ಮಂಗಳವಾರ, ಡಿಸೆಂಬರ್ 13, 2011

ಗಣಕಿಂಡಿ - ೧೩೪ (ಡಿಸೆಂಬರ್ ೧೨, ೨೦೧೧)

ಅಂತರಜಾಲಾಡಿ

ಆವರ್ತಕೋಷ್ಟಕ ಜಾಲತಾಣ

ಇದು ಅಂತಾರಾಷ್ಟ್ರೀಯ ರಸಾಯನಶಾಸ್ತ್ರ ವರ್ಷ. ಸ್ವಲ್ಪ ರಾಸಾಯನಿಕ ವಸ್ತುಗಳ ಅದರಲ್ಲೂ ಮೂಲವಸ್ತುಗಳ ಕಡೆಗೆ ಗಮನ ಕೊಡೋಣ. ಎಲ್ಲ ಮೂಲವಸ್ತುಗಳನ್ನು ಕ್ರಮಬದ್ಧವಾಗಿ ಜೋಡಿಸಿದ ಆವರ್ತಕೋಷ್ಟಕ (periodic table) ಎಲ್ಲ ರಸಾಯನಶಾಸ್ತ್ರ ವಿದ್ಯಾರ್ಥಿಗಳಿಗೆ ಅತಿ ಮುಖ್ಯ. ಮೂಲವಸ್ತುಗಳ ವಿವಿಧ ಗುಣವೈಶಿಷ್ಟ್ಯಗಳನ್ನು ಒಂದು ಕ್ರಮದಲ್ಲಿ ಇದರಲ್ಲಿ ಜೋಡಿಸಲಾಗಿದೆ. ಈ ಆವರ್ತಕೋಷ್ಟಕದ ಬಗ್ಗೆ ಹಲವಾರು ಜಾಲತಾಣಗಳಿವೆ. ಡೌನ್‌ಲೋಡ್ ಮಾಡಿಕೊಂಡು ನಿಮ್ಮ ಗಣಕದಲ್ಲಿ ಅನುಸ್ಥಾಪಿಸಬಲ್ಲ ತಂತ್ರಾಂಶಗಳೂ ಇವೆ. ಆವರ್ತಕೋಷ್ಟಕ ಮತ್ತು ಮೂಲವಸ್ತುಗಳ ಬಗ್ಗೆ ಒಂದು ಜನಪ್ರಿಯ ಜಾಲತಾಣ www.webelements.com. ಎಲ್ಲ ಮೂಲವಸ್ತುಗಳ ಗುಣವೈಶಿಷ್ಟ್ಯಗಳ ವಿವರಗಳಲ್ಲದೆ ಹಲವು ಮಾದರಿಗಳು, ವೈಜ್ಞಾನಿಕ ಆಟಿಕೆಗಳೂ ಇಲ್ಲಿ ಮಾರಾಟಕ್ಕಿವೆ.

ಡೌನ್‌ಲೋಡ್

ಮಕ್ಕಳಿಗಾಗಿ ಪ್ರೋಗ್ರಾಮ್ಮಿಂಗ್

ಗಣಕವನ್ನು ಬಳಸುವುದು ಒಂದಾದರೆ ಗಣಕದಲ್ಲಿ ಕ್ರಮವಿಧಿ ರಚಿಸುವುದು (ಪ್ರೋಗ್ರಾಮ್ಮಿಂಗ್) ಇನ್ನೊಂದು. ಇದು ಕೇವಲ ಆಸಕ್ತರಿಗೆ ಹಾಗೂ ಪರಿಣತರಿಗೆ. ಗಣಕದಲ್ಲಿ ಕ್ರಮವಿಧಿ ರಚಿಸಲು ಹಲವು ಭಾಷೆಗಳು (programming languages) ಲಭ್ಯವಿವೆ. ಉದಾ -C, C++, Java, C#, ASP.NET, ಇತ್ಯಾದಿ. ಇವೆಲ್ಲ ದೊಡ್ಡವರಿಗಾಗಿ ಹಾಗೂ ಕಲಿಯಲು ಕ್ಲಿಷ್ಟವಾದ ಭಾಷೆಗಳು. ಮಕ್ಕಳಿಗಾಗಿ ಲೋಗೋ ಎಂಬ ಭಾಷೆ ಸುಮಾರು ವರ್ಷಗಳಿಂದ ಬಳಕೆಯಲ್ಲಿದೆ. ಲೋಗೋ ಮಾದರಿಯಲ್ಲೇ ಮಕ್ಕಳಿಗೆಂದೇ ರಚಿಸಲಾದ ಕ್ರಮವಿಧಿ ರಚನೆಯ ಭಾಷೆ Scratch. ಇದರ ವೈಶಿಷ್ಟ್ಯವೇನೆಂದರೆ ಇದರಲ್ಲಿ ಎಲ್ಲವೂ ಚಿತ್ರಗಳ (ಗ್ರಾಫಿಕ್ಸ್) ಮೂಲಕ ಆಗುತ್ತದೆ. ಈ ಉಚಿತ ತಂತ್ರಾಂಶ ಬೇಕಿದ್ದಲ್ಲಿ ನೀವು ಬೇಟಿ ನೀಡಬೇಕಾದ ಜಾಲತಾಣ scratch.mit.edu. ಇದು ೧೬ ವರ್ಷದ ಒಳಗಿನ ಮಕ್ಕಳನ್ನೇ ಗಮನದಲ್ಲಿಟ್ಟುಕೊಂಡು ತಯಾರಾದ ತಂತ್ರಾಂಶ. ಇದನ್ನು ಅಧ್ಯಾಪಕರೂ ಬಳಸಬಹುದು.

e - ಸುದ್ದಿ

ರಷ್ಯದಲ್ಲೊಂದು ಟ್ವಿಟ್ಟರ್ ಯುದ್ಧ

ಟ್ವಿಟ್ಟರನ್ನು ರಾಜಕೀಯ ಕಾರಣಗಳಿಗೆ, ಜನರನ್ನು ಸೇರಿಸಲು, ಚಳವಳಿಗಳಿಗೆ ಜನರನ್ನು ಪ್ರಚೋದಿಸಲು ಮತ್ತು ಸೇರಿಸಲು ಬಳಸುವುದು ಇತ್ತೀಚೆಗೆ ಹೆಚ್ಚಾಗುತ್ತಿದೆ. ಇಜಿಪ್ಟ್‌ನಲ್ಲಿ ನಡೆದ ಚಳವಳಿಯಲ್ಲಿ ಟ್ವಿಟ್ಟರ್ ಮತ್ತು ಫೇಸ್‌ಬುಕ್ ಪ್ರಮುಖ ಪಾತ್ರವಹಿಸಿವೆ. ರಷ್ಯದಲ್ಲಿ ಇತ್ತೀಚೆಗೆ ಚುನಾವಣೆ ನಡೆಯಿತು. ಅದರಲ್ಲಿ ತುಂಬ ಮೋಸ ನಡೆದಿದೆ ಎಂದು ಜನರೆಲ್ಲ ಕೂಗಾಡಿದರು. ಹಾಗೆ ಅವರು ಕೂಗಾಡಲು ಬಳಸಿದ್ದು ಟ್ವಿಟ್ಟರ್. ಅದಕ್ಕೆಂದೆ ಒಂದು ಹಾಶ್‌ಟ್ಯಾಗ್ ಬಳಸಿ ಅವರು ಸರಕಾರವನ್ನು ದೂಷಿಸುತ್ತಿದ್ದರು. ಆದರೆ ಅದು ಸಾವಿರಾರು ಸರಕಾರಿ ಪರವಾದ ಆದರೆ ಅದೇ ಹಾಶ್‌ಟ್ಯಾಗ್ ಬಳಸಿ ಮಾಡಿದ ಟ್ವೀಟ್‌ಗಳ ರಾಶಿಯಲ್ಲಿ ಎಲ್ಲೋ ಮುಳುಗಿ ಹೋಯಿತು. ಇಲ್ಲಿ ಏನಾಗಿತ್ತೆಂದರೆ ಯಾರೋ, ಬಹುಶಃ ಸರಕಾರೀ ಪೋಷಿತ, ಸಾವಿರಾರು ಬಾಟ್‌ಗಳನ್ನು ಮೊದಲೇ ತಯಾರಿಸಿಟ್ಟಿದ್ದರು. ಈ ಸ್ವಯಂಚಾಲಿತ ಟ್ವಿಟ್ಟರ್ ಖಾತೆಗಳು (ಬಾಟ್‌ಗಳು) ಅದೇ ಹಾಶ್‌ಟ್ಯಾಗ್‌ಗೆ ಸರಕಾರದ ಪರವಾಗಿ ಸ್ವಯಂಚಾಲಿತವಾಗಿ ಟ್ವೀಟ್ ಮಾಡುತ್ತಿದ್ದವು. ಸ್ವಾರಸ್ಯವೆಂದರೆ ಈ ಬಾಟ್‌ಗಳನ್ನು ಚುನಾವಣೆಗೆ ಕೆಲವು ತಿಂಗಳುಗಳ ಮೊದಲೇ ತಯಾರಿಸಲಾಗಿತ್ತು. ಆದರೆ ಅವು ಆಗ ಸುಮ್ಮನೆ ನಿದ್ರಿಸುತ್ತಿದ್ದವು. ಟ್ವಿಟ್ಟರ್ ಮೂಲಕ ಈ ರೀತಿಯ ಧಾಳಿ ನಡೆಯಬಹುದು ಎಂದು ಪೂರ್ವಭಾವಿಯಾಗಿ ಊಹಿಸಿ ಅದಕ್ಕೆ ಪ್ರತಿಧಾಳಿಯನ್ನು ತಯಾರಿಸಿಟ್ಟಿದ್ದು ಇದೇ ಮೊದಲ ಬಾರಿ ಇರಬೇಕು.       

e- ಪದ

ಹಾಶ್‌ಟ್ಯಾಗ್ (hashtag) - ಟ್ವಿಟ್ಟರ್‌ನಲ್ಲಿ ಮಾಡುವ ಪೋಸ್ಟಿಂಗ್‌ಗಳನ್ನು ಸುಲಭವಾಗಿ ವಿಷಯಾಧಾರಿತವಾಗಿ ಹುಡುಕಲು ಸಹಾಯಮಾಡುವಂತೆ ಟ್ವೀಟ್‌ಗಳಿಗೆ ಲಗತ್ತಿಸುವ ಟ್ಯಾಗ್. ಉದಾಹರಣೆಗೆ #kannada. ಇದು ಕನ್ನಡದ ಬಗ್ಗೆ ಮಾಡುವ ಎಲ್ಲ ಟ್ವೀಟ್‌ಗಳನ್ನು ಸುಲಭವಾಗಿ ಹುಡುಕಿ ಕೊಡುತ್ತದೆ.

e - ಸಲಹೆ

ಪ್ರಮೋದ್ ಶೆಟ್ಟಿಯವರ ಪ್ರಶ್ನೆ: ನನಗೆ ಚಿತ್ರದ ಮೇಲೆ ಅಕ್ಷರ ಮೂಡಿಸುವ ತಂತ್ರಾಂಶ ಬೇಕಿತ್ತು, ತುಂಬಾ ಜಾಲಾಡಿದೆ ಸಿಗಲಿಲ್ಲ. ದಯವಿಟ್ಟು ನಿಮಗೆ ಗೊತ್ತಿದ್ದರೆ ನನಗೆ ತಿಳಿಸಿ.
ಉ: ಈ ಹಿಂದೆಯೇ ಗಣಕಿಂಡಿಯಲ್ಲಿ ಪ್ರಸ್ತಾಪಿಸಿದ್ದ FastStone Photo Resizer ತಂತ್ರಾಂಶವನ್ನು www.faststone.org ಜಾಲತಾಣದಿಂದ ಡೌನ್‌ಲೋಡ್ ಮಾಡಿಕೊಂಡು ಬಳಸಿ. ಇದು ಫೋಟೋಗಳ ಮೇಲೆ ನಿಮ್ಮ ಹೆಸರನ್ನು ಮೂಡಿಸಲು ಇರುವ ತಂತ್ರಾಂಶ. ನಿಮ್ಮ ಕೆಲಸಕ್ಕೂ ಆಗುತ್ತದೆ.

ಕಂಪ್ಯೂತರ್ಲೆ

ಮತ್ತೊಂದಿಷ್ಟು (ತ)ಗಾದೆಗಳು:
·    ಸರಿಯಾಗಿ ವೆಬ್‌ಸೈಟ್ ವಿಳಾಸ ಟೈಪ್ ಮಾಡದೆ ಇಂಟರ್‌ನೆಟ್ ಬರುತ್ತಿಲ್ಲ ಎಂದು ದೂರಿದನಂತೆ.
·    ನಿಜವಾದ ಪ್ರಜಾಪ್ರಭುತ್ವವಿರುವುದು ಅಂತರಜಾಲದಲ್ಲಿ ಮಾತ್ರ.

ಮಂಗಳವಾರ, ಡಿಸೆಂಬರ್ 6, 2011

ಗಣಕಿಂಡಿ - ೧೩೩ (ಡಿಸೆಂಬರ್ ೦೫, ೨೦೧೧)

ಅಂತರಜಾಲಾಡಿ

ಪದ್ಯಪಾನ

ಇದು ಮದ್ಯಪಾನವಲ್ಲ, ಪದ್ಯಪಾನ. ಅಂದರೆ ಪದ್ಯಗಳನ್ನು ಆಸ್ವಾದಿಸುವುದು. ಆದರೆ ಅಷ್ಟಕ್ಕೆ ಸೀಮಿತವಾಗಬೇಕಿಲ್ಲ. ಪದ್ಯಗಳ ಬಗ್ಗೆ ಚರ್ಚಿಸಬಹುದು, ಪದ್ಯಾಧಾರಿತ ಸಮಸ್ಯೆಗಳನ್ನು ಬಿಡಿಸಬಹುದು, ನೀವೊಬ್ಬ ಕುರಿತೋದದೆಯುಂ ಕಾವ್ಯಪ್ರಯೋಗ ಪರಿಣತಮತಿಯಾಗಿದ್ದಲ್ಲಿ ಪದ್ಯ ರಚಿಸಿ ಇಲ್ಲಿ ದಾಖಲಿಸಬಹುದು, ಇತ್ಯಾದಿ. ಹೌದು. ಇದೆಲ್ಲ ಎಲ್ಲಿ ಎಂದು ಕೇಳುತ್ತೀರಾ? ಬನ್ನಿ, padyapaana.com ಜಾಲತಾಣಕ್ಕೆ ಭೇಟಿ ನೀಡಿ. ಪದ್ಯ ಓದಿ ಅದಕ್ಕೆ ನಿಮ್ಮ ಟೀಕೆ ಟಿಪ್ಪಣಿ ಸೇರಿಸಿ, ಸಮಸ್ಯೆ ಪರಿಹರಿಸಿ -ಒಟ್ಟಿನಲ್ಲಿ ಕಾವ್ಯಾನಂದರಾಗಿ. ಈಗಿನ ಕಾಲದಲ್ಲಿ ಛಂದಸ್ಸುಬದ್ಧವಾಗಿ ಪದ್ಯ ರಚಿಸುವವರಿದ್ದಾರೆಯೇ? ರಚಿಸುವವರಿರಲಿ, ಓದಿ ಅರ್ಥಮಾಡಿಕೊಳ್ಳುವವರಾದರೂ ಇದ್ದಾರೆಯೇ? ಎಂದು ಆಲೋಚಿಸುತ್ತಿದ್ದೀರಾ? ಈ ಜಾಲತಾಣಕ್ಕೊಮ್ಮೆ ಭೇಟಿ ನೀಡಿ. ಛಂದಸ್ಸನ್ನು ಅರ್ಥಮಾಡಿಕೊಳ್ಳುವುದು ಮಾತ್ರವಲ್ಲ ಛಂದೋಬದ್ಧವಾಗಿ ಪದ್ಯ ರಚಿಸುವವರೂ ಇಲ್ಲಿದ್ದಾರೆ.

ಡೌನ್‌ಲೋಡ್

ಗಣಕದಲ್ಲೊಂದು ಪೆನ್ಸಿಲ್

ಒಂದಾನೊಂದು ಕಾಲದಲ್ಲಿ ಪೆನ್ಸಿಲ್ ಬಳಸಿ ಚಿತ್ರ ರಚಿಸಿದ್ದೀರಾ? ಪೆನ್ಸಿಲ್ ಚಿತ್ರಗಳೆಂದರೆ ನಿಮಗೆ ಅಚ್ಚುಮೆಚ್ಚೇ? ಮನೆ ಮನೆಗೂ ಗಣಕ ಬಂದರೇನಂತೆ ಈಗಲೂ ಪೆನ್ಸಿಲ್ ಚಿತ್ರ ನಿಮ್ಮ ಹವ್ಯಾಸವೇ? ಈ ಎಲ್ಲ ಪ್ರಶ್ನೆಗಳಿಗೆ ನಿಮ್ಮ ಉತ್ತರ ಹೌದು ಎಂದಾದಲ್ಲಿ ನಿಮಗೆ ಪೆನ್ಸಿಲ್ ತಂತ್ರಾಂಶ ಬೇಕು. ಇದನ್ನು ಕೇವಲ ಪೆನ್ಸಿಲ್ ಚಿತ್ರಗಳಿಗೆ ಮಾತ್ರವಲ್ಲ, ಹೀಗೆ ತಯಾರಿಸಿದ ಚಿತ್ರಗಳನ್ನು ಜೋಡಿಸಿ ಚಿತ್ರಸಂಚಲನೆ (ಅನಿಮೇಶನ್) ತಯಾರಿಸಲೂ ಬಳಸಬಹುದು. ಈ ತಂತ್ರಾಂಶ ಬೇಕಿದ್ದಲ್ಲಿ ನೀವು ಭೇಟಿ ನಿಡಬೇಕಾದ ಜಾಲತಾಣ www.pencil-animation.org. ಇದೊಂದು ಮುಕ್ತ ತಂತ್ರಾಂಶ. ಅಂದರೆ ಇದನ್ನು ನೀವು ಕೂಡ ಸುಧಾರಿಸಬಹುದು.

e - ಸುದ್ದಿ

ಕಮೆಂಟ್‌ಗಳಿಗಂಜಬೇಕಿಲ್ಲವಯ್ಯಾ

ಹಿಂದೊಮ್ಮೆ ನಾನು ಕಂಪ್ಯೂತರ್ಲೆಯಲ್ಲಿ ಬರೆದಿದ್ದೆ "ಕಮೆಂಟ್‌ಗಳಿಗೆ ಹೆದರಿ ಬ್ಲಾಗನ್ನೇ ನಿಲ್ಲಿಸಿದರಂತೆ" ಎಂದು. ಇದೀಗ ಇಟಲಿಯಿಂದ ಬಂದ ಸುದ್ದಿ: ಅಂತರಜಾಲತಾಣಗಳ ಸಂಪಾದಕರುಗಳು ಅಲ್ಲಿಯ ಲೇಖನ/ಬ್ಲಾಗುಗಳಿಗೆ ಓದುಗರು ದಾಖಲಿಸುವ ಕಮೆಂಟುಗಳಿಗೆ ಹೊಣೆಗಾರರಾಗುವುದಿಲ್ಲ ಎಂದು. ಇದನ್ನು ಸ್ವಲ್ಪ ವಿವರಿಸಿಬೇಕು. ಒಬ್ಬಾತ ಜಾಲತಾಣವೊಂದರಲ್ಲಿ ಲೇಖನ ಅಥವಾ ಬ್ಲಾಗ್ ಬರೆಯುತ್ತಾನೆ. ಅದರ ಕೆಳಗೆ ಓದುಗರು ತಮ್ಮ ಕಮೆಂಟ್ (ಟೀಕೆ ಟಿಪ್ಪಣಿ) ದಾಖಲಿಸುತ್ತಾರೆ. ಈ ಟೀಕೆ ಕೆಲವೊಮ್ಮೆ ತೀಕ್ಷ್ಣವಾಗಿರುವುದು ಮಾತ್ರವಲ್ಲ ಇನ್ಯಾರದೋ ಮಾನ ಹರಾಜು ಮಾಡುವಂತದ್ದೂ ಆಗಿರಬಹುದು. ಅಂತಹ ಸಂದರ್ಭಗಳಲ್ಲಿ ಆ ಜಾಲತಾಣದ ಸಂಪಾದಕರ ಮೇಲೆ ನ್ಯಾಯಾಲಯದಲ್ಲಿ ಮಾನನಷ್ಟ ಮೊಕದ್ದಮೆ ಹೂಡಿ ಪರಿಹಾರ ವಸೂಲಿ ಮಾಡಲಾಗುತ್ತಿತ್ತು. ಟೀಕೆಗಳಿಗೆ ಜಾಲತಾಣದ ಸಂಪಾದಕ ಹೊಣೆಯಲ್ಲ ಎಂದು ಇದೀಗ ಇಟಲಿ ದೇಶದ ಸರ್ವೋಚ್ಚ ನ್ಯಾಯಾಲಯ ತೀರ್ಪು ನೀಡಿದೆ.    

e- ಪದ

ಕಿನೆಕ್ಟ್ (Kinect) - ಮೈಕ್ರೋಸಾಫ್ಟ್ ಕಂಪೆನಿ ತಯಾರಿಸಿರುವ ಆಟ ಆಡುವ ಒಂದು ಸಾಧನ. ಇಂತಹ ಆಟದ ಸಾಧನಗಳಿಗೆ ಇಂಗ್ಲಿಶಿನಲ್ಲಿ gaming console ಎನ್ನುತ್ತಾರೆ. ಇದರ ವೈಶಿಷ್ಟ್ಯವೆಂದರೆ ಇದು ದೇಹದ ಚಲನವಲನವನ್ನು ಅರ್ಥ ಮಾಡಿಕೊಳ್ಳುತ್ತದೆ. ಸಾಮಾನ್ಯವಾಗಿ ಇಂತಹ ಕನ್ಸೋಲ್‌ಗಳಿಗಿರುವಂತೆ ಇದಕ್ಕೆ ಜೋಯ್‌ಸ್ಟಿಕ್ ಇಲ್ಲ. ಕೈ, ಮುಖ ಅಥವಾ ಇಡಿಯ ದೇಹವನ್ನೇ ಕುಣಿಸಿದರೆ ಕಿನೆಕ್ಟ್ ಅದನ್ನು ಅರ್ಥ ಮಾಡಿಕೊಂಡು ಅದರಂತೆ ಆಟ ಆಡುತ್ತದೆ. ಉದಾಹರಣೆಗೆ ಆಟದಲ್ಲಿ ಬೆಂಕಿ ಎದುರಾಗಿದೆ ನೀವು ಅದರ ಮೇಲಿಂದ ನೆಗೆಯಬೇಕು ಎಂದಾದಲ್ಲಿ ನೀವು ನಿಂತಲ್ಲಿಯೇ (ಅಂದರೆ ಕಿನೆಕ್ಟ್ ಮುಂದೆ) ಕುಪ್ಪಳಿಸಬೇಕು. ಕಿನೆಕ್ಟ್‌ನಲ್ಲಿರುವ ಕ್ಯಾಮರಾ ಅದನ್ನು ಅರ್ಥಮಾಡಿಕೊಂಡು ಆಟದಲ್ಲಿರುವ ವ್ಯಕ್ತಿಯನ್ನು (ನಿಮ್ಮ ಪ್ರತಿನಿಧಿ) ಕುಣಿಸುತ್ತದೆ.

e - ಸಲಹೆ

ಟಿ. ಆರ್. ಪ್ರಕಾಶರ ಪ್ರಶ್ನೆ: ನನಗೊಂದು ಕನ್ನಡದ ಜಾಲತಾಣ (ವೆಬ್‌ಸೈಟ್) ನಿರ್ಮಿಸಬೇಕಾಗಿದೆ. ಹೇಗೆ ಎಂದು ಸಲಹೆ ನೀಡುತ್ತೀರಾ?
ಉ: ಮೊದಲು ನಿಮ್ಮ ಹೆಸರಿನಲ್ಲಿ ಒಂದು ಡೊಮೈನ್ ನೇಮ್ (ಜಾಲತಾಣ ಹೆಸರು) ನೋಂದಾಯಿಸಿಕೊಳ್ಳಿ. ಅನಂತರ blogger.com ಅಥವಾ wordpress.com ಜಾಲತಾಣದಲ್ಲಿ ಒಂದು ಖಾತೆ ತೆರೆಯಿರಿ. ನಿಮ್ಮ ಡೊಮೈನ್ ಹೆಸರನ್ನು ಈ ಖಾತೆಗೆ ನೇಮಿಸಿ.

ಕಂಪ್ಯೂತರ್ಲೆ

ಮೈಕ್ರೋಸಾಫ್ಟ್‌ನವರು ಗಣಕದ ಕಾರ್ಯಾಚರಣೆಯ ವ್ಯವಸ್ಥೆಯನ್ನು ಎಷ್ಟು ಸುಲಭ ಮತ್ತು ಸರಳಗೊಳಿಸಿದರೆಂದರೆ ಜನರೆಲ್ಲ ಗಣಕವನ್ನೇ ಬಳಸಿ ದೇಹಕ್ಕೆ ವ್ಯಾಯಾಮವೇ ಇಲ್ಲದಾಗಿದೆ. ಈ ಸಮಸ್ಯೆಯನ್ನು ಪರಿಹರಿಸಲು ಮೈಕ್ರೋಸಾಫ್ಟ್‌ನವರೇ ಕಿನೆಕ್ಟ್ ಅನ್ನು ತಯಾರಿಸಿದ್ದಾರೆ. ಅದರ ಮುಂದೆ ಕುಣಿದು ಕುಪ್ಪಳಿಸಿ ದೇಹದ ಕೊಬ್ಬು ಕರಗಿಸಬಹುದು.

ಗುರುವಾರ, ಡಿಸೆಂಬರ್ 1, 2011

ಗಣಕಿಂಡಿ - ೧೩೨ (ನವಂಬರ್ ೨೮, ೨೦೧೧)

ಅಂತರಜಾಲಾಡಿ

ಕನ್ನಡ ಪದಬಂಧ

ಪತ್ರಿಕೆಗಳಲ್ಲಿ ಬರುವ ಪದಬಂಧ ನೋಡದವರಾರು? ಕೆಲವು ಮನೆಗಳಲ್ಲಂತೂ ಪದಬಂಧ ಬಿಡಿಸುವ ವಿಷಯದಲ್ಲಿ ನಾನು ತಾನು ಎಂದು ಜಗಳಗಳೇ ನಡೆಯುತ್ತದೆ. ಪತ್ರಿಕೆಯಲ್ಲಿ ಪದಬಂಧ ಬಿಡಿಸಬೇಕಾದರೆ ಪೆನ್ಸಿಲ್ ತೆಗೆದುಕೊಂಡು ಬರೆಯಬೇಕು, ಬರೆದುದನ್ನು ಅಳಿಸಿ ಬರೆಯಬೇಕು, ಹೀಗೆ ನಡೆಯುತ್ತದೆ. ಯಾವುದಾದರೊಂದು ಚೌಕದಲ್ಲಿ ತುಂಬಿಸಬೇಕಾದ ಅಕ್ಷರ ಏನು ಇರಬಹುದು ಎಂಬ ಸುಳುಹು ನೀಡಲು ಅಸಾಧ್ಯ. ಆದರೆ ಗಣಕ ಅಥವಾ ಅಂತರಜಾಲ ಮೂಲಕ ಪದಬಂಧ ಮಾಡಿದರೆ ಅದರಲ್ಲಿ ಈ ರೀತಿಯ ಹೆಚ್ಚಿನ ಸೌಕರ್ಯ ನೀಡಲು ಸಾಧ್ಯ. ಅಡ್ಡ ನೀಟ ಸುಳುಹುಗಳಲ್ಲದೆ, ಪ್ರತಿಯೊಂದು ಚೌಕಕ್ಕೂ ಪ್ರತ್ಯೇಕ ಸುಳುಹು ಅಥವಾ ಉತ್ತರ ನೀಡಬಹುದು. ಇಂಗ್ಲಿಶ್ ಭಾಷೆಯಲ್ಲಿ ಇಂತಹ ಪದಬಂಧಗಳನ್ನು ನೀಡುವ ಜಾಲತಾಣಗಳು ಬೇಕಾದಷ್ಟಿವೆ. ಕನ್ನಡದಲ್ಲಿ? ಹೌದು. ಈಗ ಕನ್ನಡ ಭಾಷೆಯಲ್ಲೂ ಅಂತರಜಾಲ ಮೂಲಕ ಪದಬಂಧ ಬಿಡಿಸಬಹುದು. ಅದಕ್ಕಾಗಿ ನೀವು www.indicross.com ಜಾಲತಾಣಕ್ಕೆ ಭೇಟಿ ನೀಡಬೇಕು.

ಡೌನ್‌ಲೋಡ್

ಕನ್ನಡ ನಿಘಂಟು

ಕಿಟ್ಟೆಲ್ ಅವರಿಂದ ಪ್ರಾರಂಭಿಸಿ ಜಿವಿಯವರ ತನಕ ಹಲವಾರು ನಿಘಂಟುಗಳು ಕನ್ನಡದಲ್ಲಿ ಬಂದಿವೆ. ಕೆಲವು ನಿಘಂಟುಗಳನ್ನು ಅಂತರಜಾಲ ತಾಣಗಳ ಮೂಲಕವೂ ಬಳಸಬಹುದು (ಉದಾ - baraha.com, kanaja.in). ಬರಹ ಜಾಲತಾಣದಲ್ಲಿ ನೀಡಿರುವ ನಿಘಂಟನ್ನು ಅಂತರಜಾಲತಾಣದ ಮೂಲಕ ಬಳಸಬಹುದು. ಅದನ್ನು ನಿಮ್ಮ ಗಣಕದಲ್ಲೇ ಅನುಸ್ಥಾಪಿಸಬಲ್ಲ ಒಂದು ತಂತ್ರಾಂಶ ಸವಲತ್ತಿನ ಮೂಲಕ ಬಳಸುವಂತಿದ್ದರೆ ಒಳ್ಳೆಯದು ಅನ್ನಿಸಬಹುದಲ್ಲವೇ? ಹೌದು ಅಂತಹ ಒಂದು ತಂತ್ರಾಂಶ ಸವಲತ್ತನ್ನು ಅಜೇಯ ಎಂಬವರು ತಯಾರಿಸಿದ್ದಾರೆ. ಇದು ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ bit.ly/rLM40n. ಇವರು ಈ ತಂತ್ರಾಂಶವನ್ನು ಮುಕ್ತ ಪರವಾನಗಿಯಲ್ಲಿ ನೀಡಿದ್ದಾರೆ. ಅಂದರೆ ತಂತ್ರಾಂಶದ ಮೂಲ ಆಕರಕ್ರಮವಿಧಿಯೂ ಡೌನ್‌ಲೋಡ್ ಮಾಡಿಕೊಳ್ಳಲು ಲಭ್ಯ. ಅಷ್ಟೇ ಅಲ್ಲ, ಇದು ಜಾಗತಿಕ ಶಿಷ್ಟತೆಯಾಗಿರುವ ಯುನಿಕೋಡ್‌ನಲ್ಲಿದೆ.

e - ಸುದ್ದಿ

ಅವಸಾನವಿಲ್ಲದ ಬ್ಯಾಟರಿ

ನಾವು ಬಳಸುವ ಬ್ಯಾಟರಿ ಸೆಲ್‌ಗಳಲ್ಲಿ ಎರಡು ವಿಧ. ಒಮ್ಮೆ ಉಪಯೋಗಿಸಿ ಎಸೆಯುವಂತದ್ದು ಮತ್ತು ಮತ್ತೆ ಮತ್ತೆ ರಿಚಾರ್ಜ್ ಮಾಡಿ ಬಳಸುವಂತದ್ದು. ಈ ರಿಚಾರ್ಜ್ ಮಾಡಬಹುದಾದ ಬ್ಯಾಟರಿಗಳು ಎಂದೆಂದಿಗೂ ರಿಚಾರ್ಜ್ ಮಾಡಬಲ್ಲವೇನೂ ಅಲ್ಲ. ಸಾಮಾನ್ಯವಾಗಿ ೨೫೦ರಿಂದ ೪೦೦ ಸಲ ರಿಚಾರ್ಜ್ ಮಾಡಬಹುದು. ಆದರೆ ಈಗ ಸ್ಟ್ಯಾನ್‌ಫೋರ್ಡ್ ವಿಶ್ವವಿದ್ಯಾಲಯದ ಸಂಶೋಧಕರು ೪೦,೦೦೦ ಸಲ ರಿಚಾರ್ಜ್ ಮಾಡಬಹುದಾದ ಬ್ಯಾಟರಿ ಸೆಲ್ ಸಂಶೋಧಿಸಿದ್ದಾರೆ.  

e- ಪದ

ಧ್ವನಿಯಿಂದ ಪಠ್ಯಕ್ಕೆ (speech to text) - ಧ್ವನಿಮುದ್ರಿತ ಅಥವಾ ನೇರವಾಗಿ ಬರುತ್ತಿರುವ ಧ್ವನಿಯನ್ನು ಪಠ್ಯ ರೂಪಕ್ಕೆ ಪರಿವರ್ತಿಸುವ ತಂತ್ರಾಂಶ. ಧ್ವನಿಯಿಂದ ಪಠ್ಯಕ್ಕೆ ಪರಿವರ್ತಿಸುವ ತಂತ್ರಾಂಶ ಸರಿಯಾಗಿ ಕೆಲಸ ಮಾಡಬೇಕಾದರೆ ಅದಕ್ಕೆ ಚೆನ್ನಾಗಿ ತರಬೇತಿ ನೀಡಬೇಕು. ಕಾರ್ಯದರ್ಶಿಗೆ ಪತ್ರವನ್ನು ಬಾಯಿಯಲ್ಲಿ ಹೇಳಿ ಆಕೆ ಅದನ್ನು ಶಾರ್ಟ್‌ಹ್ಯಾಂಡ್ ರೂಪದಲ್ಲಿ ಬರೆದುಕೊಂಡು ನಂತರ ಅದನ್ನು ಬೆರಳಚ್ಚು ಮಾಡಿ ಪತ್ರ ತಯಾರುಮಾಡುವ ಕಾಲ ಹಳೆಯದಾಯಿತು. ಈಗ ಈ ಕೆಲಸವನ್ನು ಧ್ವನಿಯಿಂದ ಪಠ್ಯಕ್ಕೆ ಪರಿವರ್ತಿಸುವ ತಂತ್ರಾಂಶ ಮಾಡುತ್ತದೆ.

e - ಸಲಹೆ

ಶ್ರೀನಿಧಿ ಡಿ. ಎಸ್. ಅವರ ಪ್ರಶ್ನೆ: ವೀಡಿಯೋದಲ್ಲಿ ಅಡಕವಾಗಿರುವ ಧ್ವನಿಯನ್ನು ಪಠ್ಯವಾಗಿ ಪರಿವರ್ತಿಸುವ ತಂತ್ರಾಂಶ ಇದೆಯೇ?
ಉ: ಇಂಗ್ಲಿಶ್ ಭಾಷೆಗೆ ತುಂಬ ಇವೆ. ಉದಾ - Dragon ಎಂಬ ವಾಣಿಜ್ಯಕ ತಂತ್ರಾಂಶ (nuance.com). ಉಚಿತ ತಂತ್ರಾಂಶ ಬೇಕಿದ್ದಲ್ಲಿ www.deskshare.com ಜಾಲತಾಣಕ್ಕೆ ಭೇಟಿ ನೀಡಿ Dictation Pro ಎಂಬ ತಂತ್ರಾಂಶವನ್ನು ಡೌನ್‌ಲೋಡ್ ಮಾಡಿಕೊಳ್ಳಿ. ಕನ್ನಡಕ್ಕೆ ಇನ್ನೂ ಇಂತಹ ತಂತ್ರಾಂಶ ತಯಾರಾಗಿಲ್ಲ.

ಕಂಪ್ಯೂತರ್ಲೆ

ಗಣಕವಾಡು

ಓದಿ ಕಮೆಂಟ್ ಮಾಡುವವ ಉತ್ತಮನು
ಓದಿಯೂ ಕಮೆಂಟ್ ಮಾಡದವ ಮಧ್ಯಮನು
ಓದದಲೆ ಕಮೆಂಟ್ ಮಾಡುವವ ತಾನಧಮ ಗಣಕಜ್ಞ

ಸೋಮವಾರ, ನವೆಂಬರ್ 21, 2011

ಗಣಕಿಂಡಿ - ೧೩೧ (ನವಂಬರ್ ೨೧, ೨೦೧೧)

ಅಂತರಜಾಲಾಡಿ

ಉಚಿತ ಗಣಿತ

ಗಣಿತ ಎಂದರೆ ಕಬ್ಬಿಣದ ಕಡಲೆ ಎನ್ನುವವರು ಬಹುಮಂದಿ. ಗಣಿತ ಎಂದರೆ ಸುಲಲಿತ ಎನ್ನುವರೂ ಇದ್ದಾರೆ. ಗಣಿತವನ್ನು ಕಲಿಸಲು ನೂರಾರು ಜಾಲತಾಣಗಳಿವೆ. ಹೆಚ್ಚಿನವು ಇಂಗ್ಲಿಶಿನಲ್ಲಿವೆ. ಕನ್ನಡದಲ್ಲಿ? ಅದೂ ಇದೆ. ಹೌದು ಕನ್ನಡ ಭಾಷೆಯಲ್ಲಿ ಗಣಿತವನ್ನು ಹೇಳಿಕೊಡುವ ಜಾಲತಾಣ www.freeganita.com. ಇದು ಸಂಪೂರ್ಣ ಉಚಿತ. ಪ್ರೌಢಶಾಲೆಯ ಪಠ್ಯಪುಸ್ತಕದಲ್ಲಿರುವ ಕೆಲವು ಸಮಸ್ಯೆಗಳು, ಪರಿಹಾರಗಳು, ಇತರೆ ವಿಷಯಗಳು ಇಲ್ಲಿವೆ. ಜೊತೆಗೆ ಪಠ್ಯದಲ್ಲಿಲ್ಲದ ಕೆಲವು ವಿಷಯಗಳೂ ಇವೆ. ವಿದ್ಯಾರ್ಥಿಗಳಿಗೂ ಅಧ್ಯಾಪಕರುಗಳಿಗೂ ಉಪಯುಕ್ತ ಜಾಲತಾಣ. ಕೊಂಡುಕೊಳ್ಳಲು ಡಿವಿಡಿಯೂ ಲಭ್ಯವಿದೆ.

ಡೌನ್‌ಲೋಡ್

ಟಚ್‌ಪ್ಯಾಡ್ ನಿರ್ಬಂಧಿಸಿ

ಲ್ಯಾಪ್‌ಟಾಪ್ ಗಣಕಗಳಲ್ಲಿರುವ ಟಚ್‌ಪ್ಯಾಡ್ ತುಂಬ ಉಪಯುಕ್ತ ಸಾಧನ. ಇದನ್ನು ಮೌಸ್ ರೀತಿಯಲ್ಲಿ ಬಳಸಬಹುದು ಮಾತ್ರವಲ್ಲ ಬಹುಪಾಲು ಸಮಯ ಹಾಗೆಯೇ ಬಳಸಲಾಗುತ್ತದೆ. ಇದರ ಮೇಲೆ ಬೆರಳು ಅಥವಾ ಅಂಗೈ ಇಟ್ಟರೆ ಅದು ಅದನ್ನು ಅರ್ಥೈಸಿಕೊಂಡು ಕೆಲಸ ಮಾಡುತ್ತದೆ. ಅಂದರೆ ಒಂದು ಕಡೆಯಿಂದ ಇನ್ನೊಂದು ಕಡೆಗೆ ಕರ್ಸರ್ ಅನ್ನು ತೆಗೆದುಕೊಂಡು ಹೋಗಲು ಇದನ್ನು ಬಳಸಬಹುದು. ಆದರೆ ಬೆರಳಚ್ಚು ಮಾಡುತ್ತಿರುವಾಗ ಕೈ ಅಥವಾ ಬೆರಳು ಇದಕ್ಕೆ ತಗುಲಿದರೆ ಕರ್ಸರ್ ಇನ್ನೆಲ್ಲಿಗೋ ಧುಮುಕಿ ತೊಂದರೆಯಾಗುತ್ತದೆ. ಪ್ರತ್ಯೇಕ ಮೌಸ್ ಇದ್ದರಂತೂ ಈ ಟಚ್‌ಪ್ಯಾಡ್‌ನ ಅಗತ್ಯವೇ ಇಲ್ಲ. ಈ ಟಚ್‌ಪ್ಯಾಡ್ ಅನ್ನು ತಾತ್ಕಲಿಕವಾಗಿ ನಿರ್ಬಂಧಿಸಲು ಅನುವು ಮಾಡಿಕೊಡುವ ತಂತ್ರಾಂಶ ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ touchpad-blocker.com.

e - ಸುದ್ದಿ

ಬ್ಲಾಗಿಸಿದ್ದಕ್ಕೆ ಹತ್ಯೆ

ಮೆಕ್ಸಿಕೊದಲ್ಲಿ ಮಾದಕ ವಸ್ತುಗಳ ದಂಧೆ ದೊಡ್ಡ ಮಟ್ಟದಲ್ಲಿ ನಡೆಯುತ್ತದೆ. ಅದನ್ನು ಅವಲಂಬಿಸಿ ರಹಸ್ಯ ತಂಡಗಳು ಕೆಲಸ ಮಾಡುತ್ತಿವೆ. ಅವು ತುಂಬ ಅಪಾಯಕಾರಿ. ಮನುಷ್ಯರ ಜೀವದ ಜೊತೆ ಚೆಲ್ಲಾಡುವುದು ಅವರಿಗೆ ಅತಿ ಸಹಜ. ಇಂತಹ ತಂಡಗಳನ್ನು ವಿರೋಧಿಸಿ ಕೆಲಸ ಮಾಡುವ ಸ್ವಸಹಾಯ ಸಂಸ್ಥೆ, ವ್ಯಕ್ತಿಗಳೂ ಇದ್ದಾರೆ. ಅಂತಹ ಕೆಲವರು ಝೀಟ ಹೆಸರಿನ ತಂಡದ ಚಟುವಟಿಕೆಗಳನ್ನು ವರದಿ ಮಾಡಲೆಂದೇ ಒಂದು ಬ್ಲಾಗ್ ತಯಾರಿಸಿದ್ದರು. ಅದರಲ್ಲಿ ಆಗಾಗ ಸುದ್ದಿಗಳನ್ನು ನೀಡುತ್ತಿದ್ದರು. ಎಲ್ಲೆಲ್ಲಿ ಈ ತಂಡವು ಕೆಲಸ ಮಾಡುತ್ತಿದೆ, ಅದರ ಚಟುವಟಿಕೆಗಳೇನು, ಅದು ಎಷ್ಟು ಸಮಾಜ ವಿರೋಧಿ, ಎಂದೆಲ್ಲ ಬ್ಲಾಗ್ ಬರೆಯುತ್ತಿದ್ದರು. ಈ ರೀತಿ ಬ್ಲಾಗಿಸುತ್ತಿದ್ದ ನಾಲ್ಕು ಮಂದಿಯನ್ನು ಸಪ್ಟೆಂಬರ್ ತಿಂಗಳಿನಿಂದ ಕಳೆದ ವಾರದ ತನಕದ ಸಮಯದಲ್ಲಿ ಕೊಲ್ಲಲಾಗಿದೆ. ಪತ್ರಿಕೆಗಳಲ್ಲಿ ಗೂಂಡಾಗಳ ವಿರುದ್ಧ ಬರೆದು ಜೀವ ಕಳಕೊಂಡವರು ಹಲವರಿದ್ದಾರೆ. ಈಗ ಬ್ಲಾಗ್ ಬರೆದು ಜೀವ ಕಳಕೊಂಡವರ ಕಾಲ.

e- ಪದ

ಕೀಲಿ ಲೆಕ್ಕಿಗ (keylogger) - ಗಣಕದ ಕೀಲಿಮಣೆಯಲ್ಲಿ ಯಾವಯಾವ ಕೀಲಿಗಳನ್ನು ಒತ್ತಲಾಗುತ್ತಿದೆ ಎಂದು ದಾಖಲಿಸಿಟ್ಟುಕೊಳ್ಳುವ ತಂತ್ರಾಂಶ. ಸಾಮಾನ್ಯವಾಗಿ ಇಂತಹ ತಂತ್ರಾಂಶಗಳನ್ನು ಕಂಪೆನಿಗಳಲ್ಲಿ ತಮ್ಮ ಉದ್ಯೋಗಿಗಳು ಗಣಕದಲ್ಲಿ ಏನೇನು  ಮಾಡುತ್ತಿದ್ದಾರೆ ಎಂದು ಗೂಢಚರ್ಯೆ ನಡೆಸಲು ಬಳಸುತ್ತಾರೆ. ಇಂತಹ ತಂತ್ರಾಂಶಗಳನ್ನೊಳಗೊಂಡ ಗೂಢಚರ್ಯೆಯ ತಂತ್ರಾಂಶಗಳು ತುಂಬ ಅಪಾಯಕಾರಿ. ಅವು ಕೀಲಿಮಣೆಯಲ್ಲಿ ಒತ್ತಿದ ಎಲ್ಲ ಕೀಲಿಗಳನ್ನು ಅಂದರೆ ರಹಸ್ಯಪದ (ಪಾಸ್‌ವರ್ಡ್), ಬ್ಯಾಂಕಿಂಗ್ ಸಂಬಂಧಪಟ್ಟ ಎಲ್ಲ ಮಾಹಿತಿ, ಇತ್ಯಾದಿಗಳನ್ನು ಇನ್ಯಾರಿಗೋ ಇಮೈಲ್ ಮೂಲಕ ಕಳುಹಿಸುತ್ತವೆ. ಆದುದರಿಂದ ಉತ್ತಮ ವೈರಸ್ ನಿರೋಧಕ ತಂತ್ರಾಂಶವನ್ನು ಬಳಸಿ ನಿಮ್ಮ ಗಣಕದಲ್ಲಿ ಇಂತಹ ತಂತ್ರಾಂಶಗಳು ಇಲ್ಲ ಎಂದು ಆಗಾಗ ಖಾತರಿಸಿಕೊಳ್ಳುವುದು ಅತೀ ಅಗತ್ಯ.

e - ಸಲಹೆ

ಪ್ರ: ನನಗೆ ಅಟೋಕ್ಯಾಡ್ (AutoCAD) ಪೂರ್ತಿ ಆವೃತ್ತಿ ಡೌನ್‌ಲೋಡ್ ಮಾಡಿಕೊಳ್ಳಬೇಕಾಗಿದೆ. ಎಲ್ಲಿ ಸಿಗುತ್ತದೆ?
ಉ: ಅದು ಉಚಿತ ತಂತ್ರಾಂಶ ಅಲ್ಲ. ಅದನ್ನು ಹಣ ನೀಡಿ ಕೊಂಡುಕೊಳ್ಳಬೇಕು.

ಕಂಪ್ಯೂತರ್ಲೆ

ಕೋಲ್ಯನ ಗಣಕಕ್ಕೆ ಏನೋ ತೊಂದರೆ ಆಗಿತ್ತು. ಪರಿಣತನಿಂದ ಪರೀಕ್ಷಿಸಿದ. ಆತ ಹೇಳಿದ - "ನಿನ್ನ ಕಂಪ್ಯೂಟರಿನಲ್ಲಿ worm ಇದೆ". ಅಕ್ಕಿಯಲ್ಲಿ ಹುಳವಾದಾಗ ಅಥವಾ ಹುಳ ಆಗದೆ ಇರಲಿ ಎಂದು ಅಕ್ಕಿ ಡಬ್ಬದೊಳಗೆ ಬೇವಿನ ಎಲೆಗಳನ್ನು ಹಾಕುವುದನ್ನು ತಿಳಿದಿದ್ದ ಕೋಲ್ಯ, ತನ್ನ ಗಣಕದೊಳಗೆ ಒಂದಿಷ್ಟು ಬೇವಿನ ಎಲೆಗಳನ್ನು ತುಂಬಿಸಿದ.

ಸೋಮವಾರ, ನವೆಂಬರ್ 14, 2011

ಗಣಕಿಂಡಿ - ೧೩೦ (ನವಂಬರ್ ೧೪, ೨೦೧೧)

ಅಂತರಜಾಲಾಡಿ

ಕನ್ನಡದಲ್ಲಿ ಗ್ಯಾಜೆಟ್ ಲೋಕ

ಗ್ಯಾಜೆಟ್‌ಗಳು ಪ್ರತಿಯೊಬ್ಬರ ಜೀವನದ ಅವಿಭಾಜ್ಯ ಅಂಗವಾಗಿವೆ. ಹಳ್ಳಿಹಳ್ಳಿಗಳಿಗೂ ಅವು ತಲುಪಿವೆ. ಸೂರ್ಯೋದಯದಿಂದ ಸೂರ್ಯಾಸ್ತದ ತನಕ ಮಾತ್ರವಲ್ಲ ದಿನದ ಎಲ್ಲ ೨೪ ತಾಸುಗಳಲ್ಲೂ ಅವು ಒಂದಿಲ್ಲ ಒಂದು ರೀತಿಯಲ್ಲಿ ನಮ್ಮೆಲ್ಲರ ಜೀವನವನ್ನು ಹಾಸುಹೊಕ್ಕಿವೆ. ಈ ಗ್ಯಾಜೆಟ್‌ಗಳ ಲೋಕದಲ್ಲೊಂದು ವಿಹಂಗಮ ಯಾತ್ರೆ ನಡೆಸಬೇಕೇ? ಅದಕ್ಕೆಂದೇ ನೂರಾರು ಜಾಲತಾಣಗಳು ಇಂಗ್ಲಿಶ್ ಭಾಷೆಯಲ್ಲಿವೆ. ಕನ್ನಡದಲ್ಲಿ ಇಲ್ಲವೇ ಎನ್ನುತ್ತೀರಾ? ಈಗ ಅದೂ ಸಿದ್ಧವಾಗಿದೆ. kannada.gizbot.com ಜಾಲತಾಣಕ್ಕೆ ಭೇಟಿ ನೀಡಿ ಕನ್ನಡದಲ್ಲೇ ಗ್ಯಾಜೆಟ್‌ಗಳ ಬಗ್ಗೆ ಓದಿ ತಿಳಿಯಬಹುದು. ಸದ್ಯಕ್ಕೆ ಗಣಕ, ಮೊಬೈಲ್ ಮತ್ತು ಸಂಗೀತದ ಗ್ಯಾಜೆಟ್‌ಗಳ ವಿಭಾಗಗಳಿವೆ. ಮುಂದಕ್ಕೆ ಇನ್ನೂ ಹೆಚ್ಚು ಹೆಚ್ಚು ವಿಭಾಗಗಳು ಸೇರಿಕೊಳ್ಳಬಹುದು ಎಂದು ಆಶಿಸಬಹುದು.

ಡೌನ್‌ಲೋಡ್

ಆಲಿಸಿರಿ ಮತ್ತು ಟೈಪಿಸಿರಿ

ನೀವೊಬ್ಬ ಪತ್ರಿಕಾರ್ತ. ಒಬ್ಬ ಅತಿ ಗಣ್ಯ ವ್ಯಕ್ತಿಯ ಸಂದರ್ಶನವನ್ನು ನಿಮ್ಮ ಚಿಕ್ಕ ಎಂಪಿ-೩ ಪ್ಲೇಯರ್ ಬಳಸಿ ಧ್ವನಿ ಮುದ್ರಿಸಿಕೊಂಡಿದ್ದೀರಿ. ಅದನ್ನು ಗಣಕಕ್ಕೆ ವರ್ಗಾಯಿಸಿದ್ದೀರಿ. ಗಣಕದಲ್ಲಿರುವ ಯಾವುದಾದರೊಂದು ಬಹುಮಾಧ್ಯಮ ಪ್ಲೇಯರ್ ಬಳಸಿ ಧ್ವನಿಮುದ್ರಿತ ಸಂದರ್ಶನವನ್ನು ಆಲಿಸಿ ಸಂದರ್ಶನದ ಪಠ್ಯ ತಯಾರು ಮಾಡುತ್ತೀರಿ. ಇದರಲ್ಲಿ ಒಂದು ಚಿಕ್ಕ ತೊಡಕಿದೆ. ಸಂದರ್ಶನದ ಧ್ವನಿಮುದ್ರಣವನ್ನು ಸ್ವಲ್ಪ ಆಲಿಸಬೇಕು, ನಿಲ್ಲಿಸಬೇಕು, ಬೆರಳಚ್ಚು ಮಾಡಬೇಕು, ನಂತರ ಮುಂದುವರಿಸಬೇಕು -ಹೀಗೆ ಮಾಡುವಾಗ ಸಾಮಾನ್ಯವಾಗಿ ಪ್ರತಿ ಬಾರಿಯೂ ಒಂದೆರಡು ಸೆಕೆಂಡುಗಳಷ್ಟು ಹಿಂದಕ್ಕೆ ಹೋಗಬೇಕಾಗುತ್ತದೆ. ಹೀಗೆ ಮಾಡಲೆಂದೇ Listen N Write ಹೆಸರಿನ ಒಂದು ತಂತ್ರಾಂಶ ಲಭ್ಯವಿದೆ. ಅದು ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ bit.ly/vl49dk.

e - ಸುದ್ದಿ

ಚೌರ್ಯದ ಕೈಪಿಡಿಯನ್ನೇ ಕದ್ದರೆ?

ಅಂತರಜಾಲದ ಮೂಲಕ ವ್ಯಕ್ತಿಯಿಂದ ವ್ಯಕ್ತಿಗೆ ಯಾವುದೇ ಫೈಲ್ ಹಂಚಿಕೊಳ್ಳಲು ಅನುವು ಮಾಡಿಕೊಡುವ ಜಾಲವ್ಯವಸ್ಥೆ ಬಿಟ್‌ಟೊರೆಂಟ್. ಇದನ್ನು ಬಳಸಿ ಸಂಗೀತ, ಚಲನಚಿತ್ರ, ಪುಸ್ತಕ, ತಂತ್ರಾಂಶ ಇತ್ಯಾದಿಗಳನ್ನು ಜನರು ಕಾನೂನುಬಾಹಿರವಾಗಿ ಹಂಚಿಕೊಳ್ಳುತ್ತಿದ್ದಾರೆ. ಆಗಿಂದಾಗ್ಗೆ ಹೀಗೆ ಹಂಚಿಕೊಳ್ಳುವವರ ಮೇಲೆ ಆಯಾ ಕೃತಿಯ ಹಕ್ಕುಸ್ವಾಮ್ಯವುಳ್ಳವರು ದಾವೆ ಹೂಡುತ್ತಲೇ ಇದ್ದಾರೆ. dummies ಹೆಸರಿನ ಮಾಲಿಕೆಯಲ್ಲಿ ನೂರಾರು ಪುಸ್ತಕಗಳು ತುಂಬ ಜನಪ್ರಿಯವಾಗಿವೆ. ಈ ಮಾಲಿಕೆಯ ಪುಸ್ತಕಗಳನ್ನು ಟೊರೆಂಟ್ ಬಳಸಿ ಹಂಚಿಕೊಂಡವರ ಮೇಲೆ ಈ ಪುಸ್ತಕಗಳ ಪ್ರಕಾಶಕರು ನ್ಯಾಯಾಲಯದಲ್ಲಿ ದಾವೆ ಹೂಡಿದ್ದಾರೆ. ಅಷ್ಟೇ ಆಗಿದ್ದರೆ ಇದು ಇದೇ ಮಾದರಿಯ ಇತರೆ ದಾವೆಗಳಂತೆ ಎಂದುಕೊಳ್ಳಬಹುದಿತ್ತು. ಆದರೆ ಇಲ್ಲೊಂದು ಸ್ವಾರಸ್ಯವಿದೆ. ಈ ಮಾಲಿಕೆಯಲ್ಲಿ Torrent for dummies ಎಂಬ ಪುಸ್ತಕವೂ ಇದೆ! ಕದಿಯುವುದು ಹೇಗೆ ಎಂದು ಕೈಪಿಡಿ ಬರೆದು ಅದನ್ನೇ ಕದ್ದಿದ್ದಾರೆ ಎಂದು ದೂರು ನಿಡಿದಂತಾಗಲಿಲ್ಲವೇ? ಏನಂತೀರಾ? ಅಂದಹಾಗೆ ಟೊರೆಂಟ್ ಮೂಲಕ ಹಂಚುವ ಎಲ್ಲ ಪೈಲ್‌ಗಳೂ ಕಾನೂನುಬಾಹಿರವೇನಲ್ಲ.

e- ಪದ

ಜಾಲಶೋಧಕ (search engine) - ಒಂದು ಪದ ಅಥವಾ ಪದಪುಂಜವನ್ನು ನೀಡಿದರೆ ಅದು ಯಾವ ಕಡತದಲ್ಲಿ ಇದೆ ಎಂದು ಪತ್ತೆ ಹಚ್ಚಿ ಹೇಳುವ ತಂತ್ರಾಂಶ. ಈ ವಿವರಣೆ ಪ್ರಕಾರ ಈ ಪದವನ್ನು ಗಣಕದಲ್ಲಿ ಕೆಲಸ ಮಾಡುವ ಹುಡುಕುವ ಸೌಲಭ್ಯಕ್ಕೆ ಬಳಸಬಹುದು. ಆದರೆ ಬಳಕೆಯಲ್ಲಿ ಈ ಪದವು ಅಂತರಜಾಲದಲ್ಲಿ ಮಾಹಿತಿಯನ್ನು ಹುಡುಕುವ ಜಾಲತಾಣಗಳಿಗೆ (ಉದಾ - ಗೂಗ್ಲ್, ಬಿಂಗ್, ಯಾಹೂ, ಆಲ್ಟಾವಿಸ್ತ,..) ಬಳಕೆಯಾಗುತ್ತಿದೆ.

e - ಸಲಹೆ

ಬನಶಂಕರಿಯ ಟಿ ಆರ್ ಪ್ರಕಾಶರ ಪ್ರಶ್ನೆ: ನನಗೆ ಸಿಬಿಎಸ್‌ಇಯ ಪಠ್ಯ ಪುಸ್ತಕಗಳು ಬೇಕು. ಎಲ್ಲಿ ಸಿಗುತ್ತವೆ?
ಉ: cbse.nic.in ಜಾಲತಾಣದಲ್ಲಿ.

ಕಂಪ್ಯೂತರ್ಲೆ

ಎಲ್ಲರೂ ಕನ್ನಡವನ್ನು ಇಂಗ್ಲಿಶ್ ಲಿಪಿಯಲ್ಲಿ ಬರೆದು ಓದುಗರಿಗೆ ಹಿಂಸೆ ನೀಡುವುದನ್ನು ನೋಡಿ ಸಹಿಸಲಾರದೆ ಕೋಲ್ಯ ಏನು ಮಾಡಿದ ಗೊತ್ತೆ? ಒಂದು ಪುಟದಷ್ಟು ದೊಡ್ಡ ಪೂರ್ತಿ ಇಂಗ್ಲಿಶ್ ಭಾಷೆಯ ಇಮೈಲ್ ಅನ್ನು ಕನ್ನಡ ಲಿಪಿಯಲ್ಲಿ ಬೆರಳಚ್ಚು ಮಾಡಿ ಎಲ್ಲರಿಗೂ ಕಳುಹಿಸಿದ.

ಮಂಗಳವಾರ, ನವೆಂಬರ್ 8, 2011

ಗಣಕಿಂಡಿ - ೧೨೯ (ನವಂಬರ್ ೦೭, ೨೦೧೧)

ಅಂತರಜಾಲಾಡಿ

ಕನ್ನಡದಲ್ಲಿ ಕಂಪ್ಯೂಟರ್

ಮನೆಮನೆಗಳಲ್ಲಿ ಗಣಕ ಸ್ಥಾಪನೆಯಾಗಿರುವ ಈ ಕಾಲದಲ್ಲಿ ಕನ್ನಡ ಭಾಷೆಯಲ್ಲಿ ಗಣಕ ಬಳಸುವ ಬಗ್ಗೆ ಮಾಹಿತಿ ಎಷ್ಟು ಲಭ್ಯವಿದೆ? ಉತ್ತರ ಅಷ್ಟೇನೂ ಆಶಾದಾಯಕವಾಗಿಲ್ಲ. ಕೆಲವೇ ಕೆಲವು ಮಂದಿ ಕನ್ನಡ ಭಾಷೆಯಲ್ಲಿ ಮಾಹಿತಿ ತಂತ್ರಜ್ಞಾನ (ಗಣಕ, ಅಂತರಜಾಲ, ಮೊಬೈಲ್, ಇತ್ಯಾದಿ) ಬಗ್ಗೆ ಮಾಹಿತಿ ನೀಡುತ್ತಿದ್ದಾರೆ. ಅಂತಹ ಒಂದು ಜಾಲತಾಣ www.compuinkannada.co.cc. ಈ ಜಾಲತಾಣದಲ್ಲಿ ಗಣಕ ಎಂದರೇನು, ಅದನ್ನು ಬಳಸುವುದು ಹೇಗೆ, ಕೆಲವು ಉಪಯುಕ್ತ ಸಲಹೆ ಸೂಚನೆಗಳು ಇವೆ. ಹಾಗೆಯೇ ಕೆಲವು ಉಚಿತ ತಂತ್ರಾಂಶಗಳೂ ಇವೆ. ಮಾಹಿತಿ ತಂತ್ರಜ್ಞಾನ ಎಷ್ಟು ಅಗಾಧವಾಗಿ ಬೆಳೆದಿದೆಯೆಂದರೆ ಅದರ ಬಗ್ಗೆ ಸಮಗ್ರ ಮಾಹಿತಿ ನೀಡಲು ಇಂತಹ ಸಾವಿರಾರು ಜಾಲತಾಣಗಳು ಬೇಕಾಗಿವೆ.

ಡೌನ್‌ಲೋಡ್

ಪದ

ಗಣಕದಲ್ಲಿ ಬೆರಳಚ್ಚು ಮಾಡಿ ಆ ಮಾಹಿತಿಯನ್ನು ಉಳಿಸುವುದು, ಸ್ವಲ್ಪ ಮಟ್ಟಿನ ವಿನ್ಯಾಸ ಮಾಡುವುದು (ದಪ್ಪ, ಅಡಿಗೆರೆ, ಓರೆ, ಇತ್ಯಾದಿ), ಇಂತಹ ಎಲ್ಲ ಕೆಲಸಗಳನ್ನು ಮಾಡಲು ಅನುವು ಮಾಡಿಕೊಡುವ ತಂತ್ರಾಂಶಕ್ಕೆ ಪದಸಂಸ್ಕಾರಕ (wordprocessor) ಎಂದು ಹೆಸರು. ಇಂತಹ ತಂತ್ರಾಂಶಗಳು ಹಲವಾರಿವೆ. ಕನ್ನಡದಲ್ಲಿ ಪದಸಂಸ್ಕರಣೆ ಮಾಡಲು ಅನುವು ಮಾಡಿಕೊಡುವ ತಂತ್ರಾಂಶಗಳೂ ಹಲವಾರಿವೆ. ಇಂತಹ ಒಂದು ತಂತ್ರಾಂಶ “ಪದ”. ಇದು ದೊರೆಯುವ ಜಾಲತಾಣ www.pada.co.in. ಇದು ವಿಂಡೋಸ್ ಮಾತ್ರವಲ್ಲ ಲಿನಕ್ಸ್‌ನಲ್ಲೂ ಕೆಲಸ ಮಾಡುತ್ತದೆ. ಒಂದು ಬಹುಮುಖ್ಯ ಸಂಗತಿಯೆಂದರೆ ಇದು ಯುನಿಕೋಡ್‌ನಲ್ಲಿ ಕೆಲಸ ಮಾಡುತ್ತದೆ. ಇದನ್ನು ಕೇವಲ ಕೀಲಿಮಣೆಯ ತಂತ್ರಾಂಶವಾಗಿಯೂ ಬಳಸಬಹುದು. ಅಂದರೆ ಇದನ್ನು ಚಾಲನೆಯಲ್ಲಿಟ್ಟುಕೊಂಡು ಮೈಕ್ರೋಸಾಫ್ಟ್ ವರ್ಡ್‌ನಂತಹ ತಂತ್ರಾಂಶಗಳಲ್ಲಿ ಕನ್ನಡದಲ್ಲಿ ಬೆರಳಚ್ಚು ಮಾಡಬಹುದು. ಇದರಲ್ಲಿ ನೀಡಿರುವ ಇನ್ನೊಂಡದು ಸವಲತ್ತೆಂದರೆ ಕನ್ನಡ ಮತ್ತು ಇತರೆ ಭಾರತೀಯ ಭಾಷೆಗಳ ನಡುವೆ ಲಿಪ್ಯಂತರ ಮಾಡುವುದು. ಈ ತಂತ್ರಾಂಶ ಸದ್ಯಕ್ಕೆ ವಿಂಡೋಸ್‌ನ ೩೨ ಬಿಟ್ ಆವೃತ್ತಿಗಳಲ್ಲಿ ಮಾತ್ರ ಕೆಲಸ ಮಾಡುತ್ತದೆ.

e - ಸುದ್ದಿ

ಅಪ್ಪ ಮಗಳಿಗೆ ಹೊಡೆದರೆ?

೧೬ ವರ್ಷದೊಳಗಿನ ಮಗಳಿಗೆ ಅಪ್ಪ ಹೊಡೆಯುವುದು, ಅದೂ ತಪ್ಪು ಮಾಡಿದಾಗ, ಅಂತಹ ಅಪರಾಧವಲ್ಲ ಎಂದು ನೀವೆಲ್ಲ ಹೇಳಬಹುದು. ಹಾಗೆಂದು ಅಮೆರಿಕಾದ ಒಬ್ಬ ನ್ಯಾಯಾಧೀಶರೂ ಹೇಳಿಕೊಳ್ಳಬಹುದು. ಆದರೆ ಇಲ್ಲಿ ಹೊಡೆದಿದ್ದು ಒಬ್ಬ ನ್ಯಾಯಾಧೀಶರೇ. ಮಗಳು ಅಂತರಜಾಲದಿಂದ ಕೃತಿಚೌರ್ಯ ಮಾಡಿ ಸಂಗೀತ, ಚಲನಚಿತ್ರಗಳನ್ನು ಡೌನ್‌ಲೋಡ್ ಮಾಡಿದ್ದಕ್ಕೆ ಅಪ್ಪ ವಿಧಿಸಿದ ಶಿಕ್ಷೆ ಎಂದರೆ ಬೆಲ್ಟ್ ಮೂಲಕ ಹಲವು ಬಾರಿ ಹೊಡೆತ. ಇದು ನಡೆದುದು ಏಳು ವರ್ಷಗಳ ಹಿಂದೆ. ಈಗ ಆ ಹುಡುಗಿಗೆ ೨೩ ವರ್ಷ ಪ್ರಾಯ. ಆಕೆ ಅಕಸ್ಮಾತ್ ಆ ಪ್ರಕರಣವನ್ನು ವೀಡಿಯೋ ಮಾಡಿಟ್ಟುಕೊಂಡಿದ್ದಳು. ಈಗ ಆಕೆಯ ಅಪ್ಪ ಮತ್ತೊಮ್ಮೆ ನ್ಯಾಯಾಧೀಶರಾಗಲು ಚುನಾವಣೆಗೆ ನಿಂತಿದ್ದಾರೆ. ಮಗಳು ತನಗೆ ಅಪ್ಪ ಹೊಡೆಯುತ್ತಿರುವ ವೀಡಿಯೋವನ್ನು ಅಂತರಜಾಲದಲ್ಲಿ ಹಾಕಿದ್ದಾಳೆ. ಇಂತಹ ಕ್ರೂರಿ ಅಪ್ಪನನ್ನು ಮತ್ತೊಮ್ಮೆ ನ್ಯಾಯಾಧೀಶರನ್ನಾಗಿ ಚುನಾಯಿಸಬೇಡಿ ಎಂದು ಜನರನ್ನು ಕೇಳಿಕೊಳ್ಳುತ್ತಿದ್ದಾಳೆ.

e- ಪದ


ಕಚಡಾತಂತ್ರಾಂಶ (crapware) - ತನ್ನ ಗುಣಮಟ್ಟಕ್ಕಿಂತಲೂ ಅತಿಹೆಚ್ಚು ಗಾತ್ರಕ್ಕೆ (ಕು)ಖ್ಯಾತವಾದ ತಂತ್ರಾಂಶ. ಸಾಮಾನ್ಯವಾಗಿ ಗಣಕ ಕೊಳ್ಳುವಾಗ ಹೆಚ್ಚು ಬಿಲ್ ಮಾಡಲಿಕ್ಕೋಸ್ಕರ ಹಲವಾರು ಅನಗತ್ಯ ಹಾಗೂ ತುಂಬ ಸ್ಥಳವನ್ನು ಮತ್ತು ಮೆಮೊರಿಯನ್ನು ಆಕ್ರಮಿಸಿಕೊಳ್ಳುವ ತಂತ್ರಾಂಶಗಳನ್ನು ಗಣಕದಲ್ಲಿ ಸೇರಿಸುವ ಪರಿಪಾಠ ಕೆಲವರಿಗಿದೆ. ಇವುಗಳನ್ನೆಲ್ಲ ಕಚಡಾತಂತ್ರಾಂಶಗಳ ಪಟ್ಟಿಗೆ ಸೇರಿಸಬಹುದು.  

e - ಸಲಹೆ

ಯೋಗೇಶರ ಪ್ರಶ್ನೆ: ನನಗೆ ಪ್ರಕಾಶಕ ತಂತ್ರಾಂಶ ಬೇಕು. ಎಲ್ಲಿ ಸಿಗುತ್ತದೆ?
ಉ: ಅದು ತುಂಬ ಹಳೆಯ ತಂತ್ರಾಂಶ. ಈಗ ಅದು ಲಭ್ಯವಿಲ್ಲ. ಅಂತರಜಾಲದಲ್ಲಿ ಕೆಲವು ಜಾಲತಾಣಗಳಲ್ಲಿ ಸಿಗಬಹುದು. ಆದರೆ ಅದು ಅಧಿಕೃತವಲ್ಲ. ಅಷ್ಟೆಲ್ಲ ಕಸರತ್ತು ಮಾಡಿ ಅದು ನಿಮಗೆ ದೊರೆತರೂ ಈಗಿನ ವಿಂಡೋಸ್ ಆವೃತ್ತಿಗಳಲ್ಲಿ ಅದು ಕೆಲಸ ಮಾಡುವುದು ಅನುಮಾನ.

ಕಂಪ್ಯೂತರ್ಲೆ

ಕೋಲ್ಯ ಕಚೇರಿಗೆ ಹೋದಾಗ ಆತನ ಬಾಸ್ ಗುರ್ರಾಯಿಸಿದ “ಯಾಕೆ ಆಫೀಸಿಗೆ ಬರುತ್ತಿದ್ದೀಯಾ? ನಿನಗೆ ಇಮೈಲ್ ಓದುವ ಅಭ್ಯಾಸ ಇಲ್ಲವಾ? ನಾನು ನಿನ್ನನ್ನು ಕೆಲಸದಿಂದ ತೆಗೆದು ಹಾಕಿದ್ದೇನೆ ಎಂದು ಮೂರು ವಾರಗಳ ಹಿಂದೆಯೇ ನಿನಗೆ ಇಮೈಲ್ ಮಾಡಿದ್ದೆನಲ್ಲಾ?”   

ಮಂಗಳವಾರ, ನವೆಂಬರ್ 1, 2011

ಗಣಕಿಂಡಿ - ೧೨೮ (ಅಕ್ಟೋಬರ್ ೩೧, ೨೦೧೧)

ಅಂತರಜಾಲಾಡಿ

ಕೆಲಸ ಹುಡುಕುವ ಮುನ್ನ

ಯಾವುದಾದರೂ ಸರಿ, ಒಂದು ಕೆಲಸ ಸಿಕ್ಕಿದರೆ ಸಾಕು ಎನ್ನುವ ಕಾಲ ಈಗಿಲ್ಲ. ತಮ್ಮ ತಮ್ಮ ಆಸಕ್ತಿಗೆ ಸರಿಹೊಂದುವ ಕೆಲಸ ಮಾಡಿದರೆ ಎಲ್ಲರಿಗೂ ಒಳ್ಳೆದು. ಅದಕ್ಕೆ ಸರಿಯಾದ ಕಂಪೆನಿ ಹುಡುಕಬೇಕು. ಕಂಪೆನಿ ಸೇರುವ ಮುನ್ನ ಅಥವಾ ಕಂಪೆನಿಗೆ ಅರ್ಜಿ ಗುಜರಾಯಿಸುವ ಮುನ್ನ ಆ ಕಂಪೆನಿ ಬಗ್ಗೆ ಪೂರ್ತಿ ವಿವರ ತಿಳಿದಿದ್ದರೆ ಒಳ್ಳೆಯದು. ಕಂಪೆನಿಯ ಜಾಲತಾಣದಲ್ಲೇನೋ ಕಂಪೆನಿಯ ಬಗ್ಗೆ ವಿವರ ಇರುತ್ತದೆ. ಆದರೆ ಅದರ ಬಗ್ಗೆ ಅಲ್ಲಿ ಕೆಲಸ ಮಾಡಿದವರಿಂದ ಹಿಂಮಾಹಿತಿ (feedback) ಸಿಗುವುದಿಲ್ಲ. ಅಲ್ಲಿ ಕೆಲಸ ಮಾಡಿದವರನ್ನು ಪರಿಚಯ ಮಾಡಿಕೊಂಡು ಅವರಿಂದ ಮಾಹಿತಿ ತಿಳಿದುಕೊಳ್ಳುವುದು ಎಲ್ಲ ಸಂದರ್ಭಗಳಲ್ಲಿ ಅಸಾಧ್ಯ. ಈ ಎಲ್ಲ ಸಮಸ್ಯೆಗಳಿಗೆ ಪರಿಹಾರ ರೂಪವಾಗಿ ಇರುವ ಜಾಲತಾಣ www.glassdoor.com. ಈ ಜಾಲತಾಣದಲ್ಲಿ ಕಂಪೆನಿಗಳ ವಿಮರ್ಶೆ ಮಾತ್ರವಲ್ಲ, ಅಲ್ಲಿ ಸಂದರ್ಶನದಲ್ಲಿ ಕೇಳುವ ಪ್ರಶ್ನೆಗಳು, ಸಂಬಳ ಎಷ್ಟಿರಬಹುದು, ಇತ್ಯಾದಿ ಎಲ್ಲ ಮಾಹಿತಿಗಳಿವೆ.

ಡೌನ್‌ಲೋಡ್

ರೂಪಾಯಿ ಚಿಹ್ನೆ

ಭಾರತ ಸರಕಾರವು ನಮ್ಮ ರೂಪಾಯಿಗೆ ಒಂದು ಚಿಹ್ನೆಯನ್ನು ಘೋಷಿಸಿರುವುದು ತಿಳಿದಿರಬಹುದು. ಈ ಚಿಹ್ನೆ ಇತ್ತೀಚೆಗೆ ಬಂದಿರುವುದು. ಗಣಕದಲ್ಲಿ ಕೆಲಸ ಮಾಡುವ ವಿಂಡೋಸ್ ಕಾರ್ಯಾಚರಣೆಯ ವ್ಯವಸ್ಥೆಯ ಎಲ್ಲ ಆವೃತ್ತಿಗಳು ಈ ಚಿಹ್ನೆಯ ಘೋಷಣೆಗೆ ಮೊದಲೇ ಬಂದವುಗಳು. ಅದುದರಿಂದ ಗಣಕದಲ್ಲಿ ಸಹಜವಾಗಿ ರೂಪಾಯಿ ಚಿಹ್ನೆ ಇರುವುದಿಲ್ಲ. ಮೈಕ್ರೋಸಾಫ್ಟ್ ಕಂಪೆನಿ ವಿಂಡೋಸ್ ೭ ಕಾರ್ಯಾಚರಣ ವ್ಯವಸ್ಥೆಗೆ ರೂಪಾಯಿ ಸೇರಿಸಿದೆ. ಭಾರತ ಸರಕಾರದ ಮಾಹಿತಿ ತಂತ್ರಜ್ಞಾನ ಇಲಾಖೆಯೂ ತಮ್ಮ ಸಕಲಭಾರತಿ ಫಾಂಟ್‌ನಲ್ಲಿ ರೂಪಾಯಿ ಚಿಹ್ನೆ ಸೇರಿಸಿ ಬಿಡುಗಡೆ ಮಾಡಿದೆ. ಈ ಸಕಲಭಾರತಿ ಫಾಂಟ್‌ನಲ್ಲಿ ಕನ್ನಡ ಮತ್ತು ಇತರೆ ಭಾಷೆಯ ಅಕ್ಷರಗಳಿವೆ. ಇದನ್ನು ಡೌನ್‌ಲೋಡ್ ಮಾಡಿಕೊಳ್ಳಲು bit.ly/IndRupee ಜಾಲತಾಣಕ್ಕೆ ಭೇಟಿ ನೀಡಿ. 

e - ಸುದ್ದಿ

ಎಲ್ಲವೂ ಸ್ಪರ್ಶಸಂವೇದಿ

ಇತ್ತೀಚೆಗೆ ಬರುತ್ತಿರುವ ಬಹುಪಾಲು ಮೊಬೈಲ್ ಫೋನ್‌ಗಳಲ್ಲಿ ಸ್ಪರ್ಶಸಂವೇದಿ ಪರದೆಗಳಿರುವುದನ್ನು (touchscreen) ಗಮನಿಸಿರಬಹುದು. ಬೆರಳಿನಲ್ಲಿ ಸ್ಪರ್ಶ ಮಾಡುವುದರ ಮೂಲಕ ಕೆಲಸಗಳನ್ನು ಮಾಡಬಹುದು. ಈ ಸ್ಪರ್ಶಸಂವೇದಿ ಪರದೆಗಳು ಮೊಬೈಲ್ ಮಾತ್ರವಲ್ಲ, ಟ್ಯಾಬ್ಲೆಟ್ ಗಣಕಗಳಲ್ಲಿ, ಬ್ಯಾಂಕ್‌ಗಳ ಎಟಿಎಂ ಯಂತ್ರಗಳಲ್ಲಿ, ಹೀಗೆ ಹಲವು ಕಡೆ ಬಳಕೆ ಆಗುತ್ತಿದೆ. ಇಂತಹ ಪರದೆಗಳು ವಿಶಿಷ್ಟ ವಸ್ತುವಿನಿಂದ ಮಾಡಿದವು ಆಗಿರುತ್ತವೆ. ಇತ್ತೀಚೆಗೆ ಮೈಕ್ರೋಸಾಫ್ಟ್ ಸಂಶೋಧನಾ ಪ್ರಯೋಗಶಾಲೆಯಿಂದ ಒಂದು ಸ್ವಾರಸ್ಯಕರ ಸಂಶೋಧನೆಯ ವರದಿಯಾಗಿದೆ. ಅವರು ಯಾವುದೇ ವಸ್ತುವನ್ನೂ ಸ್ಪರ್ಶಸಂವೇದಿಯಾಗಿ ಮಾಡುವ ತಂತ್ರಜ್ಞಾನವನ್ನು ಆವಿಷ್ಕರಿಸಿದ್ದಾರೆ. ಅದು ನಿಮ್ಮ ಅಂಗೈ ಕೂಡ ಆಗಿರಬಹುದು. ಇದಕ್ಕಾಗಿ ಲೇಸರ್ ಮತ್ತು ಕ್ಯಾಮರಾ ಬಳಸಿದ್ದಾರೆ. ಮುಂದೊಂದು ದಿನ ಮಾರುಕಟ್ಟೆಗೆ ಬರುವ ಫೋನ್ ಮೇಜಿಗೆ ಕೀಲಿಮಣೆಯನ್ನು ಪ್ರೊಜೆಕ್ಟ್ ಮಾಡುತ್ತದೆ ಮತ್ತು ನೀವು ಅದರ ಮೇಲೆ ಕೈಯಾಡಿಸಿದರೆ ಸಾಕು!

e- ಪದ

ದ್ವಿಮಾನ (binary) - ಎರಡೇ ಅಂಕೆಗಳಿರುವ ಸಂಖ್ಯಾಪದ್ಧತಿ. ನಾವು ಸಾಮಾನ್ಯವಾಗಿ ಬಳಸುವ ಎಣಿಕೆಯ ಸಂಖ್ಯಾಪದ್ಧತಿಯಲ್ಲಿ ೦ ಯಿಂದ ೯ ರ ತನಕ ಒಟ್ಟು ಹತ್ತು ಅಂಕೆಗಳಿವೆ. ಇದನ್ನು ದಶಮಾನ ಪದ್ಧತಿ ಎನ್ನುತ್ತಾರೆ. ದ್ವಿಮಾನ ಪದ್ಧತಿಯಲ್ಲಿ ೦ ಮತ್ತು ೧ -ಎರಡೇ ಅಂಕೆಗಳಿರುತ್ತವೆ. ಗಣಕಗಳ ಒಳಗೆ ಬಳಕೆಯಾಗುವುದು ಈ ಸಂಖ್ಯಾಪದ್ಧತಿಯಾಗಿದೆ.   

e - ಸಲಹೆ

ಪ್ರ: ಕರ್ನಾಟಕ ಚುನಾವಣಾ ಆಯೋಗದ ಮತದಾರರ ಪಟ್ಟಿಯಲ್ಲಿ ನನ್ನ ಹೆಸರು ಸೇರಿಸಬೇಕಾಗಿದೆ. ಅದಕ್ಕಾಗಿ ಯಾವುದಾದರು ಜಾಲತಾಣ ಇದೆಯೇ?   
ಉ: ಇದೆ. ನೋಡಿ - voterreg.kar.nic.in

ಕಂಪ್ಯೂತರ್ಲೆ

ಕೋಲ್ಯ ತನಗೆ ಲ್ಯಾಪ್‌ಟಾಪ್ ಮಾರಿದ ಕಂಪೆನಿಗೆ ಫೋನ್ ಮಾಡಿ ಹೇಳಿದ “ನನ್ನ ಹೆಂಡತಿ ಇಂಟರ್‌ನೆಟ್ ಮೂಲಕ ವ್ಯಾಪಾರ ಮಾಡುತ್ತ ಅದು ಕ್ರೆಡಿಟ್ ಕಾರ್ಡ್ ಕೇಳಿದಾಗ ನನ್ನ ಕ್ರೆಡಿಟ್ ಕಾರ್ಡನ್ನು ಲ್ಯಾಪ್‌ಟಾಪ್‌ನ ಕಾರ್ಡ್ ರೀಡರ್ ಒಳಗೆ ತೂರಿಸಿದ್ದಾಳೆ. ಅದನ್ನು ಈಗ ಹೊರಗೆ ತೆಗೆಯುವುದು ಹೇಗೆ?”   

ಸೋಮವಾರ, ಅಕ್ಟೋಬರ್ 24, 2011

ಗಣಕಿಂಡಿ - ೧೨೭ (ಅಕ್ಟೋಬರ್ ೨೪, ೨೦೧೧)

ಅಂತರಜಾಲಾಡಿ

ಪರ್ಯಾಯ

ಗಣಕದಲ್ಲಿ ಕೆಲಸ ಮಾಡಬೇಕಾದರೆ ಉಪಯುಕ್ತ ತಂತ್ರಾಂಶಗಳು ಅತೀ ಅಗತ್ಯ. ದಿನನಿತ್ಯದ ಬಳಕೆಗೆ ಎಲ್ಲ ಅಗತ್ಯ ತಂತ್ರಾಂಶಗಳನ್ನು ಹಣ ಕೊಟ್ಟು ಕೊಂಡುಕೊಂಡರೆ ಬಹುಶಃ ಎರಡು ಲಕ್ಷ ರೂಪಾಯಿಯನ್ನು ದಾಟಬಹುದು. ನಾವು ಅಷ್ಟು ಹಣ ಕೊಟ್ಟೇ ಇಲ್ಲವಲ್ಲ ಎಂದು ಆಶ್ಚರ್ಯ ಪಡಬೇಡಿ. ಬಹುಪಾಲು ಸಂದರ್ಭಗಳಲ್ಲಿ ನೀವು ಕೊಂಡ ಗಣಕದ ಜೊತೆ ಅದನ್ನು ಮಾರಿದವರು ಅಗತ್ಯದ ತಂತ್ರಾಂಶಗಳನ್ನು ಚೌರ್ಯ ಮಾಡಿ ಇನ್‌ಸ್ಟಾಲ್ ಮಾಡಿರುತ್ತಾರೆ. ಇದು ಕಾನೂನು ಪ್ರಕಾರ ತಪ್ಪು. ಹಾಗಿದ್ದರೆ ಉಚಿತ ತಂತ್ರಾಂಶಗಳೇ ಇಲ್ಲವೇ? ಇವೆ. ಬೇಕಾದಷ್ಟಿವೆ. ನಿಮಗೆ ಅಗತ್ಯವಿರುವ ದುಬಾರಿ ವಾಣಿಜ್ಯಕ ತಂತ್ರಾಂಶಕ್ಕೆ ಪರ್ಯಾಯ ತಂತ್ರಾಂಶ ಹುಡುಕಬೇಕಿದ್ದಲ್ಲಿ alternativeto.net ಜಾಲತಾಣಕ್ಕೆ ಭೇಟಿ ನೀಡಿ.

ಡೌನ್‌ಲೋಡ್

ಫೋಟೋಗಳನ್ನು ಒಂದುಗೂಡಿಸಿ

ಕೆಲವು ಸಂದರ್ಭಗಳಲ್ಲಿ ನಾವು ಫೋಟೋ ತೆಗೆಯುವ ವಸ್ತು ಅಥವಾ ಸ್ಥಳದ ಮೇಲೆ ಬೇಳಕು ಎಲ್ಲ ಜಾಗದಲ್ಲೂ ಒಂದೇ ರೀತಿಯಾಗಿರುವುದಿಲ್ಲ. ಆಗ ನಾವು ಯಾವುದಾದರೂ ಒಂದು ಜಾಗದ ಮೇಲೆ ಕೇಂದ್ರೀಕರಿಸಿ ಆ ಜಾಗದಲ್ಲಿರುವ ಬೆಳಕಿಗೆ ಅನುಗುಣವಾಗಿ ಶಟ್ಟರ್ ವೇಗ, ಅಪೆರ್ಚರ್ ಇತ್ಯಾದಿ ಆಯ್ಕೆ ಮಾಡಿಕೊಂಡು ಫೋಟೋ ತೆಗೆಯುತ್ತೇವೆ. ಹಾಗೆ ಮಾಡುವುದರಿಂದ ಏನಾಗುತ್ತದೆಯೆಂದರೆ ಕೆಲವು ಭಾಗ ಕಪ್ಪಾಗಿ ಮತ್ತು ಇನ್ನು ಕೆಲವು ಭಾಗ ಅತಿ ಬಿಳುಪಾಗಿ ಬರುತ್ತದೆ. ಈ ಸಮಸ್ಯೆಗೆ ಒಂದು ಪರಿಹಾರವಿದೆ. ಒಂದೇ ವಸ್ತುವಿನ ಫೋಟೋವನ್ನು ಹಲವು ಅಪೆರ್ಚರ್ ಆಯ್ಕೆಗಳಲ್ಲಿ ತೆಗೆದು ಅನಂತರ ಗಣಕದಲ್ಲಿ ಅವುಗಳನ್ನು ಸೂಕ್ತ ತಂತ್ರಾಂಶ ಬಳಸಿ ಜೋಡಿಸುವುದು. ಇಂತಹ ಫೋಟೋಗ್ರಾಫಿಗೆ ಹೈ ಡೈನಾಮಿಕ್ ರೇಂಜ್ (HDR) ಫೋಟೋ ಎಂದು ಕರೆಯುತ್ತಾರೆ. ಹೀಗೆ ಮಾಡಲು ಅನುವು ಮಾಡಿಕೊಡುವ ಒಂದು ಉಚಿತ ತಂತ್ರಾಂಶ Fusion ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ - fusion.ns-point.com.

e - ಸುದ್ದಿ

ಕೊಂಡಿ ನೀಡುವುದು ಅಪರಾಧವಲ್ಲ

ಅಂತರಜಾಲದಲ್ಲಿ ಇರುವ ಲೇಖನಗಳಲ್ಲಿ ಯಾವುದಕ್ಕೆ ಬೇಕಾದರೂ ಇನ್ನೊಂದು ಜಾಲತಾಣದಿಂದ ಕೊಂಡಿ ನೀಡಬಹುದು. ಇದನ್ನು ಪ್ರತಿಯೊಂದು ಜಾಲತಾಣವೂ ಮಾಡುವುದನ್ನು ಎಲ್ಲರೂ ಗಮನಿಸಿದ್ದೀರಿ. ಅಷ್ಟು ಮಾತ್ರವಲ್ಲ ಈ ಸೌಲಭ್ಯವನ್ನು ಬಳಸಿಯೂ ಇದ್ದೀರಿ. ನಿಮ್ಮ ಜಾಲತಾಣದಿಂದ ಇನ್ನೊಂದು ಜಾಲತಾಣಕ್ಕೆ ಕೊಂಡಿ ನೀಡಿದ್ದೀರಿ. ಆ ಜಾಲತಾಣದಲ್ಲಿ ಒಬ್ಬ ವ್ಯಕ್ತಿ ಅಥವಾ ಸಂಸ್ಥೆಯ ವಿರುದ್ಧ ಏನೇನೋ ಬರೆಯಲಾಗಿದೆ. ಹೀಗಿರುವಾಗ ಆ ವ್ಯಕ್ತಿ ಅಥವಾ ಸಂಸ್ಥೆ ನಿಮ್ಮ ಮೇಲೆ ಮಾನನಷ್ಟ ಮೊಕದ್ದಮೆ ಹೂಡಬಹುದೇ? ಇಲ್ಲಿ ಗಮನಿಸಬೇಕಾದ ವಿಷಯವೇನೆಂದರೆ ನಿಂದನೆಯ ಲೇಖನವನ್ನು ನೀವು ಬರೆದಿಲ್ಲ. ಆ ಜಾಲತಾಣಕ್ಕೆ ನಿಮ್ಮ ಜಾಲತಾಣದಿಂದ ಕೊಂಡಿ ನೀಡಿದ್ದೀರಿ ಅಷ್ಟೆ. ಹೀಗೆ ಮಾಡುವುದು ಅಪರಾಧವಾಗುವುದಿಲ್ಲ ಎಂದು ಇತ್ತೀಚೆಗೆ ಕೆನಡಾದ ಸರ್ವೋಚ್ಚ ನ್ಯಾಯಾಲಯ ತೀರ್ಪು ನೀಡಿದೆ.

e- ಪದ

ಬ್ಲಾಟ್‌ವೇರ್ (bloatware) - ಅಗತ್ಯಕ್ಕಿಂತ ಹೆಚ್ಚು ಗುಣವೈಶಿಷ್ಷ್ಯಗಳನ್ನು ಹೊಂದಿರುವ ಮತ್ತು ಅದರಿಂದಾಗಿ ಅತಿ ಹೆಚ್ಚು ಮೆಮೊರಿ ಹಾಗೂ ಹಾರ್ಡ್‌ಡಿಸ್ಕ್ ಜಾಗವನ್ನು ಆಕ್ರಮಿಸುವ ತಂತ್ರಾಂಶ. ಇತ್ತೀಚೆಗೆ ಗಣಕಗಳಲ್ಲಿ ಅಧಿಕ ಮೆಮೊರಿ ಮತ್ತು ಹಾರ್ಡ್‌ಡಿಸ್ಕ್ ಸಹಜವಾಗಿದೆ. ಅಂತೆಯೇ ಅಗತ್ಯಕ್ಕಿಂತ ಹೆಚ್ಚು ಸವಲತ್ತುಗಳನ್ನು ನೀಡಿ ಹೆಚ್ಚು ಜಾಗವನ್ನು ಆಕ್ರಮಿಸುವ ತಂತ್ರಾಂಶಗಳೂ ತಯಾರಾಗಿವೆ. 

e - ಸಲಹೆ

ಪ್ರ: ನನ್ನ ಜಿಮೈಲ್‌ನಲ್ಲಿ ಜಾಗ ಇಲ್ಲದಾಗಿದೆ. ಏನು ಮಾಡಬೇಕು?
ಉ: ಅನಗತ್ಯ ಇಮೈಲ್‌ಗಳನ್ನು ಅಳಿಸಿ ಹಾಕಿ. ಗಣಕದಲ್ಲಿ ಯಾವುದಾದರೂ ಇಮೈಲ್ ಗ್ರಾಹಕ ತಂತ್ರಾಂಶವನ್ನು (ಉದಾ- ವಿಂಡೋಸ್ ಲೈವ್ ಮೈಲ್, ಮೈಕ್ರೋಸಾಫ್ಟ್ ಔಟ್‌ಲುಕ್, ಥಂಡರ್‌ಬರ್ಡ್, ಇತ್ಯಾದಿ) ಇನ್‌ಸ್ಟಾಲ್ ಮಾಡಿಕೊಂಡು ಜಿಮೈಲ್‌ನಿಂದ ಇಮೈಲ್‌ಗಳನ್ನು ಅದಕ್ಕೆ ಇಳಿಸಿಕೊಳ್ಳಿ.  

ಕಂಪ್ಯೂತರ್ಲೆ

ಬ್ಲಾಗಿಗರ ಹಾಡು

ಎಲ್ಲ ಓದಲಿ ಎಂದು ನಾನು ಬ್ಲಾಗಿಸುವುದಿಲ್ಲ
ಬ್ಲಾಗಿಸುವುದು ಅನಿವಾರ್ಯ ಕರ್ಮ ನನಗೆ
ಓದುವವರಿಹರೆಂದು ನಾ ಬಲ್ಲೆ ಅದರಿಂದ
ಬ್ಲಾಗಿಸುವೆನು ಕೀ ಕುಟ್ಟಿ ಎಂದಿನಂತೆ
ಯಾರು Alt-F4 ಒತ್ತಿದರು ನನಗಿಲ್ಲ ಚಿಂತೆ
-    ಗಣಕಜ್ಞ

ಮಂಗಳವಾರ, ಅಕ್ಟೋಬರ್ 18, 2011

ಗಣಕಿಂಡಿ - ೧೨೬ (ಅಕ್ಟೋಬರ್ ೧೭, ೨೦೧೧)

ಅಂತರಜಾಲಾಡಿ

ಭಾರತದಲ್ಲಿ ಮಾತ್ರ

“ನಿಮ್ಮ ಜೀವಕ್ಕೆ ಬೆಲೆ ಇಲ್ಲದಿರಬಹುದು ಆದರೆ ಪೆಟ್ರೋಲ್ ತುಂಬ ದುಬಾರಿ. ಇಲ್ಲಿ ಧೂಮಪಾನ ಮಾಡಬೇಡಿ” -ಇದು ಪೆಟ್ರೋಲ್ ಬಂಕ್ ಒಂದರ ಮುಂದೆ ಇರುವ ಫಲಕ. ಇನ್ನೊಂದು ಉದಾಹರಣೆ -ಒಬ್ಬಾಕೆ ತನ್ನ ಚಿಕ್ಕ ಮಗುವನ್ನು ನಡೆಸಿಕೊಂಡು ಹೋಗುತ್ತಿದ್ದಾಳೆ. ಇದರಲ್ಲೇನು ವಿಶೇಷ ಎನ್ನುತ್ತೀರಾ? ಆಕೆಯ ಹೆಗಲಲ್ಲಿ ಒಂದು ಬುಟ್ಟಿ ಇದೆ. ಆ ಬುಟ್ಟಿಯಲ್ಲಿ ಆಕೆಯ ಮುದ್ದಿನ ನಾಯಿ ಇದೆ. ಅಂದರೆ ಆಕೆ ನಾಯಿಯನ್ನು ಹೊತ್ತುಕೊಂಡು ಹೋಗುತ್ತಿದ್ದಾಳೆ ಮತ್ತು ಅದೇ ಸಮಯದಲ್ಲಿ ತನ್ನ ಮಗುವನ್ನು ನಡೆಸಿಕೊಂಡು ಹೋಗುತ್ತಿದ್ದಾಳೆ. ಇವೆಲ್ಲ ಎಲ್ಲಿ ಎನ್ನುತ್ತೀರಾ? ನಮ್ಮದೇ ಭಾರತ ದೇಶದಲ್ಲಿ ಸ್ವಾಮಿ. ಹೌದು ಇದಕ್ಕೆ ಎಲ್ಲಿದೆ ಪುರಾವೆ ಎನ್ನುತ್ತೀರಾ? ಬನ್ನಿ. onlyinindia.in ಜಾಲತಾಣಕ್ಕೆ ಭೇಟಿ ನೀಡಿ.

ಡೌನ್‌ಲೋಡ್

ವಿದ್ಯುನ್ಮಾನ ನಕ್ಷೆ ತಯಾರಿಸಿ

ವಿದ್ಯುನ್ಮಾನ (ಇಲೆಕ್ಟ್ರಾನಿಕ್) ಸಲಕರಣೆಗಳನ್ನು ತಯಾರಿಸುವಲ್ಲಿ ಅವುಗಳ ವಿನ್ಯಾಸ ನಕ್ಷೆ ಪ್ರಮುಖ ಪಾತ್ರ ವಹಿಸುತ್ತದೆ. ಯಾವುದೇ ವಿದ್ಯುನ್ಮಾನ ಯಂತ್ರದ ಒಳಗೆ ಪ್ರಿಂಟೆಡ್ ಸರ್ಕ್ಯುಟ್ ಬೋರ್ಡ್ ಇರುವುದನ್ನು ಗಮನಿಸಿರಬಹುದು. ಇವುಗಳನ್ನು ತಯಾರಿಸಲು ಅವುಗಳ ವಿನ್ಯಾಸ ನಕ್ಷೆ (ಸರ್ಕ್ಯುಟ್ ಡಯಾಗ್ರಾಮ್) ಬೇಕಾಗುತ್ತದೆ. ಈ ನಕ್ಷೆಯಲ್ಲಿ ಆ ಸಲಕರಣೆಯಲ್ಲಿ ಬಳಸುವ ಎಲ್ಲ ವಿದ್ಯುನ್ಮಾನ ಅಂಗಗಳ ನಕ್ಷೆ ಮತ್ತು ಅವುಗಳನ್ನು ಜೋಡಿಸುವ ರೇಖೆಗಳಿರುತ್ತವೆ. ಉದಾಹರಣೆಗೆ ಟ್ರಾನ್‌ಸಿಸ್ಟರ್, ಡಯೋಡ್, ಕೆಪಾಸಿಟರ್, ಇತ್ಯಾದಿ. ಈ ವಿನ್ಯಾಸ ನಕ್ಷೆ ತಯಾರಿಸುವುದು ಪರಿಣತರಿಂದ ಮಾತ್ರ ಸಾಧ್ಯ. ನೀವು ಇಲೆಕ್ಟ್ರಾನಿಕ್ಸ್ ಇಂಜಿನಿಯರ್ ಆಗಿದ್ದಲ್ಲಿ ನಿಮಗೆ ಈ ನಕ್ಷೆ ತಯಾರಿಸುವುದು ದಿನನಿತ್ಯದ ಕೆಲಸವಾಗಿರುತ್ತದೆ. ಇಂತಹ ನಕ್ಷೆಗಳನ್ನು ಗಣಕ ಬಳಸಿ ತಯಾರಿಸಲು ಹಲವು ದುಬಾರಿ ತಂತ್ರಾಂಶಗಳು ಲಭ್ಯವಿವೆ. ಅಂತೆಯೇ ಒಂದು ಸರಳ ಉಚಿತ ತಂತ್ರಾಂಶವೂ ಲಭ್ಯವಿದೆ. ಅದು ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ - www.circuit-diagram.org.

e - ಸುದ್ದಿ

ಶೌಚಾಲಯ ಹಂಚಿಕೊಳ್ಳಲು ತಂತ್ರಾಂಶ

ಯಾವುದೋ ಒಂದು ನಗರದ ಮಧ್ಯದಲ್ಲಿದ್ದೀರಿ. ಬಾತ್‌ರೂಮ್ ಬಳಸಬೇಕಾಗಿದೆ. ಸ್ವಚ್ಛ ಟಾಯ್‌ಲೆಟ್ ಬೇಕಾಗಿದೆ. ಏನು ಮಾಡುವುದು? ಸುಲಭ್ ಇದೆಯಲ್ಲ ಎನ್ನುತೀರಾ? ಆದರೆ ಸುಲಭ್ ಸ್ವಚ್ಛ ಇರುತ್ತದೆ ಎಂದು ಏನು ಗ್ಯಾರಂಟಿ? ಇಷ್ಟಕ್ಕೂ ಸುಲಭ್ ಇರುವುದು ಭಾರತದಲ್ಲಿ ಮಾತ್ರ. ಅಮೆರಿಕದಲ್ಲಿ? ಹೀಗೆ ಮಾಡಿದರೆ ಹೇಗೆ? ನಿಮ್ಮ ಮನೆಯಲ್ಲಿರುವ ಬಾತ್‌ರೂಮನ್ನೇ ಸ್ವಲ್ಪ ಶುಲ್ಕಕ್ಕೆ ಬಾಡಿಗೆಗೆ ನೀಡಿದರೆ ಹೇಗೆ? ಹೌದು. ಅಂತಹ ಒಂದು ತಂತ್ರಾಂಶ ತಯಾರಾಗಿದೆ. ತಮ್ಮ ಮನೆಯ ಬಾತ್‌ರೂಮನ್ನು ಬಾಡಿಗೆಗೆ ನೀಡಲು ಸಿದ್ಧರಿರುವವರು ಈ ತಂತ್ರಾಂಶ ಮೂಲಕ ನೋಂದಣಿ ಮಾಡಿಕೊಳ್ಳಬೇಕು. ಬಾತ್‌ರೂಮ್ ಅಗತ್ಯ ಇರುವವರು ತಮ್ಮ ಸ್ಮಾರ್ಟ್‌ಫೋನ್‌ನಲ್ಲಿರುವ ಇದೇ ತಂತ್ರಾಂಶ ಮೂಲಕ ತಾವಿರುವ ಸ್ಥಳಕ್ಕೆ ಹತ್ತಿರದಲ್ಲಿರುವ ಶೌಚಾಲಯ ಯಜಮಾನರನ್ನು ಸಂಪರ್ಕಿಸಿ ಅವರು ಒಪ್ಪಿದರೆ ಹಣ ನೀಡಿ ಬಾತ್‌ರೂಮ್ ಬಳಸಬಹುದು! ಈ ತಂತ್ರಾಂಶದ ಜಾಲತಾಣ - cloo-app.com.

e- ಪದ

ಫರ್ಮ್‌ವೇರ್ (firmware) - ತಂತ್ರಾಂಶ ಅಡಕವಾಗಿರುವ ಯಂತ್ರಾಂಶ. ಗಣಕ ಮತ್ತು ಹಲವು ರೀತಿಯ ಡಿಜಿಟಲ್ ಇಲೆಕ್ಟ್ರಾನಿಕ್ಸ್ ಆಧಾರಿತ ಯಂತ್ರಗಳಲ್ಲಿ ಮೈಕ್ರೋಪ್ರಾಸೆಸರ್ (ಸೂಕ್ಷ್ಮ ಸಂಸ್ಕಾರಕ) ಇರುತ್ತದೆ. ಇಂತಹ ಕೆಲವು ಪ್ರಾಸೆಸರ್‌ಗಳಲ್ಲಿ ಅದರಲ್ಲೇ ಅಡಕವಾಗಿರುವ ಮೆಮೊರಿ ಕೂಡ ಇರುತ್ತದೆ. ಇಂತಹ ಮೆಮೊರಿಗಳಲ್ಲಿ ಆ ಯಂತ್ರದ ಕೆಲವು ಕೆಲಸಗಳನ್ನು ಮಾಡಲು ಅಗತ್ಯ ತಂತ್ರಾಂಶವನ್ನು ಕೂಡ ಸೇರಿಸುತ್ತಾರೆ. ಇದನ್ನೇ ಫರ್ಮ್‌ವೇರ್ ಎನ್ನುತ್ತಾರೆ.

e - ಸಲಹೆ

ಜೋಕರ್ ಗಂಗ ಅವರ ಪ್ರಶ್ನೆ: ಧ್ವನಿ ಇಲ್ಲದ ಆದರೆ ಸಂಗೀತ ಉಪಕರಣಗಳು ಮಾತ್ರ ಇರುವ (ಆರ್ಕೆಸ್ಟ್ರಾದಲ್ಲಿ ಬಳಸುವಂತಹದ್ದು) ಕನ್ನಡದ ಆಡಿಯೋ ಸಿ.ಡಿ.ಗಳು ಎಲ್ಲಿ ಸಿಗುತ್ತವೆ?
ಉ: ಇವುಗಳಿಗೆ ಕರಾಓಕೆ (karaoke) ಸಿ.ಡಿ. ಎನ್ನುತ್ತಾರೆ. ಇಂತಹ ಕನ್ನಡದ ಸಿ.ಡಿ. ಬೇಕಿದ್ದರೆ shopping.totalkannada.com ನೋಡಿ.

ಕಂಪ್ಯೂತರ್ಲೆ

ಕೋಲ್ಯ ಉವಾಚ: ಅವನತ್ರ ಐಪಾಡು ಇವನತ್ರ ಐಪೋಡು, ಇಲ್ದೋನ್ದು ನಾಯಿಪಾಡು.

ಸೋಮವಾರ, ಅಕ್ಟೋಬರ್ 10, 2011

ಗಣಕಿಂಡಿ - ೧೨೫ (ಅಕ್ಟೋಬರ್ ೧೦, ೨೦೧೧)

ಅಂತರಜಾಲಾಡಿ

ನಿರುಪಯುಕ್ತ ಸಂಶೋಧನೆಗಳು

ಜನರಿಗೆ ಅತಿ ಉಪಯುಕ್ತ ಸಂಶೋಧನೆಗಳು ಮತ್ತು ಅವುಗಳಿಗಾಗಿ ಜನರು ಹಕ್ಕುಸ್ವಾಮ್ಯ (ಪೇಟೆಂಟ್) ಪಡೆದುಕೊಳ್ಳುವುದು ಗೊತ್ತು ತಾನೆ? ಅಮೆರಿಕದಲ್ಲಿ ಎಲ್ಲ ರೀತಿಯ ಸಂಶೋಧನೆಗಳಿಗೆ ಪೇಟೆಂಟ್ ಪಡೆದಿಟ್ಟುಕೊಳ್ಳುವುದು ಹಲವರಿಗೆ ಹವ್ಯಾಸವಾಗಿದೆ. ಮುಂದೆಂದೋ ಯಾರೋ ಮಾಡಬಹುದಾದ ಸಂಶೋಧನೆಗಳ ಆಲೋಚನೆಗಳಿಗೂ ಪೇಟೆಂಟ್ ಪಡೆದಿಟ್ಟುಕೊಂಡು ಅದರಿಂದ ಮಿಲಿಯಗಟ್ಟಳೆ ಹಣ ಮಾಡಿಕೊಂಡವರೂ ಇದ್ದಾರೆ. ಅದೇನೋ ಸರಿ. ಆದರೆ ಎಲ್ಲ ಪೇಟೆಂಟ್‌ಗಳು ನಿಜವಾಗಿಯೂ ಉಪಯುಕ್ತವೇ? ಅಮೆರಿಕದಲ್ಲಿ ನೋಂದಣಿಯಾಗುವ ಸಾವಿರಾರು ಪೇಟೆಂಟ್‌ಗಳಲ್ಲಿ ಸಂಪೂರ್ಣ ನಿರುಪಯುಕ್ತ ಎನ್ನಿಸುವಂತಹವೂ ಹಲವಾರಿವೆ. ಅಂತಹ ಪೇಟೆಂಟ್‌ಗಳಿಗೆಂದೇ ಇರುವ ಜಾಲತಾಣ www.totallyabsurd.com. ಇಲ್ಲಿರುವವೆಲ್ಲ ಅಮೆರಿಕದಲ್ಲಿ ನಿಜವಾಗಿ ಪಡೆದಿಕೊಂಡಿರುವ ಪೇಟೆಂಟ್‌ಗಳಲ್ಲಿ ನಿರುಪಯುಕ್ತ ಅನ್ನಿಸುವವುಗಳ ಯಾದಿಯೇ ಆಗಿರುತ್ತದೆ. ಒಂದು ಉದಾಹರಣೆ -ನಾಯಿಗೊಂದು ಛತ್ರಿ.

ಡೌನ್‌ಲೋಡ್


ಯುಎಸ್‌ಬಿಗಾಗಿ ತಂತ್ರಾಂಶಗಳು

ಇತ್ತೀಚೆಗೆ ಯುಎಸ್‌ಬಿ ಡ್ರೈವ್‌ಗಳು ತುಂಬ ಜನಪ್ರಿಯವಾಗುತ್ತಿವೆ. ಅಂತೆಯೇ ಯುಎಸ್‌ಬಿಯಿಂದಲೇ ಚಲಾಯಿಸಬಲ್ಲ ತಂತ್ರಾಂಶಗಳೂ ಲಭ್ಯವಾಗುತ್ತಿವೆ. ಇವುಗಳ ಅನುಕೂಲವೇನೆಂದರೆ ಇವುಗಳನ್ನು ಚಲಾಯಿಸಲು ಗಣಕದಲ್ಲಿ ಇನ್‌ಸ್ಟಾಲ್ ಮಾಡಬೇಕಾಗಿಲ್ಲ. ದಿನಕ್ಕೊಂದು ಸೈಬರ್‌ಕೆಫೆಯಲ್ಲಿ ಗಣಕ ಬಳಸುವವರಿಗಂತೂ ಇವು ತುಂಬ ಉಪಯುಕ್ತ. ಉದಾಹರಣೆಗೆ ನೀವು ದೃಷ್ಟಿಶಕ್ತಿ ವಂಚಿತರು ಮತ್ತು ನಿಮಗೆ ಪರದೆಯಲ್ಲಿ ಮೂಡಿಬಂದ ಅಕ್ಷರಗಳನ್ನು ಓದುವ ತಂತ್ರಾಂಶ ಬೇಕಾಗಿರುತ್ತದೆ. ಅದನ್ನು ನೀವು ಭೇಟಿ ನೀಡುವ ಪ್ರತಿಯೊಂದು ಸೈಬರ್‌ಕೆಫೆಯಲ್ಲೂ ಇನ್‌ಸ್ಟಾಲ್ ಮಾಡಲು ಆಗುವುದಿಲ್ಲ. ಯುಎಸ್‌ಬಿಯಿಂದಲೇ ಚಲಾಯಿಸಬಲ್ಲ ಉಚಿತ ತಂತ್ರಾಂಶಗಳನ್ನು ಡೌನ್‌ಲೋಡ್ ಮಾಡಿಕೊಳ್ಳಲು ಅನುವು ಮಾಡಿಕೊಡುವ ಜಾಲತಾಣ www.portablefreeware.com.

e - ಸುದ್ದಿ

ಸ್ಟೀವ್ ಜಾಬ್ಸ್ ಅಂತ್ಯಕ್ರಿಯೆಯಲ್ಲಿ ಪ್ರತಿಭಟನೆಯ ಘೋಷಣೆ ಐಫೋನ್ ಮೂಲಕ

ಆಪಲ್ ಕಂಪೆನಿಯ ಸ್ಥಾಪಕ ಮಾತ್ರವಲ್ಲ ತಂತ್ರಜ್ಞಾನ ಕ್ಷೇತ್ರದಲ್ಲಿಯೇ ಅಭೂತಪೂರ್ವವಾದ ಕ್ರಾಂತಿಯನ್ನು ಮಾಡಿದ ಸ್ಟೀವ್ ಜಾಬ್ಸ್ ಇತ್ತೀಚೆಗೆ ನಿಧನರಾದುದು ನಿಮಗೆಲ್ಲ ತಿಳಿದಿರಬಹುದು. ಅವರ ಆಪಲ್ ಕಂಪೆನಿಯ ಒಂದು ಕ್ರಾಂತಿಕಾರಕ ಉತ್ಪಾದನೆ ಐಫೋನ್. ಈಗ ಮುಖ್ಯ ವಿಷಯಕ್ಕೆ ಬರೋಣ. ಅಮೆರಿಕದಲ್ಲಿ ವೆಸ್ಟ್‌ಬೊರೊ ಎಂಬ ಚರ್ಚ್ ಇದೆ. ದೇವರು ಅಮೆರಿಕವನ್ನು ಶಿಕ್ಷಿಸುತ್ತಿದ್ದಾನೆ ಯಾಕೆಂದರೆ ಅಮೆರಿಕವು ಪಾಪವನ್ನು ಮತ್ತು ಪಾಪಿಗಳನ್ನು ಸಹಿಸುತ್ತಿದೆ ಎಂದು ಅವರು ನಂಬಿದವರು. ಇರಾಕ್ ಯುದ್ಧದಲ್ಲಿ ಮಡಿದವರ ಅಂತ್ಯಕ್ರಿಯೆಯಲ್ಲಿ ಪ್ರತಿಭಟಿಸಿ ಇವರು ಪ್ರಖ್ಯಾತಿ ಪಡೆದಿದ್ದರು. ಸ್ಟೀವ್ ಜಾಬ್ಸ್ ಅವರ ಅಂತ್ಯಕ್ರಿಯೆಯಲ್ಲೂ ಪ್ರತಿಭಟಿಸುವುದಾಗಿ ವೆಸ್ಟ್‌ಬೊರೊ ಸದಸ್ಯರು ಹೀಗೆಂದು ಘೋಷಿಸಿದ್ದರು -“ಅವರಲ್ಲಿ ಅದ್ಭುತವಾದ ಪ್ಲಾಟ್‌ಫಾರಂ ಇತ್ತು ಆದರೆ ಸ್ಟೀವ್ ಜಾಬ್ಸ್ ದೇವರನ್ನು ವೈಭವೀಕರಿಸಿರಲಿಲ್ಲ. ಆತ ಪಾಪಿ. ಆದುದರಿಂದ ವೆಸ್ಟ್‌ಬೊರೊ ಅವರ ಅಂತ್ಯಕ್ರಿಯೆಯಲ್ಲಿ ಪ್ರತಿಭಟಿಸುತ್ತದೆ”. ವೆಸ್ಟ್‌ಬೊರೊ ಸದಸ್ಯರು ತಮ್ಮ ಈ ಘೋಷಣೆಯನ್ನು ಮಾಡಿದ್ದು ಟ್ವಿಟ್ಟರ್ ಮೂಲಕ ಐಫೋನ್ ಬಳಸಿ!
 
e- ಪದ

ತಂತ್ರಾಂಶ (software) - ಗಣಕವನ್ನು ನಡೆಸಲು ಬೇಕಾದ ಅತಿ ಮುಖ್ಯವಾದ ಆದೇಶ, ಸೂಚನೆ, ಕ್ರಮವಿಧಿಗಳು, ಇತ್ಯಾದಿ. ಒಂದು ಸಂಗೀತ ಉಪಕರಣವನ್ನು ಯಂತ್ರಾಂಶಕ್ಕೆ (hardware) ಹೋಲಿಸಬಹುದಾದರೆ ಅದರಲ್ಲಿ ನುಡಿಸುವ ಸಂಗೀತವನ್ನು ತಂತ್ರಾಂಶಕ್ಕೆ ಹೋಲಿಸಬಹುದು. ಯಂತ್ರಾಂಶ ಕಣ್ಣಿಗೆ ಕಾಣಿಸುವಂತಹದು. ತಂತ್ರಾಂಶ ಕಣ್ಣಿಗೆ ಕಾಣಿಸಲಾರದ್ದು.

e - ಸಲಹೆ

ಜಿತೇಂದ್ರ ಪಾಟೀಲರ ಪ್ರಶ್ನೆ: ಮೈಕ್ರೋಸಾಫ್ಟ್ ಎಕ್ಸೆಲ್‌ನಲ್ಲಿ ಬಳಸುವ ಸಮೀಕರಣಗಳನ್ನು (Excel formulas) ತಿಳಿಸುವ ಜಾಲತಾಣ ಇದೆಯೇ?
ಉ: www.excelformula.net ನೋಡಿ.

ಕಂಪ್ಯೂತರ್ಲೆ

ಇನ್ನಷ್ಟು ಗಣಕ (ತ)ಗಾದೆಗಳು:
·    ವೈರಸ್‌ನ್ನು ಅಳಿಸಿಹಾಕು ಅಂದರೆ ಇಡಿ ಹಾರ್ಡ್‌ಡಿಸ್ಕನ್ನೇ ಅಳಿಸಿ ಸ್ವಚ್ಛ ಮಾಡಿದನಂತೆ. 
·    ಮನೆ ಸ್ವಚ್ಛವಾಗಿದೆಯೆಂದರೆ ಗಣಕ ಕೆಟ್ಟು ಹೋಗಿದೆ ಎಂದು ಅರ್ಥ.
·    ಗಣಕದಲ್ಲಿ ಎಷ್ಟು ಸ್ಕ್ರೂ ಇಲ್ಲವಾಗಿದೆಯೇ ಅಷ್ಟು ಸಲ ಅದನ್ನು ಬಿಚ್ಚಲಾಗಿದೆ ಎಂದು ಅರ್ಥ.

ಸೋಮವಾರ, ಅಕ್ಟೋಬರ್ 3, 2011

ಗಣಕಿಂಡಿ - ೧೨೪ (ಅಕ್ಟೋಬರ್ ೦೩, ೨೦೧೧)

ಅಂತರಜಾಲಾಡಿ

ಆಟ ಆಡೋಣ ಬನ್ನಿ

ಆಟ ಆಡುವುದು ಯಾರಿಗೆ ಇಷ್ಟವಿಲ್ಲ? ಗಣಕದಲ್ಲಿ ಆಡಬಲ್ಲ ಆಟಗಳು ಸಾವಿರಾರಿವೆ. ಅವುಗಳಲ್ಲಿ ಬಹುಪಾಲು ತುಂಬ ದೊಡ್ಡ ಗಾತ್ರದಾಗಿರುತ್ತವೆ ಮತ್ತು ಹಣ ನೀಡಿ ಕೊಂಡುಕೊಳ್ಳಬೇಕಾಗಿರುತ್ತವೆ. ಅಂತರಜಾಲದ ಮೂಲಕವೇ ಆಡಬಲ್ಲ ಆಟಗಳ ಜಾಲತಾಣಗಳೂ ಹಲವಾರಿವೆ. ಅಂತಹ ಒಂದು ಜಾಲತಾಣ www.brizy.com. ಇಲ್ಲಿರುವ ಆಟಗಳೆಲ್ಲ ಅಡೋಬಿಯವರ ಫ್ಲಾಶ್ ತಂತ್ರಾಂಶವನ್ನು ಬಳಸುತ್ತವೆ. ಸಾಮಾನ್ಯವಾಗಿ ಎಲ್ಲರ ಗಣಕಗಳಲ್ಲಿ ಒಂದಲ್ಲ ಒಂದು ಕಾರಣಕ್ಕಾಗಿ ಫ್ಲಾಶ್ ಇನ್‌ಸ್ಟಾಲ್ ಆಗಿರುತ್ತದೆ. ಈ ಜಾಲತಾಣದಲ್ಲಿರುವ ಆಟಗಳನ್ನು ಹಲವು ವಿಷಯಾಧಾರಿತವಾಗಿ ವಿಂಗಡಿಸಲಾಗಿದೆ.

ಡೌನ್‌ಲೋಡ್

ಆಂದೋಲನ ಲೇಖ

ಭೌತಶಾಸ್ತ್ರದ ಪ್ರಯೋಗಶಾಲೆಗಳಲ್ಲಿ ಅಂದೋಲನ ಲೇಖಿ (Oscilloscope) ಸಾಮಾನ್ಯವಾಗಿ ಕಾಣಸಿಗುವ ಒಂದು ಸಾಧನ. ಇದನ್ನು ಬಳಸಿ ವಿದ್ಯುತ್ ತರಂಗಗಳ ಆವರ್ತಸಂಖ್ಯೆ, ವೋಲ್ಟ್, ಕರೆಂಟ್, ಇತ್ಯಾದಿಗಳನ್ನು ಅಳೆಯಬಹುದು. ಇದು ಬೆಲೆಬಾಳುವ ಸಾಧನ ಮಾತ್ರವಲ್ಲ ಇದನ್ನು ಬಳಸಲು ಪರಿಣತರಿಂದ ಮಾತ್ರ ಸಾಧ್ಯ. ಇದೀಗ ಗಣಕದಲ್ಲೇ ಆಸಿಲೋಸ್ಕೋಪನ್ನು ಅನುಕರಿಸುವ Visual Analyser ಎಂಬ ಉಚಿತ ತಂತ್ರಾಂಶ ಲಭ್ಯವಾಗಿದೆ. ಇದನ್ನು ಬಳಸಿ ಗಣಕದ ಆಡಿಯೋ ಕಾರ್ಡ್, ಮೈಕ್ರೋಫೋನ್ ಮೂಲಕವೇ ಧ್ವನಿ ತರಂಗಗಳನ್ನು ಊಡಿಸಿ ಅವುಗಳನ್ನು ವಿಶ್ಲೇಷಿಸಬಹುದು. ಉದಾಹರಣೆಗೆ ಭೌತಶಾಸ್ತ್ರದಲ್ಲಿ ಅತಿ ಸಾಮಾನ್ಯವಾಗಿ ಮಾಡುವ ಒಂದು ಪ್ರಯೋಗವೆಂದರೆ ಬೇರೆ ಬೇರೆ ಟ್ಯೂನಿಂಗ್ ಫೋರ್ಕ್‌ಗಳನ್ನು ಬಳಸಿ ಬೇರೆ ಬೇರೆ ಆವರ್ತ ಸಂಖ್ಯೆಯ ಧ್ವನಿ ತರಂಗಗಳನ್ನು ಹೊರಡಿಸುವುದು. ಈ ತಂತ್ರಾಂಶವನ್ನು ಇನ್‌ಸ್ಟಾಲ್ ಮಾಡಿರುವ ಲ್ಯಾಪ್‌ಟಾಪ್‌ನ ಮೈಕ್ರೋಫೋನ್ ಮುಂದೆ ಧ್ವನಿ ಹೊರಡಿಸುತ್ತಿರುವ ಟ್ಯೂನಿಂಗ್ ಫೋರ್ಕ್ ಹಿಡಿದರೆ ಅದು ಯಾವ ಆವರ್ತ ಸಂಖ್ಯೆಯ ಧ್ವನಿಯನ್ನು ಹೊರಡಿಸುತ್ತಿದೆ ಎಂದು ಅದು ಹೇಳುತ್ತದೆ. ಹಾಡುಗಾರರು ತಮ್ಮ ಶ್ರುತಿ ಶುದ್ಧಿಯನ್ನು ವೃದ್ಧಿಗೊಳಿಸಲು ಈ ತಂತ್ರಾಂಶವನ್ನು ಬಳಸಬಹುದು. ಈ ತಂತ್ರಾಂಶ www.sillanumsoft.org ಜಾಲತಾಣದಲ್ಲಿ ಲಭ್ಯ.

e - ಸುದ್ದಿ

ನಿಸ್ತಂತು ಸಂಕೇತ ಮೂಲಕ ನಿಮ್ಮ ಓಡಾಟ ಪತ್ತೆ

ಗಣಕ ಮತ್ತು ಮೊಬೈಲ್ ಫೋನ್‌ಗಳಲ್ಲಿ ಬಳಸುವ ವೈಫೈ (ನಿಸ್ತಂತು) ಸಂಕೇತಗಳ ಶಕ್ತಿ ಮನುಷ್ಯರ ಓಡಾಟದಿಂದ ಏರುಪೇರಾಗುತ್ತದೆ ಎಂಬುದನ್ನು ವಿಜ್ಞಾನಿಯೊಬ್ಬರು ಸಂಶೋಧನೆ ಮಾಡುತ್ತ ಪತ್ತೆಹಚ್ಚಿದರು. ಇದೇನು ಅಂತಹ ಮಹತ್ವದ ಸುದ್ದಿಯಲ್ಲ ಎನ್ನಿಸಬಹುದು. ಆದರೆ ಈಗ ಇನ್ನೊಬ್ಬ ವಿಜ್ಞಾನಿ ಇದೇ ತತ್ತ್ವವನ್ನಾಧರಿಸಿ ಮನೆಯೊಳಗಿರುವ ಮನುಷ್ಯರು ಎಲ್ಲೆಲ್ಲ ಓಡಾಡುತ್ತಿದ್ದಾರೆ ಎಂಬುದನ್ನು ಪತ್ತೆಹಚ್ಚಬಹುದು ಎಂದು ತಿಳಿಸಿದ್ದಾರೆ. ಅಂದರೆ ಗೂಢಚರ್ಯೆ ಮಾಡುವವರು ಮನೆಯೆ ಹೊರಗೆ ಒಂದು ವೈಫೈ ಜಾಲವನ್ನು ನಿರ್ಮಿಸಿ ಮನೆಯೊಳಗಿನ ಮಂದಿ ಎಲ್ಲೆಲ್ಲಿ ಓಡಾಡುತ್ತಿದ್ದಾರೆ ಎಂದು ಪತ್ತೆಹಚ್ಚಬಹುದು.   
 
e- ಪದ

ಯಂತ್ರಾಂಶ (hardware) - ಗಣಕದಲ್ಲಿ ಕಣ್ಣಿಗೆ ಕಾಣಿಸುವ ಎಲ್ಲ ಯಂತ್ರಭಾಗಗಳು. ಸಾಮಾನ್ಯವಾಗಿ, ಗಣಕದ ಮದರ್‌ಬೋರ್ಡ್, ಸಿಪಿಯು, ಕೀಲಿಮಣೆ, ಮೌಸ್, ಪರದೆ -ಇವೆಲ್ಲ ಯಂತ್ರಾಂಶಗಳು.

e - ಸಲಹೆ

ಇಕಬಾಲ್ ಮುಲ್ಲಾ ಅವರ ಪ್ರಶ್ನೆ: ನಾನು ಖಾಸಗಿ ಕಂಪನಿಯೊಂದರಲ್ಲಿ ಟೈಪಿಸ್ಟ (ಗಣಕ ಯಂತ್ರ) ನಾಗಿ ಕೆಲಸ ನಿರ್ವಹಿಸುತ್ತಿದ್ದೇನೆ. ಬಿಡುವಿನ ವೇಳೆಯಲ್ಲಿ ಫ್ರೀ ಇದ್ದಾಗ ಗಣಕ ಯಂತ್ರದ ಮೇಲೆ ಬೇರೆ ಕೆಲಸ ಮಾಡಲು ನಿರ್ಧರಿಸಿದ್ದೇನೆ ನನಗೆ ಯಾವುದಾದರೊಂದು ವೆಬ್‌ಸೈಟ್‌ನ ಮಾಹಿತಿ ನೀಡಬೇಕಾಗಿ ನಿಮ್ಮಲ್ಲಿ ವಿನಂತಿಸಿಕೊಳ್ಳುತ್ತೇನೆ.
ಉ: www.freelanceindia.com ಜಾಲತಾಣ ನೋಡಿ. 

ಕಂಪ್ಯೂತರ್ಲೆ

ಈ ಜಗತ್ತಿನಲ್ಲಿರುವ ಅತ್ಯಂತ ಸುಂದರ ವ್ಯಕ್ತಿ ಯಾರೆಂದು ತಿಳಿಯಬೇಕೇ? ಹಾಗಿದ್ದರೆ whoisthecutest.com ಜಾಲತಾಣಕ್ಕೆ ಭೇಟಿ ನಿಡಿ.

ಮಂಗಳವಾರ, ಸೆಪ್ಟೆಂಬರ್ 27, 2011

ಗಣಕಿಂಡಿ - ೧೨೩ (ಸಪ್ಟಂಬರ್ ೨೫, ೨೦೧೧)

ಅಂತರಜಾಲಾಡಿ

ಪಂಚತಂತ್ರ

ಪಂಚತಂತ್ರದ ಕಥೆ ಗೊತ್ತಿಲ್ಲದವರು ಇರಲಿಕ್ಕಿಲ್ಲ. ಹಾಗೆಂದ ತಕ್ಷಣ “ಇಲ್ಲ, ನಮಗೆ ಎಲ್ಲ ಕಥೆಗಳು ಗೊತ್ತಿಲ್ಲ. ಹಿಂದೊಮ್ಮೆ ಓದಿದ್ದೆವು, ಆದರೆ ಈಗ ನೆನಪಿಲ್ಲ” ಎನ್ನುವವರೂ ಇದ್ದಾರೆ. ದೊಡ್ಡವರಾದಂತೆ ಹಿಂದೆ ಯಾವಾಗಲೋ ಮಕ್ಕಳಾಗಿದ್ದಾಗ ಓದಿದ ಕಥೆಗಳು ಮರೆತು ಹೋಗುತ್ತವೆ. ಆದರೆ ಮಕ್ಕಳಿಗೆ ಕಥೆ ಹೇಳಲು ಅವುಗಳನ್ನು ಮತ್ತೊಮ್ಮೆ ಓದಬೇಕಾಗುತ್ತದೆ. ಪಂಚತಂತ್ರದ ಕಥೆಗಳು ಎಂದೆಂದಿಗೂ ಪ್ರಸ್ತುತ. ಪಂಚತಂತ್ರದ ಕಥೆಗಳನ್ನು ಅಂತರಜಾಲದಲ್ಲೂ (ಇಂಗ್ಲೀಶಿನಲ್ಲಿ) ಓದಬಹುದು. ಅದಕ್ಕೆಂದೇ ಒಂದು ಜಾಲತಾಣವಿದೆ. ಅದರ ವಿಳಾಸ - panchatantra.org. ಮೊನ್ನೆಯಷ್ಟೇ ಮಕ್ಕಳ ಪ್ರೀತಿಯ “ಅಂಕಲ್ ಪೈ” ತೀರಿಕೊಂಡರು. ಅವರು ಅಮರ ಚಿತ್ರ ಕಥೆಗಳ ಮೂಲಕ ಪಂಚತಂತ್ರ ಮತ್ತು ಇತರೆ ಕಥೆಗಳನ್ನು ಜನಮನದಲ್ಲಿ ಅಚ್ಚಳಿಯದೆ ಉಳಿಯುವಂತೆ ಮಾಡಿದ್ದಾರೆ. ಅಮರ ಚಿತ್ರ ಕಥೆಗಳ ಜಾಲತಾಣ www.amarchitrakatha.com .

ಡೌನ್‌ಲೋಡ್

ಯುಎಸ್‌ಬಿ ಡ್ರೈವ್ ವೇಗ ಪತ್ತೆ ಹಚ್ಚಿ

ನೀವೊಂದು ಯುಎಸ್‌ಬಿ ಡ್ರೈವ್ ಕೊಂಡುಕೊಂಡಿದ್ದೀರಾ. ಅಂಗಡಿಯವನು ಅದು ಇಂತಿಷ್ಟು ವೇಗದಲ್ಲಿ ಮಾಹಿತಿಯನ್ನು ಬರೆಯಬಲ್ಲುದು ಹಾಗು ಇಂತಿಷ್ಟು ವೇಗದಲ್ಲಿ ಮಾಹಿತಿಯನ್ನು ಓದಬಹುದು ಎಂದು ಹೇಳಿರಬಹುದು. ಯುಎಸ್‌ಬಿ ಡ್ರೈವ್‌ನ ಓದುವ ಮತ್ತು ಬರೆಯುವ ವೇಗಗಳು ಅತಿ ದೊಡ್ಡ ಗಾತ್ರದ ಫೈಲನ್ನು ಬರೆಯುವಾಗ ಅಥವಾ ಓದುವಾಗ ಅತಿ ಮುಖ್ಯವಾಗುತ್ತವೆ. ಯುಎಸ್‌ಬಿ ಡ್ರೈವ್‌ಗಳು ಹಲವು ವೇಗಗಳಲ್ಲಿ ದೊರೆಯುತ್ತವೆ. ನೀವು ಕೊಂಡುಕೊಂಡ ಡ್ರೈವ್ ಅಂಗಡಿಯಾತ ಹೇಳಿದಷ್ಟು ವೇಗವನ್ನು ನಿಜವಾಗಿಯೂ ನೀಡುತ್ತಿದೆಯೆ ಎಂದು ಪತ್ತೆ ಹಚ್ಚುವುದು ಹೇಗೆ? ಅದಕ್ಕೆಂದೇ ಒಂದು ಉಚಿತ ತಂತ್ರಾಂಶ HD_Speed ಲಭ್ಯವಿದೆ. ಅದು ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ bit.ly/oyeBtJ.

e - ಸುದ್ದಿ

ಕಾರು ಪತ್ತೆಗೆ ತಂತ್ರಾಂಶ

ಅಮೆರಿಕದ ಮಾರುಕಟ್ಟೆ ಸಂಕೀರ್ಣಗಳಲ್ಲಿ ಕಾರು ಪಾರ್ಕಿಂಗ್ ತುಂಬ ದೊಡ್ಡದಾಗಿರುತ್ತವೆ. ಕೆಲವೊಮ್ಮೆ ಹಲವಾರು ಮಹಡಿಗಳನ್ನು ಹೊಂದಿದ್ದು ಎಲ್ಲಿ ಕಾರು ಇಟ್ಟಿದ್ದೇನೆ ಎಂದು ನೆನಪಿಟ್ಟುಕೊಳ್ಳವುದು ಕಷ್ಟವಾಗುತ್ತದೆ. ಈ ರೀತಿಯ ಬಹುಮಹಡಿಯ ಪಾರ್ಕಿಂಗ್ ಸೌಲಭ್ಯ ಈಗ ಬೆಂಗಳೂರಿಗೂ ಬಂದಿದೆ. ವ್ಯಾಪಾರ ಮುಗಿಸಿ ಬಂದು ಕಾರು ಎಲ್ಲಿಟ್ಟಿದ್ದೆ ಎಂದು ಹುಡುಕುವುದೇ ಒಮ್ಮೊಮ್ಮೆ ದೊಡ್ಡ ತಲೆನೋವಿನ ಕೆಲಸವಾಗುತ್ತದೆ. ಈಗ ಇಂತಹವರಿಗಾಗಿಯೇ ಒಂದು ತಂತ್ರಾಂಶ ತಯಾರಾಗಿದೆ. ಪಾರ್ಕಿಂಗ್ ಜಾಗದಲ್ಲಿ ಕ್ಯಾಮರ ಇರುತ್ತದೆ. ಎಲ್ಲ ಕಾರುಗಳ ನೋಂದಣಿ ಸಂಖ್ಯೆಯನ್ನು ಅದು ಗಮನಿಸುತ್ತಿರುತ್ತದೆ. ಕಾರು ಹುಡುಕುವವರು ತಮ್ಮ ಐಫೋನ್‌ನಲ್ಲಿ ತಮ್ಮ ಕಾರು ಸಂಖ್ಯೆ ನಮೂದಿಸಿದೊಡನೆ ಆ ಸಂಖ್ಯೆಯ ಕಾರು ಎಲ್ಲಿದೆ ಎಂದು ತಿಳಿಸುತ್ತದೆ. ಈ ತಂತ್ರಾಂಶವನ್ನು ಕಾರು ಕಳ್ಳರನ್ನು ಪತ್ತೆಹಚ್ಚಲೂ ಬಳಸಬಹುದು. 
 
e- ಪದ

ಡಾಟಾ ವೇರ್‌ಹೌಸ್ (data warehouse) ಯಾವುದೇ ವಿಷಯಕ್ಕೆ ಸಂಬಂಧಿಸಿದ ದತ್ತಸಂಚಯವನ್ನು ಅಥವಾ ದತ್ತಸಂಚಯಗಳನ್ನು ಸಂಗ್ರಹಿಸಿಡುವ ವ್ಯವಸ್ಥೆ ಅರ್ಥಾತ್ ದತ್ತಸಂಚಯ ಉಗ್ರಾಣ. ಹಲವು ಬಗೆಯ ನಿರ್ಧಾರಗಳನ್ನು ಕೈಗೊಳ್ಳುವಾಗ ಸಂಸ್ಥೆಗಳು ಈ ಉಗ್ರಾಣದಿಂದ ಪಡೆದ ವಿವಿಧ ಮಾದರಿಯ ವರದಿಗಳನ್ನು ಬಳಸುತ್ತವೆ.

e - ಸಲಹೆ

ರಾಜು ಅವರ ಪ್ರಶ್ನೆ: ನಾನು ದ್ವಿತೀಯ ಪಿಯುಸಿ ಆರ್ಟ್ಸ್ ವಿದ್ಯಾರ್ಥಿಯಾಗಿದ್ದು ಹಿಂದಿನ ವರ್ಷಗಳ ಪ್ರಶ್ನೆ ಪತ್ರಿಕೆಗಳು ಬೇಕಾಗಿವೆ. ಎಲ್ಲಿ ಸಿಗುತ್ತವೆ?
ಉ: bit.ly/mZb5xp ನೋಡಿ. 

ಕಂಪ್ಯೂತರ್ಲೆ

ಗಣಕ ತಜ್ಞ ಕೋಲ್ಯನನ್ನು ಬೆಂಗಳೂರಿನ ಸಾರಿಗೆ ಉಸ್ತುವಾರಿಗೆ ಮುಖ್ಯಸ್ಥನನ್ನಾಗಿ ನೇಮಿಸಿದರು. ಬೆಂಗಳೂರಿನಲ್ಲೆಲ್ಲ ನಮ್ಮ ಮೆಟ್ರೋ ಕೆಲಸ ನಡೆಯುತ್ತಿರುವುದರಿಂದ ರಸ್ತೆಗಳು ಇದ್ದಕ್ಕಿದ್ದಂತೆ ನಾಪತ್ತೆಯಾಗುತ್ತಿವೆ. ಇಂತಹ ಸಂದರ್ಭಗಳಿಗೆಂದು ಕೋಲ್ಯ ಒಂದು ಬೋರ್ಡ್ ತಯಾರಿಸಿದ. ರಸ್ತೆ ಮುಚ್ಚಿದಾಗೆಲ್ಲ ಅದನ್ನು ಬಳಸುವಂತೆ ಆದೇಶ ಹೊರಡಿಸಿದ. ಆ ಫಲಕದಲ್ಲಿ ಹೀಗೆಂದು ಬರೆದಿತ್ತು “404 Not found -  ರಸ್ತೆ ನಾಪತ್ತೆಯಾಗಿದೆ”.

ಗುರುವಾರ, ಸೆಪ್ಟೆಂಬರ್ 22, 2011

ಗಣಕಿಂಡಿ - ೧೨೨ (ಸಪ್ಟಂಬರ್ ೧೯, ೨೦೧೧)

ಅಂತರಜಾಲಾಡಿ

ಹಕ್ಕಿ ನೋಡಿದಿರಾ?

ಸಾವಿರಾರು ಕಿಲೋಮೀಟರ್ ದೂರದಿಂದ ಹಕ್ಕಿಗಳು ವಲಸೆ ಬರುವುದು ಗೊತ್ತಿರಬಹುದು. ಮೈಸೂರಿನ ಪಕ್ಕದ ರಂಗನತಿಟ್ಟು ಇಂತಹ ಹಕ್ಕಿಗಳಿಗೆ ಖ್ಯಾತವಾಗಿದೆ. ಇದೇ ರೀತಿ ಇನ್ನೂ ಹಲವಾರು ಸ್ಥಳಗಳಲ್ಲಿ ವಲಸೆಬಂದ ಹಕ್ಕಿಗಳನ್ನು ಗಮನಿಸಬಹುದು. ಕೆಲವೊಮ್ಮೆ ಅಷ್ಟೇನೂ ಪ್ರಚಲಿತವಲ್ಲದ ಜಾಗದಲ್ಲೂ ವಲಸೆಬಂದ ಹಕ್ಕಿಗಳನ್ನು ನೋಡಬಹುದು. ಈ ವರ್ಷ ಕಂಡುಬಂದ ಹಕ್ಕಿ ಪ್ರಭೇದ ಇನ್ನೊಂದು ವರ್ಷ ಕಂಡುಬರಬೇಕೆಂದೇನೂ ಇಲ್ಲ. ಹೀಗೆ ಕಂಡುಬಂದ ಹಕ್ಕಿಗಳನ್ನು ವರದಿ ಮಾಡಿ ಅವುಗಳ ಬಗ್ಗೆ ಮಾಹಿತಿಸಂಚಯ ಮಾಡಲೆಂದೇ ಒಂದು ಜಾಲತಾಣವಿದೆ. ಅದರ ವಿಳಾಸ - www.migrantwatch.in. ಈ ಜಾಲತಾಣದಲ್ಲಿ ನೋಂದಾಯಿಸಿಕೊಂಡು ನೀವು ಗಮನಿಸಿದ ವಲಸೆಹಕ್ಕಿಗಳ ಬಗ್ಗೆ ಮಾಹಿತಿ ದಾಖಲಿಸಬಹುದು.

ಡೌನ್‌ಲೋಡ್

ಫೋಟೋದಿಂದ ಕಲಾಚಿತ್ರಕ್ಕೆ

ಫೋಟೋ ನೋಡಿಕೊಂಡು ಅದರಂತೆಯೇ ಇರುವ ಕಲಾಚಿತ್ರ ರಚಿಸುವ ಕಲಾವಿದರನ್ನು ಕಂಡಿರಬಹುದು. ಅಂತಹವರ ಕೈಯಿಂದ ನಿಮ್ಮ ಅಥವಾ ನಿಮ್ಮ ಆಪ್ತರ ಚಿತ್ರಗಳನ್ನು ಬರೆಸಿರಲೂ ಬಹುದು. ಗಣಕವನ್ನು ಬಳಸಿ ಇಂತಹ ಚಿತ್ರ ತಯಾರಿಸುವಂತಿದ್ದರೆ ಒಳ್ಳೆಯದು ಅನ್ನಿಸಿದೆಯೇ? ನೀವು ಗ್ರಾಫಿಕ್ಸ್ ತಂತ್ರಾಂಶ ಪರಿಣತರಾದರೆ ಈ ಕೆಲಸವನ್ನು ನೀವೇ ಮಾಡಬಹುದು. ಆದರೆ ಅಂತಹ ಯಾವ ವಿದ್ಯೆಯೂ ನಿಮಗೆ ಗೊತ್ತಿಲ್ಲದಿದ್ದಲ್ಲಿ ಫೋಟೋದಿಂದ ಕಲಾಚಿತ್ರವನ್ನು ತಯಾರಿಸಲೆಂದೇ ಉಚಿತ ತಂತ್ರಾಂಶವೊಂದಿದೆ. ಅದರ ಹೆಸರು  FotoSketcher. ಇದನ್ನು ಬಳಸಿ ಫೋಟೋವನ್ನು ಹಲವು ನಮೂನೆಯಲ್ಲಿ ಕಲಾಚಿತ್ರವನ್ನಾಗಿಸಬಹುದು. ಈ ತಂತ್ರಾಂಶ ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ - www.fotosketcher.com.

e - ಸುದ್ದಿ

ಬೆಂಗಳೂರ್‌ಡ್ ಆಗಿಲ್ಲ

ಅಮೇರಿಕದಲ್ಲಿ ಒಂದು ಪದ ಬಳಕೆಗೆ ಬಂದಿದೆ. ಅದುವೇ ಬೆಂಗಳೂರ್‌ಡ್ (Banglored). ಅಮೆರಿಕದಿಂದ ಮಾಹಿತಿ ತಂತ್ರಜ್ಞಾನದ ಕೆಲಸಗಳು ಭಾರತಕ್ಕೆ ಅದರಲ್ಲೂ ಬೆಂಗಳೂರಿಗೆ ವರ್ಗಾವಣೆಯಾಗಿ ಅಲ್ಲಿ ನಿರುದ್ಯೋಗದ ಸಮಸ್ಯೆ ಸೃಷ್ಠಿಯಾಗಿದೆ ಎಂಬುದನ್ನು ಸೂಚಿಸಲು ಇದನ್ನು ಬಳಸುತ್ತಾರೆ. ನಾನು ಬೆಂಗಳೂರ್‌ಡ್ ಆದೆ ಎಂದರೆ ನನ್ನ ಕಂಪೆನಿ ನಾನು ಮಾಡುತ್ತಿದ್ದ ಕೆಲಸವನ್ನು ಬೆಂಗಳೂರಿಗೆ ವರ್ಗಾಯಿಸಿದೆ ಹಾಗೂ ಅದರಿಂದಾಗಿ ನಾನು ಕೆಲಸ ಕಳಕೊಂಡೆ ಎಂದು ಅರ್ಥ. ಆದರೆ ಇತ್ತೀಚೆಗೆ ಬಂದ ವರದಿ ಇದನ್ನು ಸುಳ್ಳಾಗಿಸಿದೆ. ಅಮೆರಿಕದಲ್ಲಿ ಮಾಹಿತಿ ತಂತ್ರಜ್ಞಾನ ಕ್ಷೇತ್ರದಲ್ಲಿಯ ನಿರುದ್ಯೋಗವು ಶೇಕಡ ೪.೭ರಿಂದ ೩.೮ಕ್ಕೆ ಇಳಿದಿದೆ. ಇದೇ ಸಮಯದಲ್ಲಿ ಅಮೆರಿಕದಲ್ಲಿ ನಿರುದ್ಯೋಗವು ಶೇಕಡ ೮.೯ರಿಂದ ೯.೧ಕ್ಕೆ ಏರಿದೆ. 
 
e- ಪದ

ದತ್ತಸಂಚಯ (database) - ಗಣಕದಲ್ಲಿ ಕ್ರಮಬದ್ಧವಾಗಿ ಜೋಡಿಸಿದ ದತ್ತಾಂಶಗಳ (ಮಾಹಿತಿ ತುಣುಕು) ಗುಚ್ಛ. ಈ ದತ್ತಗಳನ್ನು ಹಲವು ವಿಧಗಳಲ್ಲಿ ಜೋಡಿಸಿಡಲಾಗುತ್ತದೆ. ದತ್ತಸಂಚಯಗಳಿಗೆ ಉದಾಹರಣೆಗಳು - ಗ್ರಂಥಾಲಯದಲ್ಲಿಯ ಪುಸ್ತಕಗಳ ವಿವರಗಳು, ಕಂಪೆನಿಯಲ್ಲಿರುವ ನೌಕರರ ಮಾಹಿತಿಗಳು, ಬಸ್ ವೇಳಾಪಟ್ಟಿ -ಇತ್ಯಾದಿ. ಗಣಕ ಬಳಸಿ ನಡೆಸುವ ಬಹುಪಾಲು ಕೆಲಸಗಳು ದತ್ತಸಂಚಯಗಳನ್ನು ಬಳಸಿಯೇ ಆಗುತ್ತವೆ.

e - ಸಲಹೆ


ಶ್ರೀಹರ್ಷ ಅವರ ಪ್ರಶ್ನೆ: ನಾನು ಪ್ರೌಢ ಶಾಲಾ ಶಿಕ್ಷಕ. ನನಗೆ ಹತ್ತನೆಯ ತರಗತಿಯ ಮಾದರಿ ಮತ್ತು ಹಿಂದಿನ ವರ್ಷಗಳ ಪ್ರಶ್ನೆ ಪತ್ರಿಕೆಗಳು ಬೇಕು. ಆವು ಅಂತರಜಾಲದಲ್ಲಿ ದೊರೆಯುತ್ತವೆಯೇ?
ಉ: ಕರ್ನಾಟಕ ಸರಕಾರದ ಪ್ರೌಢ ಶಿಕ್ಷಣ ಇಲಾಖೆಯವರ ಜಾಲತಾಣದಲ್ಲಿದೆ. ಜಾಲತಾಣಸೂಚಿ - bit.ly/pu5cUW 

ಕಂಪ್ಯೂತರ್ಲೆ

ದಿನಕ್ಕೊಂದು ಆಪಲ್ ದೂರವಿಡುವುದು ವೈದ್ಯರನ್ನು - ಇದು ಹಳೆಯ ಗಾದೆ.
ದಿನಕ್ಕೊಂದು ಆಪಲ್ ಉತ್ಪನ್ನ ದಿವಾಳಿಗೆ ದಾರಿ - ಇದು ಇಂದಿನ ಗಾದೆ.

ಬುಧವಾರ, ಸೆಪ್ಟೆಂಬರ್ 14, 2011

ಗಣಕಿಂಡಿ - ೧೨೧ (ಸಪ್ಟಂಬರ್ ೧೨, ೨೦೧೧)

ಅಂತರಜಾಲಾಡಿ

ಪಿಡಿಎಫ್‌ನಿಂದ ಎಕ್ಸೆಲ್‌ಗೆ 

ನಿಮಗೆ ಒಬ್ಬರು ಒಂದು ಪಿಡಿಎಫ್ ಕಡತ ಕಳುಹಿಸುತ್ತಾರೆ. ಅದು ಒಂದು ಅರ್ಜಿ ಆಗಿರುತ್ತದೆ ಅಥವಾ ಒಂದು ಕೋಷ್ಟಕವಾಗಿರುತ್ತದೆ. ಅದನ್ನು ತುಂಬಿಸಿ ಅವರಿಗೆ ವಾಪಾಸು ಕಳುಹಿಸಬೇಕು. ಇಂತಹ ಸಂದರ್ಭದಲ್ಲಿ ಉಪಯೋಗಕ್ಕೆ ಬರುವುದು ಪಿಡಿಎಫ್‌ನಿಂದ ಮೈಕ್ರೋಸಾಫ್ಟ್ ಎಕ್ಸೆಲ್‌ಗೆ ಪೈಲನ್ನು ಬದಲಾಯಿಸುವ ತಂತ್ರಾಂಶ. ಆದರೆ ಅಂತಹ ಬಹುತೇಕ ತಂತ್ರಾಂಶಗಳನ್ನು ಹಣ ಕೊಟ್ಟು ಕೊಳ್ಳಬೇಕು. ಪಿಡಿಎಫ್ ಫೈಲ್‌ಗಳನ್ನು ಎಕ್ಸೆಲ್ ಫೈಲ್‌ಗಳಾಗಿ ಪರಿವರ್ತಿಸಲು ಒಂದು ಜಾಲತಾಣ ಇದೆ. ಅಲ್ಲಿ ನಿಮ್ಮ ಪಿಡಿಎಫ್ ಕಡತವನ್ನು ಸೇರಿಸಿದರೆ ಅದು ಕೆಲವೇ ನಿಮಷಗಳಲ್ಲಿ ಅದನ್ನು ಮೈಕ್ರೋಸಾಫ್ಟ್ ಎಕ್ಸೆಲ್ ಕಡತವಾಗಿ ಪರಿವರ್ತಿಸಿ ನೀಡುತ್ತದೆ. ಆ ಜಾಲತಾಣದ ವಿಳಾಸ - www.pdftoexcelonline.com. ನಿಮಗೆ ಆ ತಂತ್ರಾಂಶವನ್ನು ಕೊಂಡುಕೊಳ್ಳಬೇಕು ಎಂದೆನಿಸಿದರೆ ಇದೇ ಜಾಲತಾಣದಿಂದ ಕೊಳ್ಳಬಹುದು.

ಡೌನ್‌ಲೋಡ್

ರಸಾಯನಶಾಸ್ತ್ರಜ್ಞರಿಗೆ

ರಸಾಯನಶಾಸ್ತ್ರದಲ್ಲಿ ಒಂದು ಪ್ರಮುಖ ವಿಷಯ ಅಣುಗಳ ರಚನೆ ಮತ್ತು ಅವುಗಳನ್ನು ತೋರಿಸುವುದು. ಕಾಗದದಲ್ಲಿ ಹಲವು ವಿಧದಲ್ಲಿ ಸೂತ್ರ ಪ್ರಕಾರ ಅಣು ರಚನೆಗಳನ್ನು ತೋರಿಸಬಹುದು. ಆದರೂ ಕೆಲವು ಸಂದರ್ಭಗಳಲ್ಲಿ ಮೂರು ಆಯಾಮದಲ್ಲಿ ಅವುಗಳನ್ನು ಮೂಡಿಸಿದರೇ ಅದು ಹೆಚ್ಚು ಸ್ಪಷ್ಟವಾಗುವುದು. ಅಣುಗಳ ರಚನೆಯನ್ನು ಗಣಕದಲ್ಲಿ ತಯಾರಿಸಲು ಅನುವು ಮಾಡಿಕೊಡುವ ತಂತ್ರಾಂಶ Chemitorium. ಪರಮಾಣುಗಳನ್ನು ಬಳಸಿ ಅಣುಗಳ ರಚನೆಯನ್ನು ಮೂಡಿಸಲು ಇದು ಸಹಾಯಮಾಡುತ್ತದೆ. ಸಾಮಾನ್ಯ ಅಣುಗಳ ರಚನೆ ಅದಕ್ಕೆ ಮೊದಲೇ ಗೊತ್ತಿರುತ್ತದೆ. ಪರಮಾಣುಗಳನ್ನು ತಂದು ಜೋಡಿಸಿದರೆ ಸಾಕು. ಮೂಡಿದ ರಚನೆಯನ್ನು ಮೂರು ಆಯಾಮಗಳಲ್ಲಿ ನೋಡಬಹುದು. ಅದನ್ನು ವಿವಿಧ ಕೋನಗಳಲ್ಲಿ ತಿರುಗಿಸಬಹುದು ಹಾಗೂ ಇತರೆ ತಂತ್ರಾಂಶಗಳಿಗೆ ರಫ್ತು ಮಾಡಬಹುದು. ಈ ತಂತ್ರಾಂಶ ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ bit.ly/rnwx03. ವಿದ್ಯಾರ್ಥಿಗಳಿಗೂ ಅಧ್ಯಾಪಕರಿಗೂ ಉಪಯುಕ್ತ ತಂತ್ರಾಂಶ.

e - ಸುದ್ದಿ

ಸುಳ್ಳು ತಂತ್ರಾಂಶಕ್ಕೆ ದಂಡ

ಸಾಮಾನ್ಯವಾಗಿ ಗುಣವಾಗದ ಖಾಯಿಲೆಗಳನ್ನು ಗುಣ ಮಾಡುತ್ತೇವೆ ಎಂದು ಜಾಹೀರಾತು ನೋಡಿರುತ್ತೀರಿ. ಅದೇ ರೀತಿ ಐಫೋನ್ ಮೂಲಕ ಮೊಡವೆಗಳನ್ನು ಗುಣ ಮಾಡುತ್ತೇವೆ ಎಂದು ಎರಡು ಕಂಪೆನಿಗಳು ಜಾಹೀರಾತು ನೀಡಿ ಅವುಗಳನ್ನು ಮಾರಿ ದುಡ್ಡು ಮಾಡುತ್ತಿದ್ದವು. ಅವರ ಪ್ರಕಾರ ಐಫೋನ್‌ನ ಪರದೆಯಿಂದ ಕೆಲವು ವಿಶಿಷ್ಟ ಬಣ್ಣದ ಬೆಳಕುಗಳನ್ನು ಹೊಮ್ಮಿಸಿ ಅದನ್ನು ಮೊಡವೆ ಇರುವ ಪ್ರದೇಶದ ಮೇಲೆ ಬೀಳಿಸಿದರೆ ಮೊಡವೆ ಗುಣವಾಗುತ್ತದೆ. ಇದನ್ನು ಪ್ರಯೋಗಶಾಲೆಯಲ್ಲಿ ಪರಿಶೀಲಿಸಿ ಇದು ಸುಳ್ಳು ಜಾಹೀರಾತು ಎಂದು ಸರಕಾರವು ನಿರ್ಧರಿಸಿತು. ಅಂತೆಯೇ ಕಂಪೆನಿಗಳಿಗೆ ತಿಳಿಸಿ ಆ ತಂತ್ರಾಂಶಗಳನ್ನು ಮಾರುಕಟ್ಟೆಯಿಂದ ವಾಪಾಸು ಪಡೆಯಲಾಯಿತು ಮತ್ತು ಕಂಪೆನಿಗಳಿಗೆ ದಂಡ ವಿಧಿಸಲಾಯಿತು. ನಮ್ಮ ದೇಶದಲ್ಲಿ?   
 
e- ಪದ

ದತ್ತ (data) - ಗಣಕಗಳಲ್ಲಿ ದಾಖಲಿಸುವ ಹಾಗೂ ಸಂಗ್ರಹಿಸುವ ಮಾಹಿತಿ. ಸಾಮಾನ್ಯವಾಗಿ ಈ ಪದವನ್ನು ಪಠ್ಯವಲ್ಲದ ದ್ವಿಮಾನ ಅಂಕೀಯ ಮಾಹಿತಿಯ ಬಗ್ಗೆ ಹೇಳುವಾಗ ಬಳಸುತ್ತಾರೆ. ಗಣಕಕ್ಕೆ ನೀಡುವ ಆದೇಶಗುಚ್ಛಕ್ಕೆ ಪ್ರೋಗ್ರಾಮ್ (ಕ್ರಮವಿಧಿ) ಎನ್ನುತ್ತಾರೆ. ಕ್ರಮವಿಧಿಯು ದತ್ತವನ್ನು ಬಳಸಿ ಕ್ರಮವಿಧಿಯಲ್ಲಿ ನೀಡಿದ ಸೂತ್ರಗಳ ಪ್ರಕಾರ ಕೆಲಸ ಮಾಡಿ ದತ್ತವನ್ನು ಸಂಸ್ಕರಿಸಿ ದೊರೆತ ಮಾಹಿತಿಯನ್ನು ಹೊರನೀಡುತ್ತದೆ.

e - ಸಲಹೆ

ಪ್ರವೀಣರ ಪ್ರಶ್ನೆ: ನಾನು ಯಾವುದೇ ತಂತ್ರಾಂಶದಲ್ಲಿ ನಕಲು ಮಾಡಿ ಅಂಟಿಸುವಾಗ (copy and paste) “file integrity violated” ಎಂಬ ದೋಷಸಂದೇಶ ಬರುತ್ತಿದೆ. ಇದಕ್ಕೇನು ಪರಿಹಾರ?
ಉ: ಬಹುಶಃ ನೀವು teracopy ಎಂಬ ತಂತ್ರಾಂಶವನ್ನು ಬಳಸುತ್ತಿರಬೇಕು. ಅದನ್ನು ತೆಗೆದುಹಾಕಿ ಪ್ರಯತ್ನಿಸಿ.

ಕಂಪ್ಯೂತರ್ಲೆ

ಕೋಲ್ಯ ಉವಾಚ: ಈ ಅಣ್ಣಾ ಹಜಾರೆಯವರ ಭ್ರಷ್ಟಾಚಾರ ವಿರೋಧ ಆಂದೋಲನ ತುಂಬ ಅತಿಯಾಯಿತು. ನನ್ನ ಕಂಪ್ಯೂಟರ್‌ನಲ್ಲಿ ಯಾವ ಫೈಲ್ ತೆರೆಯಲು ಹೊರಟರೂ “file corrupted” ಎಂದು ಹೇಳುತ್ತಿದೆ.

ಸೋಮವಾರ, ಸೆಪ್ಟೆಂಬರ್ 5, 2011

ಗಣಕಿಂಡಿ - ೧೨೦ (ಸಪ್ಟಂಬರ್ ೦೫, ೨೦೧೧)

ಅಂತರಜಾಲಾಡಿ

ನಾವು ಶಿಕ್ಷಕರು

ಅಂತರಜಾಲದಲ್ಲಿ ವಿಜ್ಞಾನ, ತಂತ್ರಜ್ಞಾನ, ವೈದ್ಯಕೀಯ -ಹೀಗೆ ಹಲವಾರು ವಿಷಯಗಳ ಬಗ್ಗೆ ಮಾಹಿತಿ ಸಿಗುತ್ತದೆ. ಶಿಕ್ಷಕರು ಈ ಮಾಹಿತಿಗಳನ್ನು ಬಳಸಿಕೊಳ್ಳಬಹುದು. ತಮ್ಮ ಪಾಠಗಳಲ್ಲಿ ಅವುಗಳನ್ನು ಅಳವಡಿಸಿಕೊಳ್ಳಬಹುದು. ಆದರೆ ಶಿಕ್ಷಕರಿಗಾಗಿಯೇ ಮಾಹಿತಿಕೋಶ ಅಥವಾ ಜಾಲತಾಣ ಇದೆಯೇ? ಇದೆ. ಅಂತಹ ಒಂದು ಜಾಲತಾಣ www.wetheteachers.com. ಇದು ಶಿಕ್ಷಕರಿಂದ ಶಿಕ್ಷಕರಿಗಾಗಿ ನಿರ್ಮಾಗೊಂಡ ಜಾಲತಾಣ. ಶಿಕ್ಷಕರು ಇತರೆ ಶಿಕ್ಷಕರ ಜೊತೆ ಪಾಠ ಮಾಡಲು ಸಹಾಯಕಾರಿಯಾದ ಹಲವಾರು ಮಾಹಿತಿಗಳನ್ನು ಈ ಜಾಲತಾಣ ಮೂಲಕ ಹಂಚಿಕೊಳ್ಳಬಹುದು. ಅವು ಸ್ಲೈಡ್, ಪಠ್ಯ, ವಿದ್ಯಾರ್ಥಿಗಳಿಗೆ ನೀಡುವ ಚಟುವಟಿಕೆ, ಶಿಕ್ಷಕರ ದಿನಚರಿ, ವಿದ್ಯಾರ್ಥಿಗಳ ಅಥವಾ ಶಾಲೆಗೆ ಅಗತ್ಯ ದತ್ತಸಂಚಯದ ವಿನ್ಯಾಸ, ಶಿಕ್ಷಕರಿಗೆ ಉಪಯುಕ್ತ ತಂತ್ರಾಂಶ, ಇತ್ಯಾದಿ ಇರಬಹುದು. ನೀವು ಶಿಕ್ಷಕರಾದರೆ ಈ ಜಾಲತಾಣಕ್ಕೆ ಖಂಡಿತ ಭೇಟಿ ನೀಡಬೇಕು. ಇದು ಕೆಲವು ಶಿಕ್ಷಕರು ಸೇರಿ ಪ್ರಾರಂಭಿಸಿದ ಜಾಲತಾಣ. ಇತ್ತೀಚೆಗೆ ಖಾಸಗಿ ಕಂಪೆನಿಯೊಂದು ಈ ಜಾಲತಾಣವನ್ನು ಕೊಂಡುಕೊಂಡಿದೆ. ಆದರೆ ಇದರ ಮೂಲ ಉದ್ದೇಶಕ್ಕೆ ಭಂಗ ಬಾರದ ರೀತಿಯಲ್ಲಿ ಇದನ್ನು ಮುಂದುವರೆಸಿಕೊಂಡು ಹೋಗುವುದಾಗಿ ಅದು ಹೇಳಿಕೊಂಡಿದೆ. 

ಡೌನ್‌ಲೋಡ್

ಪದಕೋಶ

ಇಂಗ್ಲಿಶ್ ಭಾಷೆಗೆ ನಿಘಂಟು ಮತ್ತು ಸಮಾನಾರ್ಥ ಪದಕೋಶಗಳು ಹಲವಾರು ಲಭ್ಯವಿವೆ. ಅಂತಹ ಒಂದು ಉಚಿತ ಪದಕೋಶ ಮತ್ತು ಸಮಾನಾರ್ಥ ಪದಕೋಶವನ್ನು wordweb.info ಜಾಲತಾಣದಿಂದ ಡೌನ್‌ಲೋಡ್ ಮಾಡಿಕೊಳ್ಳಬಹುದು. ಇದರಲ್ಲಿ ಉಚಿತ ಮತ್ತು ವಾಣಿಜ್ಯಕ ಎಂಬ ಎರಡು ಆವೃತ್ತಿಗಳಿವೆ. ಉಚಿತ ಆವೃತ್ತಿಯಲ್ಲಿ ಸುಮಾರು ೧,೫೦,೦೦೦ ಪದಗಳಿವೆ ಮತ್ತು ೫,೦೦೦ ಪದಗಳಿಗೆ ಮಾತ್ರ ಉಚ್ಛಾರವಿದೆ. ಇದು ಮೈಕ್ರೋಸಾಫ್ಟ್ ವರ್ಡ್ ಜೊತೆ ಸುಲಲಿತವಾಗಿ ಮಿಳಿತವಾಗುತ್ತದೆ. ವರ್ಡ್‌ನಲ್ಲಿ ಬೆರಳಚ್ಚು ಮಾಡುತ್ತಿದ್ದಂತೆ ಯಾವುದೇ ಪದದ ಅರ್ಥ ಬೇಕಿದ್ದರೆ ಅಥವಾ ಬಳಸಿದ ಪದಕ್ಕೆ ಸಮಾನಾರ್ಥವಾದ ಬೇರೆ ಪದ ಬಳಸಬೇಕಿದ್ದರೆ ಒಂದು ಸರಳವಾದ ಕೀಲಿಸರಣಿ ಒತ್ತಿದರೆ ಆಯಿತು. ಅದು ನೀಡುವ ಆಯ್ಕೆಯಲ್ಲಿ ನಿಮಗಿಷ್ಟವಾದ ಪದವನ್ನು ಬಳಸಬಹುದು. ಇದೇ ಜಾಲತಾಣದಲ್ಲಿ ಮೊಬೈಲ್ ಫೋನ್‌ಗಳಿಗೂ ಇದೇ ತಂತ್ರಾಂಶದ ಆವೃತ್ತಿ ಲಭ್ಯವಿದೆ.

e - ಸುದ್ದಿ

ತನ್ನ ಫೋಟೋ ತೆಗೆದು ಸಿಕ್ಕಿಬಿದ್ದ ಕಳ್ಳ

ಕಳ್ಳನೊಬ್ಬ ಒಬ್ಬಾಕೆಯ ಫೋನ್ ಕದ್ದ. ಆತನಿಗೆ ತನ್ನ ಫೋಟೋ ತೆಗೆಯುವ ಹುಚ್ಚು ಇತ್ತು. ಫೋನಿನಲ್ಲಿ ಇದ್ದ ಕ್ಯಾಮರಾ ಬಳಸಿ ತನ್ನ ಫೋಟೋ ತಾನೇ ಕ್ಲಿಕ್ಕಿಸಿದ. ಆತನ ದುರದೃಷ್ಟಕ್ಕೆ ಹಾಗೂ ಫೋನ್ ಕಳಕೊಂಡಾಕೆಯ ಅದೃಷ್ಟಕ್ಕೆ ಆ ಫೋನಿನಲ್ಲಿ ಫೋಟೋಬಕೆಟ್ ತಂತ್ರಾಂಶ ಇತ್ತು. ಅದು ಆ ಫೋನ್ ಬಳಸಿ ಏನೇ ಫೋಟೋ ತೆಗೆದರೂ ಅದನ್ನು ಫೋಟೋಬಕೆಟ್ ತಾಲತಾಣದಲ್ಲಿದ್ದ ಆಕೆಯ ಖಾತೆಗೆ ಸೇರಿಸುತ್ತಿತ್ತು. ಕಳ್ಳನ ಫೋಟೋವೂ ಅದೇ ರೀತಿ ಅಲ್ಲಿಗೆ ಹೋಗಿ ಸೇರಿಕೊಂಡಿತು. ಅಲ್ಲಿ ಕಳ್ಳನ ಫೋಟೋ ನೋಡಿದ ಆಕೆ ಅದನ್ನು ಪೋಲೀಸರಿಗೆ ತಿಳಿಸಿದಳು. ಮುಂದೇನಾಯಿತು ಎಂದು ವಿವರಿಸುವ ಅಗತ್ಯ ಇಲ್ಲ ತಾನೆ? (ಫೋಟೋಬಕೆಟ್ ಪಿಕಾಸಾ, ಫ್ಲಿಕರ್ ಮಾದರಿಯಲ್ಲಿ ಫೊಟೋಗಳನ್ನು ಹಂಚಿಕೊಳ್ಳುವ ಒಂದು ಜಾಲತಾಣ).   
 
e- ಪದ

ಮ್ಯಾಂಗೋ (Mango) - ಮೈಕ್ರೋಸಾಫ್ಟ್ ವಿಂಡೋಸ್ ಫೋನ್‌ನ ಆವೃತ್ತಿ ೭.೧ ರ ಸಂಕೇತನಾಮ. ಸ್ಮಾರ್ಟ್‌ಫೋನ್ ಕಾರ್ಯಾಚರಣ ವ್ಯವಸ್ಥೆಗಳಲ್ಲಿ (operating system) ವಿಂಡೋಸ್ ಫೋನ್ ಕೂಡ ಒಂದು. ಮ್ಯಾಂಗೋದಲ್ಲಿ ಹಲವು ಅತ್ಯಾಧುನಿಕ ಸೌಲಭ್ಯಗಳನ್ನು ನೀಡಲಾಗಿದೆ. ಮ್ಯಾಂಗೋ ಅಳವಡಿಸಿದ ಸ್ಮಾರ್ಟ್‌ಫೋನ್ ಇನ್ನೂ ಜಾಗತಿಕ ಮಾರುಕಟ್ಟೆಗೆ ಹಾಗೂ ಭಾರತಕ್ಕೆ ತಲುಪಿಲ್ಲ.

e - ಸಲಹೆ

ಹಲವು ಮಂದಿ ಮತ್ತೆ ಮತ್ತೆ ಕೇಳುತ್ತಿರುವ ಪ್ರಶ್ನೆ: ಕನ್ನಡ ಚಲನಚಿತ್ರ ಹಾಗೂ ಹಾಡುಗಳನ್ನು ಉಚಿತವಾಗಿ ಡೌನ್‌ಲೋಡ್ ಮಾಡಿಕೊಳ್ಳಬೇಕು. ಯಾವ ಜಾಲತಾಣದಲ್ಲಿ ಸಿಗುತ್ತದೆ?
ಉ: ಚಲನಚಿತ್ರ ಹಾಗೂ ಹಾಡುಗಳನ್ನು ಅವುಗಳ ಹಕ್ಕುಸ್ವಾಮ್ಯವುಳ್ಳವರ ಅನುಮತಿಯಿಲ್ಲದೆ ಅಥವಾ ಅವುಗಳನ್ನು ಹಣನೀಡಿ ಕೊಂಡುಕೊಳ್ಳದೆ ಡೌನ್‌ಲೋಡ್ ಮಾಡಿಕೊಳ್ಳುವುದು ಕಾನೂನು ಪ್ರಕಾರ ಅಪರಾಧ. ಅಂತರಜಾಲದಲ್ಲಿ ಈ ರೀತಿ ಕಾನೂನುಬಾಹಿರವಾಗಿ ಡೌನ್‌ಲೋಡ್ ಮಾಡಿಕೊಳ್ಳಲು ಅನುವು ಮಾಡಿಕೊಡುವ ಕೆಲವು ಜಾಲತಾಣಗಳೂ ಇವೆ. ಆದರೆ ಅವು ಕಾನೂನುಬಾಹಿರವಾದುದರಿಂದ ಅವುಗಳ ಕೊಂಡಿಯನ್ನು ಗಣಕಿಂಡಿ ಅಂಕಣದಲ್ಲಿ ನೀಡುವಂತಿಲ್ಲ. ನೀವು ಕೂಡ ಕಾನೂನುಬಾಹಿರವಾಗಿ ಯಾವುದೇ ಹಾಡು, ಚಲನಚಿತ್ರ, ತಂತ್ರಾಂಶ ಡೌನ್‌ಲೋಡ್ ಮಾಡಬೇಡಿ.

ಕಂಪ್ಯೂತರ್ಲೆ

“ನನ್ನಲ್ಲಿ ಟ್ವಿಟ್ಟರ್, ಫೇಸ್‌ಬುಕ್, ಆರ್ಕುಟ್, ಗೂಗ್ಲ್+, ಫೋರ್‌ಸ್ಕ್ವೇರ್, ಎಲ್ಲ ಇವೆ. ನಿನ್ನಲ್ಲಿ ಏನಿದೆ?”
“ನನ್ನಲ್ಲಿ ಕೆಲಸವಿದೆ”

ಮಂಗಳವಾರ, ಆಗಸ್ಟ್ 30, 2011

ಗಣಕಿಂಡಿ - ೧೧೯ (ಆಗಸ್ಟ್ ೨೯, ೨೦೧೧)

ಅಂತರಜಾಲಾಡಿ

ಸೂರ್ಯಾತೀತಗ್ರಹ ಮಾಹಿತಿಸಂಚಯ
ಬ್ರಹ್ಮಾಂಡದಲ್ಲಿ ನಮ್ಮ ಸೂರ್ಯನಿಗೆ ಮಾತ್ರವೇ ಗ್ರಹಗಳಿವೆ ಎಂದು ನಂಬಿದ್ದ ಕಾಲವೊಂದಿತ್ತು. ಆದರೆ ಈಗ ವಿಜ್ಞಾನ ತಂತ್ರಜ್ಞಾನ ತುಂಬ ಮುಂದುವರೆದಿದೆ. ಸೂರ್ಯನ ಹೊರತಾಗಿಯೂ ವಿಶ್ವದಲ್ಲಿರುವ ಕೋಟ್ಯಾನುಕೋಟಿ ನಕ್ಷತ್ರಗಳಲ್ಲಿ ಬಹುಪಾಲು ನಕ್ಷತ್ರಗಳಿಗೆ ಸುತ್ತುತ್ತಿರುವ ಗ್ರಹಗಳಿವೆ ಎಂದು ತೀರ್ಮಾನಕ್ಕೆ ಬರಲಾಗಿದೆ. ಅಂತಹವುಗಳಲ್ಲಿ ಇದುತನಕ ೫೭೩ ಸೂರ್ಯಾತೀತ ಗ್ರಹಗಳನ್ನು (exoplantes) ಪತ್ತೆಹಚ್ಚಲಾಗಿದೆ. ಇವುಗಳನ್ನು ಪತ್ತೆಹಚ್ಚುವುದು ತುಂಬ ಕಷ್ಟದ ಕೆಲಸ. ಅದಕ್ಕಾಗಿ ಕೆಲವು ವಿಶಿಷ್ಟ ವಿಧಾನಗಳನ್ನು ಬಳಸಲಾಗುತ್ತದೆ. ಹೀಗೆ ಪತ್ತೆಹಚ್ಚಿದ ಎಲ್ಲ ಗ್ರಹಗಳ ವಿವರಗಳು exoplanet.eu ಜಾಲತಾಣದಲ್ಲಿ ಲಭ್ಯವಿವೆ. ಸೂರ್ಯಾತೀತ ಗ್ರಹಗಳ ಬಗ್ಗೆ ಎಲ್ಲ ವಿವರಗಳು ಇಲ್ಲಿ ದೊರೆಯುತ್ತವೆ. ಜೊತೆಗೆ www.exoplanetology.com ಮತ್ತು exoplanets.org ಜಾಲತಾಣಗಳಿಗೂ ಭೇಟಿ ನೀಡಿ.

ಡೌನ್‌ಲೋಡ್


ಲ್ಯಾಪ್‌ಟಾಪ್, ಫೋನ್ ಸುರಕ್ಷೆ

ಲ್ಯಾಪ್‌ಟಾಪ್ ಅಥವಾ ಫೋನ್ ಕಳವಾಗುವುದು ಸಹಜ. ಹೀಗೆ ಕಳವಾದಾಗ ಪತ್ತೆ ಹಚ್ಚಲು ಸಹಾಯ ಮಾಡುವ ತಂತ್ರಾಂಶಗಳೂ ಹಲವಾರಿವೆ. ಅಂತಹ ಒಂದು ಉಚಿತ ತಂತ್ರಾಂಶ Prey. ಇದು ಲ್ಯಾಪ್‌ಟಾಪ್ ಮತ್ತು ಆಂಡ್ರೋಯಿಡ್ ಫೋನ್‌ಗಳಲ್ಲಿ ಕೆಲಸ ಮಾಡುತ್ತದೆ. ಲ್ಯಾಪ್‌ಟಾಪ್‌ನಲ್ಲಿ ಇದನ್ನು ಇನ್‌ಸ್ಟಾಲ್ ಮಾಡಿ ಕೆಲವು ಆಯ್ಕೆಗಳನ್ನು ನಮೂದಿಸಬೇಕು. ಲ್ಯಾಪ್‌ಟಾಪ್ ಕಳವಾದಾಗ ಫೋನ್ ಅಥವಾ ಅಂತರಜಾಲದ ಮೂಲಕ ಈ ತಂತ್ರಾಂಶವನ್ನು ಚಾಲನೆಗೊಳಿಸಬೇಕು. ನಂತರ ಅದು ನಾವು ನಿಗದಿ ಮಾಡಿದ ಸಮಯಕ್ಕೆ ಸರಿಯಾಗಿ ಲ್ಯಾಪ್‌ಟಾಪ್‌ನಲ್ಲಿ ಏನೇನು ನಡೆಯುತ್ತಿದೆ ಎಂದು ವರದಿ ಕಳುಹಿಸುತ್ತಿರುತ್ತದೆ. ಇದರ ಮೂಲಕ ಲ್ಯಾಪ್‌ಟಾಪ್ ಎಲ್ಲಿದೆ, ಯಾರು ಹೇಗೆ ಬಳಸುತ್ತಿದ್ದಾರೆ ಎಂಬ ಮಾಹಿತಿ ಪಡೆದು ಅದನ್ನು ಪೋಲೀಸರಿಗೆ ನೀಡಿ ಕಳ್ಳರನ್ನು ಹಿಡಿಯಬಹುದು. ಈ ತಂತ್ರಾಂಶ ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ preyproject.com.

e - ಸುದ್ದಿ

ತಂತ್ರಜ್ಞನಿಂದ ಕದ್ದರೆ?

ಕೆಲವು ತಿಂಗಳುಗಳ ಹಿಂದೆ ಇಂಗ್ಲೆಂಡಿನಲ್ಲಿ ಹದಿಹರೆಯದವರು ಅಂಗಡಿ ಮನೆಗಳನ್ನು ಲೂಟಿ ಮಾಡಿದ್ದು ನೆನಪಿರಬಹುದು. ಆ ಸಂದರ್ಭದಲ್ಲಿ ಒಬ್ಬ ಯುವಕ ಒಂದು ಮನೆಯಿಂದ ಲ್ಯಾಪ್‌ಟಾಪ್ ಒಂದನ್ನು ಕದ್ದ. ಆದರೆ ಆತನ ದುರದೃಷ್ಟಕ್ಕೆ ಆತ ಕದ್ದಿದ್ದು ಒಬ್ಬ ತಂತ್ರಾಂಶ ಸುರಕ್ಷಾ ಪರಿಣತನದಾಗಿತ್ತು. ಆತ ತನ್ನ ಲ್ಯಾಪ್‌ಟಾಪ್‌ನಲ್ಲಿ Prey ಎಂಬ ತಂತ್ರಾಂಶವನ್ನು ಅಳವಡಿಸಿದ್ದ. ಕಳ್ಳ ತಾನು ಕದ್ದ ಲ್ಯಾಪ್‌ಟಾಪ್‌ನಲ್ಲಿ ಏನೇನು ಮಾಡುತ್ತಿದ್ದಾನೆ ಎಂಬುದನ್ನು ಆ ತಂತ್ರಾಂಶ ಇಮೈಲ್ ಮಾಡತೊಡಗಿತು. ಎರಡು ದಿನಗಳ ನಂತರ ಕಳ್ಳ ತನ್ನ ಫೇಸ್‌ಬುಕ್ ಖಾತೆಗೆ ಲಾಗಿನ್ ಆದ. ಅಲ್ಲಿಂದ ಆತನ ಸಂಪೂರ್ಣ ವಿವರ ಪಡೆದು ಪೋಲೀಸರಿಗೆ ನೀಡಿ ಆತನನ್ನು ಬಂಧಿಸಲಾಯಿತು. 
 
e- ಪದ

ಮರುಟ್ವೀಟ್ (retweet) - ಮೈಕ್ರೋಬ್ಲಾಗಿಂಗ್ ಜಾಲತಾಣ ಟ್ವಿಟ್ಟರಿನಲ್ಲಿ ಒಬ್ಬರು ದಾಖಲಿಸಿದ ಟ್ವೀಟ್ ಅನ್ನು ಇನ್ನೊಬ್ಬರು ಪುನರಾವರ್ತಿಸುವುದು. ಒಬ್ಬರ ಟ್ವೀಟ್ ಎಷ್ಟು ಜನಪ್ರಿಯವಾಗಿದೆ ಎಂಬುದಕ್ಕೆ ಎಷ್ಟು ಜನರು ಅದನ್ನು ಮರುಟ್ವೀಟ್ ಮಾಡಿದ್ದಾರೆ ಎಂಬುದೂ ಒಂದು ಅಳತೆಗೋಲಾಗಿದೆ. ಇತ್ತೀಚೆಗೆ ಆಕ್ಸ್‌ಫರ್ಡ್ ನಿಘಂಟು ಈ ಪದವನ್ನು ತನ್ನ ನಿಘಂಟಿನಲ್ಲಿ ಅಧಿಕೃತವಾಗಿ ಸೇರಿಸಿದೆ.

e - ಸಲಹೆ

ವೀರು ಅವರ ಪ್ರಶ್ನೆ: C ಪ್ರೋಗ್ರಾಮ್ಮಿಂಗ್ ಕಲಿಯಲು ಉಚಿತ ಟ್ಯುಟೋರಿಯಲ್ ಜಾಲತಾಣ ಯಾವುದಾರೂ ಇದೆಯೇ?
ಉ: ಹಲವಾರಿವೆ. ಒಂದು ಉದಾಹರಣೆ - www.tutorials4u.com/c/

ಕಂಪ್ಯೂತರ್ಲೆ

iMac, iPhone, iPod, iTab, ಇತ್ಯಾದಿಗಳನ್ನು ತಯಾರಿಸುವ ಆಪಲ್ ಕಂಪೆನಿಯ ಸಿಇಓ ಆಗಿದ್ದ ಸ್ಟೀವ್ ಜಾಬ್ಸ್ ಇತ್ತೀಚೆಗೆ ತಮ್ಮ ಹುದ್ದೆಗೆ ರಾಜೀನಾಮೆ ಇತ್ತರು. ಅವರ ರಾಜೀನಾಮೆಯಲ್ಲಿದ್ದುದು ಒಂದೇ ಪದ -“iResign”

ಮಂಗಳವಾರ, ಆಗಸ್ಟ್ 23, 2011

ಗಣಕಿಂಡಿ - ೧೧೮ (ಆಗಸ್ಟ್ ೨೨, ೨೦೧೧)

ಅಂತರಜಾಲಾಡಿ

ಸ್ಲೈಡ್ ಹಂಚಿ

ಸಭೆ, ವಿಚಾರ ಸಂಕಿರಣ, ಕಮ್ಮಟ, ಗೋಷ್ಠಿಗಳಲ್ಲಿ ಮಂಡಿಸಬೇಕಾದ ವಿಷಯವನ್ನು ಪರಿಣಾಮಕಾರಿಯಾಗಿ ತಿಳಿಸಲು ಸಾಮಾನ್ಯವಾಗಿ ಗಣಕ ಬಳಸಿ ಪ್ರೆಸೆಂಟೇಶನ್ ಮಾಡಲಾಗುತ್ತದೆ. ಬಹುಜನರು ಇದಕ್ಕಾಗಿ ಬಳಸುವುದು ಮೈಕ್ರೋಸಾಫ್ಟ್ ಪವರ್‌ಪಾಯಿಂಟ್ ತಂತ್ರಾಂಶ. ಈ ರೀತಿ ತಯಾರಿಸಿದ ಪ್ರಸೆಂಟೇಶನ್ ಸ್ಲೈಡ್‌ಗಳನ್ನು ಜಗತ್ತಿಗೆ ಹಂಚಲು ಒಂದು ಜಾಲತಾಣ ಇದೆ. ಅದರ ವಿಳಾಸ - www.slideshare.net. ಈ ಜಾಲತಾಣ ಬಹುಮಟ್ಟಿಗೆ ಯುಟ್ಯೂಬ್ ಮಾದರಿಯಲ್ಲಿ ಕೆಲಸ ಮಾಡುತ್ತದೆ. ನೀವು ಇಲ್ಲಿ ನಿಮ್ಮ ಪ್ರೆಸೆಂಟೇಶನ್ ಸ್ಲೈಡ್‌ಗಳನ್ನು ಸೇರಿಸಿ ಅದರ ಕೊಂಡಿಯನ್ನು ನಿಮ್ಮ ಮಿತ್ರರಿಗೆ ಕಳುಹಿಸಿದರೆ ಅವರು ತಮ್ಮ ಗಣಕದಲ್ಲಿ ಅಂತರಜಾಲದ ಮೂಲಕ ಈ ಸ್ಲೈಡ್‌ಗಳನ್ನು ನೋಡಬಹುದು. ಜಾಲತಾಣದಲ್ಲಿ ಈಗಾಗಲೆ ಇರುವ ಸಾವಿರಾರು ಪ್ರಸೆಂಟೇಶನ್ ಸ್ಲೈಡ್‌ಗಳನ್ನು ವಿಷಯವಾರು ವಿಂಗಡಿಸಿರಿಸಲಾಗಿದೆ.

ಡೌನ್‌ಲೋಡ್

ಪ್ರಸಾರಕೇಂದ್ರ

ಬಾನುಲಿ ಹಾಗೂ ದೂರದರ್ಶನ ಕೇಂದ್ರಗಳು ಗೊತ್ತಲ್ಲ? ಅದೇ ರೀತಿ ಅಂತರಜಾಲದ ಮೂಲಕ ರೇಡಿಯೋ ಹಾಗೂ ಟಿ.ವಿ. ಪ್ರಸಾರ ಕೇಂದ್ರಗಳನ್ನು ಸ್ಥಾಪಿಸಬಹುದು. ಅದಕ್ಕೆ ತುಂಬ ಹಣ ಖರ್ಚು ಆಗುತ್ತದೆ. ಸುಲಭದಲ್ಲಿ ಒಂದು ಪ್ರಸಾರ ಕೇಂದ್ರ ಪ್ರಾರಂಭಿಸಬೇಕೇ? ಅದಕ್ಕೆಂದೇ ಒಂದು ತಂತ್ರಾಂಶ ಉಚಿತವಾಗಿ www.sopcast.com ಜಾಲತಾಣದಲ್ಲಿ ಲಭ್ಯವಿದೆ. ಈ ತಂತ್ರಾಂಶದ ವೈಶಿಷ್ಟ್ಯವೇನೆಂದರೆ ಇದು ವ್ಯಕ್ತಿಯಿಂದ ವ್ಯಕ್ತಿಗೆ (person-to-person, P2P) ವಿಧಾನವನ್ನು ಬಳಸುತ್ತದೆ. ಟೊರೆಂಟ್ ಬಳಸುವವರಿಗೆ ಈ ವಿಧಾನ ಪರಿಚಿತ. ನಿಮ್ಮ ಗಣಕವನ್ನು ಬ್ರಾಡ್‌ಬಾಂಡ್ ಮೂಲಕ ಅಂತರಜಾಲಕ್ಕೆ ಸಂರ್ಕಿಸಿ ಈ ತಂತ್ರಾಂಶ ಮೂಲಕ ಹಾಡು, ಚಲನಚಿತ್ರಗಳನ್ನು ಜಗತ್ತಿಗೆಲ್ಲ ಪ್ರಸಾರ ಮಾಡಬಹುದು. ಅದನ್ನು ನೋಡುವವರಲ್ಲೂ ಅದೇ ತಂತ್ರಾಂಶ ಇರತಕ್ಕದ್ದು. ನಿಮ್ಮ ಸಂಘದ ಕಾರ್ಯಕ್ರಮ, ಮಗಳ ಹುಟ್ಟುಹಬ್ಬದ ಆಚರಣೆ, ಮದುವೆ, ಏನೇ ಇರಬಹುದು, ಈ ವಿಧಾನದಲ್ಲಿ ನಿಮ್ಮ ಮಿತ್ರರಿಗೆಲ್ಲ ಪ್ರಸಾರ ಮಾಡಬಹುದು.

e - ಸುದ್ದಿ

ಕಾರು ಓಡಿಸಿದಷ್ಟೇ ತೆರಿಗೆ

ಕಾರು ಓಡಿಸಿದಷ್ಟೇ ಪೆಟ್ರೋಲು ಖರ್ಚಾಗುವುದು ಎಲ್ಲಿರಿಗೂ ತಿಳಿದ ವಿಷಯ. ಆದರೆ ತೆರಿಗೆ ವಿಷಯದಲ್ಲಿ ಹಾಗಿಲ್ಲ. ನೀವು ಕಾರು ಓಡಿಸಿ ಅಥವಾ ಸುಮ್ಮನೆ ಗ್ಯಾರೇಜಿನಲ್ಲಿಟ್ಟಿರಿ, ವರ್ಷಕ್ಕೆ ಇಂತಿಷ್ಟು ಎಂದು ತೆರಿಗೆ ಕಟ್ಟಲೇ ಬೇಕು (ಭಾರತದಲ್ಲಿ ೧೫ ವರ್ಷಗಳ ತೆರಿಗೆಯನ್ನು ಕಾರು ಕೊಂಡುಕೊಳ್ಳುವಾಗಲೇ ತೆರಬೇಕು). ನೆದರ್‌ಲ್ಯಾಂಡ್ ದೇಶದಲ್ಲಿ ಒಂದು ಹೊಸ ಪ್ರಯೋಗ ನಡೆಯುತ್ತಿದೆ. ಕಾರುಗಳಲ್ಲಿರುವ ಉಪಗ್ರಹಾಧಾರಿತ ಜಿಪಿಎಸ್ ತಂತ್ರಜ್ಞಾನದ ಮೂಲಕ ಕಾರು ಯಾವಾಗ ಎಷ್ಟು ದೂರ ಕ್ರಮಿಸಿದೆ ಎಂದು ದಾಖಲಿಸಲಾಗುತ್ತದೆ. ತಿಂಗಳ ಅಥವಾ ವರ್ಷದ ಕೊನೆಗೆ ಕಾರು ಒಟ್ಟು ಎಷ್ಟು ದೂರ ಸಂಚರಿಸಿದೆಯೋ ಅದಕ್ಕೆ ಅನುಗುಣವಾಗಿ ತೆರಿಗೆ ಕಟ್ಟತಕ್ಕದ್ದು. ಇಂಧನ ಉಳಿಸಿ ಪರಿಸರವನ್ನು ಉಳಿಸಲು ಸಹಾಯಮಾಡಲು ಜನರಿಗೆ ಉತ್ತೇಜನ ನೀಡಲು ಈ ಹೊಸ ವ್ಯವಸ್ಥೆ ಜಾರಿ ಮಾಡಲಾಗುತ್ತಿದೆ.  
 
e- ಪದ

ಬಹುಮಾಧ್ಯಮ ಪ್ರಸಾರ (Streaming or media streaming) - ಅಂತರಜಾಲದ ಮೂಲಕ ಬಹುಮಾಧ್ಯಮ ಅದರಲ್ಲೂ ಮುಖ್ಯವಾಗಿ ಧ್ವನಿ ಮತ್ತು ವೀಡಿಯೋಗಳನ್ನು ಪ್ರಸಾರ ಮಾಡುವುದು.  ಇಲ್ಲಿ ಧ್ವನಿ ಮತ್ತು ವೀಡಿಯೋ ಮಾಹಿತಿಯು ನಿರಂತರ ಪ್ರವಾಹ ರೂಪದಲ್ಲಿ ಪ್ರಸಾರವಾಗುತ್ತಿರುತ್ತದೆ. ಅಂದರೆ ಸಂಗೀತ ಅಥವಾ ಚಲನಚಿತ್ರವನ್ನು ಗಣಕಕ್ಕೆ ಡೌನ್‌ಲೋಡ್ ಮಾಡಿಕೊಳ್ಳಲು ಸಾಧ್ಯವಿಲ್ಲ. ಯುಟ್ಯೂಬ್ ಇದಕ್ಕೆ ಉತ್ತಮ ಉದಾಹರಣೆ. ಆದರೆ ಇಂತಹ ಪ್ರಸಾರಗಳನ್ನು ಸಂಗ್ರಹಿಸಿ ಗಣಕಕ್ಕೆ ಪ್ರತಿ ಮಾಡಿಕೊಳ್ಳಲೂ ತಂತ್ರಾಂಶಗಳು ಲಭ್ಯವಿವೆ.

e - ಸಲಹೆ

ತೀರ್ಥಹಳ್ಳಿಯ ಅಶ್ವಿನ್ ಅವರ ಪ್ರಶ್ನೆ: ನೋಕಿಯ 3110 ಫೋನಿನಿಂದ ಎಲ್ಲ ವಿಳಾಸಗಳನ್ನು ಗಣಕಕ್ಕೆ ಪ್ರತಿ ಮಾಡಿಕೊಳ್ಳುವುದು ಹೇಗೆ?
ಉ: ನೋಕಿಯಾ ಜಾಲತಾಣದಿಂದ PCSuite ಎಂಬ ತಂತ್ರಾಂಶವನ್ನು ಡೌನ್‌ಲೋಡ್ ಮಾಡಿಕೊಳ್ಳಿ. ಈ ತಂತ್ರಾಂಶ ಬಳಸಿ ಯುಎಸ್‌ಬಿ ಕೇಬಲ್ ಮೂಲಕ ಮೊಬೈಲಿನಿಂದ ಗಣಕಕ್ಕೆ ವಿಳಾಸಗಳನ್ನು ಪ್ರತಿ ಮಾಡಿಕೊಳ್ಳಬಹುದು.

ಕಂಪ್ಯೂತರ್ಲೆ

ಕೋಲ್ಯನ ಗಣಕದಲ್ಲೇನೋ ತೊಂದರೆಯಾಗಿತ್ತು. ಗ್ರಾಹಕ ಸೇವೆಗೆ ಫೋನ್ ಮಾಡಿದ. “ಎಷ್ಟು ವಿಂಡೋಗಳನ್ನು ತೆರೆದಿದ್ದೀರಾ” ಎಂಬ ಪ್ರಶ್ನೆ ಬಂತು. ಕೋಲ್ಯ ಉತ್ತರಿಸಿದ “ನಾನು ಹವಾನಿಯಂತ್ರಿತ ಕೊಠಡಿಯಲ್ಲಿದ್ದೇನೆ. ಯಾವ ವಿಂಡೋವೂ ತೆರೆದಿಲ್ಲ”.

ಬುಧವಾರ, ಆಗಸ್ಟ್ 17, 2011

ಗಣಕಿಂಡಿ - ೧೧೭ (ಆಗಸ್ಟ್ ೧೫, ೨೦೧೧)

ಅಂತರಜಾಲಾಡಿ

ಭಾರತ ನನ್ನ ದೇಶ

ನಮ್ಮ ದೇಶದ ಅಧಿಕೃತ ಅಂತರಜಾಲತಾಣ ಇರಲೇಬೇಕಲ್ಲ? ಹೌದು, ಇದೆ. ಅದರ ವಿಳಾಸ - india.gov.in. ಇದು ಭಾರತ ಸರಕಾರದ ಅಧಿಕೃತ ಜಾಲತಾಣ. ನಮ್ಮ ದೇಶದ ಬಗ್ಗೆ ಎಲ್ಲ ವಿವರಗಳು ಇಲ್ಲಿವೆ. ಉದಾ- ರಾಷ್ಟ್ರೀಯ ಹಬ್ಬಗಳು, ಪ್ರಾಣಿ, ಹೂವು, ಪಕ್ಷಿ, ಗೀತೆ, ನದಿ, ಇತ್ಯಾದಿ. ಎಲ್ಲ ರಾಜ್ಯಗಳು, ಕೇಂದ್ರಾಡಳಿತ ಪ್ರದೇಶಗಳು, ಅವುಗಳ ಮಾಹಿತಿಗಳು ಇಲ್ಲಿವೆ ಅಥವಾ ಆಯಾ ಸರಕಾರಗಳ ಅಧಿಕೃತ ಜಾಲತಾಣಗಳಿಗೆ ಕೊಂಡಿಗಳಿವೆ. ಪಾಸ್‌ಪೋರ್ಟ್ ಪಡೆಯುವುದು ಹೇಗೆ, ಸರಕಾರದ ಹಲವು ಅರ್ಜಿಗಳು, ಗಝೆಟ್‌ಗಳು ಎಲ್ಲ ಮಾಹಿತಿ ಇಲ್ಲಿವೆ. ಸರಕಾರಕ್ಕೆ ನೇರವಾಗಿ ದೂರು ನೀಡಬೇಕೆ? ಅದಕ್ಕೂ ಇಲ್ಲಿ ಸವಲತ್ತು ಇದೆ. ಇದು ನಿಜಕ್ಕೂ ಉಪಯೋಗಕಾರಿ. ಇದು ಕೆಲಸ ಮಾಡುತ್ತದೋ ಇಲ್ಲವೋ ಎಂಬ ಬಗ್ಗೆ ನನಗೆ ಅನುಮಾನವಿತ್ತು. ನಾನು ಒಂದು ದೂರು ಸಲ್ಲಿಸಿದಾಗ ಅದರ ಬಗ್ಗೆ ಕ್ರಮ ತೆಗೆದುಕೊಂಡು ನನಗೆ ಪತ್ರವೂ ಬಂದಿತ್ತು. ನಮ್ಮ ರಾಜ್ಯದಲ್ಲಿರುವ ಒಟ್ಟು ಜಿಲ್ಲೆಗಳ ಮಾಹಿತಿ ಮಾತ್ರ ತಪ್ಪಾಗಿದೆ.

ಡೌನ್‌ಲೋಡ್

ಅರ್ಜಿಗಳು

ಪಾಸ್‌ಪೋರ್ಟ್‌ಗೆ ಅರ್ಜಿ ಗುಜರಾಯಿಸಬೇಕಾಗಿದೆ. ಆದರೆ ಅರ್ಜಿ ಎಲ್ಲಿ ಸಿಗುತ್ತದೆ? ವಾಹನದ ಪರವಾನಗಿ ಪತ್ರ ಕಳೆದುಹೋಗಿದೆ. ಇನ್ನೊಂದು ಪ್ರತಿ ಬೇಕಾಗಿದೆ. ಅದಕ್ಕೂ ಅರ್ಜಿ ಹಾಕಬೇಕಾಗಿದೆ. ಹೀಗೆ ಒಂದಲ್ಲ ಒಂದು ನಮೂನೆಯ ಅರ್ಜಿ ಎಲ್ಲರಿಗೂ ಬೇಕಾಗಿ ಬರುತ್ತದೆ. ಇಲ್ಲಿ ನೀಡಿರುವ ಎರಡು ಉದಾಹರಣೆಗಳಲ್ಲಿ ಆಯಾ ಖಾತೆಯ ಜಾಲತಾಣಕ್ಕೆ ಭೇಟಿ ನೀಡಿ ಹುಡುಕಾಡಿದರೆ ಅರ್ಜಿ ಸಿಗುತ್ತದೆ. ಎಲ್ಲ ಅರ್ಜಿಗಳು ಒಂದೇ ಕಡೆ ಸಿಗುವಂತಿದ್ದರೆ ಒಳ್ಳೆಯದು ಅಂದುಕೊಳ್ಳುತ್ತಿದ್ದೀರಾ? ಅದೂ ಸಿದ್ಧವಾಗಿದೆ. www.downloadformsindia.com ಜಾಲತಾಣಕ್ಕೆ ಭೇಟಿ ನೀಡಿ ನಿಮಗೆ ಬೇಕಾದ ರಾಜ್ಯ ಅಥವಾ ಕೆಂದ್ರ ಸರಕಾರದ ಸೂಕ್ತ ಖಾತೆಯ ಅರ್ಜಿ ಡೌನ್‌ಲೋಡ್ ಮಾಡಿಕೊಳ್ಳಬಹುದು.

e - ಸುದ್ದಿ

ಟ್ವೀಟ್ ಮಾಡುವ ವಾಶಿಂಗ್ ಮೆಶಿನ್

ಅಮೆರಿಕದ ಅಪಾರ್ಟ್‌ಮೆಂಟ್‌ಗಳಲ್ಲಿ ಬಟ್ಟೆ ತೊಳೆಯುವ ಯಂತ್ರ ಇಟ್ಟುಕೊಳ್ಳುವ ಹಾಗಿಲ್ಲ. ಅದಕ್ಕೆಂದೆ ನೆಲಮಹಡಿಯಲ್ಲಿ ಒಂದು ಕೋಣೆ ಇರುತ್ತದೆ. ಅಲ್ಲಿ ಹಲವಾರು ಯಂತ್ರಗಳಿರುತ್ತವೆ. ಇಪ್ಪತ್ತನೆಯ ಮಹಡಿಯಲ್ಲಿರುವವರು ತಮ್ಮೆಲ್ಲ ಕೊಳೆ ಬಟ್ಟೆಗಳನ್ನು ತುಂಬಿಕೊಂಡು ಆ ಕೊಠಡಿಗೆ ಹೋದಾಗ ಎಲ್ಲ ಯಂತ್ರಗಳು ಬಳಕೆಯಲ್ಲಿದ್ದರೆ ಅವರು ಯಾವುದಾದರು ಯಂತ್ರ ಖಾಲಿ ಆಗುವ ತನಕ ಕಾಯ ಬೇಕಾಗುತ್ತದೆ. ಈಗ ಕೆಲವು ಬುದ್ಧಿವಂತ ಯಂತ್ರಗಳು ಮಾರುಕಟ್ಟೆಗೆ ಬರತೊಡಗಿವೆ. ಅದನ್ನೆ ಸ್ವಲ್ಪ ಬದಲಾಯಿಸಿ ಒಬ್ಬರು ಟ್ವೀಟ್ ಮಾಡುವ ಯಂತ್ರ ತಯಾರಿಸಿದ್ದಾರೆ. ಕೊಠಡಿಯಲ್ಲಿರುವ ಎಲ್ಲ ಯಂತ್ರಗಳನ್ನು ಇದಕ್ಕೆ ಜೋಡಿಸಲಾಗಿದೆ. ಯಾವ ಯಂತ್ರ ಖಾಲಿಯಾದರೂ ಅದು ಟ್ವೀಟ್ ಮಾಡುತ್ತದೆ. ಮನೆಯಲ್ಲೆ ಕುಳಿತು ಈ ಸಂದೇಶ ಬಂದೊಡನೆ ಬಟ್ಟೆ ತೆಗೆದುಕೊಂಡು ಕೆಳಗಿಳಿದು ಬಂದರೆ ಆಯಿತು.  
 
e- ಪದ

ಸಹಯೋಗಿ ತಂತ್ರಾಂಶ (groupware) - ಹಲವು ಮಂದಿ ಜೊತೆ ಸೇರಿ ಸಹಯೋಗದಲ್ಲಿ ಕೆಲಸ ಮಾಡಲು ಅನುವು ಮಾಡಿಕೊಡುವ ತಂತ್ರಾಂಶ. ಉದಾಹರಣೆಗೆ ಒಂದು ಕಡತ ತಯಾರಿಸುವುದು. ಈ ಕೆಲಸಕ್ಕೆ ಹಲವು ಮಂದಿ ಕೈಜೋಡಿಸಬಹುದು. ಒಬ್ಬರು ತಯಾರಿಸಿದ ಭಾಗಕ್ಕೆ ಇನ್ನೊಬ್ಬರು ಟಿಪ್ಪಣಿ ಹಾಕಬಹುದು. ಎಲ್ಲರೂ ಜೊತೆ ಸೇರಿ ಸಮೂಹ ಚಾಟ್ ಮಾಡಬಹುದು. ಇಮೈಲ್ ಕಳುಹಿಸುವುದೂ ಇದರಲ್ಲಿ ಅಡಕವಾಗಿದೆ.

e - ಸಲಹೆ

ತೇಜೇಶ್ ಅವರ ಪ್ರಶ್ನೆ: ನನಗೆ ಗೂಗ್ಲ್ ಕ್ರೋಮ್ ಬ್ರೌಸರ್ ಬೇಕಾಗಿದೆ. ಆದರೆ ಅದು ಅಂತರಜಾಲ ಸಂಪರ್ಕ ಇಲ್ಲದಿದ್ದರೂ ಇನ್‌ಸ್ಟಾಲ್ ಮಾಡುವಂತಿರಬೇಕು.
ಉ: ಈ ಕೊಂಡಿಯನ್ನು ಬಳಸಿ - http://dl.google.com/chrome/install/154.36/chrome_installer.exe.

ಕಂಪ್ಯೂತರ್ಲೆ

ಒಂದು ಹುಡುಗಿಯ ಟೀಶರ್ಟ್‌ನಲ್ಲಿ ಕಂಡಿದ್ದು -“ನಾನು ಫೇಸ್‌ಬುಕ್ ಅಲ್ಲ. ಎಲ್ಲರೂ ನನ್ನನ್ನು ಮೆಚ್ಚಬೇಕಾಗಿಲ್ಲ”.

ಮಂಗಳವಾರ, ಆಗಸ್ಟ್ 9, 2011

ಗಣಕಿಂಡಿ - ೧೧೬ (ಆಗಸ್ಟ್ ೦೮, ೨೦೧೧)

ಅಂತರಜಾಲಾಡಿ

ಆತ್ಮಹತ್ಯೆ ಬೇಡ

ಖಿನ್ನತೆ ಒಂದು ಬಹುಸಾಮಾನ್ಯ ಖಾಯಿಲೆ. ಇದು ಹೆಚ್ಚಾಗಿ ಹಲವು ಮಂದಿ ಆತ್ಮಹತ್ಯೆ ಮಾಡಿಕೊಳ್ಳುತ್ತಿದ್ದಾರೆ. ಆತ್ಮಹತ್ಯೆ ಮಾಡಿಕೊಳ್ಳುವ ಭಾವನೆ ಸಾಮಾನ್ಯವಾಗಿ ಪ್ರತಿ ವ್ಯಕ್ತಿಗೂ ಒಮ್ಮೆಯಾದರೂ ಬಂದೇ ಬರುತ್ತದೆ. ಕೆಲವರಿಗೆ ಇಂತಹ ಸಂದರ್ಭದಲ್ಲಿ ಒತ್ತಡ ತಡೆದುಕೊಳ್ಳಲಾರದೆ ಆತ್ಮಹತ್ಯೆ ಮಾಡಿಕೊಂಡೇ ಬಿಡುತ್ತಾರೆ. ಇಂತಹವರಿಗೆ ಆಪ್ತಸಲಹೆ ಅತಿ ಮುಖ್ಯ. ಅತ್ಮೀಯರಲ್ಲಿ ಹೇಳಿಕೊಳ್ಳಲಾಗುವುದಿಲ್ಲ. ಅದಕ್ಕಾಗಿಯೇ ಸಹಾಯವಾಣಿ ಇದೆ. ಅಂತರಜಾಲತಾಣವೂ ಇದೆ. ಅಂತಹ ಒಂದು ಜಾಲತಾಣ www.aasra.info. ನಿಮ್ಮ ಪರಿಚಯದವರು ಯಾರಾದರೂ ನಿಮ್ಮಲ್ಲಿ ಆಗಾಗ “ಈ ಜೀವನ ಸಾಕಾಗಿದೆ. ಸಾಯೋಣ ಅನ್ನಿಸುತ್ತಿದೆ” ಎಂದೆಲ್ಲ ಗಳಹುತ್ತಿದ್ದರೆ ಅವರಿಗೆ ಈ ಜಾಲತಾಣಕ್ಕೆ ಭೇಟಿ ನೀಡಲು ಸಲಹೆ ನೀಡಿ.

ಡೌನ್‌ಲೋಡ್

ಯುಎಸ್‌ಬಿ ಲೈನಕ್ಸ್

ಲೈನಕ್ಸ್ ಒಂದು ಪ್ರಮುಖ ಕಾರ್ಯಾಚರಣೆಯ ವ್ಯವಸ್ಥೆ (operating system). ಅಷ್ಟೇ ಹೇಳಿದರೆ ಸಾಲದು. ಇದು ಸಂಪೂರ್ಣ ಉಚಿತ ಮತ್ತು ಮುಕ್ತ ತಂತ್ರಾಂಶ. ಇತ್ತೀಚೆಗೆ ಇದು ತುಂಬ ಜನಪ್ರಿಯವಾಗುತ್ತಿದೆ. ಲೈನಕ್ಸ್ ಬಳಸಬೇಕಿದ್ದರೆ ಪರಿಣತರಿಂದ ಮಾತ್ರ ಸಾಧ್ಯ ಎಂಬ ಕಾಲವೊಂದಿತ್ತು. ಆದರೆ ಈಗ ಹಾಗಿಲ್ಲ. ನಿಮ್ಮಲ್ಲಿ ಇರುವ ಗಣಕದಲ್ಲೇ ವಿಂಡೋಸ್ ಜೊತೆಗೇ ಲೈನಕ್ಸ್ ಕೂಡ ಹಾಕಿಕೊಳ್ಳಬಹುದು. ಆದರೆ ಅದಕ್ಕಾಗಿ ಹಾರ್ಡ್‌ಡಿಸ್ಕನ್ನು ವಿಭಾಗ ಮಾಡಿ ಅದರಲ್ಲಿ ಇನ್‌ಸ್ಟಾಲ್ ಮಾಡಿಕೊಳ್ಳಬೇಕು. ಮೊದಲು ಕಲಿತು ಆಮೇಲೆ ಹಾಕಿಕೊಳ್ಳೋಣ ಎನ್ನುವವರಿಗೆ ಸಿ.ಡಿ. ಅಥವಾ ಡಿ.ವಿ.ಡಿ.ಯಿಂದಲೇ ಬೂಟ್ ಮಾಡಿ ಅದರಿಂದಲೇ ಕೆಲಸ ಮಾಡುವ ಸೌಲಭ್ಯವೂ ಇದೆ. ಇನ್ನೂ ಒಂದು ಸೌಲಭ್ಯವಿದೆ. ಅದು ಯುಎಸ್‌ಬಿಯಿಂದ ಕೆಲಸ ಮಾಡುವುದು. ಇದಕ್ಕಾಗಿ LinuxLive USB Creator ಎನ್ನುವ ತಂತ್ರಾಶ www.linuxliveusb.com ಜಾಲತಾಣದಲ್ಲಿ ಲಭ್ಯವಿದೆ.

e - ಸುದ್ದಿ

ಹಾಡು ಪ್ರತಿಮಾಡಿಕೊಳ್ಳುವುದು ಕಾನೂನುಬದ್ಧವಾಗಲಿದೆ

ನೀವು ಹಣಕೊಟ್ಟು ಕೊಂಡುಕೊಂಡ ಸಿ.ಡಿ. ಅಥವಾ ಡಿ.ವಿ.ಡಿ.ಯಲ್ಲಿರುವ ಸಂಗೀತ ಅಥವಾ ಚಲನಚಿತ್ರವನ್ನು ನಿಮ್ಮೆದೇ ವೈಯಕ್ತಿಕ ಮನರಂಜನೆಯ ಉಪಕರಣಕ್ಕೆ (ಐಪಾಡ್, ಎಂಪಿ೩ ಪ್ಲೇಯರ್, ಇತ್ಯಾದಿ) ಪರಿವರ್ತಿಸಿ ವರ್ಗಾಯಿಸಿ ಬಳಸುತ್ತಿರುವಿರಿ ತಾನೆ? ಕಾನೂನು ಪ್ರಕಾರ ಇದು ಕೃತಿಚೌರ್ಯವಾಗುತ್ತದೆ ಎಂಬುದು ಎಷ್ಟು ಜನರಿಗೆ ಗೊತ್ತಿದೆ? ಇದರ ಬಗ್ಗೆ ಸಾಕಷ್ಟು ಚರ್ಚೆ ನಡೆದಿದೆ. ಕೊನೆಗೂ ಈ ರೀತಿ ಪರಿವರ್ತಿಸಿ ಬಳಸುವುದು ಅಪರಾಧವಲ್ಲ ಎಂದು ಇಂಗ್ಲೆಂಡಿನಲ್ಲಿ ಕಾನೂನು ಮಾಡಲಾಗುತ್ತಿದೆ. ಭಾರತದಲ್ಲಿ ಇನ್ನೂ ಇದರ ಬಗ್ಗೆ ಚರ್ಚೆ ಪ್ರಾರಂಭವಾಗಿಲ್ಲ. 
 
e- ಪದ

ವೈಯಕ್ತಿಕ ಮನರಂಜನೆಯ ಉಪಕರಣ (personal media player or portable media player (PMP) or digital audio player (DAP)) - ಡಿಜಿಟಲ್ ವಿಧಾನದಲ್ಲಿ ಹಾಡು, ಸಂಗೀತ, ಚಲನಚಿತ್ರ, ಫೋಟೋ, ಇತ್ಯಾದಿಗಳನ್ನು ಸಂಗ್ರಹಿಸಿಟ್ಟುಕೊಂಡು ಅದನ್ನು ಚಲಾಯಿಸಿ ವೀಕ್ಷಿಸಲು ಮತ್ತು ಆಲಿಸಲು ಅನುವು ಮಾಡಿಕೊಡುವ ಉಪಕರಣ. ಉದಾ -ಆಪಲ್ ಐಪಾಡ್, ಕ್ರಿಯೇಟಿವ್ ಎಂಪಿ೩ ಪ್ಲೇಯರ್, ಮೈಕ್ರೋಸಾಫ್ಟ್ ಝೂನ್, ಇತ್ಯಾದಿ.

e - ಸಲಹೆ

ಪೂರ್ವಿ ಅವರ ಪ್ರಶ್ನೆ: ನನಗೆ ಟೈಪಿಂಗ್ ವೇಗ ಹೆಚ್ಚಿಸಲು ಸಹಾಯ ಮಾಡುವ ಉಚಿತ ತಂತ್ರಾಂಶ ಬೇಕು. ಎಲ್ಲಿ ಸಿಗುತ್ತದೆ?
ಉ: ನಿಮಗೆ ಟೈಪಿಂಗ್ ಟ್ಯೂಟರ್ ತಂತ್ರಾಂಶ ಬೇಕಾಗಿದೆ. ನಿವು www.tipp10.com/en/ ಜಾಲತಾಣದಲ್ಲಿ ದೊರೆಯುವ TIPP10 ತಂತ್ರಾಂಶವನ್ನು ಬಳಸಬಹುದು.

ಕಂಪ್ಯೂತರ್ಲೆ

ಒಬ್ಬಾತ ತನ್ನ ಫೇಸ್‌ಬುಕ್ ಸ್ಥಿತಿಯಲ್ಲಿ “ನಾನು ಈ ರಾತ್ರಿ ಟೆರೇಸ್‌ನಲ್ಲಿ ಮಲಗುತ್ತೇನೆ” ಎಂದು ದಾಖಲಿಸಿದ. ಎರಡೇ ನಿಮಿಷಗಳಲ್ಲಿ ಹದಿನೈದು ಸೊಳ್ಳೆಗಳು ಅವನ ಸ್ಥಿತಿಯನ್ನು ಮೆಚ್ಚಿದ್ದವು!

ಬುಧವಾರ, ಆಗಸ್ಟ್ 3, 2011

ಗಣಕಿಂಡಿ - ೧೧೫ (ಆಗಸ್ಟ್ ೦೧, ೨೦೧೧)

ಅಂತರಜಾಲಾಡಿ

ಇ-ದಾನ ಮಾಡಿ

ನಿಮ್ಮಲ್ಲಿ ನಿಮಗೆ ಉಪಯೋಗವಿಲ್ಲದ ಆದರೆ ಸಂಪೂರ್ಣ ಕೆಟ್ಟು ಹೋಗಿರದ ಹಲವಾರು ವಸ್ತುಗಳಿರಬಹುದು. ಅದು ಬೆಲೆಬಾಳುವ ಉಪಕರಣವಿರಬಹುದು, ಬಟ್ಟೆಬರೆಯಿರಬಹುದು, ಅಥವಾ ಸೈಕಲ್, ಹೀಗೆ ಯಾವುದು ಬೇಕಿದ್ದರೂ ಆಗಿರಬಹುದು. ಅವುಗಳನ್ನು ಉಪಯೋಗ ಮಾಡುವಂತಹ ಬಡವರಿಗೆ, ನಿರ್ಗತಿಕರಿಗೆ ದಾನ ಮಾಡುವ ಇಚ್ಛೆಯೂ ನಿಮಗಿರಬಹುದು. ಆದರೆ ದಾನ ಮಾಡುವುದು ಹೇಗೆ? ಅಗತ್ಯವಿರುವವರು ಎಲ್ಲಿದ್ದಾರೆ? ಅವರನ್ನು ಸಂಪರ್ಕಿಸುವುದು ಹೇಗೆ? ಎಂದೆಲ್ಲಾ ಆಲೋಚಿಸುತ್ತಿದ್ದೀರಾ? ಹಾಗಿದ್ದರೆ ನೀವು www.e-daan.com ಜಾಲತಾಣಕ್ಕೆ ಭೇಟಿ ನೀಡಬಹುದು. ದಾನ ನೀಡುವವರನ್ನು ಮತ್ತು ದಾನ ಪಡೆಯುವವರನ್ನು ಈ ಜಾಲತಾಣ ಒಂದುಗೂಡಿಸುತ್ತದೆ. ಸಾಮಾನ್ಯವಾಗಿ ದಾನ ಪಡೆಯುವವರು ಅಂತರಜಾಲ ಬಳಸುವವರಾಗಿರುವುದಿಲ್ಲ. ವಸ್ತುಗಳನ್ನು ಎನ್‌ಜಿಓಗಳ ಮೂಲಕ ವಿತರಣೆ ಮಾಡಲಾಗುತ್ತದೆ.

ಡೌನ್‌ಲೋಡ್

ನಿಸ್ತಂತು ಜಾಲಕೇಂದ್ರ

ಅಂತರಜಾಲ ಸಂಪರ್ಕ ಪಡೆಯಲು ಹಲವು ವಿಧಾನಗಳಿವೆ. ಲ್ಯಾಪ್‌ಟಾಪ್‌ಗಳಲ್ಲಂತೂ ನಿಸ್ತಂತು ಸಂಪರ್ಕವೂ ಸಾಧ್ಯ. ಲ್ಯಾಪ್‌ಟಾಪನ್ನು ಕೇಬಲ್ ಅಥವಾ ಯುಎಸ್‌ಬಿ ಮೋಡೆಮ್ ಮೂಲಕ ಅಂತರಜಾಲಕ್ಕೆ ಸಂಪರ್ಕಿಸಲೂ ಸಾಧ್ಯ. ಎಲ್ಲ ಲ್ಯಾಪ್‌ಟಾಪ್‌ಗಳಲ್ಲಿ ನಿಸ್ತಂತು ಸೌಲಭ್ಯ ಇರುತ್ತದೆ. ಈ ನಿಸ್ತಂತು ಸವಲತ್ತನ್ನು ಅಂತರಜಾಲಕ್ಕೆ ಸಂಪರ್ಕ ನೀಡುವ ವ್ಯವಸ್ಥೆಯಾಗಿಯೂ ಬದಲಿಸಬಹುದು. ಅಂದರೆ ನಿಮ್ಮ ಲ್ಯಾಪ್‌ಟಾಪನ್ನು ಬ್ರಾಡ್‌ಬಾಂಡ್ ಸಂಪರ್ಕ ಮೂಲಕ ಅಂತರಜಾಲಕ್ಕೆ ಸಂಪರ್ಕಿಸಿದ್ದೀರಿ ಎಂದುಕೊಳ್ಳೋಣ. ನಂತರ ಅದರಲ್ಲಿರುವ ನಿಸ್ತಂತು ಸವಲತ್ತನ್ನು ಅಂತರಜಾಲ ಸಂಪರ್ಕವನ್ನು ಇತರೆ ಗಣಕ ಅಥವಾ ಸ್ಮಾರ್ಟ್‌ಫೋನ್‌ಗಳಿಗೆ ಅಂತರಜಾಲ ಸಂಪರ್ಕ ಪಡೆದುಕೊಳ್ಳುವ ವ್ಯವಸ್ಥೆಯಾಗಿ ಬಳಸಬಹುದು. ಅಂದರೆ ಈಗ ನಿಮ್ಮ ಲ್ಯಾಪ್‌ಟಾಪ್ ಅಂತರಜಾಲ ಸಂಪರ್ಕ ನೀಡುವ ಕೇಂದ್ರವಾಗುತ್ತದೆ. ಮನೆಯಲ್ಲಿ ಇರುವ ಇತರೆ ಗಣಕ ಹಾಗೂ ಸ್ಮಾರ್ಟ್‌ಫೋನ್‌ಗಳು ಇದನ್ನು ಬಳಸಬಹುದು. ಈ ರೀತಿ ಮಾಡಿಕೊಳ್ಳಲು ಅನುವು ಮಾಡಿಕೊಡುವ Connectify ತಂತ್ರಾಂಶ ಬೇಕಿದ್ದರೆ ನೀವು ಭೇಟಿ ನೀಡಬೇಕಾದ ಜಾಲತಾಣ www.connectify.me

e - ಸುದ್ದಿ

ಫೋಟೋಶಾಪ್ ಮಾಡಿ ಜಾಹೀರಾತು ನೀಡಿದರೆ...

ಫೋಟೋಶಾಪ್ ಬಳಸಿ ಫೋಟೋಗಳನ್ನು ತಿದ್ದಬಹುದು. ಕಪ್ಪನೆಯ ಹುಡುಗಿಯನ್ನು ಬಿಳಿ ಬಣ್ಣದ ಚೆಲುವೆಯನ್ನಾಗಿಸಬಹುದು. ಇಂಗ್ಲೆಂಡಿನಲ್ಲಿ ಇದೇ ವಿಧಾನವನ್ನು ಜಾಹೀರಾತೊಂದರಲ್ಲಿ ಬಳಸಲಾಯಿತು. ಸೌಂದರ್ಯವರ್ಧಕವೊಂದರ ಜಾಹೀರಾತಾಗಿತ್ತದು. ತಮ್ಮ ಉತ್ಪನ್ನವನ್ನು ಬಳಸಿ ಸುಂದರ ತ್ವಚೆಯನ್ನು ಹೊಂದಬಹುದು ಎಂಬುದನ್ನು ಸೂಚಿಸಲು ಅವರು ಫೋಟೋಶಾಪ್ ಮಾಡಿದ ಫೋಟೋವನ್ನು ಬಳಸಿದ್ದರು. ಸಂಸದರೊಬ್ಬರು ಈ ಜಾಹೀರಾತಿನ ವಿರುದ್ಧ ದೂರು ನೀಡಿದರು. ಮೂಲ ಫೋಟೋ ಕೇಳಿದಾಗ ಕಂಪೆನಿಯವರು ಅದನ್ನು ನೀಡಲು ನಿರಾಕರಿಸಿದರು. ಈಗ ಜಾಹೀರಾತು ನಿಯಂತ್ರಣ ಸಂಸ್ಥೆಯವರು ಆ ಜಾಹೀರಾತನ್ನು ಮುಟ್ಟುಗೋಲು ಹಾಕಿದ್ದಾರೆ.   
 
e- ಪದ

ಸ್ಪ್ರೆಡ್‌ಶೀಟ್ ತಂತ್ರಾಂಶ (spreadsheet software) - ಅಡ್ಡ ಮತ್ತು ನೀಟ ಸಾಲುಗಳಲ್ಲಿ ಮಾಹಿತಿಗಳನ್ನು ನಮೂದಿಸಿ ಕೋಷ್ಟಕ ತಯಾರಿಸಿ ಅದನ್ನು ಬಳಸಿ ಹಲವು ವಿಧಾನಗಳಲ್ಲಿ ಮಾಹಿತಿ ಸಂಸ್ಕರಣೆ ಮಾಡಲು ಅನುವು ಮಾಡಿಕೊಡುವ ತಂತ್ರಾಂಶ. ಮೈಕ್ರೋಸಾಫ್ಟ್ ಎಕ್ಸೆಲ್ ಇದಕ್ಕೆ ಉತ್ತಮ ಉದಾಹರಣೆ. ಇವುಗಳಲ್ಲಿ ಗಣಿತ ಸಮೀಕರಣಗಳನ್ನು ಬಳಸಿ ಹಲವು ನಮೂನೆಯ ಲೆಕ್ಕಾಚಾರ ಮಾಡಬಹುದು. ಕೇವಲ ಪಠ್ಯಗಳ ಮೇಲೂ ಕೆಲವು ಸಂಸ್ಕರಣೆಗಳನ್ನು ಮಾಡಬಹುದು.

e - ಸಲಹೆ

ರಣಜಿತ್ ಅವರ ಪ್ರಶ್ನೆ: ಸಂಗೀತದಿಂದ ಧ್ವನಿಯನ್ನು ಬೇರ್ಪಡಿಸಲು ಸಾಧ್ಯವೇ?
ಉ: ಇದು ಪರಿಣತರಿಂದ ಮಾತ್ರ ಸಾಧ್ಯ. ಇದನ್ನು ಸಾಧಿಸಲು ಹಲವು ವಿಧಾನಗಳಿವೆ. ವಿವರಗಳಿಗೆ bit.ly/a8nF8T ಜಾಲತಾಣ ನೋಡಿ.

ಕಂಪ್ಯೂತರ್ಲೆ

ಕೋಲ್ಯನ ಮಗ ಶಾಲೆಗೆ ಪ್ರಥಮ ತರಗತಿಗೆ ಮೊದಲ ದಿನ ಹೋಗಿ ಸಾಯಂಕಾಲ ಮನೆಗೆ ವಾಪಾಸು ಬಂದಿದ್ದ. ಶಾಲೆಯ ಪ್ರಥಮ ದಿನ ಹೇಗಿತ್ತು ಎಂದು ಕೋಲ್ಯ ವಿಚಾರಿಸಿದ. ಮಗ ಹೇಳಿದ “ಎಂತಹ ಶಾಲೆಯೋ ಅದು. ಅಲ್ಲಿ ವೈಫೈ ಕೂಡ ಇಲ್ಲ”.

ಸೋಮವಾರ, ಜುಲೈ 25, 2011

ಗಣಕಿಂಡಿ - ೧೧೪ (ಜುಲೈ ೨೫, ೨೦೧೧)

ಅಂತರಜಾಲಾಡಿ

ಬಿಳಿಹಲಗೆ

ಶಾಲೆಗಳಲ್ಲಿ ಬಳಸುವ ಕರಿಹಲಗೆ ಗೊತ್ತು. ಅಂತೆಯೇ ಕಚೇರಿಗಳಲ್ಲಿ, ವಿಚಾರಸಂಕಿರಣಗಳಲ್ಲಿ ಬಳಸುವ ಬಿಳಿಹಲಗೆ ಗೊತ್ತು ತಾನೆ? ನೀವು ಬೆಂಗಳೂರಿನಲ್ಲಿ, ನಿಮ್ಮ ಸಹೋದ್ಯೋಗಿ ಅಥವಾ ಸ್ನೇಹಿತ ಅಮೇರಿಕದಲ್ಲಿ, ಮತ್ತೊಬ್ಬ ಜಪಾನ್‌ನಲ್ಲಿ ಕುಳಿತುಕೊಂಡು ಅಂತರಜಾಲವನ್ನು ಬಳಸಿ ವಿಚಾರಗೋಷ್ಠಿ ಮಾಡುವ ಸವಲತ್ತುಗಳು ಹಲವಾರಿವೆ. ಹೆಚ್ಚಿನವು ಪಠ್ಯದ ಮೂಲಕ ಅಥವಾ ಮಾತನಾಡುವ ಮೂಲಕ, ಇನ್ನೂ ಕೆಲವು ಕ್ಯಾಮರಾ ಬಳಸಿ ವೀಡಿಯೋ ಚಾಟ್ ಮಾಡುವ ಸವಲತ್ತುಗಳನ್ನು ನೀಡುತ್ತವೆ. ನೀವು ಯಾವುದೋ ವಿಷಯದ ಬಗ್ಗೆ ಚರ್ಚಿಸುವಾಗ ಚಿತ್ರಗಳ ಮೂಲಕ, ಗೆರೆಗಳ ಮೂಲಕ ಒಬ್ಬರಿಗೊಬ್ಬರಿಗೆ ವಿವರಿಸಬೇಕಾದಾಗ ಏನು ಮಾಡುತ್ತೀರಿ? ಆಗ ನಿಮ್ಮ ಸಹಾಯಕ್ಕೆ ಬರುವುದು ಅಂತರಜಾಲ ಮೂಲಕ ಸಹಯೋಗಿ ಬಳಕೆ ಮಾಡಬಹುದಾದ ಬಿಳಿಹಲಗೆ. ಅಂತಹ ಒಂದು ಉಚಿತ ಸೌಲಭ್ಯ ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ www.dabbleboard.com. ಇದರಲ್ಲಿ ಉಚಿತ ಮತ್ತು ವಾಣಿಜ್ಯಕ ಎಂಬ ಎರಡು ಆವೃತ್ತಿಗಳಿವೆ.

ಡೌನ್‌ಲೋಡ್

ಪದಬಂಧ ರಚಿಸಿ

ಪದಬಂಧ ಯಾರಿಗೆ ಗೊತ್ತಿಲ್ಲ? ಎಲ್ಲ ಪತ್ರಿಕೆ ಮ್ಯಾಗಝೀನ್‌ಗಳಲ್ಲಿ ಪದಬಂಧ ಕಂಡುಬರುತ್ತದೆ. ಇವುಗಳನ್ನು ಬಿಡಿಸುವುದು ಒಳ್ಳೆಯ ಹವ್ಯಾಸ ಕೂಡ. ಇಂಗ್ಲಿಶ್ ಭಾಷೆಯಲ್ಲಿ ಪದಬಂಧ ರಚಿಸಬೇಕೇ? ಅಂದರೆ ಹಲವು ಸುಳಿವುಗಳನ್ನು ನೀಡಬೇಕಾಗಿದೆ, ಅವುಗಳಲ್ಲಿ ಅಡ್ಡ ಮತ್ತು ನೀಟ ಯಾವುದು, ಉತ್ತರದ ಪದದಲ್ಲಿ ಎಷ್ಟು ಅಕ್ಷರಗಳಿವೆ, ಇತ್ಯಾದಿ ಮಾಹಿತಿ ನೀಡಿ ಅದಕ್ಕೆ ಸರಿಹೊಂದುವ ಪದಬಂದ ರಚಿಸಬೇಕಾಗಿದೆ. ಇದು ಅಷ್ಟು ಸುಲಭವಲ್ಲ. ತುಂಬ ಕಸರತ್ತು ಮಾಡಬೇಕಾದ ಕೆಲಸ. ಆದರೆ ನಿಮ್ಮಲ್ಲಿ EclipseCrossword ಇದ್ದರೆ ಸುಲಭದಲ್ಲಿ ಇಂಗ್ಲಿಶ್ ಭಾಷೆಯ ಪದಬಂಧ ರಚಿಸಬಹುದು. ಈ ಉಚಿತ ತಂತ್ರಾಂಶ ಬೇಕಿದ್ದಲ್ಲಿ ನೀವು ಭೇಟಿನೀಡಬೇಕಾದ ಜಾಲತಾಣ www.eclipsecrossword.com. ಕನ್ನಡದಲ್ಲಿ ಪದಬಂಧ ರಚಿಸುವ ತಂತ್ರಾಂಶವನ್ನು ಯಾರೂ ತಯಾರಿಸಿದಂತಿಲ್ಲ.  

e - ಸುದ್ದಿ

ಗೂಗಲ್ ಲಾಬ್ ಅವಸಾನ

ಗೂಗಲ್‌ನವರು ಹಲವು ಉಚಿತ ಸಲತ್ತುಗಳನ್ನು ನೀಡಿದ್ದಾರೆ. ಅವುಗಳಲ್ಲಿ ಹೆಚ್ಚಿನವುಗಳು ಅವರ ಪ್ರಯೋಗಶಾಲೆಯಿಂದ ಬಂದವುಗಳು. ಇವುಗಳನ್ನು www.googlelabs.com ಜಾಲತಾಣದಲ್ಲಿ ಉಚಿತವಾಗಿ ನೀಡಿದ್ದಾರೆ. ಅವುಗಳನ್ನು ಹಲವು ವಿಧಗಳಲ್ಲಿ ಬಳಸಬಹುದು -ಜಾಲತಾಣದಲ್ಲಿಯೇ, ಡೌನ್‌ಲೋಡ್ ಮಾಡಿಕೊಂಡು, ನಮ್ಮ ಪ್ರೋಗ್ರಾಮ್‌ನಲ್ಲಿ, ಇತ್ಯಾದಿ. ಈ ಎಲ್ಲ ಸವಲತ್ತುಗಳು ಸದ್ಯದಲ್ಲಿಯೇ ಅಲಭ್ಯವಾಗಲಿವೆ. ಗೂಗಲ್ ಲಾಬ್ ಅನ್ನು ಸದ್ಯದಲ್ಲಿಯೇ ಮುಚ್ಚುವುದಾಗಿ ಗೂಗಲ್ ಹೇಳಿಕೆ ನೀಡಿದೆ. ಬಳಕೆದಾರರು ಈಗಲೇ ಅಗತ್ಯವಿರುವವುಗಳನ್ನು ಡೌನ್‌ಲೋಡ್ ಮಾಡಿಕೊಳ್ಳುವುದು ಒಳಿತು.  
 
e- ಪದ

ಕಲಿಕಾರಂಜನೆ (edutainment) - ಗಣಕಾಧಾರಿತ ಶಿಕ್ಷಣದಲ್ಲಿ ರೂಢಿಯಲ್ಲಿರುವ ಪದ. ಇದು education (ಕಲಿಕೆ) ಮತ್ತು entertainment (ಮನರಂಜನೆ) ಎಂಬ ಪದಗಳ ಸಂಕ್ಷಿಪ್ತ ರೂಪ. ಕಲಿಕೆ ಮತ್ತು ಮನರಂಜನೆಯನ್ನು ಜೊತೆ ಜೊತೆಗೆ ನೀಡುವುದೇ ಇದರ ವಿಶೇಷತೆ. ಶಿಕ್ಷಣವು ಮನರಂಜನಾತ್ಮಕವಾಗಿರಲು ಇದು ಸಹಾಯ ಮಾಡುತ್ತದೆ. ಬಹುಮಾಧ್ಯಮ ಅರ್ಥಾತ್ ಪಠ್ಯ, ಚಿತ್ರ, ಧ್ವನಿ, ಚಲನಚಿತ್ರ, ಅನಿಮೇಶನ್ ಇತ್ಯಾದಿಗಳ ಬಳಕೆ ಇಲ್ಲಿ ಆಗುತ್ತದೆ.

e - ಸಲಹೆ

ಮೈಸೂರಿನ ಆದರ್ಶ ಭಾರದ್ವಾಜರ ಪ್ರಶ್ನೆ: ನನ್ನ ಇಂಟರ್‌ನೆಟ್ ಸಂಪರ್ಕ ತುಂಬ ನಿಧಾನವಾಗಿದೆ. ಡೌನ್‌ಲೋಡ್ ಮಾಡಲು ತುಂಬ ಸಮಯ ಹಿಡಿಯುತ್ತದೆ. ಡೌನ್‌ಲೋಡ್ ವೇಗ ಹೆಚ್ಚಿಸಲು ಯಾವುದಾದರು ತಂತ್ರಾಂಶ ಇದೆಯೇ?
ಉ: ಇದೆ. ನೀವು  www.speedbit.com/dap ಜಾಲತಾಣದಿಂದ Download Accelerator ತಂತ್ರಾಂಶವನ್ನು ಡೌನ್‌ಲೋಡ್ ಮಾಡಿ ಬಳಸಬಹುದು.

ಕಂಪ್ಯೂತರ್ಲೆ

ಗಣಕ (ತ)ಗಾದೆ:
  • ಪೆನ್ನಿಗೊಂದು ಕಾಲ ಕೀಬೋರ್ಡಿಗೊಂದು ಕಾಲ.
  • ಈಗೀಗ ಜನರು ಪೆನ್ನಿಗಿಂತ ಕೀಬೋರ್ಡನ್ನೇ ಜಾಸ್ತಿ ಬಳಸುತ್ತಿದ್ದಾರೆ ಯಾಕೆಂದರೆ ಪೆನ್ನಿನಲ್ಲಿ backspace ಇಲ್ಲ.

ಮಂಗಳವಾರ, ಜುಲೈ 19, 2011

ಗಣಕಿಂಡಿ - ೧೧೩ (ಜುಲೈ ೧೮, ೨೦೧೧)

ಅಂತರಜಾಲಾಡಿ

ಯಾವುದು ಹೇಗೆ?

ಕಾರಿನ ಶಕ್ತಿಚಾಲಿತ ಸ್ಟಿಯರಿಂಗ್ ಹೇಗೆ ಕೆಲಸ ಮಾಡುತ್ತದೆ? ದೂರದರ್ಶಕ ಮತ್ತು ಸೂಕ್ಷ್ಮದರ್ಶಕಗಳು ಹೇಗೆ ಕೆಲಸ ಮಾಡುತ್ತವೆ? ಹೀಗೆ ದಿನನಿತ್ಯ ನಾವು ಕಾಣುವ, ಕೇಳುವ ಯಂತ್ರಗಳು ಹೇಗೆ ಕೆಲಸ ಮಾಡುತ್ತವೆ ಎಂಬ ಕುತೂಹಲ ಕೆಲವರಿಗೆ ಇರುತ್ತದೆ. ಮಕ್ಕಳ ಮಟ್ಟಿಗಂತೂ ಇದು ಸತ್ಯ. ಮಕ್ಕಳು ಕೇಳುವ ಎಲ್ಲ ಪ್ರಶ್ನೆಗಳಿಗೆ ಉತ್ತರಿಸಲು ತಡಕಾಡುತ್ತಿದ್ದೀರಾ? ಅಥವಾ ಎಲ್ಲ ಯಂತ್ರಗಳು ಹೇಗೆ ಕೆಲಸ ಮಾಡುತ್ತವೆ ಎಂದು ತಿಳಿದುಕೊಳ್ಳುವ ಕುತೂಹಲ ನಿಮಗೂ ಇದೆಯೇ? ಹಾಗಿದ್ದರೆ ನೀವು ಭೇಟಿ ನೀಡಬೇಕಾದ ಜಾಲತಾಣ www.howstuffworks.com. ಭೌತಶಾಸ್ತ್ರ, ರಸಾಯನಶಾಸ್ತ್ರ, ಜೀವಶಾಸ್ತ್ರ ಹೀಗೆ ವಿಜ್ಞಾನದ ಹಲವು ವಿಭಾಗಗಳು, ತಂತ್ರಜ್ಞಾನದ ಹಲವು ವಿಭಾಗಗಳು, ಖಗೋಳಶಾಸ್ತ್ರ - ಹೀಗೆ ಎಲ್ಲ ವಿಭಾಗಗಳು ಇಲ್ಲಿವೆ. ಇದುತನಕ ವಿಜ್ಞಾನಕ್ಕೆ ವಿವರಿಸಲು ಅಸಾಧ್ಯವಾದ ಕೆಲವು ಕೌತುಕಗಳೂ ಇಲ್ಲಿವೆ. ಯಂತ್ರಗಳು ಕೆಲಸ ಮಾಡುವ ವಿಧಾನವನ್ನು ವಿವರಿಸುವ ಚಿತ್ರಸಂಚಲನೆಗಳು (ಅನಿಮೇಶನ್) ಖಂಡಿತ ನೋಡಲೇಬೇಕಾದವುಗಳು. 

ಡೌನ್‌ಲೋಡ್

ಧ್ವನಿ ತಂತ್ರಜ್ಞರಾಗಿ

ನಿಮ್ಮ ಗಣಕದಲ್ಲೇ ಒಂದು ಅತ್ಯಂತ ಶಕ್ತಿಶಾಲಿಯದ ಪರಿಣತರೂ ಮೆಚ್ಚುವಂತಹ ಧ್ವನಿ ಸ್ಟುಡಿಯೋ ಸ್ಥಾಪಿಸಬೇಕೇ? ಹಾಗಿದ್ದರೆ ನಿಮಗೆ ಬೇಕು DarkWave Studio. ಇದು ಸಂಪೂರ್ಣ ಉಚಿತ ಮತ್ತು ಮುಕ್ತ ತಂತ್ರಾಂಶ. ಹಲವು ಟ್ರ್ಯಾಕ್‌ಗಳಲ್ಲಿ ಹಲವು ಬೇರೆ ಬೇರೆ ಸಂಗೀತ ಉಪಕರಣಗಳನ್ನು ಮತ್ತು ಗಾಯಕರ ಧ್ವನಿಗಳನ್ನು ಧ್ವನಿಮುದ್ರಣ ಮಾಡಿಕೊಂಡು ನಂತರ ಎಲ್ಲವನ್ನು ವ್ಯವಸ್ಥಿತವಾಗಿ ಒಟ್ಟು ಮಾಡಿ ಉತ್ತಮ ಸಂಗೀತ ತಯಾರಿಸಲು ಇದು ಅನುವು ಮಾಡಿಕೊಡುತ್ತದೆ. ಹಲವು ಸಂಗೀತ ಪರಿಣಾಮ ಮತ್ತು ಬದಲಾವಣೆಗಳನ್ನೂ ಇದು ಒದಗಿಸಿಕೊಡುತ್ತದೆ. ಈ ತಂತ್ರಾಂಶ ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ bit.ly/p2knZL.   

e - ಸುದ್ದಿ

ಸೂಪರ್ನೋವಾ ಸ್ಫೋಟ ಪತ್ತೆಗೆ ಟ್ವಿಟ್ಟರ್

ಇತ್ತೀಚೆಗೆ ಟ್ವಿಟ್ಟರ್ ಬಳಕೆ ಎಲ್ಲ ಕ್ಷೇತ್ರಗಳನ್ನು ವ್ಯಾಪಿಸುತ್ತಿದೆ. ಟ್ವಿಟ್ಟರ್‌ನಲ್ಲಿ ಒಬ್ಬ ಚಿಕ್ಕ ಸಂದೇಶ ದಾಖಲಿಸುತ್ತಾನೆ. ಇನ್ನೊಬ್ಬ ಅದನ್ನು ಹಿಂಬಾಲಿಸುತ್ತಾನೆ. ಅದು ಹಾಗೆ ಬೆಳೆಯುತ್ತದೆ. ಅದಕ್ಕೆ ಒಬ್ಬ ಉತ್ತರಿಸುತ್ತಾನೆ, ಮತ್ತೊಬ್ಬ ಅದರ ಮೇಲೆ ಕ್ರಮ ಕೈಗೊಳ್ಳುತ್ತಾನೆ -ಹೀಗೆ ಸಾಗುತ್ತದೆ. ಅಮೇರಿಕಾದಲ್ಲೊಬ್ಬ ಹವ್ಯಾಸಿ ಖಗೋಳಶಾಸ್ತ್ರಜ್ಞರು ಎಂ೫೧ ಗ್ಯಾಲಕ್ಸಿಯಲ್ಲಿ ಸೂಪರ್ನೋವ ಸ್ಫೋಟವಾಗುತ್ತಿರುವುದನ್ನು ಗಮನಿಸಿದರು. ಕೂಡಲೆ ಅವರು ಅದರ ಬಗ್ಗೆ ಟ್ವೀಟ್ ಮಾಡಿದರು. ಅದನ್ನು ಹವಾಯಿ ದ್ವೀಪದಲ್ಲಿರುವ ಪ್ರಪಂಚದ ಅತಿದೊಡ್ಡ ದೂರದರ್ಶಕವನ್ನು ನಿಯಂತ್ರಿಸುವ ವಿಜ್ಞಾನಿ ಓದಿದರು. ಕೂಡಲೆ ತಮ್ಮ ದೂರದರ್ಶಕವನ್ನು ಸೂಪರ್ನೋವ ಸ್ಫೋಟದ ದಿಕ್ಕಿಗೆ ತಿರುಗಿಸಿದರು. ಹೀಗೆ ಸೂಪರ್ನೋವ ಸ್ಫೋಟವನ್ನು ದಾಖಲಿಸಲು ಟ್ವಿಟ್ಟರ್ ಸಹಾಯ ಮಾಡಿದಂತಾಯಿತು.
 
e- ಪದ

ಚಿತ್ರಸಂಚಲನೆ (ಅನಿಮೇಶನ್ - animation) - ಒಂದಾದ ಮೇಲೆ ಒಂದು ಚಿತ್ರಗಳನ್ನು ವೇಗವಾಗಿ ಪರದೆಯ ಮೇಲೆ ಮೂಡಿಸಿ ಚಲನೆಯ ಭಾವನೆಯನ್ನು ಮೂಡಿಸುವ ವಿಧಾನ. ಟಾಮ್ ಮತ್ತು ಜೆರ್ರಿ ಕಾರ್ಟೂನ್ ನೋಡದವರಾರು? ಇದನ್ನು ಚಿತ್ರಸಂಚಲನೆಯ ವಿಧಾನದಿಂದ ತಯಾರಿಸಿದ್ದಾರೆ. ಹಿಂದಿನ ಕಾಲದಲ್ಲಿ ಎಲ್ಲ ಚಿತ್ರಗಳನ್ನು ಮನುಷ್ಯರೇ ಬೇರೆ ಬೇರೆ ಹಾಳೆಗಳಲ್ಲಿ ಚಿತ್ರಿಸಿ ಚಿತ್ರಸಂಚಲನೆ ತಯಾರು ಮಾಡುತ್ತಿದ್ದರು. ಈಗ ಗಣಕ ಮತ್ತು ಸೂಕ್ತ ತಂತ್ರಾಂಶ ಬಳಸುತ್ತಾರೆ.

e - ಸಲಹೆ


ಕೆಂಗೇರಿಯ ಅರುಣ ಅವರ ಪ್ರಶ್ನೆ: ನಾನು ನಡೆಸುವ ತರಗತಿಯನ್ನು ಬೇರೆ ಬೇರೆ ಸ್ಥಳಗಳಿಂದ ಅಂತರಜಾಲ ಮೂಲಕ ನೋಡಲು ಅನುವು ಮಾಡಿಕೊಡುವ ಜಾಲತಾಣ ಅಥವಾ ತಂತ್ರಾಂಶ ಯಾವುದಾದರೂ ಇದೆಯೇ?
ಉ: ಇವುಗಳನ್ನು ನೋಡಿ - www.digitalsamba.com, www.livestream.com, www.ustream.tv

ಕಂಪ್ಯೂತರ್ಲೆ

ಉದ್ಯೋಗದ ಸಂದರ್ಶನಕ್ಕೆ ಅಭ್ಯರ್ಥಿಯಾಗಿ ಬಂದ ಕೋಲ್ಯನಿಗೆ ಪ್ರಶ್ನೆ ಕೇಳಲಾಯಿತು -“ನಿನಗೆ ಕೆಲಸ ಯಾಕೆ ಬೇಕು?”. ಕೋಲ್ಯ ಉತ್ತರಿಸಿದ - “ಫೇಸ್‌ಬುಕ್‌ನಲ್ಲಿ status update ಮಾಡಲು”.

ಸೋಮವಾರ, ಜುಲೈ 11, 2011

ಗಣಕಿಂಡಿ - ೧೧೨ (ಜುಲೈ ೧೧, ೨೦೧೧)

ಅಂತರಜಾಲಾಡಿ

ನವಪದವೀಧರರಿಗೆ

ಮಾಹಿತಿ ತಂತ್ರಜ್ಞಾನ ಕ್ಷೇತ್ರದಲ್ಲಿ ಕೆಲಸ ಪಡೆದುಕೊಳ್ಳುವುದು ಎಲ್ಲ ನವಪದವೀಧರರ ಆಸೆ. ಅದರಲ್ಲೂ ಇಂಜಿನಿಯರಿಂಗ್ ಪದವೀಧರರ ಮಟ್ಟಿಗೆ ಇದು ಅಪ್ಪಟ ಸತ್ಯ. ಹೆಚ್ಚಿನ ಕಂಪೆನಿಗಳು ಇಂಜಿನಿಯರಿಂಗ್ ಕಾಲೇಜುಗಳಿಗೇ ನೇರವಾಗಿ ಕ್ಯಾಂಪಸ್‌ನಲ್ಲೇ ಆಯ್ಕೆ ಪ್ರಕ್ರಿಯೆ ನಡೆಸುತ್ತಾರೆ. ಆದರೆ ಎಲ್ಲ ಕಾಲೇಜುಗಳಿಗೆ ಎಲ್ಲ ಕಂಪೆನಿಗಳು ಹೋಗುವುದಿಲ್ಲ. ಎಲ್ಲರಿಗೂ ಕ್ಯಾಂಪಸ್ ಆಯ್ಕೆ ಪ್ರಕ್ರಿಯೆಯಲ್ಲಿ ಕೆಲಸ ಸಿಗುವುದೂ ಇಲ್ಲ. ಬಿಸಿಎ, ಬಿಎಸ್‌ಸಿ, ಎಂಸಿಎ ಕಾಲೇಜುಗಳಿಗೂ ಹೋಗುವ ಕಂಪೆನಿಗಳ ಸಂಖ್ಯೆ ತುಂಬ ಕಡಿಮೆ. ಹಾಗಿದ್ದರೆ ಈ ಎಲ್ಲ ಪದವೀಧರರು ಮಾಹಿತಿ ತಂತ್ರಜ್ಞಾನ ಕ್ಷೇತ್ರದಲ್ಲೇ ಕೆಲಸ ಪಡೆಯಬೇಕಿದ್ದರೆ ಏನು ಮಾಡಬೇಕು? ಇಂತಹವರಿಗಾಗಿಯೇ ಒಂದೆರಡು ಜಾಲತಾಣಗಳಿವೆ. ಅಲ್ಲಿ ನೋಂದಾಯಿಸಿಕೊಂಡು ನೇಮಕಾತಿ ಪರೀಕ್ಷೆ ತೆಗೆದುಕೊಳ್ಳಬೇಕು. ಉತ್ತಮ ಅಂಕ ಬಂದರೆ ಆ ಜಾಲತಾಣದಲ್ಲಿ ನೋಂದಾಯಗೊಂಡ ಕಂಪೆನಿಗಳು ಈ ಪದವೀಧರರನ್ನು ಸಂದರ್ಶನ ನಡೆಸಿ ನೇಮಕಾತಿ ಮಾಡಿಕೊಳ್ಳುತ್ತವೆ. ಈ ಜಾಲತಾಣಗಳು www.myamcat.com ಮತ್ತು www.elitmus.com.

ಡೌನ್‌ಲೋಡ್

ರಾಸಾಯನಿಕ ತೂಕ

ಎಲ್ಲ ರಾಸಾಯನಿಕ ವಸ್ತುಗಳಿಗೂ ಒಂದು ಸೂತ್ರವಿದೆ. ಈ ಸೂತ್ರದ ಪ್ರಕಾರ ಅದರ ತೂಕ ನಿರ್ಧಾರವಾಗುತ್ತದೆ. ಶಾಲೆಯಲ್ಲಿ ಕಲಿಯುವ ವಿದ್ಯಾರ್ಥಿಗಳಿಗೆ ಈ ರಾಸಾಯನಿಕ ತೂಕ ಲೆಕ್ಕಹಾಕುವುದು ಒಂದು ತಲೆನೋವಿನ ಕೆಲಸ. ಉದಾಹರಣೆಗೆ ಇಂಗಾಲದ ಡೈಆಕ್ಸೈಡಿನ ತೂಕ ೪೪.೦೧. ಪ್ರತಿ ಅಣುವಿನಲ್ಲೂ ಇರುವ ಪರಮಾಣುಗಳ ತೂಕ ಒಟ್ಟು ಮಾಡಿದರೆ ಅಣುವಿನ ತೂಕ ಸಿಗುತ್ತದೆ. ಲೆಕ್ಕಹಾಕಬೇಕಾದರೆ ಎಲ್ಲ ಮೂಲವಸ್ತುಗಳ ಪರಮಾಣು ತೂಕದ ಕೋಷ್ಟಕ ಕೈಯಲ್ಲಿರಬೇಕು. ಇದಕ್ಕೆಲ್ಲ ಒಂದು ಸುಲಭ ಪರಿಹಾರ FormulaWeight2011 ಎಂಬ ಉಚಿತ ತಂತ್ರಾಂಶ. ಈ ತಂತ್ರಾಂಶ ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ bit.ly/rh1kFG.
    
e - ಸುದ್ದಿ

ಫೇಸ್‌ಬುಕ್ ಸಹಾಯಕ್ಕೆ

ಗಂಡ ಇನ್ನೊಂದು ಹುಡುಗಿಯ ಸಹವಾಸ ಮಾಡುವುದನ್ನು, ಮಾಡಬಯಸುವುದನ್ನು ಫೇಸ್‌ಬುಕ್ ಮೂಲಕ ಪತ್ತೆಹಚ್ಚಿದ ಹಲವು ಘಟನೆಗಳು ವಿದೇಶದಿಂದ ವರದಿಯಾಗಿವೆ. ಆ ಬಗ್ಗೆ ಇದೇ ಅಂಕಣದಲ್ಲಿ ಪ್ರಸ್ತಾವಿಸಿಯೂ ಆಗಿತ್ತು. ಈಗ ಅಂತಹುದೇ ಘಟನೆ ನಮ್ಮದೇ ದೇಶದ ಕೊಯಂಬತ್ತೂರಿನಿಂದ ವರದಿಯಾಗಿದೆ. ಮಹಾಲಕ್ಷ್ಮಿ ಎಂಬಾಕೆ ಕಾರ್ತಿಕೇಯನ್ ಎಂಬಾತನನ್ನು ಮದುವೆಯಾಗಿದ್ದಳು. ಒಂದು ಮಗುವಾದ ನಂತರ ಅವರ ನಡುವೆ ವಿರಸ ಬಂದು ಬೇರೆಬೇರೆಯಾಗಿ ಜೀವಿಸುತ್ತಿದ್ದರು. ಆತ ಎಲ್ಲಿದ್ದಾನೆ ಎಂದು ಆಕೆಗೆ ಸುಳಿವಿರಲಿಲ್ಲ. ಆತ ಗುಟ್ಟಾಗಿ ಇನ್ನೊಂದು ವಿವಾಹ ಮಾಡಿಕೊಳ್ಳಲು ಏರ್ಪಾಡು ನಡೆಸಿದ್ದ. ಆಕೆಗೆ ಅದರ ಸುಳಿವು ಸಿಕ್ಕಿತು. ಇತರೆ ಹೆಂಗಸರು ಮಾಡಿದಂತೆ ಆಕೆಯೂ ಹುಡುಗಿಯ ಹೆಸರಿನಲ್ಲಿ ಖಾತೆ ತೆರೆದು ಆತನನನ್ನು ಖೆಡ್ಡಾಕ್ಕೆ ಬೀಳಿಸಿದಳು. ಆತ ಇನ್ನೊಂದು ಮದುವೆಯಾಗಿ ದುಬಾಯಿಗೆ ಹಾರುವ ಯೋಜನೆ ಹಾಕಿದ್ದ. ಎಲ್ಲ ಮಣ್ಣುಪಾಲಾಯಿತು.
 
e- ಪದ

ಮ್ಯಾಕ್ ವಿಳಾಸ (MAC address) - ಇದು Media Access Control address  ಎಂಬುದರ ಕಿರುರೂಪ. ಒಂದು ಗಣಕಜಾಲದ ಪ್ರತಿ ಸಂಧಿಜಾಗವನ್ನೂ ನಿರೂಪಿಸುವ ವಿಳಾಸ. ಸಾಮಾನ್ಯವಾಗಿ ಗಣಕವನ್ನು ಗಣಕಜಾಲಕ್ಕೆ  ಸೇರಿಸಲು ಅಡಾಪ್ಟರ್ ಬಳಸುತ್ತಾರೆ. ಈ ಅಡಾಪ್ಟರ್ ಮೂಲಕ ಕೇಬಲ್ ಮೂಲಕ ಗಣಕಜಾಲಕ್ಕೆ ಸಂಪರ್ಕ ಮಾಡಿಕೊಳ್ಳಬಹುದು. ನಿಸ್ತಂತು (ವಯರ್‌ಲೆಸ್) ವಿಧಾನದ ಮೂಲಕವೂ ಜಾಲಕ್ಕೆ ಸೇರಿಕೊಳ್ಳಬಹುದು. ಅದಕ್ಕೂ ಒಂದು ಅಡಾಪ್ಟರ್ ಇರುತ್ತದೆ. ಈ ಅಡಾಪ್ಟರ್‌ನ ವಿಳಾಸವೇ ಮ್ಯಾಕ್ ವಿಳಾಸ. ನಿಸ್ತಂತು ವಿಧಾನದಲ್ಲಿ ಜಾಲಕ್ಕೆ ಸೇರಿಕೊಳ್ಳಬೇಕಿದ್ದಲ್ಲಿ ಹಲವು ಕಂಪೆನಿಗಳಲ್ಲಿ ಈ ಮ್ಯಾಕ್ ವಿಳಾಸ ಸರ್ವರ್‌ನಲ್ಲಿ ನಮೂದಾಗಿದ್ದರೆ ಮಾತ್ರ ಸೇರಿಕೊಳ್ಳಬಹುದು ಎಂಬ ನಿಯಮವನ್ನು ರೂಪಿಸಿರುತ್ತಾರೆ.

e - ಸಲಹೆ

ಮಂಗಳೂರಿನ ರವಿ ಅವರ ಪ್ರಶ್ನೆ: ಮೊಬೈಲ್ನಲ್ಲಿ ನುಡಿ ಅಥವಾ ಬರಹಗಳನ್ನು ಟೈಪ್ ಮಾಡಿ ಆನಂತರ ಅದನ್ನು ಗಣಕಯಂತ್ರಕ್ಕೆ ವರ್ಗಾಯಿಸಿ ನುಡಿ ಕಡತವನ್ನು ಮಾಡಲು ಸಾಧ್ಯವೇ? ಯಾವ ಮೊಬೈಲ್ನಲ್ಲಿ ಈ ವ್ಯವಸ್ಥೆ ಇದೆ? ಕನ್ನಡದಲ್ಲಿ ಇದು ಸಾಧ್ಯವಾದರೆ ಕೆಲವು ಬರಹಗಾರರಿಗೆ ಅನುಕೂಲವಾಗುತ್ತದೆ. ದಯವಿಟ್ಟು ಈ ಬಗ್ಗೆ ಮಾಹಿತಿ ಕೊಡಿ.
ಉ: ಸದ್ಯಕ್ಕೆ ಅಂತಹ ಸವಲತ್ತು ಇಲ್ಲ.

ಕಂಪ್ಯೂತರ್ಲೆ

ಜೀವನ ಫೇಸ್‌ಬುಕ್‌ನಂತೆ. ಎಲ್ಲರೂ ನಿಮ್ಮ ಕಷ್ಟವನ್ನು ಕೇಳಿಸಿಕೊಳ್ಳುತ್ತಾರೆ, ಅದನ್ನು ಇಷ್ಟಪಡುತ್ತಾರೆ, ಅದರ ಬಗ್ಗೆ ಕಮೆಂಟ್ ಮಾಡುತ್ತಾರೆ, ಆದರೆ ನಿಮ್ಮ ಕಷ್ಟವನ್ನು ಯಾರೂ ಪರಿಹರಿಸುವುದಿಲ್ಲ. ಯಾಕೆಂದರೆ ಎಲ್ಲರೂ ತಮ್ಮ ತಮ್ಮ ಸ್ಥಿತಿಯನ್ನು ಪೇಸ್‌ಬುಕ್‌ನಲ್ಲಿ ದಾಖಲಿಸುವದರಲ್ಲಿ ಬ್ಯುಸಿ ಆಗಿದ್ದಾರೆ.

ಸೋಮವಾರ, ಜುಲೈ 4, 2011

ಗಣಕಿಂಡಿ - ೧೧೧ (ಜುಲೈ ೦೪, ೨೦೧೧)

ಅಂತರಜಾಲಾಡಿ

ಜನಲೋಕಪಾಲ ವಿಧೇಯಕ ತನ್ನಿ


ಎಲ್ಲೆಲ್ಲೂ ತುಂಬಿರುವ ಭ್ರಷ್ಟಾಚಾರದಿಂದ ರೋಸಿಹೋಗಿದ್ದೀರಿ ತಾನೆ? ಭ್ರಷ್ಟಾಚಾರ ವಿರುದ್ಧ ಅಣ್ಣಹಜಾರೆ ಮಾಡುತ್ತಿರುವ ಚಳವಳಿಯೂ ಗೊತ್ತು ತಾನೆ? ಈ ಚಳವಳಿಯಲ್ಲಿ ನೀವೂ ಧುಮುಕಲು ಸಮಯವಿಲ್ಲವೇ? ಅಡ್ಡಿಯಿಲ್ಲ. ಜನಲೋಕಪಾಲ ವಿಧೇಯಕ ತನ್ನಿ ಎಂದು ಕನಿಷ್ಠ ನಿಮ್ಮ ಸಂಸದರಿಗೆ ಒತ್ತಾಯಿಸಬಹುದಲ್ಲವೇ? ಹೌದು, ಆದರೆ ಹೇಗೆ ಎನ್ನುತ್ತೀರಾ? nocorruption.in ಜಾಲತಾಣಕ್ಕೆ ಭೇಟಿ ನೀಡಿ. ನಿಮ್ಮ ಸಂಸದರ ಇಮೈಲ್ ವಿಳಾಸ ಪತ್ತೆಹಚ್ಚಿ. ಅದೇ ಜಾಲತಾಣದಲ್ಲಿ ನೀಡಿರುವ ಪತ್ರದ ಮಾದರಿಯಲ್ಲಿ ನಿಮ್ಮ ಸಂಸದರಿಗೆ ಇಮೈಲ್ ಮಾಡಿ. ಕೆಲವು ಸಂಸದರ ಇಮೈಲ್ ವಿಳಾಸದಲ್ಲಿ ತಪ್ಪು ಇರಬಹುದು. ಸರಿಯಾದ ವಿಳಾಸ ತಿಳಿದಿದ್ದಲ್ಲಿ ಅದನ್ನು ತಿದ್ದಲೂ ನೀವು ನೆರವಾಗಬಹುದು.


ಡೌನ್‌ಲೋಡ್

ಫಾಂಟ್ ಪಟ್ಟಿ

ನಿಮ್ಮ ಗಣಕದಲ್ಲಿ ನೂರಾರು ಅಥವಾ ಇನ್ನೂ ಹೆಚ್ಚು ಫಾಂಟ್‌ಗಳಿರಬಹುದು. ಸಾಮಾನ್ಯವಾಗಿ ಡಿಟಿಪಿ ಮಾಡುವವರ ಗಣಕಗಳಲ್ಲಿ ಇದು ಸಹಜ. ಆದರೆ ಬೇರೆಬೇರೆ ಫಾಂಟ್‌ಗಳಲ್ಲಿ ಪಠ್ಯ ಹೇಗೆ ಕಾಣುತ್ತದೆ ಎಂದು ತಿಳಿಯಬೇಕಲ್ಲ? ವಿಂಡೋಸ್‌ನಲ್ಲಿಯೇ ಇರುವ ಸವಲತ್ತು ಅಷ್ಟೇನೂ ಚೆನ್ನಾಗಿಲ್ಲ. ಅದರಲ್ಲೂ ಕನ್ನಡ ಯುನಿಕೋಡ್ ಬೆಂಬಲಿತ ಓಪನ್‌ಟೈಪ್ ಫಾಂಟ್‌ಗಳ ಹೆಸರು ಮಾತ್ರ ತೋರಿಸುತ್ತದೆ. ಅದರಲ್ಲಿ ಕನ್ನಡ ಯುನಿಕೋಡ್ ಪಠ್ಯ ಹೇಗೆ ಕಾಣುತ್ತದೆ ಎಂದು ತೋರಿಸುವುದಿಲ್ಲ. ಗಣಕದಲ್ಲಿರುವ ಎಲ್ಲ ಫಾಂಟ್‌ಗಳನ್ನು ಹೆಸರು ಮತ್ತು ಅದರಲ್ಲಿ ಪಠ್ಯ ಮೂಡಿಬರುವ ರೀತಿಯನ್ನು ತೋರಿಸುವ ತಂತ್ರಾಂಶ FontViewOK. ಇದು ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ bit.ly/kidTA7. ಇದು ಕನ್ನಡ ಯುನಿಕೋಡ್ ಪಠ್ಯವನ್ನು ಕೂಡ ತೋರಿಸುತ್ತದೆ.

e - ಸುದ್ದಿ

ಕೆಲಸ ಕಳಕೊಂಡ ಉದ್ಯೋಗಿ...

ಅಮೇರಿಕದ ಬಾಲ್ಟಿಮೋರ್ ನಗರದ ಕಂಪೆನಿಯೊಂದರಲ್ಲಿ ಉದ್ಯೋಗಿಯೊಬ್ಬನನ್ನು ೨೦೦೯ರಲ್ಲಿ ಕೆಲಸದಿಂದ ತೆಗೆದು ಹಾಕಲಾಗಿತ್ತು. ಆದರೆ ಆತ ಮಾಮೂಲಿ ಉದ್ಯೋಗಿಯಾಗಿರಲಿಲ್ಲ. ಕಂಪೆನಿಯ ಗಣಕಗಳ ಉಸ್ತುವಾರಿ ನೋಡಿಕೊಳ್ಳುವವನಾಗಿದ್ದ. ಅಂದರೆ ಕಂಪೆನಿಯ ಗಣಕಜಾಲಕ್ಕೆ ಹೇಗೆ ಪ್ರವೇಶಿಸುವುದೆಂದು ಆತನಿಗೆ ತಿಳಿದಿತ್ತು. ಕೆಲಸದಿಂದ ತೆಗೆದುಹಾಕಿದ್ದ ಕಂಪೆನಿಯ ಮಖ್ಯಸ್ಥರ ಮೇಲೆ ಸೇಡು ತೀರಿಸಿಕೊಳ್ಳಲು ಆತ ಸೂಕ್ತ ಸಮಯಾವಕಾಶಕ್ಕೆ ಕಾದಿದ್ದ. ಒಮ್ಮೆ ಕಂಪೆನಿಯ ಒಂದು ಬಹು ಮುಖ್ಯ ಸಭೆಯಲ್ಲಿ ಕಂಪೆನಿಯ ಮುಖ್ಯಸ್ಥ ಪವರ್‌ಪಾಯಿಂಟ್ ಪ್ರೆಸೆಂಟೇಶನ್ ಮಾಡುತ್ತಿದ್ದ. ಅದೇ ಸಮಯಕ್ಕೆ ಕಾದಿದ್ದ ಈತ ದೂರನಿಯಂತ್ರಣದಿಂದ ಮುಖ್ಯಸ್ಥನ ಪ್ರೆಸೆಂಟೇಶನ್‌ನ ಸ್ಲೈಡ್‌ಗಳ ಮಧ್ಯೆ ಅಶ್ಲೀಲ ಸ್ಲೈಡ್‌ಗಳನ್ನು ತುರುಕಿಸಿದ್ದ. ಎಲ್ಲರ ಮುಂದೆ ಪ್ರೆಸೆಂಟೇಶನ್ ಮಾಡುವಾಗ ಮುಖ್ಯಸ್ಥನ ಇರಿಸುಮುರಿಸು ಹೇಗಾಗಿರಬೇಕು? ಈತ ಈಗ ಕಾರಾಗೃಹದಲ್ಲಿದ್ದಾನೆ.
 
e- ಪದ

ಅಂಕೀಯ ಪ್ರಮಾಣಪತ್ರ (digital certificate) - ವಿದ್ಯುನ್ಮಾನ ದಾಖಲೆ (ದಸ್ತಾವೇಜು, ಇಮೈಲ್) ಕಳುಹಿಸುವಾಗ ಸುರಕ್ಷೆಗಾಗಿ ಲಗತ್ತಿಸುವ ವಿದ್ಯುನ್ಮಾನ ಪ್ರಮಾಣಪತ್ರ. ದಾಖಲೆ ಕಳುಹಿಸುತ್ತಿರುವವರು ನಿಜವಗಿಯೂ ಅದೇ ವ್ಯಕ್ತಿ ಎಂದು ತಿಳಿಸುವ ಗುರುತು ಚೀಟಿ ಎಂದೂ ಕರೆಯಬಹುದು. ಇದನ್ನು ಹಣ ಕೊಟ್ಟು ಕೊಂಡುಕೊಳ್ಳಬೇಕು. ದಾಖಲೆಯನ್ನು ಕಳುಹಿಸುವಾತ ತನ್ನ ವೈಯಕ್ತಿಕ ಕೀಲಿ ಬಳಸಿ ಗೂಢಲಿಪೀಕರಿಸಿ (encryption) ಕಳುಹಿಸುತ್ತಾನೆ. ಓದುವವರು ಅಂತರಜಾಲದ ಮೂಲಕ ಈ ಕೀಲಿಗೆ ಸರಿಹೊಂದುವ ಇನ್ನೊಂದು ಕೀಲಿಯನ್ನು ಪಡೆದು ತನ್ನ ಗಣಕದಲ್ಲಿ ಸ್ಥಾಪಿಸಿ ದಾಖಲೆಯನ್ನು ಓದಬಹುದು. ತೆರಿಗೆ ದಾಖಲೆಗಳನ್ನು ಅಂತರಜಾಲದ ಮೂಲಕ ನೀಡುವಾಗ ಲಕ್ಕಪತ್ರ ಪರಿಶೀಲಕರು ಇದೇ ವಿಧಾನವನ್ನು ಬಳಸುತ್ತಾರೆ. 

e - ಸಲಹೆ

ತುರುವೇಕೆರೆಯ ಉಷಾಶ್ರೀನಿವಾಸ್ ಅವರ ಪ್ರಶ್ನೆ: ನಾನು ವಿಂಡೋಸ್ ಎಕ್ಸ್‌ಪಿ ಆಪರೇಟಿಂಗ್ ಸಿಸ್ಟಂನಲ್ಲಿ ಆಫೀಸ್ ೨೦೦೭ ನಲ್ಲಿ ಗಣಿತದ ಸಮೀಕರಣಗಳನ್ನು ಟೈಪ್ ಮಾಡಿ ಅದನ್ನು ಪೇಜ್‌ಮೇಕರ್ ೭ ಗೆ ಕಾಪಿ ಮಾಡಲು ಸಾಧ್ಯವಾಗುತ್ತಿಲ್ಲ. ಪೇಜ್ ಮೇಕರ್ ೭ ನಲ್ಲಿ ಗಣಿತದ ಸಮೀಕರಣಗಳನ್ನು ಟೈಪ್ ಮಾಡಲು ಸಾಧ್ಯವಿಲ್ಲವೇ? ದಯಮಾಡಿ ತಿಳಿಸಿ. ಅಥವಾ ಆಫೀಸ್ ೨೦೦೭ನಿಂದ ಹೇಗೆ ಕಾಪಿ ಮಾಡಿಕೊಳ್ಳಬಹುದು ತಿಳಿಸಿ.
ಉ: ಪೇಜ್‌ಮೇಕರ್‌ಗೆ ಸಮೀಕರಣಗಳನ್ನು ಸೇರಿಸಲು ಒಂದು ಸವಲತ್ತು ಇದೆ. ಆದರೆ ಅದು ತುಂಬ ಕ್ಲಿಷ್ಟವಾಗಿದೆ ಹಾಗೂ ತುಂಬ ಕ್ಲಿಷ್ಟವಾದ ಸಮೀಕರಣಗಳನ್ನು ಅದರಲ್ಲಿ ರಚಿಸಲಾಗುವುದಿಲ್ಲ. ಒಂದು ಸರಳ ಉಪಾಯವೆಂದರೆ ನೀವು ವರ್ಡ್‌ನಲ್ಲಿ ಸಮೀಕರಣ ತಯಾರಿಸಿ ನಕಲು ಮಾಡಿಕೊಂಡು (Ctrl-c) ಅದನ್ನು ಯಾವುದಾದರೂ ಗ್ರಾಫಿಕ್ಸ್ ತಂತ್ರಾಂಶಕ್ಕೆ (ಉದಾ -ಫೋಟೋಶಾಪ್) ಅಂಟಿಸಿ (Ctrl-v) ನಂತರ ಅದನ್ನು .jpg ಆಗಿ ಉಳಿಸಿ. ಆ ಫೈಲನ್ನು ಪೇಜ್‌ಮೇಕರ್‌ನಲ್ಲಿ ಆಮದು ಮಾಡಿಕೊಂಡು ಬಳಸಬಹುದು.

ಕಂಪ್ಯೂತರ್ಲೆ

ಆಧುನಿಕ ಚಲನಚಿತ್ರ ಸಂಭಾಷಣೆ-
“ನನ್ನಲ್ಲಿ ಕೋಟಿಗಟ್ಟಳೆ ಹಣವಿದೆ, ಸ್ವಿಸ್ ಬ್ಯಾಂಕ್ ಇದೆ, ಎಂಜಲಿಗೆ ಕೈಯೊಡ್ಡುವ ಜನರಿದ್ದಾರೆ, ಮಾಧ್ಯಮದವರಿದ್ದಾರೆ, ಪೋಲೀಸರಿದ್ದಾರೆ, ಭಟ್ಟಂಗಿಗಳಿದ್ದಾರೆ. ನಿನ್ನಲ್ಲಿ ಏನಿದೆ?”
“ನನ್ನಲ್ಲಿ ಟ್ವಿಟ್ಟರ್ ಫೇಸ್‌ಬುಕ್ ಇದೆ”

ಸೋಮವಾರ, ಜೂನ್ 27, 2011

ಗಣಕಿಂಡಿ - ೧೧೦ (ಜೂನ್ ೨೭, ೨೦೧೧)

ಅಂತರಜಾಲಾಡಿ

ಡಿಜಿಟಲ್ ಫೋಟೋಗ್ರಫಿ

ಡಿಜಿಟಲ್ ಕ್ಯಾಮರಾಗಳು ಈಗೀಗ ಸರ್ವೇಸಾಮಾನ್ಯವಾಗಿವೆ. ಹಲವು ಗುಣವೈಶಿಷ್ಟ್ಯಗಳ ಕ್ಯಾಮರಾಗಳು ಎಲ್ಲರ ಕೈಗೆಟುಕುತ್ತಿವೆ. ಆದರೆ ಈ ಕ್ಯಾಮರಾಗಳನ್ನು ಬಳಸುವುದು ಹೇಗೆ? ಸುಮ್ಮನೆ ನೋಡಿ ಕ್ಲಿಕ್ ಮಾಡುವುದನ್ನು ಯಾರು ಬೇಕಾದರೂ ಮಾಡಬಹುದು. ಆದರೆ ಕ್ಯಾಮರಾದಲ್ಲಿ ನೀಡಿರುವ ಎಲ್ಲ ಆಯ್ಕೆಗಳನ್ನು ಬಳಸುವುದು ಹೇಗೆ? ಈ ಅಪೆರ್ಚರ್, ಐಎಸ್‌ಓ, ಶಟ್ಟರ್ ಸ್ಪೀಡ್, ಇತ್ಯಾದಿ ಆಯ್ಕೆಗಳನ್ನು ಯಾವ ಸಂದರ್ಭದಲ್ಲಿ ಯಾವ ರೀತಿ ಬಳಸಬೇಕು? ಈ ಪ್ರಶ್ನೆಗಳು ಹೊಸತಾಗಿ ಕ್ಯಾಮರಾ ಕೊಂಡುಕೊಂಡ ಎಲ್ಲರ ಮನದಲ್ಲೂ ಮೂಡುವುದರಲ್ಲಿ ಆಶ್ಚರ್ಯವಿಲ್ಲ. ಈ ಎಲ್ಲ ಪ್ರಶ್ನೆಗಳಿಗೆ ಉತ್ತರರೂಪವಾಗಿ www.photoxels.com ಜಾಲತಾಣವಿದೆ. ಡಿಜಿಟಲ್ ಫೋಟೋಗ್ರಫಿ ಬಗ್ಗೆ ಸಂಪೂರ್ಣ ಅಜ್ಞಾನಿಯಿಂದ ಹಿಡಿದು ಪರಿಣತರ ತನಕ ಎಲ್ಲ ವರ್ಗದವರಿಗೂ ಉಪಯೋಗಿಯಾಗುವ ಲೇಖನಗಳು ಇಲ್ಲಿವೆ. 

ಡೌನ್‌ಲೋಡ್

ಸಮೀಕರಣ ರಚಿಸಿ

ಗಣಿತದ ಸಮೀಕರಣಗಳನ್ನು ಗಣಕದಲ್ಲಿ ಮೂಡಿಸುವುದು ಬಹು ಕಷ್ಟದ ಕೆಲಸ. ಮೈಕ್ರೋಸಾಫ್ಟ್ ವರ್ಡ್ ಇದ್ದಲ್ಲಿ ಅದಕ್ಕೆ ಸಮೀಕರಣಗಳನ್ನು ರಚಿಸಲು ಅನುವು ಮಾಡಿಕೊಡುವ equation editor ಎಂಬ ಹೆಚ್ಚುವರಿ ಸವಲತ್ತು ಲಭ್ಯವಿದೆ. ಆದರೆ ವರ್ಡ್ ತಂತ್ರಾಂಶವೇ ಇಲ್ಲದಿದ್ದಲ್ಲಿ? ಅಥವಾ ಸಮೀಕರಣ ರಚಿಸಲು ಒಂದು ಸರಳವಾದ ತಂತ್ರಾಂಶ ಬೇಕು ಎನ್ನುವವರು ನೀವೇ? ಹಾಗಿದ್ದಲ್ಲಿ ನಿಮಗಾಗಿ Math-o-mir ಎಂಬ ತಂತ್ರಾಂಶ ಲಭ್ಯವಿದೆ. ಇದು ಸಂಪೂರ್ಣ ಉಚಿತ. ಇದನ್ನು ಬಳಸಿ ಕ್ಲಿಷ್ಟವಾದ ಸಮೀಕರಣಗಳನ್ನು ರಚಿಸಿ ನಂತರ ಅದನ್ನು ಚಿತ್ರ ರೂಪದಲ್ಲಿ ಉಳಿಸಿಕೊಳ್ಳಬಹುದು. ಈ ತಂತ್ರಾಂಶ ಬೇಕಿದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ - bit.ly/kw7UwE.    
[ಈ ಕೊಂಡಿಯಲ್ಲಿ ದೋಷವಿದೆ ಎಂದು ಕೆಲವರು ಬರೆದಿದ್ದಾರೆ. ಅದು ಒಂದು ಎಚ್ಚರಿಕೆ ಮಾತ್ರ. ಅದನ್ನು ಕಡೆಗಣಿಸಿ ಮುಂದುವರೆಯಬಹುದು. ನೇರ ಕೊಂಡಿ ಬೇಕಿದ್ದವರಿಗೆ - http://gorupec.awardspace.com/mathomir.html]

e - ಸುದ್ದಿ

ನಿಮಗಿಷ್ಟಬಂದ ಡೊಮೈನ್ ಹೆಸರು

ಅಂತರಜಾಲತಾಣಗಳ ಹೆಸರುಗಳು ಸಾಮಾನ್ಯವಾಗಿ .com, .org, .net, .edu, .in, ಇತ್ಯಾದಿಯಾಗಿ ಕೊನೆಗೊಳ್ಳುವುದು ಗೊತ್ತಿರಬಹುದು. ಇವುಗಳು ಬೇಕಾಬಿಟ್ಟಿಯಾಗಿರಲು ಸಾಧ್ಯವಿಲ್ಲ. ಈ ಹೆಸರುಗಳನ್ನು ಒಂದು ಚೌಕಟ್ಟಿನಲ್ಲಿಡಲು ಒಂದು ಸಂಸ್ಥೆ (ICANN) ಇದೆ. ಅದು ಇತ್ತೀಚೆಗೆ ನಿಮಗಿಷ್ಟಬಂದ ಹೆಸರುಗಳನ್ನು ಇಟ್ಟುಕೊಳ್ಳುವ ಸ್ವಾತಂತ್ರ್ಯವನ್ನು ನೀಡಿದೆ. ಅಂದರೆ .phone, .car, .paper, ಇತ್ಯಾದಿಯಾಗಿ ಏನು ಬೇಕಾದರೂ ಇಟ್ಟುಕೊಳ್ಳಬಹುದು. ಉದಾಹರಣೆಗೆ www.kannadaprabha.newspaper. ಆದರೆ ಈ ಸ್ವಾತಂತ್ರ್ಯ ತುಂಬ ದುಬಾರಿ. ಪ್ರಾರಂಭದಲ್ಲಿ ೧,೮೫,೦೦೦ ಡಾಲರು ನೀಡಬೇಕು ಮತ್ತು ಪ್ರತಿ ವರ್ಷ ೨೫,೦೦೦ ಡಾಲರು ನೀಡಬೇಕು.
 
e- ಪದ

ಮೇಲ್ಮಟ್ಟದ ಡೊಮೈನ್ (top-level domain - TLD) - ಅಂತರಜಾಲತಾಣಗಳ ಹೆಸರುಗಳ ಕೊನೆಯಲ್ಲಿ ಬಳಸುವ ಡೊಮೈನ್‌ನ ಮೇಲ್ಮಟ್ಟದ ಹೆಸರು. ಉದಾಹರಣೆಗೆ www.kannadaprabha.com ಎಂಬಲ್ಲಿ .com ಎಂಬುದು ಟಿಎಲ್‌ಡಿ ಆಗಿದೆ. ಟಿಎಲ್‌ಡಿಗೆ ಉದಾಹರಣೆಗಳು - .com, .org, .net, .edu, .in, ಇತ್ಯಾದಿ.

e - ಸಲಹೆ

ಕೃಷ್ಣ ಅವರ ಪ್ರಶ್ನೆ: ನಮ್ಮ ಕಂಪ್ಯೂಟರ್ ಯು.ಪಿ.ಎಸ್. ಇದ್ದರು ಕರೆಂಟ್ ಹೋದಾಗ ರೀ ಸ್ಟಾರ್ಟ್ ಆಗುತ್ತದೆ ಯಾಕೆ?
ಉ: ನಿಮ್ಮ ಯು.ಪಿ.ಎಸ್. ಅನ್ನು ಪರಿಣತರಿಂದ ಪರಿಶೀಲಿಸಿ. ಯು.ಪಿ.ಎಸ್.ನ ಶಕ್ತಿ ಕಡಿಮೆ ಇರಬಹುದು ಅಥವಾ ಅದು ವಿದ್ಯುತ್ ನಿಲುಗಡೆಯಾದ ನಂತರ ತಾನು ವಿದ್ಯುತ್ ಸರಬರಾಜು ಪ್ರಾರಂಭಿಸಲು ತೆಗೆದುಕೊಳ್ಳುವ ಸಮಯಾವಧಿ ಜಾಸ್ತಿ ಇರಬಹುದು. ಈ ಸಮಯಾವಧಿ ಮೈಕ್ರೋಸೆಕೆಂಡುಗಳಲ್ಲಿರತಕ್ಕದ್ದು.

ಕಂಪ್ಯೂತರ್ಲೆ

ಇತ್ತೀಚೆಗೆ ಗೂಗಲ್‌ನವರು ತಮ್ಮ ಅನುವಾದ ಸೌಲಭ್ಯದ (translate.google.com) ಭಾಷೆಗಳಿಗೆ ಕನ್ನಡವನ್ನೂ ಸೇರಿಸಿದ್ದಾರೆ. ಸದ್ಯಕ್ಕೆ ಅದು ಉತ್ತಮವಾಗಿಲ್ಲ. ಅಲ್ಲಿನ ಅನುವಾದಗಳಿಗೆ ಕೆಲವು ಉದಾಹರಣೆಗಳು:
wooden tables = ಮರದ ಕೋಷ್ಟಕಗಳು
button state = ಗುಂಡಿಯನ್ನು ರಾಜ್ಯ
windows is hanging = ಕಿಟಿಕಿಗಳನ್ನು ನೇಣು ಇದೆ 
ಅಳಿಯ = Can be measured

ಬುಧವಾರ, ಜೂನ್ 22, 2011

ಗಣಕಿಂಡಿ - ೧೦೯ (ಜೂನ್ ೨೦, ೨೦೧೧)

ಅಂತರಜಾಲಾಡಿ

ಭೌತಶಾಸ್ತ್ರಜ್ಞರುಗಳಿಗೆ

ಭೌತಶಾಸ್ತ್ರದಲ್ಲಿ ಆಸಕ್ತಿಯಿರುವ ಎಲ್ಲರಿಗೂ ಒಂದು ಉಪಯುಕ್ತ ಜಾಲತಾಣ www.iop.org. ವಿದ್ಯಾರ್ಥಿಗಳಿಗೆ, ಅಧ್ಯಾಪಕರುಗಳಿಗೆ ಮತ್ತು ಭೌತಶಾಸ್ತ್ರದಲ್ಲಿ ಆಸಕ್ತಿಯಿರುವ ಯಾರು ಬೇಕಾದರೂ ಈ ಜಾಲತಾಣದ ಪ್ರಯೋಜನ ಪಡೆದುಕೊಳ್ಳಬಹುದು. ಈ ಜಾಲತಾಣವು ಭೌತಶಾಸ್ತ್ರ ಸಂಸ್ಥೆಯ ಅಧಿಕೃತ ಜಾಲತಾಣ. ಆಸಕ್ತಿಯಿದ್ದಲ್ಲಿ ಈ ಸಂಸ್ಥೆಗೆ ಸದಸ್ಯರೂ ಆಗಬಹುದು. ಭೌತಶಾಸ್ತ್ರಕ್ಕೆ ಸಂಬಂಧಿಸಿದ ಹಲವು ಮಾಹಿತಿ, ಲೇಖನಗಳ ಜೊತೆ ಹಲವು ವೀಡಿಯೋಗಳೂ ಇವೆ. ನಿಮ್ಮ ಶಾಲೆ ಯಾ ಕಾಲೇಜಿನಲ್ಲಿ ಭೌತಶಾಸ್ತ್ರ ಪ್ರಯೋಗ ಪ್ರದರ್ಶನ ಮಾಡಬೇಕಿದ್ದಲ್ಲಿ ಅದಕ್ಕೆ ಸಂಬಂಧಿಸಿದ ಹಲವು ಉದಾಹರಣೆಗಳು ಇಲ್ಲಿವೆ.

ಡೌನ್‌ಲೋಡ್

ಕಾರು ಓಡಿಸಿ

ಗಣಕದಲ್ಲಿ ಕಾರು ಓಡಿಸುವ ಹಾಗೂ ಓಟದ ಸ್ಪರ್ಧೆಯ ಆಟಗಳು ಹಲವಾರಿವೆ. ಅವುಗಳಲ್ಲಿ ಬಹುತೇಕ ದುಬಾರಿ ತಂತ್ರಾಂಶಗಳು. ಅದೇ ರೀತಿ ಉಚಿತ ತಂತ್ರಾಂಶಗಳೂ ಇವೆ. ಅಂತಹ ಒಂದು ಉಚಿತ ತಂತ್ರಾಂಶ ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ www.wheelspinstudios.com/drivingspeed2. ಎಲ್ಲ ಆಟಗಳಂತೆ ಇದೂ ತುಂಬ ದೊಡ್ಡ ಗಾತ್ರದ್ದಾಗಿದೆ. ಡೌನ್‌ಲೋಡ್ ಮಾಡುವ ಮೊದಲು ಫೈಲ್ ಗಾತ್ರವನ್ನು ಗಮನಿಸಿಕೊಳ್ಳಿ. ಈ ಆಟವನ್ನು ಗಣಕದಲ್ಲಿ ಒಂಟಿಯಾಗಿ, ಗಣಕವನ್ನು ಎದುರಾಳಿಯಾಗಿಟ್ಟುಕೊಂಡು ಅಥವಾ ಅಂತರಜಾಲದ ಮೂಲಕ ಇತರೆ ಎದುರಾಳಿಗಳನ್ನು ಆಯ್ಕೆ ಮಾಡಿಕೊಂಡು ಆಡಬಹುದು. ಅಂತರಜಾಲ ಮೂಲಕ ಆಡಬೇಕಿದ್ದರೆ ಉತ್ತಮ ಬ್ರಾಡ್‌ಬ್ಯಾಂಡ್ ಸಂಪರ್ಕ ಬೇಕು. ಉತ್ತಮ ಮಟ್ಟದ ಗ್ರಾಫಿಕ್ಸ್ ಕಾರ್ಡ್ ಕೂಡ ಇರಬೇಕು.

e - ಸುದ್ದಿ

ಅಂತರಜಾಲ ಸಂಪರ್ಕ ಈಗ ಮೂಲಭೂತ ಹಕ್ಕು

ಅಂತರಜಾಲ ಸಂಪರ್ಕವು ಒಂದು ಮೂಲಭೂತ ಹಕ್ಕು ಎಂದು ವಿಶ್ವಸಂಸ್ಥೆ ಇತ್ತೀಚೆಗೆ ಘೋಷಿಸಿದೆ. ಇದು ಬಹು ದೂರಗಾಮಿ ಪರಿಣಾಮ ಬೀರಲಿದೆ. ಇತ್ತೀಚೆಗೆ ಈಜಿಪ್ಟ್ ಮತ್ತು ಕೆಲವು ಮಧ್ಯ ಏಷಿಯಾ ದೇಶಗಳಲ್ಲಿ ನಡೆದ ಚಳವಳಿಗಳಲ್ಲಿ ಅಂತರಜಾಲವು ಪ್ರಮುಖ ಪಾತ್ರವಹಿಸಿದೆ. ಜನರು ಚಳವಳಿಯಲ್ಲಿ ಸೇರಲು ಟ್ವಿಟ್ಟರ್ ಮತ್ತು ಫೇಸ್‌ಬುಕ್‌ಗಳನ್ನು ಬಳಸಿಕೊಂಡಿದ್ದರು. ಇದರಿಂದ ಕುಪಿತವಾದ ಅಲ್ಲಿನ ಸರಕಾರಗಳು ತಮ್ಮ ದೇಶದಲ್ಲಿ ಅಂತರಜಾಲ ಸಂಪರ್ಕವನ್ನು ನಿಷೇಧಿಸಿದ್ದರು. ಇಂತಹ ಘಟನೆಗಳು ಮರುಕಳಿಸಬಾರದು ಎಂದು ತೀರ್ಮಾನಿಸಿದ ವಿಶ್ವಸಂಸ್ಥೆ ಅಂತರಜಾಲ ಸಂಪರ್ಕವು ಪ್ರತಿಯೊಬ್ಬ ಮಾನವನ ಮೂಲಭೂತ ಹಕ್ಕು ಎಂದು ಘೋಷಿಸಿದೆ.
 
e- ಪದ

ಲಾಟೆಕ್ (LaTeX) - ಮುದ್ರಣ ಮತ್ತು ಪುಟವಿನ್ಯಾಸಕ್ಕೆ ಬಳಸುವ ಒಂದು ಕ್ರಮವಿಧಿ ಭಾಷೆ. ಇದು ಸಾಮಾನ್ಯವಾಗಿ ವಿಜ್ಞಾನಿ ಮತ್ತು ಗಣಿತಶಾಸ್ತ್ರಜ್ಞರ ಬಳಗದಲ್ಲಿ ಪ್ರಚಲಿತವಾಗಿದೆ. ಇದರಲ್ಲಿ ಪುಟವಿನ್ಯಾಸ ಮತ್ತು ವಿವಿಧ ನಮೂನೆಯ ಮುದ್ರಣದ ಪರಿಣಾಮಗಳನ್ನು ಪಡೆಯಲು ಆದೇಶಗಳನ್ನು ನಿಡಬೇಕಾಗುತ್ತದೆ. ಕೊನೆಗೆ ಅದು ಸುಂದರ ಪುಟವಾಗಿ ಮುದ್ರಣಕ್ಕೆ ತಯಾರಾಗಿ ಬರುತ್ತದೆ. ಇದು ಅತ್ಯಂತ ಶಕ್ತಿಶಾಲಿಯಾಗಿದೆ. ಎಷ್ಟು ಕ್ಲಿಷ್ಟವಾದ ಸಮೀಕರಣವಾದರೂ ಇದನ್ನು ಬಳಸಿ ಪಡೆಯಬಹುದಾಗಿದೆ. ಇದರ ಮೂಲ ಟೆಕ್ (TeX). ಇದನ್ನು ಕನ್ನಡ ಭಾಷೆಗೂ ಅಳವಡಿಸಲಾಗಿದೆ.

e - ಸಲಹೆ

ಮಹಾಲಿಂಗೇಶರ ಪ್ರಶ್ನೆ: ನಾನು ಮಸ್ಕತ್‌ನಿಂದ ತರಿಸಿದ ಲ್ಯಾಪ್ಟಾಪ್ ಬಳಸುತ್ತಿರುವೆ. ಅದರಲ್ಲಿ ವಿಂಡೋಸ್ ೭ ಇದೆ.  ಅದರಲ್ಲಿ ನನಗೆ ನುಡಿ ತಂತ್ರಾಂಶವನ್ನು ಬಳಸಲು ಆಗುತ್ತಿಲ್ಲ. ಯುನಿಕೋಡ್ ಆಯ್ಕೆಮಾಡಿಕೊಂಡು ಟೈಪ್ ಮಾಡಿ ಪೆನ್ ಡ್ರೈವ್ ನಲ್ಲಿ ಸೇವ್ ಮಾಡಿ ಬೇರೆ ಕಂಪ್ಯೂಟರ್‌ನಲ್ಲಿ ಹಾಕಿದಾಗ ಸರಿಯಾಗಿ ಓಪನ್ ಆಗುವುದಿಲ್ಲ. ನನ್ನ ಕೀಲಿಮಣೆಯಲ್ಲಿ ಇಂಗ್ಲಿಶ್ ಜೊತೆಗೆ ಅರೇಬಿಕ್ ಇರುವುದೇ ಹೀಗಾಗಲು ಕಾರಣವೇ ತಿಳಿಸಿ.
ಉ: ಅರೇಬಿಕ್ ಕೀಲಿಮಣೆಯಿದ್ದರೆ ತೊಂದರೆಯಿಲ್ಲ. ಅಷ್ಟೇಕೆ? ಪ್ರಪಂಚದ ಎಲ್ಲ ಭಾಷೆಯ ಕೀಲಿಮಣೆಗಳನ್ನು ಕೂಡ ನೀವು ಹಾಕಿಟ್ಟುಕೊಳ್ಳಬಹುದು. ಆದರೆ ಯಾವುದೇ ಒಂದು ಸಮಯದಲ್ಲಿ ಒಂದನ್ನು ಮಾತ್ರ ಚಾಲನೆಗೊಳಿಸಬಹುದು. ಅದುದರಿಂದ ಅದು ನಿಮ್ಮ ಸಮಸ್ಯೆಯಲ್ಲ. ವಿಂಡೋಸ್ ೭ ರಲ್ಲಿ (೬೪ ಬಿಟ್ ಆವೃತ್ತಿಯಲ್ಲಿ) ನುಡಿ ತಂತ್ರಾಂಶ ಸರಿಯಾಗಿ ಕೆಲಸ ಮಾಡುವುದಿಲ್ಲ. ನೀವು ವಿಂಡೋಸ್‌ನಲ್ಲೇ ಇರುವ ಕನ್ನಡ ಯುನಿಕೋಡ್ ಕೀಲಿಮಣೆಯನ್ನು ಬಳಸಬಹುದು.

ಕಂಪ್ಯೂತರ್ಲೆ

ಮೈಕ್ರೋಸಾಫ್ಟ್ ಸ್ಕೈಪನ್ನು ೮.೫ ಬಿಲಿಯನ್ ಕೊಟ್ಟು ಕೊಂಡುಕೊಂಡಿತು ಎಂಬುದನ್ನು ಪತ್ರಿಕೆಗಳಲ್ಲಿ ಓದಿದ ಕೋಲ್ಯ ಉದ್ಗರಿಸಿದ - “ಅವರೇಕೆ ಅದಕ್ಕೆ ದುಡ್ಡು ಕೊಟ್ಟು ಕೊಂಡುಕೊಂಡರು? ಅವರು ಅದನ್ನು ಬಿಟ್ಟಿಯಾಗಿ ಡೌನ್‌ಲೋಡ್ ಮಾಡಿಕೊಳ್ಳಬಹುದಿತ್ತಲ್ಲ!” 

ಸೋಮವಾರ, ಜೂನ್ 13, 2011

ಗಣಕಿಂಡಿ - ೧೦೮ (ಜೂನ್ ೧೩, ೨೦೧೧)

ಅಂತರಜಾಲಾಡಿ

ಭ್ರಷ್ಟಾಚಾರ ನಿರ್ಮೂಲನ

ಇತ್ತೀಚಿನ ಎರಡು ವರ್ಷಗಳಲ್ಲಿ ಭ್ರಷ್ಟಾಚಾರದ್ದೇ ಮಾತು. ಭ್ರಷ್ಟಾಚಾರ ವಿರುದ್ಧ ನಡೆಯುತ್ತಿರುವ ಚಳವಳಿ ಎಲ್ಲರಿಗೂ ಗೊತ್ತು. ದೇಶದಲ್ಲಿ ಜನಲೋಕಪಾಲ ಕಾಯಿದೆ ತರಬೇಕು ಎಂದು ಅಣ್ಣಾ ಹಜಾರೆ ನಡೆಸುತ್ತಿರುವ ಚಳವಳಿ ಗೊತ್ತಿಲ್ಲದವರು ಇಲ್ಲ. ಈ ಜನಲೋಕಪಾಲ ಮಸೂದೆ ಎಂದರೆ ಏನು? ಈ ಕಾಯಿದೆಯನ್ನು ರೂಪಿಸುತ್ತಿರುವ ತಂಡ, ಕಾಯಿದೆಯ ರೂಪುರೇಷೆ, ನಿಮ್ಮ ಪ್ರಶ್ನೆಗಳಿಗೆ ಉತ್ತರ, ಇತ್ತೀಚಿನ ಸುದ್ದಿ, ನೀವು ಸುದ್ದಿ ಮಾಧ್ಯಮದವರಾದರೆ ನಿಮಗೆ ಅಗತ್ಯ ಮಾಹಿತಿ, ಚಿತ್ರ, ಇತ್ಯಾದಿ ಎಲ್ಲ ದೊರಕುವ ಜಾಲತಾಣ  www.indiaagainstcorruption.org. ಕರಡು ಲೋಕಪಾಲ ಮಸೂದೆಯನ್ನು ಡೌನ್‌ಲೋಡ್ ಕೂಡ ಮಾಡಿಕೊಳ್ಳಬಹುದು. ಇನ್ನು ತಡವೇಕೆ? ನೀವೂ ಭ್ರಷ್ಟಾಚಾರ ನಿರ್ಮೂಲನೆಗೆ ಕೈಜೋಡಿಸಿ.

ಡೌನ್‌ಲೋಡ್

ಫ್ರಾಕ್ಟಲ್ ತಯಾರಿಸಿ

Fractal Forge ಎಂಬುದು ಒಂದು ಮುಕ್ತ ತಂತ್ರಾಂಶ. ಇದನ್ನು ಬಳಸಿ ಹಲವು ವಿಧದ ಫ್ರಾಕ್ಟಲ್‌ಗಳನ್ನು ಮಾಡಬಹುದು. ಫ್ರಾಕ್ಟಲ್ ಎಂದರೆ ಏನು ಎಂದು ಕೇಳುತ್ತಿದ್ದೀರಾ? ಉತ್ತರ ಇದೇ ತಂತ್ರಾಂಶದ ಸಹಾಯ ಕಡತದಲ್ಲಿ ಇದೆ. ಈ ಕ್ಲಿಷ್ಟ ಗಣಿತಶಾಸ್ತ್ರ ನಿಮಗೆ ಅರ್ಥವಾಗುವುದಿಲ್ಲವೇ? ಚಿಂತಿಸಬೇಡಿ. ಅದರಿಂದ ದೊರೆಯುವ ಅದ್ಭುತ ವಿನ್ಯಾಸಗಳನ್ನು ನೋಡಿ ಆನಂದಿಸಿ. ನಿಮ್ಮ ಗೆಳೆಯರಿಗೆ ಒಂದು ವೈeನಿಕ ಶುಭಾಶಯ ಪತ್ರ ಕಳುಹಿಸಲು ಈ ವಿನ್ಯಾಸಗಳನ್ನು ಬಳಸಿ. ಈ ತಂತ್ರಾಂಶದ ತಾಣಸೂಚಿ: uberto.fractovia.org. ಮೂರು ಆಯಾಮದ ಫ್ರಾಕ್ಟಲ್‌ಗಳನ್ನು ತಯಾರಿಸಬೇಕೇ? ಹಾಗಿದ್ದರೆ www.chaospro.de ಜಾಲತಾಣಕ್ಕೆ ಭೇಟಿ ನಿಡಿ ಅಲ್ಲಿ ದೊರೆಯುವ ತಂತ್ರಾಂಶವನ್ನು ಡೌನ್‌ಲೋಡ್ ಮಾಡಿಕೊಳ್ಳಿ.


e - ಸುದ್ದಿ

ಬಾಂಬ್ ಬದಲು ಕೇಕ್

ಸರಕಾರದ ಜಾಲತಾಣಗಳಿಗೆ ಅದರಲ್ಲೂ ಮುಖ್ಯವಾಗಿ ಸೇನೆ, ಸುರಕ್ಷೆ, ಸಂಶೋಧನಾ ಕೇಂದ್ರ -ಇತ್ಯಾದಿಗಳ ಜಾಲತಾಣಗಳಿಗೆ ಹ್ಯಾಕರ್‌ಗಳು ಮತ್ತು ಆತಂಕವಾದಿಗಳು ದಾಳಿ ಇಟ್ಟು ಅವುಗಳನ್ನು ಕೆಡಿಸುವುದು, ಆ ಜಾಲತಾಣದಲ್ಲಿ ಎಚ್ಚರಿಕೆಯ ಸಂದೇಶ ದಾಖಲಿಸುವುದು ಆಗಾಗ ನಡೆಯುತ್ತದೆ. ಈ ಬಗ್ಗೆ ಪತ್ರಿಕೆಗಳಲ್ಲಿ ಓದಿಯೇ ಇರುತ್ತೀರಿ. ಆದರೆ ಇದು ವಿರುದ್ಧ ಕಥೆ. ಅಲ್‌ಖೈದದವರು ಇಂಗ್ಲಿಶ್ ಭಾಷೆಯಲ್ಲಿ ಒಂದು ಜಾಲತಾಣ ನಿರ್ಮಿಸಿ ಸುಲಭದಲ್ಲಿ ಬಾಂಬ್ ತಯಾರಿಸುವುದು ಹೇಗೆ ಎಂಬ ವಿವರಣೆಯನ್ನು ಅದರಲ್ಲಿ ದಾಖಲಿಸಿದ್ದರು. ಬ್ರಿಟಿಶ್ ಗುಪ್ತಚಾರಿಕೆ ಸಂಸ್ಥೆಯವರು ಅದಕ್ಕೆ ದಾಳಿ ಇಟ್ಟು ಅದನ್ನು ಕೆಡಿಸಿ ಬಾಂಬ್ ಬದಲಿಗೆ ಕೇಕ್ ತಯಾರಿಸುವುದು ಹೇಗೆ ಎಂಬ ವಿವರವನ್ನು ಹಾಕಿ ಇಟ್ಟಿದ್ದರು.
 
e- ಪದ


ಸೈಬರ್‌ಸ್ಕ್ವಾಟಿಂಗ್ (cybersquatting) - ಇದಕ್ಕೆ ಇನ್ನೊಂದು ಹೆಸರು ಡೊಮೈನ್ ಸ್ಕ್ವಾಟಿಂಗ್ (domain squatting). ಇನ್ನೊಂದು ಕಂಪೆನಿ ಅಥವಾ ಸಂಸ್ಥೆಯ ಹೆಸರಿನಲ್ಲಿ ಜಾಲತಾಣ ಹೆಸರನ್ನು ನೋಂದಾಯಿಸಿ ಇಟ್ಟುಕೊಳ್ಳುವುದು. ಉದಾಹರಣೆಗೆ xyz ಹೆಸರಿನ ಒಂದು ಖ್ಯಾತ ಕಂಪೆನಿ ಇದೆ ಎಂದಿಟ್ಟುಕೊಳ್ಳಿ. ಆ ಕಂಪೆನಿ ತನ್ನ ಹೆಸರಿನಲ್ಲಿ ಇನ್ನೂ ತನ್ನ ಜಾಲತಾಣದ ಹೆಸರನ್ನು (ಡೊಮೈನ್ ನೇಮ್) ನೋಂದಾಯಿಸಿಕೊಂಡಿಲ್ಲ ಎಂದು ಅರಿತವರೊಬ್ಬರು ಆ ಹೆಸರನ್ನು (xyz.com) ನೋಂದಾಯಿಸಿ ಇಟ್ಟುಕೊಳ್ಳುವುದು. ಇದರ ಹಿಂದಿನ ಉದ್ದೇಶ ಮುಂದೊಂದು ದಿನ ಅದೇ ಕಂಪೆನಿಗೆ ಆ ಹೆಸರನ್ನು ಅತಿ ಹೆಚ್ಚು ಹಣಕ್ಕೆ ಮಾರುವುದು.  ಜಾಗತಿಕ ಬೌದ್ಧಿಕ ಹಕ್ಕುಸ್ವಾಮ್ಯ ಸಂಸ್ಥೆ (World Intellectual Property Organization - WIPO) ಪ್ರಕಾರ ಇದು ಅಪರಾಧ. ಹಲವು ಕಂಪೆನಿಗಳವರು ನ್ಯಾಯಾಲಯದ ಮೂಲಕ ತಮ್ಮ ಡೊಮೈನ್ ಹೆಸರು ತಮ್ಮದಾಗಿಸಿಕೊಂಡಿದ್ದಾರೆ.

e - ಸಲಹೆ

ದುಂಡಪ್ಪನವರ ಪ್ರಶ್ನೆ: ನನ್ನ ಗಣಕ ಹದಿನೈದು ನಿಮಿಷ ಕೆಲಸ ಮಾಡಿ ತನ್ನಿಂದತಾನೆ ಆಫ್ ಆಗುತ್ತದೆ. ಇದಕ್ಕೇನು ಕಾರಣ?
ಉ: ಬಹುಶಃ ನಿಮ್ಮ ಗಣಕದ ಒಳಗೆ ಇರುವ ಸಿಪಿಯು ಬಿಸಿ ಆಗುತ್ತಿರಬೇಕು. ಅದರ ಮೇಲಿನ ಫ್ಯಾನ್ ಕೆಲಸ ಮಾಡುತ್ತಿದೆಯೋ ಪರೀಕ್ಷಿಸಿ. ಗಣಕಕ್ಕೆ ಸರಿಯಾಗಿ ಗಾಳಿ ಓಡಾಡುತ್ತಿರಬೇಕು. ಪ್ಲಾಸ್ಟಿಕ್ ಕವರ್ ಹಾಕಿ ಬಳಸಬೇಡಿ. ಇನ್ನೂ ಒಂದು ಕಾರಣ ಇರುವ ಸಾಧ್ಯತೆ ಇದೆ. ಮೆಮೊರಿ ಚಿಪ್‌ಗಳು ಸಡಿಲವಾಗಿರಬಹುದು. ಅದನ್ನೂ ಪರೀಕ್ಷಿಸಿ ನೋಡಿ.  

ಕಂಪ್ಯೂತರ್ಲೆ

ಕೋಲ್ಯನ ಮಗ ಜಾಲತಾಣವೊಂದರಲ್ಲಿ ತನ್ನ ಹೆಸರನ್ನು ನೋಂದಾಯಿಸುತ್ತಿದ್ದ. ಅಲ್ಲಿ ಸರ್‌ನೇಮ್ ಎಂದಿದ್ದಲ್ಲಿ ತನ್ನ ಉಪಾಧ್ಯಾಯರ ಹೆಸರನ್ನು ನಮೂದಿಸಿದ.

ಮಂಗಳವಾರ, ಜೂನ್ 7, 2011

ಗಣಕಿಂಡಿ - ೧೦೭ (ಜೂನ್ ೦೬, ೨೦೧೧)

ಅಂತರಜಾಲಾಡಿ

ಕೋಪಿಷ್ಠ ಹಕ್ಕಿಗಳು

ಆಪಲ್ ಐಫೋನ್ ಮತ್ತು ಆಂಡ್ರೋಯಿಡ್ ಫೋನ್‌ಗಳಲ್ಲಿ ತುಂಬ ಜನಪ್ರಿಯವಾದ ಆಟ Angry Birds. ಇದು ಈಗ ಮೊಬೈಲ್ ತಂತ್ರಾಂಶ ಮಾರುಕಟ್ಟೆಯಲ್ಲಿ ಮಾರಾಟದ ದಾಖಲೆಯಲ್ಲಿ ಮೊದಲನೆಯ ಸ್ಥಾನದಲ್ಲಿದೆ. ನಿಮ್ಮಲ್ಲಿ ಐಫೋನ್ ಅಥವಾ ಆಂಡ್ರೋಯಿಡ್ ಫೋನ್ ಇದ್ದಲ್ಲಿ ಅದನ್ನು ಮಾರುಕಟ್ಟೆಯಿಂದ ಕೊಂಡುಕೊಳ್ಳಬಹುದು ಅಥವಾ ಉಚಿತ ಆವೃತ್ತಿಯನ್ನು ಡೌನ್‌ಲೋಡ್ ಮಾಡಿಕೊಳ್ಳಬಹುದು. ಇದು ಬರಿಯ ಆಟವಲ್ಲ. ಇದರಲ್ಲಿ ಸ್ವಲ್ಪ ವಿಜ್ಞಾನವೂ ಇದೆ. ಒಂದು ಕವಣೆಯನ್ನು ಬಳಸಿ ಅದರ ವೇಗ, ಕೋನ ಬದಲಿಸಿ, ಹಕ್ಕಿಗಳನ್ನು ಎಸೆದು ಹಂದಿಗಳನ್ನು ಕೊಲ್ಲಬೇಕು. ಇದನ್ನು ನಿಮ್ಮ ಗಣಕದಲ್ಲೇ ಆಡಬೇಕೇ? ಅದೂ ಉಚಿತವಾಗಿ? ಹಾಗಿದ್ದರೆ ನೀವು chrome.angrybirds.com ಜಾಲತಾಣಕ್ಕೆ ಭೇಟಿ ನಿಡಬೇಕು. ಇದು ಕ್ರೋಮ್ ಬ್ರೌಸರ್‌ನಲ್ಲಿ ಅತ್ಯುತ್ತಮವಾಗಿ ಕೆಲಸ ಮಾಡುತ್ತದೆ. ಮೈಕ್ರೋಸಾಫ್ಟ್ ಇಂಟರ್‌ನೆಟ್ ಎಕ್ಸ್‌ಪ್ಲೋರರ್ ೯ ಹಾಗೂ ಫೈರ್‌ಫಾಕ್ಸ್ ೪ ರಲ್ಲೂ ಕೆಲಸ ಮಾಡುತ್ತದೆ. ಆದರೆ ಕ್ರೋಮ್‌ನಷ್ಟು ಚೆನ್ನಾಗಿ ಅಲ್ಲ. ಇತ್ತೀಚೆಗೆ ಇದನ್ನು ಕ್ರೋಮ್‌ಗೆ ಸೇರಿಸಿಕೊಂಡು ಅಂತರಜಾಲ ಸಂಪರ್ಕ ಇಲ್ಲದಿದ್ದಾಗಲೂ ಆಡುವ ಸವಲತ್ತು ನೀಡಿದ್ದಾರೆ. ಎಚ್ಚರಿಕೆ. ಇದು ನಿಮ್ಮನ್ನು ಒಂದು ಚಟವಾಗಿ ಅಂಟಿಕೊಂಡುಬಿಡಬಹುದು.

ಡೌನ್‌ಲೋಡ್

ಕಡತ ರಿಪೇರಿ ಮಾಡಿ

ಗಣಕದಲ್ಲಿ ಒಂದು ಕಡತ ತಯಾರಿ ಮಾಡುತ್ತಿದ್ದೀರಿ. ಅದಕ್ಕಾಗಿ ಮೈಕ್ರೋಸಾಫ್ಟ್ ವರ್ಡ್ ಅಥವಾ ಎಕ್ಸೆಲ್ ಬಳಸುತ್ತಿದ್ದೀರಿ. ಆಗ ಇದ್ದಕ್ಕಿದ್ದಂತೆ ವಿದ್ಯುಚ್ಛಕ್ತಿ ಕೈಕೊಡುತ್ತದೆ. ನಿಮ್ಮಲ್ಲಿ ಯುಪಿಎಸ್ ಇಲ್ಲ. ಆಗ ಏನಾಗುತ್ತದೆ? ಗಣಕ ಇದ್ದಕ್ಕಿದ್ದಂತೆ ನಿಂತುಹೋಗುವುದರಿಂದ ಹೆಚ್ಚಿನಂಶ ನೀವು ಕೆಲಸ ಮಾಡುತ್ತಿದ್ದ ಕಡತ ಕೆಟ್ಟುಹೋಗುವ ಸಾದ್ಯತೆ ಇದೆ. ಆಗಾಗ ಕಡತವನ್ನು ಉಳಿಸುತ್ತಾ ಇರು ಎಂದು ಆಯ್ಕೆ ಮಾಡಿಕೊಂಡಿದ್ದಲ್ಲಿ ಸುಮಾರು ಮಾಹಿತಿ ಸಿಗುವ ಸಾಧ್ಯತೆ ಇದೆ. ಹಾಗಿಲ್ಲದಿದ್ದಲ್ಲಿ ಕಡತ ಕೆಟ್ಟಿದ್ದರೆ ಅದನ್ನು ಸರಿಮಾಡಲು ಒಂದು ತಂತ್ರಾಂಶ ಉಚಿತವಾಗಿ ಲಭ್ಯವಿದೆ. ಅದನ್ನು ಡೌನ್‌ಲೋಡ್ ಮಾಡಿಕೊಳ್ಳಲು ನೀವು ಭೇಟಿ ನೀಡಬೇಕಾದ ಜಾಲತಾಣ  www.filerepair1.com. ವರ್ಡ್ ಮತ್ತು ಎಕ್ಸೆಲ್ ಮಾತ್ರವಲ್ಲ, ಇನ್ನೂ ಹಲವಾರು ನಮೂನೆಯ ಫೈಲ್‌ಗಳನ್ನು ಇದು ರಿಪೇರಿ ಮಾಡಬಲ್ಲುದು.

e - ಸುದ್ದಿ

ನಿಮ್ಮ ಮುಖಕ್ಕೆ ಸರಿಹೊಂದುವ ನಾಯಿ

ನಿಮ್ಮ ಮುಖಕ್ಕೆ ಸರಿಹೊಂದುವ ಹೆಣ್ಣು/ಗಂಡನ್ನು ನೋಡಿ ಮದುವೆ ಆಗುವುದು ಗೊತ್ತು ತಾನೆ? ಅದನ್ನೇ ಗಣಕ ಬಳಸಿಯೂ ಮಾಡಬಹುದು. ಅದಕ್ಕಾಗಿ ತಂತ್ರಾಂಶಗಳೂ ಇವೆ. ಹಲವು ಅಂತರಜಾಲತಾಣಗಳೂ ಇವೆ. ಅಂತಹ ಜಾಲತಾಣದಲ್ಲಿ ನಿಮ್ಮ ಫೋಟೋ ನೀಡಿದರೆ ಅದು ನಿಮ್ಮ ಮುಖಕ್ಕೆ ಸರಿಹೊಂದುವ ಬಾಳಸಂಗಾತಿಯನ್ನು ಹುಡುಕಿ ಕೊಡುತ್ತದೆ. ಅದೇನೋ ಸರಿ. ಆದರೆ ನಿಮ್ಮ ಮುಖಕ್ಕೆ ಸರಿಹೊಂದುವ ನಾಯಿ ಕೊಳ್ಳುವುದು ಗೊತ್ತೆ? ಅದಕ್ಕಾಗಿ ನೀವು www.doggelganger.co.nz  ಜಾಲತಾಣಕ್ಕೆ ಭೇಟಿ ನೀಡಬೇಕು. ಆ ಜಾಲತಾಣದಲ್ಲಿ ನೀವು ನಿಮ್ಮ ಫೋಟೋ ನೀಡಬಹುದು ಅಥವಾ ನಿಮ್ಮ ಗಣಕದಲ್ಲಿ ಕ್ಯಾಮರಾ ಇದ್ದರೆ ಅದರ ಮೂಲಕ ಫೋಟೋವನ್ನು ಅದುವೇ ತೆಗೆದುಕೊಳ್ಳುತ್ತದೆ. ನಂತರ ನಿಮ್ಮ ಮುಖಕ್ಕೆ ಸರಿಹೊಂದುವ ನಾಯಿಯ ಮಾಹಿತಿ ನೀಡುತ್ತದೆ. ಆದರೆ ನಾಯಿ ಮಾತ್ರ ನ್ಯೂಝೀಲಂಡಿನಲ್ಲಿ ಸಿಗುತ್ತದೆ.
 
e- ಪದ

ಟೈಪೋಸ್ಕ್ವಾಟ್ಟಿಂಗ್ (Typosquatting) - ಖ್ಯಾತ ಜಾಲತಾಣಗಳ ವಿಳಾಸವನ್ನು ಬೆರಳಚ್ಚು ಮಾಡುವಾಗ ತಪ್ಪಾದರೆ ದೊರೆಯುವ ಜಾಲತಾಣ ವಿಳಾಸಗಳನ್ನು ನೋಂದಣಿ ಮಾಡಿಟ್ಟುಕೊಳ್ಳುವುದು. ಉದಾಹರಣೆಗೆ google.com ಎಲ್ಲರಿಗೂ ಗೊತ್ತು. ಕೆಲವೊಮ್ಮೆ ಅದನ್ನು ಬೆರಳಚ್ಚು ಮಾಡುವಾಗ goggle ಎಂದಾಗುತ್ತದೆ. ಇದನ್ನು ಮೊದಲೇ ಊಹಿಸಿ goggle.com ಎಂಬ ಜಾಲತಾಣವನ್ನು ನೋಂದಾಯಿಸಿಕೊಳ್ಳವುದು. ಅನಂತರ ಅದಕ್ಕೆ ಬರುವ ವೀಕ್ಷಕರನ್ನು ಬೇರೆಡೆಗೆ ಹಾದಿ ತಪ್ಪಿಸುವುದು.

e - ಸಲಹೆ

ಪ್ರ: ನನಗೆ ಗೂಗ್ಲ್ ವಿ-ಅಂಚೆ (gmail) ಯಲ್ಲಿರುವ ಪತ್ರಗಳನ್ನು ನನ್ನ ಗಣಕಕ್ಕೆ ಡೌನ್‌ಲೋಡ್ ಮಾಡಿಟ್ಟುಕೊಳ್ಳಬೇಕು ಮತ್ತು ಗಣಕದಿಂದಲೇ ಜಿಮೈಲ್ ಮೂಲಕ ವಿ-ಅಂಚೆ ಕಳುಹಿಸಬೇಕು. ಅದಕ್ಕೆ ಏನು ಮಾಡಬೇಕು?
ಉ: ನಿಮ್ಮ ಗಣಕದಲ್ಲಿ ಯಾವುದಾದರೂ ವಿ-ಅಂಚೆಯ ತಂತ್ರಾಂಶ ಇರಬೇಕು. ಉದಾ -ಮೈಕ್ರೋಸಾಫ್ಟ್ ಔಟ್‌ಲುಕ್, ವಿಂಡೋಸ್ ಲೈವ್ ಮೈಲ್, ಥಂಡರ್‌ಬರ್ಡ್, ಇತ್ಯಾದಿ. ಔಟ್‌ಲುಕ್ ತುಂಬ ಚೆನ್ನಾಗಿದೆ. ಆದರೆ ಅದು ಉಚಿತವಲ್ಲ. ವಿಂಡೋಸ್ ಲೈವ್ ಮೈಲ್ ಉಚಿತ. ಅದನ್ನು bit.ly/iJYE4G ಜಾಲತಾಣದಿಂದ ಡೌನ್‌ಲೋಡ್ ಮಾಡಿಕೊಳ್ಳಬಹುದು. ಜಿಮೈಲ್‌ನಲ್ಲಿ POP/IMAP ಆಯ್ಕೆ ಮಾಡಿಕೊಳ್ಳಬೇಕು. ಪೂರ್ತಿ ವಿವರ ಜಿಮೈಲ್ ಜಾಲತಾಣದಲ್ಲಿದೆ.  

ಕಂಪ್ಯೂತರ್ಲೆ

ಕೋಲ್ಯನ ೬ ವರ್ಷದ ಮಗಳಿಗೆ ಗಣಕದ ಡೆಸ್ಕ್‌ಟಾಪ್‌ನಲ್ಲಿ ಮೈಕ್ರೋಸಾಫ್ಟ್ ಇಂಟರ್‌ನೆಟ್ ಎಕ್ಸ್‌ಪ್ಲೋರರ್‌ನ ಚಿತ್ರಿಕೆ (ಐಕಾನ್) ಕಾಣಸಿಗಲಿಲ್ಲ. ಆಕೆ ಅಪ್ಪನಿಗೆ ಕೇಳಿದಳು -“ಯಾಕೆ ನನ್ನ ಕಂಪ್ಯೂಟರಿನಿಂದ ಇಂಟರ್‌ನೆಟ್ಟನ್ನು ಡಿಲೀಟ್ ಮಾಡಿದೆ?”

ಮಂಗಳವಾರ, ಮೇ 31, 2011

ಗಣಕಿಂಡಿ - ೧೦೬ (ಮೇ ೩೦, ೨೦೧೧)

ಅಂತರಜಾಲಾಡಿ

ಕಾನೂನು ಖಟ್ಲೆ ಹುಡುಕಿ

ನಮ್ಮ ದೇಶದಲ್ಲಿರುವಷ್ಟು ಕಾನೂನುಗಳು ಮತ್ತು ಅವುಗಳಿಗೆ ತಂದಿರುವ ತಿದ್ದುಪಡಿಗಳು ಪ್ರಪಂಚದ ಬೇರೆ ಯಾವ ದೇಶದಲ್ಲೂ ಇಲ್ಲವೇನೋ? ಪ್ರತಿಯೊಂದು ವಿಷಯಕ್ಕೂ ಒಂದೊಂದು ಕಾನೂನು ಇದೆ. ಕೆಲವು ಕಾನೂನುಗಳಂತೂ ಬ್ರಿಟಿಶರ ಕಾಲದವುಗಳು. ಹಲವು ಸಲ ಈ ಕಾನೂನುಗಳನ್ನು ಬೇರೆ ಬೇರೆ ನ್ಯಾಯಾಲಯಗಳು ಹಲವು ರೀತಿಯಲ್ಲಿ ಅರ್ಥೈಸಿಕೊಂಡಿದ್ದು ಕೊನೆಗೆ ಸರ್ವೋಚ್ಚ ನ್ಯಾಯಾಲಯ ಅದಕ್ಕೆ ಅಂತಿಮ ತೀರ್ಪು ನೀಡಿದ ಉದಾಹರಣೆಗಳು ಸಾಕಷ್ಟಿವೆ. ಅಂದರೆ ಕಾನೂನು ಪುಸ್ತಕ ಓದಿದರೆ ಸಾಲದು. ಅದನ್ನು ಅನುಸರಿಸಿ ನಡೆದಿರುವ ಹಲವು ದಾವೆಗಳು ಮತ್ತು ಅವುಗಳಿಗೆ ನೀಡಿರುವ ತೀರ್ಪುಗಳು ಗೊತ್ತಿರಬೇಕು. ಸಾಮಾನ್ಯವಾಗಿ ಈ ಎಲ್ಲ ವಿಷಯಗಳನ್ನು ದೊಡ್ಡ ದೊಡ್ಡ ಪುಸ್ತಕಗಳ ರೂಪದಲ್ಲಿ ಪ್ರಕಟಿಸುತ್ತಾರೆ. ಅವುಗಳು ಬಹುಪಾಲು ನ್ಯಾಯವಾದಿಗಳ ಕಚೇರಿಗಳಲ್ಲಿರುತ್ತವೆ. ಯಾವ ಕಪಾಟಿನ ಯಾವ ಪುಸ್ತಕದ ಯಾವ ಪುಟದಲ್ಲಿ ನಿಮಗೆ ಅಗತ್ಯವಾದ ಮಾಹಿತಿ ಇದೆ ಎಂದು ತಿಳಿಯುವುದು ಹೇಗೆ? ಈ ಎಲ್ಲ ವಿಷಯಗಳು ಒಂದು ಮೌಸ್ ಕ್ಲಿಕ್‌ನ ಮೂಲಕ ಸಿಗುವಂತಿದ್ದರೆ ಒಳ್ಳೆಯದಲ್ಲವೇ? ಹೌದು. ಈಗ ಅದಕ್ಕಾಗಿಯೇ ಒಂದು ಕಾನೂನು ಶೋಧಕ ಜಾಲತಾಣ ಸಿದ್ಧವಾಗಿದೆ. ಅದರ ವಿಳಾಸ - www.legalcrystal.com.
 
ಡೌನ್‌ಲೋಡ್


ಎಕ್ಸೆಲ್‌ಗೆ ಇನ್ನಷ್ಟು ಜೋಡಣೆ

ಮೈಕ್ರೋಸಾಫ್ಟ್ ಎಕ್ಸೆಲ್ ಯಾರಿಗೆ ಗೊತ್ತಿಲ್ಲ. ಲೆಕ್ಕಾಚಾರ ಮಾಡಲು, ಕೋಷ್ಟಕ ಮತ್ತು ಚಾರ್ಟ್ ತಯಾರಿಸಲು, ಮಾಹಿತಿಗಳ ಸಂಸ್ಕರಣೆ ಮತ್ತು ವಿಶ್ಲೇಷಣೆ ಮಾಡಲು ಬಹುಮಂದಿ ಬಳಸುವ ತಂತ್ರಾಂಶ ಇದು. ಜನಸಾಮಾನ್ಯರ ದಿನನಿತ್ಯದ ಕೆಲಸಗಳಿಗೆ ಇದರಲ್ಲಿ ಅಡಕವಾಗಿರುವ ಸವಲತ್ತುಗಳು ಧಾರಾಳ ಸಾಕು. ಆದರೂ ನೀವು ತುಂಬ ಪರಿಣತರಾಗಿದ್ದು ಇನ್ನೂ ಬೇಕು ಎನ್ನುವವರಾದರೆ ನಿಮಗೊಂದು ಸಿಹಿಸುದ್ದಿ ಇದೆ. ಮೈಕ್ರೋಸಾಫ್ಟ್ ಎಕ್ಸೆಲ್‌ಗೆ ಸೇರಿಸಲು ಉಚಿತ ಸವಲತ್ತುಗಳ ಗುಚ್ಛ Extools ಲಭ್ಯವಿದೆ. ಇದು ಬೇಕಿದ್ದಲ್ಲಿ ನೀವು ಭೇಟಿ ನೀಡಬೇಕಾದ ಜಾಲತಾಣ www.excel-extools.com. ಇಲ್ಲಿ ಎಕ್ಸೆಲ್ ೨೦೦೩ ಮತ್ತು ಹಿಂದಿನ ಆವೃತ್ತಿಗೆ ಹಾಗೂ ೨೦೦೭ ಮತ್ತು ನಂತರದ ಆವೃತ್ತಿಗಳಿಗೆ ಎಂದು ಎರಡು ನಮೂನೆಯಲ್ಲಿ ಡೌನ್‌ಲೋಡ್‌ಗೆ ಲಭ್ಯವಿವೆ. ಒಂದು ತುಂಬ ಉಪಯುಕ್ತ ಸವಲತ್ತೆಂದರೆ ಸಂಖ್ಯೆಯಿಂದ ಪದಗಳಿಗೆ ಪರಿವರ್ತಿಸುವುದು. ಎಕ್ಸೆಲ್‌ಗೆ ಸಂಬಂಧಪಡದಿದ್ದರೂ ಇದರ ಜೊತೆ ನೀಡಿರುವ ಇನ್ನೊಂದು ಸವಲತ್ತು ನಿಮ್ಮ ಗಣಕದಲ್ಲಿ ಇರುವ ಎಲ್ಲ ಫಾಂಟ್‌ಗಳ ಪಟ್ಟಿ ತಯಾರಿಸಿಕೊಡುತ್ತದೆ.

e - ಸುದ್ದಿ

ಗೂಗ್ಲ್ ವಾಲೆಟ್

ಗೂಗ್ಲ್‌ನವರು ಒಂದು ಹೊಸ ತಂತ್ರಜ್ಞಾನವನ್ನು ತಮ್ಮ ಆಂಡ್ರೋಯಿಡ್ ಫೋನ್‌ಗಳಲ್ಲಿ ಅಳವಡಿಸುವವರಿದ್ದಾರೆ. ಇದು ಸಮೀಪ ಕ್ಷೇತ್ರ ಸಂವಹನವನ್ನು ಬಳಸುತ್ತದೆ. ಅಂಗಡಿಯಲ್ಲಿ ಸಾಮಾನು ಕೊಂಡುಕೊಂಡು ಕೊನೆಗೆ ಹಣ ಪಾವತಿ ಮಾಡಬೇಕಾದಾಗ ನಗದುಕಟ್ಟೆಯಲ್ಲಿರುವ ಸಂವೇದಕದ ಮುಂದೆ ಗೂಗ್ಲ್ ವಾಲೆಟ್ ತಂತ್ರಜ್ಞಾನ ಅಳವಡಿಸಿರುವ ಮೊಬೈಲ್ ಫೋನನ್ನು ಹಿಡಿದರೆ ಸಾಕು. ನಿಮ್ಮ ಖಾತೆಯಿಂದ ಅಂಗಡಿಯಾತನ ಖಾತೆಗೆ ಹಣ ವರ್ಗಾವಣೆಯಾಗುತ್ತದೆ. ಈ ತಂತ್ರಜ್ಞಾನ ಇನ್ನೂ ಬಳಕೆಗೆ ಬರಬೇಕಷ್ಟೆ. ಸದ್ಯಕ್ಕೆ ಇದನ್ನು ನ್ಯೂಯಾರ್ಕ್ ಮತ್ತು ಸ್ಯಾನ್‌ಫ್ರಾನ್ಸಿಸ್ಕೋ ನಗರಗಳಲ್ಲಿ ಪರೀಕ್ಷೆ ಮಾಡಲಾಗುತ್ತಿದೆ. ಫೋನ್ ಕಳೆದುಕೊಳ್ಳುವ ಚಾಳಿಯವರಿಗೆ ಇದು ಮತ್ತೊಷ್ಟು ತಲೆನೋವಿನ ಸುದ್ದಿ.
 
e- ಪದ

ಸಮೀಪ ಕ್ಷೇತ್ರ ಸಂವಹನ (NFC - Near Field Communication) - ಅತಿ ಸಮೀಪದಲ್ಲಿರುವ ವಿದ್ಯುನ್ಮಾನ ಉಪಕರಣಗಳ ನಡುವೆ ನಡೆಯುವ ಸಂವಹನ. ೪ ಸೆಮೀ ಅಥವಾ ಅದಕ್ಕಿಂತಲೂ ಕಡಿಮೆ ವ್ಯಾಪ್ತಿಯಲ್ಲಿ ನಡೆಯುವ ನಿಸ್ತಂತು (ವಯರ್‌ಲೆಸ್) ಸಂವಹನ. ಇದು ಬಹುಮಟ್ಟಿಗೆ ಬ್ಲೂಟೂತ್ ಮಾದರಿಯಲ್ಲಿ ಕೆಲಸ ಮಾಡುತ್ತದೆ. ಆದರೆ ಇದರ ತರಂಗಾಂತರ, ಶಕ್ತಿ ಮತ್ತು ವ್ಯಾಪ್ತಿಗಳು ಕಡಿಮೆ. ಪ್ರಮುಖವಾಗಿ ಮೊಬೈಲ್ ದೂರವಾಣಿಗಳಲ್ಲಿ ಇವುಗಳ ಬಳಕೆ.

e - ಸಲಹೆ

ಜಿ. ಎಚ್. ಶ್ರೀಧರ ಅವರ ಪ್ರಶ್ನೆ: ನನ್ನ ಡಿ.ವಿ.ಡಿ.ಯಲ್ಲಿ ಕೆಲವು ದೊಡ್ಡ ಫೈಲುಗಳಿವೆ. ಅವುಗಳನ್ನು ಚಿಕ್ಕ ಫೈಲುಗಳಾಗಿ ಕತ್ತರಿಸಿ ಸಿ.ಡಿ.ಗಳಲ್ಲಿ ಸಂಗ್ರಹಿಸಬೇಕಾಗಿದೆ. ಹೀಗೆ ಮಾಡಲು ಯಾವುದಾದರು ತಂತ್ರಾಂಶ ಇದೆಯೇ?
ಉ: ಇದೆ. ನೀವು www.winmend.com/file-splitter ಜಾಲತಾಣದಿಂದ File Splitter ತಂತ್ರಾಂಶವನ್ನು ಡೌನ್‌ಲೋಡ್ ಮಾಡಿಕೊಂಡು ಬಳಸಿ. 

ಕಂಪ್ಯೂತರ್ಲೆ

ಒಬ್ಬಾತ ಒಂದು ಹುಡುಗಿಯನ್ನು ಒಂದು ಮದುವೆ ಮನೆಯಲ್ಲಿ ನೋಡಿದ. ಆಕೆಯ ಮುದ್ದು ಮುಖ ಆತನಿಗೆ ಇಷ್ಟವಾಯಿತು. ಆಕೆಯ ಮುದ್ದುಮುಖವನ್ನು ತನಗೆ ಬೇಕು ಎಂದು ಬುಕ್ಕಿಂಗ್ ಮಾಡಿಕೊಂಡ. ಹಾಗಿದ್ರೆ ಇದನ್ನು ಫೇಸ್‌ಬುಕಿಂಗ್ ಎನ್ನಬಹುದೇ?